RILRU NATNA HI DAMLOHNA CHI KHAT A NI

Phatsanna avanga i kawppui na taka i hliam avang khan, a nun eng ang takin nge a nghawng a, eng harsatna nge a neih phah tih hi i ngaihtuah ngai em? A hmangaih em em chuan phatsanin, a hmangaih tawh lo nia hriatna a nei a, hmangaihtu nei lo nia inhriain, mal leh khawhar takin a hun leh ni a hmang liam tawh thin.

Mi hlim thei tak kha mi beidawng a lo ni ta a, mi chak tak ni thin kha mi nep leh chak lo tak a lo ni ta. Mi zaidam em em thin chuan huat tur zawngin, a thin chhe ta em em a, engkim mai chu a ning em em a, phurna leh thathona reng reng a nei thei tawh ngai lo. Chuti ang nun tluka hrehawm chu a awm thei tawh ngai lovang.

Hmalam hun thlira hlim taka a hun a hman thin vei nen, a ngaihtuahna te chu a tawi tuk a, hun hlim awm leh nghahhlelh tur reng reng a hmu thei tawh lo. Engkim mai chu a ning em em thin a, thenrual te zingah chuan hlimin nui ve thin mah se, a chhungril erawh a rum vawng vawng thung si…… chu nun chu a va han khirh tehlul em!!

Aw le, hetiang dinhmuna ding ve lo te chuan, a chanve pawh kan hriatthiampui phak kher lovang, “mi pakhat chauh an awm hleinem, mahni intihchhiat phah nan hman tur a ni lo asin le,” tiin, chu harsatna chu awlsam taka chinfel theih emaw tiin, Pathian rilru pu phak ni awm fahranin, NGAIHDAMNA, DAWHTHEIHNA, HRIATTHIAMNA chu changchawiin, a kawppui amah uiresantu chu ngaidam hram hram turin an fuih fo thin.

Mahse, mihring kan inang lo ang bawkin, kan rilru pawh a inang lo thei ve thin khawp mai. Thenkhat ten an namnul theih laiin, thenkhat tan chuan ralpui beih a beih a ngai ve hial thin. Mi thiamte chuan thinlung natna hi damlohna chikhat a ni, tiin an sawi hial thin. Chuvangin natna tuar mek te chu i tanpui thei lo anih pawhin, a natna belhchhah sak lo hram ang che.

Share this post:

You May Also Like

Leave a comment:

avatar
  Subscribe  
Notify of