THEIHNGHILH I DUH EM NI?

Ziaktu : Toni DA Ralte Ahmangaihi
August 10, 2015

“Theihnghilh ka duh, engtin nge ka tih ang?” Tih zawhna ka dawn chang hian, “I theihnghilh hlen dawn lo tih hi pawm la, theihnghilh tumbuai lo la, hahdam taka i hriatreng hun a la thleng ve mai ang” tiin ka chhang thin.

I nuna mi pawimawh leh hlu em em, i lo hlimpui fo tawh leh i lo tah pui thin kha i theihnghilh hlen dawn lo. Chumi avang erawh chuan i ngaihtuah ngut ngut reng dawn tihna a ni lo a, i nunphung leh mize hloh thak khawpin i vei kumkhua dawn tihna a ni hek lo. A sarhu lai chuan i natpui ang a, zantin i suangtuah ang a, i thanharh apiangin i hmaah a lo inlar zel ang. Khatiang hun kha chu i tawrh ve a ngai a ni.

Mi thenkhat chuan kan hma kan sial luatah tawrhna pumpelh dan mawlh kan zawng a, kan duhthusam min tihahdam thei kan tawng leh si lo a. Vanduai chungchuang leh rethei tlawk tlawkah kan inngaih phah thin. Chu chuan a let tam takin kan tawrhna kha a belhchhah a, a tawpah THIH kan chak mai thin.

Engvangin nge kan nuna hlutna nei mihring tan chuan hun reilote tal pawh tah nan kan hman loh lem ang le? Kan hmang phal lo a nih chuan a hlu tak tak lo a ni zawk mai lo maw? Nat te, khawhar te hi thil nuam a ni hauh lo. Mahse, kumhlun tur pakhat mah a awm lo tih hi i hriat ka duh hle mai.

Tah bawrh bawrh te, chinlem awm lek lova, tuemaw bula inbunruah te hi tlawmna a ni lo. Hmasawnna a ni zawk. Tawrhna thupbo tuma, nasa taka inhmuamup thin te hi beidawng hma zawk leh dam har zawk an ni thin. A then phei chu an puakkeh a, an nih tur ang an ni pha tawh lo hial thin. Nang chu ni ve suh aw.

Tichuan, ngaihtuah ngut ngut reng kha hrehawm i ti a, i rilru kha thildanga lakpen i duh tih ka hria a lawm. Indona i hmachhawn mek a ni. Che chhuak rawh le.

I list a mi “tuemaw” kha han kawmngeih tum teh. A nih loh pawn nangmah ngainatu che kha hnaih ve tawh teh. A tir chuan midang tana hunawl hman leh phur lo chunga midang kawm chu a awlsam lo chiang! Mahse, i thei. Hmangaihna chungchang sawi dun kher a ngai lo. Titi phungleng atangin i’n tan ang a, rei lote ah chuan in ngainat zawng leh tuizawng in inhriattawn sak tawh anga. In phur telh telh mai ang. Biak loh hleka khawharna i neih tawh phei chuan “tuemaw” i hriatreng thin kha i ngaihtuah ngut ngut tawh miah lo tih i hrechhuak hnuhnawh anga, i chak sawt ang. Duh leh in Ck ang a, hmmmm.

MAHSE.. a lo lang leh thin ang “tuemaw” kha!! Chu chu pawi ti miah suh. I theihnghilh hlen dawn lo ka tih kha. I hrechhuak ve a ni mai. I hriatchhuah apianga i natna hrikthlakna tur midang thian aia thuk hret i nei tawh a, lungngai suh.

Ngaih vawng vawng chang i neih pawn inthiam lo suh. “ka lo la thlah phal tak tak lo a nih hi” tiin dawihzep takin midang tihnat nan hmang ve suh. I thlah thei a, midang pawh i kawmsan thei tawh. Lunglenna mai mai kha chu a rukin tuar ve mai rawh.

“THINLUNG HLIAM CHU A TINATU AIIN THINLUNG THAR HLAKIN AN ENKAWL HIAN A DAM HLEN ZAWK THIN.”

Thinlung thar mamawhtu chuan chet a lak ve erawh a ngai. Awmhmun atanga dawnsawn tumtu hi mi dawihzep a ni. Huaisen taka ke pen chhuak ngam te erawh an nui thin.

“I HMANGAIHBER KHA THEIHNGHILH TUM BUAI LOVIN I HRIATRENGNA KHA DAMKHAWCHHUAH NAN HMAN TUM ZAWK ANG CHE.”

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x