ROCHAMPUII

Jeel Tochhawng Maq
14 May 2014

“Ka rai ” tih thu a rawn thawn a; mak ka tihna ai chuan pawi ka tihna a nasa zawk. A chhan chu ka fa paitu hian ka zalenna a phuar dawn a, ka ngaihzawng Teteii nen kan inthen phah bawk ang. Keiman neih duh lo mah ila, fahrah dinhmuna lo ding tawh ka pa chuan nei turin min nawr dawn tih ka hria. Ka pa thu chu hnial ngam a ni lo a; a sawt hek lo. Ka fa paitu hi ka ngaihzawng a ni lo a, hmangaihte chu hnai lo mai, zu kan in hona atanga ka CK pui, hmeichhe zu in, easy ve tak a ni. Ka ngaisang lova, ka hmusit em em chuang lo. Vawi 2 sex kan hmang a, kan inbiak tawh loh hnu-ah ka fa a pai thu a rawn sawi ta si. Ka fa a nih loh rinhlelhna-in ka khat a, a chhan chu zu in thin hmeichhia a ni tlat a, kei lo pawh hian an keuh thluk fe a rinawm. Mipa sulhnu leh lawng sulhnu hriat hran theih ni hek lo le. Ka bialnu Teteii hi ka hmangaih a, kan intihthiamloh lai a nih vang a nia, Rochampuii hi ka ck pui.

Ka inthunun theih loh man ka tuar mek a ni. Champuii nen chuan hmaichhanah kan inbe ta a, a lungngaih hmel khawp mai, kei lahin neih ka hlauh em avangin TITLA mai turin ka rawn a, mahse, ani chuan “min nei dawn lo mah la, ka fa hi chu ka hring tho vang; ka thisen ringin a nung a, ka thawk rualin a thaw ve tawh asin, ka tihlum phal teuh lo mai” a ti tlat si. Ka mangang tan riau, ka fa lo piang tur chu SAWN ni turin ka phal si lo. Nupui nei turin ka la in peih bawk si lo, hmangaih dang ka nei bawk si. Ka hlauh ang ngeiin ka chhungte chuan nei turin min nawr ta. Ka pa phei chu a hmanhmawh hle. Teteii’n a lo hriat chuan a rilru a na ngei mai; Ka inthiamlo viau na a kan inthen laia thil thleng a nih avangin ama thiamloh a nihna chen pawh awm ve-in ka hria a ni. Tichuan chhungte nawr hluih vang leh kan inthen leh thuai beisei chungin Rochampuii chu nupui atan ka nei ta a.

Zan 1-na chu ka rui ka chatthla hmak, khum khatah pawh kan mu dun lo. Ka be lova, ka be chak hlawl lo a ni. Ani pawh a ngawi reng a, a mu ve mai. Ka chhungte laka inthup ngai bawk nen ka nun ram hi a chau hluah hluah a ni ber e. Teteii nen kan in-date thulh chuang lova, kan inbe zan tin tho. Kei chuan hetiang anga ka awm khum reng chuan min nei rei peih lovin ama duhthu-in a chhuah mai ka ring a, ka beisei bawk. Ka chhungten an ngaina em em te chu ka haw hlur a; hmeichhe fing tak a ni. Ka chhungte tihlawm dan a hre hle.

Kar lohah kan chhungkuaah chuan a tlatlum ta thuai a. Kei erawh ka ipik ngaiin ka ipik a, kan inchhungah chuan ka leng thlawt lo ni berin ka hria. Champuii chu ka hua a, tihnat ka duh, mahse chhuanlam tur min siamsak ngai lo. Chhan tha tak awm lova pawngpaw hauh emaw velh emaw chu ka duh bik si lo. A tihsual ka chang ran a, mahse a hria emaw tih mai turin a nun a vawng em em a, a nulat lai nun kha a thlah fel hmak tawh niin a lang. Sex erawh kan hmang ngai lova, ani khumah, kei sofa-ah {kan room ah} ka mu thin. Itna chhete mah ka nei ngai lova; ka nupui angin ka en thei lo bawk, ka fa hi hring se, ani hi chhuak sela, naute chu awmpui ila tiin duhthu ka sam thin.

Zan khat chu ka nute nen inneih lawmnaah an kal a, roomah keimah chauhin ka awm a; engnge ka hriat teh reng ni a diary chu ka chhiar chak tlat a, inthiamlo ru tak chungin ka keu ta a. Kan inneih hnu a a nun chu ka chhiar a, tlem chuan ka khawngaih ta. “Valtea a lo la haw lo a, lehkhabu ka chhiar mai mai; ka khua a har tak zet. Ka inthiamlohna lah chu a pung tial tial si; tinge mi inhmangaihna par thliaktu ka nih bik le? Tumah tihnat ka duh lo asin. Valtea nun ka tichhia a, Teteii ka tina bawk a, hrem ka phu a ni. Mahse keimah chauh a ka fa enkawl ka zuam si lo, pa a mamawh a, kei hian ka phuhru zo dawn si lo, Lalpa, naute hi chu ka tihsual rah sengtir lul suh aw..”

Ka huat em em chuan mahni inthiam lo em em chungin ni a lo vui liam ve thin a nih chu! Chumi zan chuan ka muhil thei mang hlek lo mai, khum ka va en a, min hnungchhawn zawngin a saisir a; mahse a la muhil lo tih a thawk dan atangin ka hre thei. Ka aw ka thian a, nidangah chuan ka be zen zen lo. Ka thawmhnaw hak tur min laksak tur te, insu tur te leh Teteii chungchang te ka sawi khum thin. “I muhil thei nange?” ka ti ta a. “Umm, ka mut a chhuak lo a” tih pahin ka lam hawiin a lo inlet a, a mit chu ka ngaihbel emaw ni a bui chakin ka hria, tap zo hlim hmel a pu bawk.

“Hmangaih i nei ve tawh em?” tiin zawhna dengkhawng tak ka zawt hlawl a. “Aw nei tawh e” tih chu chhanna ka hmuh chhun. A dul pawh a puar ve ak tawh a; dik tak chuan a hmelchhe lo a, a nu lianin a vun a nung sar bawk nen, rai chu a inhmeh letling phian a; mahse hmeichhe enin ka en thei chuang lo. Teteii nen hunawl apiangah kan inhmu a; sex pawh kan hmang, a rai erawh ka hlau a, damdawi a ei thin.

Hun a kal ve zel a..

Kan nupa pawh inhlat takin kan la awm zel a; a hma ang em em kha chuan ka haw tawh bik lova; mahse ka la pawm thei chuang lo. Ni khat chu ka nute’n bazar turin min tir tlat si a, kan nupain kan chhuak ve ta poh a, MC ah kan vei thuak thuak a; kan inlei zawh hnu chuan restaurant-ah kan chawl a, kan thu fel chiah tihin Teteii leh a thiannu an lo lut ve a, kan bulah an rawn thu ta chat mai le. “Val, in nu hi chibai i phal em?” tih pahin a nui awr awr a. Juice rim a rawn nam huk leh nghal, a timing lo lulai em mai. “Chibai la” nel-awm vak lo hian ka ti a. Champuii erawh a ei tur bih ngur pahin a ei mial mial a. “Chami, inpa hi i tilungawi zo meuh lo a nih hi ti raw?” a ti leh kher a. Ka melh rum kher mai, ka nupui ka tan vang ni lovin ka mualphona tur leh ama mawng hlimna tur thil a sawi chhuak chu ka hua a ni.

“Theihtawp chu ka chhuah ve alawm” tiin zaidam takin a lo chhang a. “Nia, a fa hi lo pai lo ni la chuan tunah pawh ka bulah a awm tur, hmeichhe pakhat easy vang mai hian ka hmangaihber hi ka chan dawn lo chiang lutuk; i lo hriat ve mai mai atan. Valtea nen hian in innei hlen dawn lo” a ti ta piap piap mai, a rui tih ka hria, a thinlung hah leh na chhawk nan hman a tum tih pawh ka hria, ka khawngaih, mahse mawl tak leh atthlak taka che tur chuan ka phal lo. “Valtea hian min hmangaih lo pawh a ni mai thei; mahse ka pasal a ni a, kohhran leh Pathian hmaah thu ka lo tiam tawh a, chu chu ka damchhungin ka vawng reng ang; thihna chauh lo chuan min then hran ka phal ngai lovang” tiin a chhang a; inring tawk hliah hliah hmel hi a pu a; a zahawm thar thut niin ka hria. Teteii pawh chuan tawng ngaihna a hre tawh lo nge, a dar a chhin ak a, a ngawi ta daih a.

Teteii chu ka kai hrang a, a chetdan leh tawngkam mawi lo takte kha ti tawh lo turin ka ngen a. Ani rui lungpuam tawh si chuan, min nam sawk a; tap chungin min ankhum ta phiar phiar mai. Mi an lo hawi thup a, ka hnar ka hmu lian ngei mai. Tawp turin ka ti a, a phur telh telh emaw tih turin a au ring zual sauh a. “Tunge i hmangaih zawk? Sawi rawh.. i nupui nge keimah? Mawh.. duh thlang fel nghal rawh” tiin a rak tuar tuar a. “Tete, hetah lo hmundangah sawi dun ila” ka ti dek dek a. “I hmangaih lo, i nupui hi i hmangaih lova, i fa a pai vang chauha i neih a ni tih hi puang chhuak ta che, kei lo midang i hmangaih thei lo hrim hrim; in inthen veleh kan innei ang tiin thu kan tiam tawh kha” tih pahin min kawk sawk sawk a.

Champuii lo kal mek chu panin a kutzungchalin a kawk va a. “Nang mi tenawm leh mihur hian Valtea hi min chhuhsak theih i inring a mi? Zak rawh, i hur man i hmu nih kha, i pasal hi ka ta a nih hi; ka duh duh a ka khawih phar theih min atchilh lo chauhtu a nih hi aw” tiin chaltlai zet zetin a ankhum a. Champuii chuan hnuai lam a bih tlat a; chutah a rawn hawi chhuak a, a hmelah chuan zahna leh tawrhna chu a inlar chhawk zut zut a; a mittui tling piau chu dan kir tum takin a khap sak sak a.

“Tete, i nat dan tur chu ka hrethiam lutuk, kei pawn ka hmangaih ber ka chan ve tawh a; a natzia hrechiangtu ka ni; mahse tunah chuan ka pasal a ni tawh a, a nuamah pawh a hrehawmah pawh enkawl a dawhthei turin ka lo intiam tawh; chuvang chuan kei chuan ka pasal hi ka phatsan dawn lo, a mahin min hnawtchhuak a, min then a nih loh chuan kei chuan nupui nihna hi ka vawnghim reng ang” tih thu a sawi laia a hmel chu tumruh leh luhlul tih hriat zetin a ding khawng lah a, a hmui a pet a, a dul chu a han zut leh a. A nui lui sak a, min rawn melh zauh a, muangchangin a kal ta a.

Ka so bulh bulh a, ka ra te chu a so hlauh hluah mai. Ka zak ngawih ngawih a, Teteii chu ka ngaihzawng ni mah se ka haw hlur mai, a rui leh nghal vei nen. Mahse ka thlah haw tho a, Champuii chu ka rilruah a awm reng mai. A chhanna mak tak tak te avang khan a zahawm thar thut niin ka hria; hmeichhe fing ta ngang a ni bawk a; a pasal ka mualphona tur pawh a hliahkhuh hneh khawp mai. Ka lakah demawmin a awm ngai lova; nupuiin pasal tana a tihtur zawng zawng {sex tihloh} chu ka tan a ti thin, chuvang chuan a ni, amah huatna thinlung hi a nem tak tial tial.

Ka haw chuan a lo mu a, a chau ve deuh bawk nen, a muhil hmel chu ka zu en thuak a, ka hawi sawn thei tlat lo, danglam a awm; ka hmu hmeltha ta em em a; pawisawi lo hmel a pu a, a thaw sak sak a; a thlamuan hmel hle. Ka rilru putdan chu ka duh lo hle; a chhan chu hmeichhia anga ka en tak tlat avang chuan. Ka inbual chhung te chuan Champuii ringawt ka mitthla a.. ka hisap a, ka nupui chu ka suangtuahnain ka phelh ruak a; a taksa mam leh no em em, a vun nel thepte chu ka chul vel a; a lo chik ngher ngher a, chu chuan min tiphur sawt a, a hnute kawh lah chu ka fawp dawk dawk a; a dul puar ve euh tawh chu ka fawp kual dan dan a, raipuar nalh leh itawm tak a ni. Ka ngaihtuahna te chu shower hmangin thunun ka tum a, ka inkhawhtir seng seng a, ka faifuk rut rut a, Teteii ngaihtuah talh ka tum a; harsa ka ti hial, ka danglam ta vek emaw ni chu le? Chaw ei lai chuan ka hmaa thu ka nupui chu ka melh leh zuk thin, min lo en ve mang si lova; ka thinur ru teuh ringawt, a mak mai mai mang e.

Zanah chuan ka leng chhuak lo teh mial a, Champuii chuan lehkhabu a chhiar leh a, keiin games ka khel thung. Kan boruak chu a tang at mai. Inhnaih tak, inhlat tum ve vein kan awm niin ka hria. Sawi tur ka hre lova; ani pawh a ngawi reng. A tawp a tawpah chuan, “Vawiin thil thleng kha pawi ka ti khawp mai”, ka ti satliah a.”Ka thiam loh vek a nih kha, pawi ka ti” a lo ti thuai a.

“Teteii kha khatiang khan a awm ngai lo asin”

“Ka ring, mi tha tak, mi hmangaih thei tak niin ka hria”

“Nia, min hmangaih ve em a ni”

“Nang pawn tiraw?”

Chu zawhna chu nidang chu ni se awlsam takin “Aw tehreng mai, ka hmangaih alawm” tiin ka chhang ang a, ka nui lui leh vel ang. Mahse, tun tum chu chhan har ka ti ta tlat mai. Teteii chu ka hmangaih lo ta tihna em ni ang? Ni lo, Champuii tihnat chu ka hreh tlat tawh a ni, eng ka ti ta nge Valtea hi…? “Ka tihpalh, zawh kher che ngai lovin ka hria alawm, ka sual ti raw?” a ti a. Ka va en a, ka mitah tak min lo melh a, ka lai lek lek.

“Tupawn thil kan tisual theuh alawm.”

“Mahse ka sual dan hi a runthlak bik alawm.”

“Ka tel ve tho a, i thiam loh a ni fai vek lo.”

“Khami zan khan ka hmangaih ber khan min phatsan lo ni se chuan khatiang thil kha a thleng awm si lova.”

“Kei pawh ka nat lai tho a nia, kan lo intawng fuh em a nih chu”

Za lo tih hriat zet hian a nui hul hak a, bathroomah min luhsan ta a. Champuii dul puar lian tial tial chuan amah min thlakhlelhtir tam tial tial ni hialin ka hria, mi rilru chhe lutuk ka ni bik lova; hetiang khawpa ka tana inpe zo nupui hi kei pawn tihsak theih ka nei ve a, min mamawh a, a pasal ka nihna angin leh a fa pa ka nih avang pawn. Chuvang chuan ka ngaihsakna ka lantir ve ta zeuh zeuh a; kei pawn nuam ka ti, khatianga hnam bei lo taka awmdun reng hrehawmzia kha ka hre ta chiah, keimah leh keimah ka inhrem a; ka ipik thin. Tunah erawh kan inkawm a; thian tha tak angin. Tin, a mizia tam tak ka hriat loh ka hre thar a, a danglamna leh a duhawmna lai te pawh ka hmuh hmaih thei ta bik lo.

Mahse raipuar a nih chu thuhran, sex hman lam chu kan sawi ngai lo a, khum khatah kan la mu dun chuang lo bawk. A nau neih chuan zing dar 3 velah lukhamin min rawn vawm harh a, ka va hawi phei chu a lo vial ngawlh ngawlh tawh a, ka tho vat a; ka phili chung mai. Ka nute kan kai tho a, Hospital kan pan ta nghal a. Ka pain car a khalh a, ka nu nen a hnungah kan bawihsawm a, a na tuar hmel ka hmuh chuan ka lo na ve zawk zawkin ka hria. A heh a pet fan fan a; a tuarchhel kher mai; chhete pawhin a rum chhuak lo. Ka kut a hmer ngawng ngawng a; a thlanfimin a bual huh hnep a, ka va khawngaih teh reng em! A san chhuah theih loh avangin zai a ngai a, kan vei tuak chhen a; tun atanga reiloteah pa ka ni ve tawh dawn a, pa dinhmun ka luah zo ang em ka hre lo, tunah chuan lo piang phawt se ka duh ber. Nupui nei tawhte chuan in hrethiam ang, nangni phei chu inhmangaih taka innei in ni leh nghal a, kei hmangaihna tel lova pasal ni ta pawh hian naute leh a nu ngaihtuah chu na ka ti ve khawp asin.

Dar 11 a lo rik meuh chuan naute tap ri ngak ngak kan hre ta. Ka zang huai mai. Nurse chuan a lo pawm phei a, “Fapa i nei ta” tiin ka fapa chu min entir a. Nausen duhawm leh no chek mai, sam dum hlap mai ka hmuh ruala ka awmdan kha ka sawichhuak thiam tawh lo. Mahse Champuii a la harh thei tlat lo, ka nu phei chu a tap fuih fuih tawh a; kei pawh ka mangang a ni. Ka nupui a ni a, thla 6 zet ka lo chenpui tawh leh ka rawng min bawlsaktu a ni. Chung zawng zawng ai chuan ka fapa hringtu a ni a, a fapa hian a mamawh a, a harh a ngai a ni. Kan tawngtaina chhanin a awm ta a, a lo harh ve thei ta a. ka hlimna khan a vawrtawp a thleng hial nia ka hriat tak chu’h!!! “Nu i ni tawh a nia aw” ka ti sap a. A nui a, a chau tih ka hria, tui ka pe a, min mamawh laia bihruksan chu ka tum tawh bik lo. “A pa a chhun em?” a ti a. “A nu pawh a chhun” tih pahin ka nuih a.

Bawihtea chuan duat rawn a hlawh ngei mai, a nu pawn hnute a pek chhung bak a pawm hman meuh lo. Teteii pawn a rawn en ve a, ka rin aiin boruak hi a ngam tlat nia, ka thiam loh a ni miau a, ka sawisel ngam lo. Mahse Champuii hriat tur ngei a, “Awi ha,,a pa anna reng reng a nei lo; a an deuh chu ka mitthlain ka hmu, Valtea thlah chu a ang lo maw le!” a han ti kher kha chu’h!! Champuii hmel ka va en a, a la na hle tih ka hre thei, mahse mi inthunun thei tak a ni a, a insangruh teuh pawh ka hmu thei. “Tupaw’n a pa a chhun an ti vek asin,” ka ti ve ta ngat a, Champuii thlavang hauh chu ka lo tina tawh hle a lo ni. Chu ka tawngkam chuan Teteii ngeng a chhun leh ta. “A lo nih vel tak chuuuuu… nupui nei chunga ngaihzawng neih chingpa,” tiin min rawn melh rawm rawm a. “Tete, khawngaihin inah chuan engmah thlentir suh, ka fapa in lo en ve duh a, ka lawm e, haw tawh mai ta che u, khawngaihin” tiin chang fal hian ka nupui chuan a rawn ti ta khauh mai le. Kei lah ka ngawi hmiah tawh si, buaina chawhchhuah em chu a ngam bik lo a niang, an chhuak tau ta nghawng nghawng a.

Eng tik lai atang khan nge Champuii chu ka ngaihven tak em em tih ka hre lo, ka hmangaih em tih pawh ka la chiang chuang lo. Mahse a dawhtheihna leh inpekna chuan ka thinlung a tinem a, ka khawngaih a; ngaihzawng ka nei tih hrereng chung leh a bulah pawh ka mu duh lo tih hrereng chunga nupui tihtur a hlen zelna chuan min hneh tial tial a ni. A nulat lai kha chuan hmeichhe zu in thin leh mipa kawp lawr ve tak niin ka lo hria a; mahse ka nupui dinhmun a luah atang kha chuan a nunhlui chu a phum bo hmiah a ni. Ani ang vek hi nupui ni ta se pawmlai nei chunga ngaihzawng nei hi an tam lovang. Kei ngei pawn ngaihzawng chu ka neihsan alawm, ka ngei vang leh min hua se chhuak se ka tih vangin; mahse a dinna ngaia ding reng-i chuan a pasal tak tak ka nih hun nghakin khawhar takin min lo nghak thin a, nupui tha tak leh mo tha tak nih a tum a; a ni reng bawk.

Teteii chu ka hmangaih thin alawm, mahse a chetdan huangtau leh a duhthawhna chuan min hlattir a ni, ka dik loh vanga thleng ni tho mah se amah pawn a zir ve tho, nupui ka neih hnu pawn amah hmu tura min ngen thintu a ni. Min thlah a tum loh thu a sawi chamchi a; kei lahin ka lo hnar phal bik lova, hun remchang inherchhuah hun nghakin ka nupui thlimin nun kan chen thin. Dik tak chuan nupui ka neih dawn pawn min thlah a, mipa tha tak tawng turin duhsakna ka hlan.. mahse a tum miau lova, min ban a, min pawh a, min hnaih a, min zui a, ka lo hmangaih thin leh ka lo thlakhlelh em em a nih avangin ka tan chuan tlanchhiatsan a har a ni.

Champuii ka ngainatna zual zel chuan inah min awmtir tam a; ka leng chhuak khat ta pharh mai. Mahse Champuii chu ka lakah a inlahrang tlat hian ka hre thin. Zan khat chu ruah a sur bur bur a, tek lah a tla nasa; khuma a mu lai chu thovin min lo kai tho a, a hlau tih a sawi a, ka mutpui a ngai ta. Bawihtea a laiah a mu a; rilru kawm melh melh chungin kan ngawi dun vang vang a. Bawihtea ka kuah tur chuan Champuii ban ka khawih fuh palh a; Bawihtea a lo kuah ve tho chu niin. Ka kut chu la sawn ta lem lovin a ban nel thep chu ka hmer vawng vawng a, chu chu duhtawk lovin ka dap phei zel a, a nghawng ka dap fuh ta a.

Ka kut chu a la a, zawi tak fiah tak siin “Teteii ngaihtuah rawh” a ti a, ka zak chem chem, ka chhang ngam tawh lo. Teteii chu ka tan engmah a ni tawh lo tih hrilh ka duh a, mahse he nu huhang hi ka zo hlawl lo, mipa chu ka ni ve si a maw? Ka nupui chu fawh pawh ka fawp ngam lo a nih chu!! Ka tih dik loh ka tuar mek a ni. Ka ngai zual telh telh a; a bula awm ka chak em em reng a, ani erawh chuan min mamawh hmel a pu si lo. Bawihtea chu a duat em em a, kei pawn ka duat, mahse a nu pawh hi duat ka duh asin. Ka lo tih hrehawmna zawng zawng kha rulh let ka duh mahse min hlat tlat si.

Bawihtea tap riin min kai harh a, ka tho vat a, a nu chu a mutui ngang mai, ka thinur tep a ni, ka kai tho a, hnute a pe a, a muhil ve leh ta mai a; kei pawh chu khumah chuan ka in thawlh ve ta than a, min rawn en a, ka nui ringawt. A inrin hmain ka va fawp thut a, a mengphawk nasa; ka fawp leh a, min lo chhang let tha kher mai, ka phur zia chu… Bawihtea ka bawhkan a, Champuii chungah ka bawk a, min en kar a, a thaw ham ham a, mipa dik tak angin ka che tan a, aw khur lek lek hian “Tinge?” a ti tham tiak a. “Ka mamawh che, nang pawn min mamawh” ka ti nghut a. Ka fawp leh ngawih ngawih a, min kuah chial a, khatiang taka ka phurna sosang kha ka la hre ngai lo, ramsa koham tak ka ang ber. Ani pawh a inthunun thei bik lo, pasal chuan nupui a nihna chu a nemnghet ve ta chiah e.

A tuk zing a ka sms dawn chuan min tinui a, “Teteii kha Pu Khawliana fapa nen khan an inru daih, ral i ngai em?” tih thu chu. “Teteii pasal nei chu hrehawm i ti em? Tih theih ka nei em?” tiin ka nupui chuan lainat hmel fa hian min ti a.

“Tihtheih i nei, ka nupui ni reng rawh” ka ti ta thlawt a. Ka kuah a, ding chungin ka fawp a, ka mit a en chungin “I nupui ka ni tawh maw?” a ti sap a. “Ka nupui i ni, kei hi i pasal ka ni” Kan nui dun a, a hlim hmel chuan min tilawm a, a nui hmel chuan min ti hahdam a ni. Tichuan kei hi PASAL chu ka lo ni.. ROCHAMPUII tan liau liau.

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x