PUITU KA NGAI (Confession)

Khum bul thutthlengah chuan ka thu a, thisen chaw inkhai far kauh kauh chu ka thlir a, engtikah tak rawn harhchhuak ang maw? Ka tih lain a mit ko chu a rawn phu det det a, thei leh thei lo hian a rawn meng ta a. A awmna hmun chu hriat tumin a mit a han melh kual a, min han hmu chu mak ti tak hian min en a, tawng a han tum a, a awri chhuak tur reng reng a awm lo. Tui i duh em? ka tih chu ‘aw’ tih nan a mit chuan min han zaizir a, a dang ro tak tihnawng tur chuan tui tlem te chu a ka-ah chuan ka han tulh a. A tui lem zo rawn meng leh chu a hma ai chuan a mitmeng pawh a fiah ta zawk a. Ka tho va, nurse duty chu ka ko a. A mar leh a khawsik chu a han en a, a khawsik chu a la sang tha hle.

A ban chu a han chet dawn a, a chet tha thei lova. A vanglai chuan a hmel chu hmuhnuam tak a ni ve ang. Mahse tunah chuan entlak a awm tawh lo. Hmangaihtu leh lainattu a tlachham ang bawkin, eitur tha, thisen,engkim a tlachham a, a dangin a cher em em a, Doctor te pawn rei a dam an beisei ngam lo, chu chu keia rin dan tho pawh a ni. Nunna hi mihringte thu nilovin, a petu pathian thu a lo ni zawk. Minute a liam a, darkar a liam a, ni leh thla a han vei meuh chuan hma a rawn sawnin thil pawh tlem tlem a ei leh thei ta a.

Hunawl kan neih chang te hian a nunkawng chhuk chho ve tak, a thil lo tawn tawh te chu a theih ang angin min hrilh ve thin a, a chang chuan sawi har sa tiin a tap thul, a changin a nui a, harsa ti tak chung chuan min hrilh ve hram hram thin a, chu chu he thu lo pianchhuahna hi a ni. Tikhawpa nun hrehawm leh beidawng si chuan mi rilru tihnat a la hlau tlat thung si. A nun kawng bumboh tak leh rapthlak tak chu ‘keima duhthlanna a zawh ka ni a ti lawi si a,’ a pa chu boral hma lo in enkawlna tha dawng se chuan a nun chu a danglam ve ngei a ring tlat a ni. (Thudik zawng zawng tar lan kher a tha love tiin mimal hming leh hmun hming te hi thup a ni.) Nawhchizawrhna hi khawvelin a hmel hriatna a rei tawh hle a, sumdawnna upa leh sum vir vel tam ber na zing a mi a ni.

Khawvel awmchhung chuan a awm dawn a, tihrem theih a ni lo. Nawhchizuar te hi tihluihna leh mahni duhthlanna (sum leh pai a harsatna) avanga in zuar an ni tlangpui a, an nawhchizawrh chhan hrang hrang chhuanlam tur tha tak an nei vek a ni. Thenkhat nuamsa ang reng takin an awm a, thenkhat erawh tlan chhuah duh, chhuah ngaihna hre tawh si lo beidawng em em te an lo ni. Ram dang angin Mizoramah chuan nawhchizuar lane te a la awm lova, inbum chhuah a, nawhchi inzawrh luih tir em chu kan la tawng rih lo. Mahse kan khawpuiah hian a ruka inzuar (K.S) sang chuang an awm tawh; chung K.S kan tih te zinga mi Lalrinpuii hringnun kawng zawh chhoh dan chu tuna kan sawi tur hi a ni. Hmeichhe naupang luhlul leh tihmawh zet ka ni thin. Ka pa hnen atanga Thuthlung Thar Bu leh Sanday school ka examna certificate chu ka pianna khua ka chhuahsan ni a ka rohlu neih chhun chu an ni. Ka pa a han boral a, ka nu’n pasal dang a neih chuan kei chu he khawvel ah mi chuang mai ka lo ni ta; ka nu leh pahrawn chu chhuahsanin, engtin tin emaw Aizawl hi ka lo lut a, mi hnenah awm kualin ka hringnun kawng bumboh tak chu ka lo zawh chho ta a ni.

Ka pa khan thawhah (asthma) a neih avangin min damrei pui lo a, pianpui unau ka nei hek lo. Ka pa chuan chhungte a nei lo nge ni, an chanchin reng reng a sawi ka hre ngai lo. A thawkrim in amah enkawlna tur sum leh pai kan nei lo a, a dam chhung kum kha sei deuh se chuan hetiang hian ka awm ka ring bik lo. Ka nu hi a nulat lai chuan zaipawl tlar hma te pawh a lo mawi ve thin a, khawkhat nula hmeltha tih hialin an sawi ve thin. Ka Pa chuan min hmangaih em em a, ka nu nen chuan an mizia a danglam hlauh thung. Ka nu kha naupangte a pasal nei a nih vang nge chu ka hre lo nangin in cheina lam te kha a uar em em a, veng chhung tleirawl te nen a an in kawm khawm vang te khan in ah hian a awm tam lo em em a, ka pa damlo pawh a ngaihsak tha mang lova, vantlang rin ang ngeiin ka pa boral atanga thla tam pawh a liam hma chuan a aia naupang daih nen chuan an innei zui ta mai reng a, zu zuar chhungkua kan lo nita der mai. Thiante zingah hrehawm ka ti thuai a, pa ka nei tawh bawk si lo, hmusit leh endawng ka hlawh thuai a, in lamah lah anchhe tin reng phurtu leh an kut thak hnawihna ber ka lo ni bawk si. Chung tihduhdahna chu tlansan tumin Aizawl ka pan ta ringawt a, kan khuaah chuan vawi khatmah ka haw leh ta lo. Ka nu te lahin min rawn ngaihsakin min rawn zawng zui hek lo.

Kan khua ka chhuahsan chuan kum sawm pahnih ka ni. Aizawl a ka awmna te chuan thingpui dawr an siam a, tah chuan ka thawk ve nghal a, Thil hi ka hrethiam lo fo mai, dawra lo chawl lutte thingpui leh eitur ka chhawp te hian an bulah hian ngawi reng hian ka lo ding leh veng veng thin. Mi biak hmasak leh kohte hi ka harsat tlat thin a, hauh pawh ka tawk ngun, mahse ka chawlawl zo tawh a ni ber, ‘Rawh’ leh ‘Suh’ tih chu a hma atanga ka nitin thupek dawn a ni a, hrehawm tihchang nei mahila, min chhawr a, min awmpui duh chu a lawmawm em em a, kut thlak ka tawk ta ngai lo pawh chu a thawven thlak a ni. Dawra lo chawl thin ten min han fiam chang te hian ka zak hi ka sen awp awp thin a, min fiamtute an chhuah hma chu ka chhuak tha mai ngam lo thin. Nitin thingpui dawrah hun hmangin kar kan tluan a, chawlhni lo thleng tur hi ka huphurh em em thin.

Ka rualpui hmeichhe naupang te inkhawm tura Biakin lam pana hlim taka an kal ka hmuh te hian ka it ngawih ngawih a, ka inkhawm chak te hi ka mittui te a tla hial thin. Inkhawm hman lo lekin thawhtan lam atan inbuatsaih a ngai thin si a. Ka pa dam lai chuan kan inkhawm ban apiang hian rang takin in lamah ka tlan haw a, a nin (ka pa) ka zirlai te min lo zawt leh vek thin a.Tumkhat phei chu Primary Dept kan nihin naupang inkhawmpuiah chang (recitation) ka sawi ve nghe nghe a, ka mitthla hian a hmu fo thin. Sam enzatna nge ka hre tawh lo…ih…mittui tla chunga tuh tute chuan lawm takin an seng ang tih kha a ni. Ka chawlhni kawr sendang ka ha a, tha hnem ngai takin ka ban chu ka han vai a……

Ka awmna thingpui dawr atang chuan hmun dangah ka insawn leh a. Dawr lama awm lovin inchhung sekrek leh nau awm chu ka hna a ni ta thung a. Nu dinhmun hi a pawimawh nen nu tam takin an hriat chian loh mihrang hnena an fa te thlamuang taka an dah thei te hi a mak ka lo ti ve thin. Enge ka tawn dawn ka hre lo, chu ka hriat lohna tak chuan hlimna min pe a, beiseina nen hmalam panin min nawr kal thin. Thian ka kawm ngai meuh lova, ka hlawh te pawh a then ka pi chuan Bank lamah min dah that sak a, hmanna tur ka neih chuan min lak chhuah sak mai thin a, tiang chuan harsa lo tak in ka awm ve a ni.

Thing delh loh lung delh loh nana na chu, ka taksa a lo thanglian a, ka tleirawl ve ta uaih mai. Darthlalanga ka in en chang hian hmel chhe zawk zawk chu ka ni lo tih ka hria. Tin, ka pi nena kan chhuah dun ve chang te hian mipa ho hian min en duh deuh tlat hian ka hre thin. Ngaihzawng ka nei ngai lo a, nei hman ka ni hek lo. Mite tana vanneihna, hmelthatna te chu ka tan chuan vanduaina leh anchhia, thlemtu kotu mai a lo ni si ;

Pawngsual ka tawh zan rapthlak tak kha ka theihnghilh thei mawlh lo. July thla a ni a, khua a chhia in ruah a sur duh hle a. Ka pi te chu Lunglei lamah an zin avangin an tlangval nen chauh chuan in kan lo nghak a. Zanah chuan ruah a sur beng chheng hle a, an tlangval leng lo haw chuan zu rim a rawn nam deuh tih ka hria, a room-ah thingpui pe tur chuan min rawn au a. Thingpui chu ka siam a, ngawi reng chuan a room-ah chuan ka va dah thla a, rang em emin a lo tho a, a thinrim hmel em em a, kawngkhar chu a va kalh nghal a. Ka hlau leh mangang lutuk chu ka chhungrilah ka khur der der a, ka tawlh a, min rawn hnaih zel a, ka tan tawlhna tur a awm tawh lo, bang chuan min dal ta, “Bang atang khan i tawlh chhuak thei chuang lo ang” min han ti a, min man bet a, min thehthlu thuai a, tanpuitu ka au a, tumah min rawn chhan tur an lo kal si lo. Ka mangang au ri chu ruah sur bengchheng tak kar ah chuan a tham ral mai si. Chu mihring chuan ka hmeichhiat thianghlimna leh hlutna chu min hneh chhuh a, siam that theih tawh lohin a ti bawrhbang ta.

Ka chunga thil thleng chu ka sawi chhuah chuan thahah min la vau zui a, ka thinlung a va na tak em. Chu in anchhedawng chu tlan bosan ka duh a, mahse kalna tur chuang ka hre si lo. A chhungte an lo haw hnu pawh chuan ka chunga thil thleng chu sawi chhuak ta reng reng lova. Tuma hnenah pawngsual tawk ka nih hi ka sawi chhuak lo zawk ang tiin ka rilru ka siam ta zawk a. Amah (min sualtu) ka ten leh huat tluk zetin kei pawh ka intenin ka inhua a ni. A chhungte an lo thlen tirh khan lo sawi chhuakin min lo that ta zawk mai se ka tan hian a tha tur. Taksa nate chu dam leh maia, rilru na erawh a dam thei lo zawng a nih hi.

Phuba lak ka chakna leh tumna chuan min hnem ber. Mahse ka chunga thil thleng chuan keimaha inrintawkna ka neih te chu min hlauh tir a, mi aia hniama inngaihna ka rilruah chuan a tuh ta; Pawngsual tawk ka ni miau si a. Chu inah chuan ka awm tui thei tawh lo a, ka rilru a bet thei tawh hek lo. Ka dawihzep em avangin a dik zawk ka tlawm a, a dik lo zawk leh misual ang maiin zan thim hnuaiah chu in chu ka chhuahsan ta nge nge a.

Mamawhna hian mihringte hi huaisenna leh remhriatna min lo pe thin a nih ngei hi. Aizawl chu chhuahsanin Kolasib tlangdunga Hotel pakhatah chuan ka thawk ve leh ta a. Nau awm a ka hlawh kha chu ka dil zui tawh lo. Ka kawl ve tlem a zawng chu ka chan a ni ve mai. Hringnun hi vanduaina leh vanneihna a inchhawk mai mai thin a lo ni a niang e. Hotel-a hna ka han nei leh mai te chu ka vanneihna tak te pawh a niang e. Ka hlawh chu tam lo mahse keimah ngeiin ka pawisa chu ka khawl vek tawh a, tihsual leh ka tum tawh lo.

Ka theih tawka thain ka thawk a, fak pawh ka hlawh ve luam thin. Chung fakna awri te chuan min va tilawm thin em. Zan khat thil thua chhuak leh mai thei ka nih avangin ka sum chu a tul tawp khawkah lo chuan ka hmang mai mai ngai lova, a lak luhna a pawimawh tluk zetin a hman dan fimkhur a pawimawh ka ti ve tlat a.

Hun leh ni a liam a, mi chitin chitang nitin tawng ta chuan ka nuna vanduaina rapthlak tak ka tawh avanga ka rilru hnual thin te kha theihnghilh chang ka nei ve ta fo mai. Mahse mipa hi ka nel thei der lo. Hmeltha ka han tih ve deuh leh min han ngaihven deuh te pawh hi a rukin ka tih tlat thin. Mahse a chang chuan an bula han awm a, han tawng ve bawrh bawrh te hi ka chak ang lawi a. Chu chuan ka khawhar zia leh hmangaihtu ka mamawh zia min hriatchhuah tir thin. A tawpah zawng hmangaihtu ka tawng vet a nih kha! Mi han rin mai hi ka harsat tlat a, chu chu ka chak lohna leh sualna tak pawh a ni.

Ka seilenna leh ka nitin a thil tawn vang te pawh a ni mahna. Mipa te phei chu ka tisa mawina chauh duhin min hmangaih ang tih ka hlau tlat thin. Mahse, ‘mahse’ a awm leh thin. Mihring tute pawh hian min duhsaktu leh min ngaina tu chu kan ngaina ve thin. Ran kan tih tak ngial te pawn an mahni duhsaktu leh duattu chu an hriain an ngaina thin an tih kha maw. Keia kara min lo ngainatu leh hmagaihtu chu kei pawn ka lo hmangaih lo thei lo. Kan in ngaizawng ta a. Hmangaihtu han neih leh hmangaih han neih zet chu a lo nuam a ni. Kum khat zet kan inngaizawn hnu chuan kan inru ve ta nghe nghe a. Kan inruk hian kum sawpariat bak ka la ni lo a, ka pi (ka thawhna) te pawh hrilhna chang kan hre lo, ka bo ta kha kan in ru ah a ngaih mai kan ring a. Ka pasal te khua chu tlai ni tlak hma hian kan lut a, tlai ni tla tur chu a mawi em em a. Kan hmaa khua inpharh diai chu kan thlir a, chu khua chu ka khua tur a ni. Ka hlim em em rualin ka zam ru bawk si. A chhungte hrilh lawk lova kan han inhruai haw chu engtin lo ngai ang maw? ka ti a. Mahse ka zam rukna ai chuan ka hlimna chu a buk rit fe zawk. In kan han lut ta a le, rinloh tak a mo thar hmel an han hmu chu an hlimin an lawm em em a. A nu leh pa, a tu a te pawh chu an fel em em vek mai. Hmangaihtu neih nawmzia leh hlut zia te, a thlamun thlak zia te ka hriat belh a, chhungkaw tha taka ka lawi lut chu vannei ka in ti em em a. Ka hma lawkah, ka ban phak maiah khawvel thar hlimna tam tak ka dawn tur chu awmin ka hria. Mi koh harsat viau thin kha, ka nu ka pa tih tur ka han nei ta te chu a hlut dan ka sawifiah thiam pha lo, ka ko awl lo ani ber mai.

Ka khawvel chu a thar a, a va han mawi em em. Ka pasal chuan min duat hle a, a tu a te pawh chuan min duat a, min ngaihsak a, mahse ka pasal chu a hna avangin kan bulah chuan a awm reng thei si lo. Ka chanchin, ka fahrah zia te ka pa’n a hriat chuan min khawngaih hle a, ka nu erawh in min en dan a dang deuhin ka hria.Insuihtha lo chuan kan han inkawl ve naw naw a, ka pasal lah nitin ka bulah a awm thei si lo, ka khua hi a har ngawih ngawih a ni. ‘Insuih tha lo a inkawl reng chu a tha lo e’ ka pa’n a tih avang chuan kan in suih tha ta a. Ka chhungte (hnampui/chipui) min zawn sak a, pathian leh thuhretu mipui hmaah chuan dam chhunga a nuamah leh hrehawmah pawh tiin kan tiam ta a nih kha. Damchhung atan!!

Ka pa’n “Inneih hi a inneihna ropuinaah a innghat lova, a inneih tirtu-ah pawh a innghat hek lo, a inneia te hi a ni pawimawh ber chu ni. Mi famkim lo pahnih, an famkim lohna te, an harsatna te inpui tawn a, inti chak a, in fuih tawna inngaihdamnaah hian a ni, a hlawhtlinna chu a awm ni,” tia a sawi te kha dam chhungin kan zawm thei ta si lo. Innei zawng zawng ten dam chhunga zawm atan a va tha em. Ka nunah chuan zep ruk ka neih tlat avangin a rukin ka inthiam lo a, engtin emaw tak hian ka thla a muang lo a ni. Pawngsual tawk tawh ka nih chu ka pasal, ka hmangaih leh min hmangaihtu ngei pawh chu ka hrilh ngam tlat lo mai.

Mi in a ka lo awm thin na leh Dawr ah te ka lo thawh thinna vang chuan thawhhreh engmah ka nei lo a, ka pa phei chuan indim deuh rawh min ti fo thin. Ka chungah chuan a tha em em a, mo en pawh a min en lovin fa tak en hian min en niin ka hria. Chhungkua ka nei a, engkim hna thawhna ah chuan thahnem ka ngai thei em em a, a hmain mi hnuaiah hna ka thawk thin a, tunah chuan keimahni tan ngei a ni tawh si. Kum hnih kan inneih hnu pawh chuan nau ka la pai lo a, ka rilru a nuam lovin ka pasal chungah leh ka chhungte chungah chuan ka inthlahrung zo vek mai. A chang chuan pawngsual ka tawh avang te kha a nih ka ring a. A chang leh ka pasal laka zep ka neih avanga Pathianin min hrem te a nih ka ring thul. Ka pasal chu lo haw se, ka thil zep zawng zawng chu ka hrilh tawh ang ka ti thin a, tun tum a lo haw chuan ka sawi tawh ngei ngei ang ka ti a, a hun a lo thleng a, engmah ka sawi ngam leh lova. Ka pasal chu zawi zawi hian ka lak atang chuan a hla tial tial a. A rawn haw chang lahin ka chungah vuina leh thinrimna tur ngawt a zawng a, tuk zan tha kan nei ngai ta mang lo. Tlangkam atangin a thawhna lamah ngaihzawng a neih thu ka hre ta nghe nghe a. Mahse luhlul ka chuah a, ngaihzawng a neih chu hre lo angin ka awm lui tlat a, a laka that ka chhuahna te chuan rei a daih zo lo.

Amah ngeiin ngaihzawng a neih thu min hrilh a, a nula chu a rawn hawn ta nge nge a. Ka hmangaih leh pasal chuan kei chu min hnawlin mi dang a lo thlang ta; ka rilru chu a na em em a, mahse ka dem lo. Fa a awt em em a, ka hrinsak thei bawk si lo. Ka pasal thutlukna chu ka dang thei lova, ka hnial ngam hek lo. Ka hmangaih em avangin a hlimna tur chu ka duhsak ber a, dal ka tum lo. Ka pa chuan ka chhuak tur chu min ui der ve hle a, min chelh a, mahse ka tan awm rengna chi a ni tawh si lo. Min neitu berin midang a thlang tawh miau a. Ka pazawn te hnen lamah chuan hun enge maw chen ka han awm ve ren rawn a, ka awmdan tur zel pawh hriat thiam har ka ti. Hmangaihna ka lo thlakhlelh em em thin te chu ka tan tahna mai a lo ni zo ta si. Tu mihring mah hi rin ka duh tawh lova, pasal neih pawh ka tum tawh hek lo: Ka rilru na chuan tu hnen atang mahin hmangaihna chu ka dil ngai tawh lo anga, ka beisei ngai tawh lovang tiin rilru ka siam ta a. Mahse tu mihring hi nge hmangaihna chu mamawh lo a, hmangaihna chu tlansan hlen thei awm ang le ?

Hna rem chang a piang ka thawk a, a rem leh ka inhlawh thul. Ka pa zawn te chhung chu an thain fel hle mahse an ina han awm reng lah chu a mawiin a dikin ka hre thei bawk si lo. Ka chunga an fel leh inthlahrun ana ting mai bawk si. Ka inhlawhna tlem tlem ka khawl leh ka pasal pa pawisa min pai chu humin Aizawl lam bawk chu ka pan leh ta a. Mipui tamna apiangah eizawnna a awlsam a, Aizawlah chuan thawh tur enge maw ka hmuh leh mai ka ring a,enge fuke kim ka nei a, ka ei khawp na na chu ka nghei bik lovang ka ti a. Mahse engtin nge bul ka tan ang ka hre lo. In luah tur man tlawm deuh ka zawng a, ka hmuh chhun chu a bang awng deuh siar suar a ni. Hmeichhia mahni a awmna atan chuan a thlanawm vak lo a ni. Bungbel eng vak mah nei lovin ka han invawm lut a. Ka thawmhnaw thenkhat ka tiral a, khar chhawngah tangin chawhmeh ilo ka han zuar kual ve lauh lauh a. Mahse ka tihchi a ni lo tih ka hre chhuak ta thuai a. Ka rin lohna lam daihah ka peng ta. Dinhmun a han tleu a, rahbi a han pheh chuan eng pawh kan ti duh ta mai thin a nih hi, kan inpha mar thiam zel leh nghal.

Zu ka zuar!
Ka naupan laia ka eizawnna duh loh ber mai kha. Zu kan zawrh avanga ka zahna leh hrehawm ka tihna zawng zawng te khan zuar lo turin min hneh zo ngang lo a ni e; Mi ta lachhawngin bul ka han tan a, thlai zawrh ai kha chuan a lo nuamin a hahdam hle mai. Mi inah kal kual dun dun a ngai tawh lo, eng anga veng tla birhah pawh awm mahila a duh chuan min rawn pan vang vang mai. A tir ah chuan Zu zawrh chu in thiam lo hle mah i la, rei zawrh ka tum lohna chuan ka inthlahrun na a ti zang khai deuh a. Ka nu leh pa te kha kan thiam thar leh a, mahse an ni nen chuan kei chu ka dang, ka hlawk hunah ka bansan leh mai dawn tlat a. Hmeichhe tlawngawl mahni a khawsa, zu zuar bawk si chu kan hmel ten puak a lo ti ve deuh nen, ka lun phian zel a. Duh hun huna bansan theih ka inring kha ka lo inzuar thatchhiain, ka sum duhna thinlung nen ka bansan phal ta i khaw lo mai. In dang ka luah sauh sauh a, keima tawkah chuan ka phuisui ve sawt khawp mai. Kohhran ka ngaihven lova, Pathian ka ngaisak hek lo. Pathianni te hlei hlei chu ka hlawk ni a ni leh nghal. Ka nun chu a ho tial tial a, za sawm tlanchhe thei reng reng lo han inchuh te chu a nuam tlat. Zu pawh tem chhin ngai lo khan, a tak leh tak loh ka han tem chhina, a tui leh tui loh pawh turin ka lo in duh ve ta reng mai. Mitmei ven tur ka nei lo a, min zilh tu tur lah ka nei hek lo. Chuvang chuan ka hlawkna tur tam tak chu ka in zo ta fo mai.

Pawmlai nei lo na na chu min ngaihven tu leh min chhaitu pawh ka tawng nual. Thenkhat chuan ka zu an duh vang pawh a ni mai thei. Thenkhat ho hmel tak tak an ni a, a then erawh ingnghahna tlak tak tak tur pawh ka hmu. Pasal neih leh ka tum tawh lo bur a, chuvang chuan an zuam zawng tur pawn ka khawsa ngai mang lo. Mahse tumah ka be chhe chuang lo a. Ka eizawnna, min dawrtute an ni miau a. Chung min duhtu te zingah chuan sawrkar officer motor dawng pha chin ngat pawh an tel nia. Pa khat nen phei chuan kan innei tep a. Zu a rawn in ve thin a, inthang a ni lo tih ka hre nghal mai. A rui chhe ngai lo a, mi biakna tur ngawt hi a ngaihtuah a. A insawi dan chuan a nupui chunga a lungawi lovin zu inah a tlak ta mai niin a sawi a. A nungchang ze zawi leh dam thluam te chu ka ngainat zawng tak mai a ni a. An nupa chanchin chu engmah ka zawt ngai lova, ka ngaihven hek lo. A khat tawk hian a lo lang thin a, mi ti ti pui hi a tum ziah lehnghal a, chhuanlam ka siam ruai thin. A lo lan loh rei chang chuan ka khua hi a har vawng vawng thin a. ka zan mut hmunah te hian ka ngaihtuah leh thin a, a chang chuan ka inthiamlo a,a chang lehngaihtuah ringawt te chu a pawi lo, sual a ni lo ka ti leh thul..A…kha mihring kha ka hmangaihin ka hria, tun thleng hian. Ka chan ang chang tur atan chuan ka hmeichhiatpui chu ka phal thei si lo.

Chung ka suangtuahna te chu zing khawvar te chuan a hnawt bo leh thin. Hmangaihna chu rin pawh ka duh tawh lova, a hriat pawh ka duh tawh lo a nih kha! Mahse ka nun hian hmangaihtu chu a duh a, a duh mai a ni lo, a mamawhin a khua a har ngawih ngawih a ni lawm ni ? Nupa hlim taka kawng an kal dun ka hmuh lai te, nula tlangval inngaizawng, inthlahlel taka an inkai ka hmuh te hian ka nun chhungril hi a lo na thin a ni. Chutah zet chuan hmangaihtu ka mamawh zia ka in hrechhuak leh thin. Ka nihna ang ang a min hmangaihtu, ka nihna ang anga min pawmtu tur chu mihring tu pawh hian kan tlin lohna ang anga min pawmtu leh hmangaihtu chu kan duhin kan thlahlel theuh hian ka ring. Zan dang a ang lo tlat, zankhat chu, mut ti tui tawk lek hian ruah chu a sur cherh cherh a, In leng tumah an awm si lo, ka khawhar chuan zu ka inthlit a, ka in ka in ta mai a, ka duh aiin a inhnemin ka hria. Kawngkhar chu a rawn ri a ka phu chiang kher mai. Rang takin zu chu ka dah bo a, hlauthawng takin kawngkhar chu ka va hawng ta. Electric eng dul ruih hnuaiha chuan kan officer pa chu huh zawr hnuang hian a lo ding a. An nupa boruak a tha leh deuh a nih ka ring a, chawlhkar hnih zet chu a lo lang tawh lo a nih kha. In chhungah chuan ka phih lut a, a Jacket chu a far tluk tluk a. A inhrukna tur towel ka pe a, a ding bu luk luk a. A jacket chu ka phelh sak a, thutthlengah chuan ka nem thu a, a lu chu ka hruk sak a. A tho thurh a, ka kutah chuan a vuan a, min chhuahpui a tum ta mai. “Ka nupui chu ka thenfel tawh, zanin hian ka haw pui dawn che,” a ti ta mai a. Ka hnial a, tan ka khawh a, zan dangah hetianga rui chhiain ka hmu ngai si lo. “Kei min hmangaih chuan i nupui chu hruai leh zawk rawh” ka ti a. “A ni ka duh tawh lo, a chhuak tawh a, nang hi a ni ka duh chu ni” a ti bur mai si.

A dik tak chuan kei pawhin amah chu ka thlahlel tih ka hria. Lungawi taka a tang chhunga han beia, ‘kei pawn ka duh che asin, ka hmangaih che alawm’ tih ka va han chak tak em. Mahse a rem si lo. Ka tisual nawn leh dawn tawh lo. Min pawm thut a, mi chhuahpui a tum ta mai. Ka han tal vak a, min thlah mai duh si lo, ka kut chuan banga saidawium (bottle) in hung chu a va man fuh ta, a luah chuan ka vua a, min thlah ta a. Ka tum aiin ka vaw na a, a lu chu a pawp a, a thi duh phian lehnghal a. Ka han bawihsawm dawn chuan a duh der lo lehnghal a. “Min khawih suh, I duh leh min vaw hlum law law rawh, I kuta thih chu ka duhthusam a nia lawm” a ti a. “Ka vua che kha ka duh vang reng a ti ka ni lo.Min chhuahpui i tum lui a, ka mangangin ka tum loh takin ka vaw ta mai che a nih kha” ka ti ve thung a. A zu in tur ka thlit a, a in duh lo a, a lungawi zan lo a niang, a ngawi reng a. Ngawi reng a awm chu a hah thlak em mai ka ti a, ka mut san ta daih a. Zinga ka han harh chuan ka lu chu rit bur hian ka hria a, zan lama thil thleng te chu ka han ngaihtuah a, a rui lungpuam mai mai in a ti a nih ka ring a. Ka han tho a, kan officer pa chu thutthlengah chuan a lo la mu reng mai, ka mut san khan a haw ve mai ka ring a. Ka thawmah chuan a rawn harh a, a tho a, a han inphih harh a. “Ti rawh Rinpui i kal ang le” a ti a. Kei chuan “Tunah chuan ka zui thei lo che a, min lo hrethiam teh, ka duhdan chuan I nupui chu hruai leh la ka duhber a” ka han ti a. “A theih tawh loh”a ti bur bawk si. Chuti chu vawiin lamah ka lo ingngaihtuah ang e, nang pawh lo inngaihtuah tha leh la, naktuk zan lamah min rawn ngai chang ta che, zu nam chuan lo kal reng reng suh ang che” ka ti a. Lungawi takin a tuk zan lama min rawn lam tum chuan hlim takin min chhuahsan ta a ni. Tukthuan chu tui ti lo tak chung chuan ka han tlak hram a, kan officer pa chu chhandan tur ka hre thiam lo.

Ngaihtuah a tawi tuk mai. A chang chuan neih mai ka duh a, mahse ka tisual ang tih ka hlau bawk si. Amah a lo lan hunah a chiang mai ang chu. Zu kan siamna lamah chuan ka kal a. Ka zu bilhna hmun te chu an lo sam veng vuk mai a, an tichhe vek a. Hrilhhai zetin in lam pan chuan ka haw a. In ka han thleng chu engkim a danglam zo vek. Ka in kalhna tala chu an lo vaw thla a, bungrua te chu pawnah chuan an lo dah khawm darh nuaih a, a sawi thei chi a sawi a, a keh thei chi a keh nual bawk a. Engmah sawi lawk leh inhriattir lawk pawh a awm lo, a rang thei ang bera chhuak tura thu pek ka ni. Chung min hnawt chhuak tute zingah chuan mifelte pawh hmuin ka inhria. Ka zu in tute ngei ngei pawh ka hmu. Thenkhat phei chu mifel sualna nei lo pawh an ni ang. Mahni fate leh inchhungkhur ngaihsak hman lo leka mi fate siamthat tuma thahnem ngai te, a kul atai a Kohhkrana in hmang, ka dam loh hritlan, engmah ka thawhtheih loh pawha, ka zan khat buhfai thlak tur pawh min pe lova, ka zu zawrh sual ka sim theih nana thahnem ngai taka Biak in lama min tawngtaipuitu te an ni tih chu ka chhia leh tha hriatna hian min hriatpui e! Khawtlang tangrual chu ka do zo lo a, ka do ngam chi lah an ni hek lo.Veng dangah ka insawn a, min la rawn um zui talh talh leh nghal. A dawih zawk leh chak lo zawk chu ka tawlh a, ka tlanchhe zel a,a tawpah zawng dinhmun chhe ber thlengin ka ei tur hmuh nan ka taksa ngei chu ka hralh a lo ngai ta! A van rapthlak tak em. Tanpuitu ka nei lo a, min humhimtu Dante chu eng anga tha pawh nise ka hriat miau loh avangin engmah ka tan tangkaina an nei chuang lo. A thenin zu zuar, a thenin awmherh avanga nawhchizuar te min ti. A enga pawh chu a dik vek mai. Ka ei hmuh nana khawtlang pawh zah zo lo ka nia. Mihring hi din hmun chhe vawrtawpa a din tawh chuan, kan tih duh ngailoh pawh alo tih theih dawn khawp mai.

Tampui mitthi tawkte pawhin an ei hmuhna zawng zawng a tawp si chuan bahra khur an lai ta mai ang hi a ni ber mai.Hei vang hian hmuhtheihloh Pathian hial pawh ka zah zo lo leh zualin zahna chang pawh ka hre lo hial a ni. Ka nun chu sakawr, a thununna lakam tel lova a duhna lam lama a tlan vel hi ka chan ta ber. Ka awmherh leh hurherh avanga nawhchizuar zawng ka ni mawlh lo. Chu chu mahni inthiam chawpa sawimawi ka ni hek lo. Ka hmangaih miah lo te nen a sex hman a, ka taksa ka hralh chu a na ka ti a sin. Ka dinhmun a phet em a, kawng dang zawh tur ka hre ngang tawh lo a ni. A chang chuan mahni inthiam chawpna te ka nei a. Rilru leh thluak fim pu chunga kan chanai eiru mah an zak lova, chawimawi an nih si chuan engah nge ka ei tur ka hlawh chhuah ve nana ka taksa ka han hralh chu SUAL a nih bik em em ang? Mahse, chu eizawnna chu hna hniam ber leh zahthlak, rapthlak ber a ni ka ti lo thei si lo : Rilru a damin ngaih a ngam tak tak thei mawlh lo. Ka thianin “Mahni hna a rinawm te hian zah an phu ber, chuvang chuan kei chu rinawm tak hian ka inzuar mai dawn a ni” a tih te chu ka tawmpui pha ve lo.

Mi bathlar leh inruak, a rem chang changah kan riak mai thin. Khawtlang hruaitu, VDP man leh vuak te kan tawk fo a, savawm bawma khung, lu ziah kawlh thlengin ka tawk a ni. Lu ziah kawlh te, kut inthlak a invuak vak te hian mihring chhungril nun sual hi siam tha thei se chuan sualna hi khawvel atang hian um bo a ni ang a, misual tumah kan awm lo tur. Kan nuna harsatna leh vanduaina te a bul atanga min hriatpui tum lovin,kan awmherh leh hur herh avangah min puh thlu leh ngawt thin. Tharum leh zahna, tiang hmang tea min siam that an tumna chuan kan rilruah sual ta viaua inngaihna te, luhlulna te, rilru piansualna rapthlak zawk a hring chhuakin an tuh mai a ni tih an rawn hre tawh si lo. AW…. eng vangin nge khawvelah ka lo pian ve kher kher ni!

Ka nun atang hian zir tur zawng ula, a vang khawp ang. Ka taksa tihfaina hun leh hmun ka neih loh ang bawkin ka chhungril lam pawh a bawlhhlawh a, a thianghlim chuang lo. Zu mai nilo deuh te pawh a rem chuan ka ti thei ve fu. Rilru harhfima ka awm chang hian ka hma lam hun tur te ka ngaihtuah nasa ve thei khawp mai. Ka thlarau chan tur thlengin ka ngaihtuah a, ka tim ur ur thin. Mi a te vanneihna ber chu an hmlam hun lungkham lo a hlim taka an awm thei thin hi a ni. Kei chu a a lo tawk hian ka fing ve khang lang bawk si a. Vawi tam ruihhlo ka ti tawh lovang ka ti a, mahse ka hmuh chuan ka hnar phal leh si lo.

Thu chu ka tiam tam leh ka bawhchhe tam mai mai tih ka hria. Tin, ruihhlo chu reilo te tal pawh ka rilru hah min chhawk tu a nih avangin ka thlah phal tak tak lo a ni. Ka harh fim lai chuan ka hma lam hun tur ka ngaihtuah thin ka tih kha. He ka taksa mawina hi a la chuai dawn, he ka tha hi a la thum anga, ka vun te hi a la zur dawn. Chutih hunah chuan dawrtu ka nei lo anga engtinnge ka khawsak tak ang ni? Ka hmalam hun chu a va thim tak em. Taksa hremna leh thlarau hremna chu ka chang kawp dawn em ni? Ka upat huna min enkawl tu tur ka neih a ngai a ni. Ruihhlo pawh hi sim emaw, ka tihtlem emaw a tulin a ngai a ni. Tanpuitu ka duh a, ka mamawh tak zet ani.

Biak In hi kum engzat chiah nge ka luh loh pawh ka hre tawh mai lo. A inkhawm kawng zawh lo hlirin ka khawsa a, inkhawm ve ngam tur pawh ka ni lo. Pathian te hi engahmah ka ngai lo han ti thin mahila, nun a han beidawn tak tak chuan Pathian bawk ka hre chhuak leh thin. Biak Inah chuan ka manganna leh beidawnna zawng zawng Pathian hmaa leih baw tur chuan ka lut leh ta! Maicham hma-ah chuan ka han thingthi a, tawngtai ka han tum a, thinlunga tawt em em sikhan chham tur reng reng ka hre ta lo! Ka tawngtai khat em tawh vang pawh a niang e. Ka din hmun ka han ngaihtuah lungpuam chu ka tap ta vak mai a. Engtianga rei nge ka lo tah pawh ka hre lo. Zing tawngtai inkhawm tur an lo kal a, ka hmel leh ka incheina an han hmuh chuan ka awmlohna tur hmuna awmah min ngai ta. Min ringhlel pawh chu a awm ka ti tho mai. An phun deuh mar mar a, police emaw VDP kutah emaw min pek mai an rawt a. Lu tuak var vo tawh, pa pakhat hian a hnial a, an inah chuan min hruai haw ta. Ka inbual a, chaw duhtawkin ka ei a, ka harh sawng sawng a, ka zangkhai ta riau hian ka hria. Ka chanchin min zawt a, ka sawi hnawk nuaih a, an in chu ka duh hun huna riah nan, chaw ei nana hmang turin min hrilh a. Chhungkaw fel tak an ni. Nilengin ka awm a, zanah ka chhuahsan leh a, vawi khatmah ka tibuai leh ta lo.

Ka nunah mahni inrintawkna ka neih loh avang leh mahni indah hniamna ka neih tlat avangin mi va biak hmasak te hi ka hreh thin. Ka tawng tam loh avang te hian thian kawm leh siam pawh ka thiam lo. Thiantha han tih tur tak tak pawh pakhat chauh ka nei a, ka thurukengkim ka hrilh ngamna a ni. Kei ai chuan a u deuh a, amah ka rinngamna chu a thlawn ngai lo. Amah pawhin min ring ve em em a ni. Ka awmdan a dik ta lo, ka khat deuh ulin ka inhria, zing lam leh tlai lamah hian ka khua a sik ser ser a, chaw lah ka chak si lo. Natna tha lo enge maw ka kai ta anih ka ring a, ka ngaih a tha thei lo, ka thiani chu ka han hrilh a. Doctor inentir a rawt ta mai. Ka hreh viau naa, ka hlauhthawn deuh bawk si avang chuan phur lo tak hian kan inentir ta nge nge a. Kan khawsak danah leh nun danah natna hri tha lo, lo kai ta pawh ni ila a awm ka ti lutuk. Mahse chung natna kai tur chuan ka inphal lehchuang si lo. Ka thisen leh zun, marphu an han endik a, hlauhthawn tur engmah a awm lo, ka that lohna pawh an hmu lo. Mahse nau ka pai….?! Rin har ka ti a, awih har ka ti kher mai. Pasal ka nei a, nau ka pai loh avangin kan inthen ani deuh ber a, keima dik loh zawkah ka ngai a, ka pasal zawk kha a lo dik lo zawk em ni dawn? Thil kal tawh hnu a ni a, ka tan ngaihtuah vak vak a sawt lo. Mi chitin chi tang ka kawp a, ka rai si lo, tunah I rai an ti leh si. Ka va han lawm tak em. Mahse ka lawman chuan rei a daih lo kher mai!

Ka thian nu chuan tihtlak a rawt ta mauh mai, ka tan harsatna a tam theih dan chi hrang hrang min hrilh ta teuh mai. Kei chuan a thim zawng hlirin i thlir a nih kha, nakina min la enkawltu tur a la ni dawn a sin ka ti a. Khua a va han var loh theih tak em. A engamah hmain kan buai chu ani si a le. Ka thiannu tanna kha a lo dik chiah ani. Mahse mahni rila rah ngei ka fa that tur chuan huaisenna ka nei hlawl lo. Pawisawi lo nausen nunna chu ka la ngam lo a ni. A pa ber pawh puh tur ka hre lo, mahse chu chuan ka rilru a ti buai lo. Fa ka pai avanga ka hlimna kha a nasa em a ni. Ka thiannu nen chuan kan han inhnial leh rih thul. Ka tum chu a ruh em a, ka ngaihdan ka sawhsawn dawn chuang lo ni a ahriat chuan min hrethiam ta. A theihna apiangah min pui a, thian tha hi chu an lo va hlu em. Tichuan ka fa chu ka pai tlang ta a ni.

Doctor chuan thu tha tak tak min hrilh a, zu leh ruihhloin naupai a tihkhawloh theih dan te, nau piansualna thlenga a thlen theih dan te min hrilh a. Tin, damdawi pawh mahni duh thua ei mai mai loh tur a ti a. Cheng sangkhat lai min pe a, “I rem chan leh min rul leh anga, i rul thei ta lo anih pawhin hrehawm ti reng reng suh ang che” min ti a. Harsatna I nei a nih pawn min rawn pan hreh reng reng suh ang che,” tiin min thlamuan a. Kha Doctor kha a felin thla a va han timuang tak em. Ka beisei loh leh rin lohna lam daihah duhsakna leh khawngaihna ka dawng a ni.

Nun hlutna hriain dam chhan tur thar ka nei ta. Bul tanna tur sum nen, a va han lawmawm tak em. Doctor sum min pek leh keiin ka lo kawl ve tlem te, ka thiani min sih chhuah nen. Ka thian nu lah chuan a dang pawh kan la ngaihtuah zel ang chu tiin min la tawng thlamuan zui. In luah tur min zawn pui a, a tlawm apiang a ni mai kan duh chu. Neihsa engmah a awm lo nen, kan han luah chu a nuihzatthalk zawk. A tirah chuan sangha tin ruak te mai mai pawh hi ka it ngawih ngawih zel mai.

Ka in zuar ngai ta lo. Zu bawk chu kan zuar leh a, ka taksa in a zawh laia a tam thei ang ber khawl tumin tha hnem pawh ka ngai hle a, nau ka ngaihtuah avangin ka zu inthin leh ruihhlo dang ka tih thin te pawh ka thlah fel hmak mai. Mihringin kan tum tak tak chuan a lo nghei theih khawp mai. Ka thian nu kha a lo riak zauh zauh thina, min pui reng bawk a. Doctor pawisa kha han rulh kan tum a, mahse a ngai lo e, a lo tih tlat avang chuan lawm takin kan chhuahsan leh ta zawk a. A lawm nan zu kan han pek leh hlak pek a, a va han atthlak tak em. Ka chunga a thatna avang tal pawh khan tha taka nung tur chu ka ni mawle. Nau chu tha takin ka nei ta, mipa a ni nghe nghe a. Ka hlimna chuan van a tawng a, ka lawmna chu tuifinriat angin a thuk a ni. A chang chuan naupang inkhualtelem te hi ka in chan leh thin. Ka fa chu engtin zel nge ka enkawl ang ka hre lo. Rilrua beiseina ka neih chu ka neih chhun pawh a ni mai thei. Ka nun bawraw leh tawp tak avang khan fuke kim loin a lo piang ang tih mawlh ka hlau a, chung ka hlauhna zawng zawngte thleng lova a lo piang chu ka va han lawm tak em.

A chhartu nuin min han hmuh a, a han tap ngek ngek te chu, chu aia tap mawi hi ka tan khawvelah hian a awm chuang lo a ni. Ka fa, ka rila rah ngei a ni, mi naute tha zawng zawng aiin a tha in a duh awm si. Ka thian nu chuan min rawn awmpui thin a, tin, nau ka neih hma hian khawchhak lam mi, ka zu buaipui tur hlawh fa awmpui ka nei bawk a. A changin zu kan siamna hmun ram lamah te a riak ve mai thin a, mi pawh a chhawk zangkhai nasa hle mai. Nau te chu a lo thang lian zel a, a nui a, a bawkvak a, a ding a, a han kal theih te chuan kan hlim em em a, tawng a han zir te chu a aia ngaihthlak nuam hi a awm tawh chuang lo. Ka khawchhak awmpui pa chang a tawngfiah lo lo, kei pawh ka tawngfiah lo zo vek mai !

Upa-in, vanduaina hi a lo thlen chuan a zawn zawnin a lo thleng duh an tih hi kan nei zo ta. Nautein kum hnih hmel pawh a la hmuh hma chuan a hrisel ta lovin, a sawngnawi ta em em a, a taksa te chu a vuaiin a nem diai a. Dadawi leh inentirna manah sum tam tak kan seng a, hma a sawn thei bawk si lo. Chutih karah kan khawchhakpa chuan kan sum a thena zar lo lain a lo tlan bopui lehnghal. Rilru a hahin mang a ang duh ta ngei mai. Zu lah chu an chek ngawrhin an khirh zual sauh a. A zu man mai duh tawk lovin thenkhatin pawisa an lo phut ve leh zel nen. A tawpah zawng kan neihin a tlin ta ngang lo a, Jail lamah kan nu fa chuan kan in kuah liam ta nge nge a nih kha.

Inthiam a har a, rilru hi a dam thei mawlh lo. Chhia leh tha pawh la hre hrang lo. A tihsual tel ve miah lo a, naupang Jail a a han tang ve chu, ka lung hi a awi thei mawlh lo. Thiam ka inchan tir thei hek lo. Nau ka pai tirha ka thiannu thusawi te kha ka hre chhuak uai uai a,inchhir hian ban a pel tak meuh meuh a ni. Keimah min la enkawl let ve beisei vanga pai kha ka ni lawm ni? Aw!….mahni hma ka lova sial tak em. Inchhir nan chuan a tlai tawh si. Kei chu tihian lo tlu hlum ta mai mai zawk ila tha tur. Engahnge keimah ang bawka mi vanduai tur ka lo pai a, ka lo pawm le ? Mittui hian inchhirna leh lungngaihna te hi tlengfai thei se, engzat a tam pawh sen ka huam ngei ang. Tah a sawt si lo, mahse tap lo thei ka ni lo, ka chan hi a rapthlak em a ni.

He Jail bang hung pawn lamah hian zalenna famkim chu a awm.Jail te hi misual te hremna a ni lo, insiamthatna a ni an ti thin. Mahse tumah insiam tha turin Jailah an luh tak pawh ka hre ngai lo.Jail ah a tanga, a rawn chhuak chu a tha lutuk, a lam durh durh mai tia an sawi mihring lah ka hmu hek lo. Chu hmunah chuan a ni keimah avanga ka fapa chu a tan ve ni. Ka fa chuan zalenna a nei, mahse ka pe thei si lo. A mah ang rual naupang, hlim taka an tualchai tur te ka han mitthla a, ka pawm vawng vawng a, chu zalenna chu engtik ni ah emaw chuan i la nei khawp ang, engtikahmah he hmunah hian i lut leh tawh lovang, i nu avang phei chuan i lut nawn tawh lo leh zual ang ka ti a. Ka tap a, a ngaihna erawh ka hre si lo. I nu hi ka mawlin ka a em a, mamte, ka chhan thei lo che a ni, min ngaidam ang che. Nufa a tang chu midang pawh an awm a, pathum lai kan ni. Kan tan chhan a lo inang vek lehnghal. Ka tanpui dang te nen chuan kan inchhawk zangkhai nasa hle a. A beng hawng deuhin hnuchham chawmna In a awm thu te an sawi a, chungah chuan nau a dah theih thu te nen an han sawi a, ka tan chuan thil thar a ni. Hnuchham tih takah an nuten an sen laia an thih san chauh te emaw dah theihna ka ti a. Tin, mahni fa hrin ngei chutianga han dah theih te chu a rilru khawih thlakin a rapthlak ka ti. Mahse kei ngei pawn chu thil chu ka ti ve tho si..

Thil sual lian tham leh pawi rapthlak tawk lo na na chu thla thum vel kan tan hnu chuan min sezawl chhuah leh tawp mai a. Lawm tur nge lawm loh tur pawh ka hre lo. Hawna tur in kan nei tawh lo a, ka lawmna ber nia ka hriat chu ka fapa chuan pawn boruak zalenna a tem leh chu a ni mai a. A lehlam zawnga thlir chuan kan chhuak chu a buaithlak mah mah. Ngaihtuah tur a tam si.

Kan nufa chuan an sawi Home lam pan chuan kan in paw ta hnak hnak mai. Ka rilru na lutuk chu ka mittui a far zawih zawih a. Mahni rila rah ngei pawh ka enkawl zo lo chu ka inten ngawih ngawih a ni. Lo la duh lo ta se engtin nge ka tih ang le? Home-ah chuan eng thil nge min lo zawh pawh mumalin sawi tur ka hre tawh lo. Ka theih chuan ka rawn lam leh ngei ngei ang, hei keimah hriatrengnan ka ti a, choka chemte chuan ka sam chu ka tan a, ka dah ta a ni. Rilru i thlak a nih chuan ni sawmruk hmain i rawn lam leh dawn nia min tiin ka hria. Tlai nitla turin tlang a chhun chu a mawi em em a. Ka fa chu ka han ngaihtuah a, lak letnghal mai ka duh rum rum a. Ni tla chuan ka rilru natna te chu tlakpui thei se ka va duh tak em. Mahni rila rah ngei pawh enkawl ngam lo khawpin maw ka lo dawihzepa, fa ka lo neih ve le ?

Fahrah, ‘ka pa’ tih leh ‘ka nu’ tih tur pawh nei lovin, Ka khawvel chu a tawp ta, kalna tur dang reng ka hre tawh lo a, hmabak beisei tur engmah ka nei ta lo. Nun beidawng em em, thih chak ngawih ngawih, thih hlau bawk si ka ni. Kathlarau chan tur ka han dawn a, hremhmun hi a awm a nih ngai chuan chu ngei chu ka pan mek a ni. Chu hmuna kal chu ka hlauin ka duh si lo. Mangang leh beidawng takin ka tap a, ka rilru na nen, ka lo muhil ta. Zing lam khawvar deuh ruau ruau ah ruah rawn sur chuan min tiharh a, mi bathlar hul belh tum chuan ka tlan ta chiam a. Ui hian min lo bauh hrep a, ruah leh ui te pawh chuan min do zo ta. He khawvel ah hian lam tang ka nei ta lo.

Ka tan inzawrh leh mai lo chu kawng dang zawh tur ka hre lo. Riltam taka nithum zet ka tei hnu chuan ka thiannu kha ka hmu leh ta. Ka hlim zia mai chu(h). Ka vahvaih pui, ka rilru min tawmpui tu, ka tang chhuak lawm nan zu kan han in a. Engmah hre lova in inhlum ka duh. A tawk tawh em em e an tih thlengin ka in a, rilru a harhfim bawk si. Ka han tho a, ka han pen dawn a, ka kal thei der si lo. Tichuan khawlai bawk chu ka address a lo ni leh ta. Intih faina tur hmun kan nei si lo, mi reh lai chuhin zanah tuikhurah te kan insil thul. Ka bawrchhawr em em a, ka rilru na theihnghilh tumin zu ka in nasa. Min dawr tute pawh zu in mi vek an ni. Nun in harsatna a han tawh chuan ka nghei hmak tawh ka tih damdawi te chu ka han thar thawh leh a, hman ang reng khan an lo la thawk nuam tho si. Engahnge hringnun hi rilru na leh lungngai reng renga ka thlah liam bik ang ni?

Inchiu pawh ka pawisa ta lo. Ka ti ta zauh zauh reng a, ka rilru natna chu reilote tal pawh theihnghilh a tlansan ka thlahlel a ni. Hlimna nia ka hriat chu a um in ka um a, ka um phak thei si lo. Ka hlim chhung a rei chuang lo. Ka nihna ang angin ka lang chhuak ngam tur a ni ka ti a, mahse ka lang chhuak ngam chuang bawk si lo. A tir kha chuan min dawr tute lakah pawh ka fair viau thin a, mahse a lo rei deuh a, ka lo duham in, an sum leh pai chu a rem chang ang ang ruksak ka hnial ta lo. Inthiam lohna pawh ka nei hran lo. A dik tak chuan min hmangaihtu pawh ni hlei lo, kan hmangaih te pawh ni bik bawk lo, reilotea min theihnghilh zui leh nghal mai tur an tisa chakna hrikthlak nan chauha min duh tute nena mipat hmeichhiatna hman hian ka tan nawmna leh hlimna reng reng a thlen lo. Ka hrehin ka rap ngawih ngawih zawk a ni. Ka thiannu nen chuan ka fapa chu tlawhchhuah leh zai hi kan rel a, kan han phur mai mai khawp a. Vawi tam tak kan tumna chu chhuanlam fahrah leh dawrawm te te hmangin kan han thulh leh phawt a. A tawpah zawng kan puitlin ve ta hram a. Kan sum neih ang angina a lawm zawng tur te kan lei a, Rambo polythene-khat tan in kan in khai chhuak ve ta a. Kan han thleng chu le, a hmel kan hmu zo ta reng reng lo. Ka thinrim ka han ang tak tak mai kha chu a lo ngaithlatu te tan kha chuan ka rapthlak ngawt ta ve ang. Lam tuma kal pawh ni lo kha, lam leh tum ang ten ka insawi vel. Midangin fa atana an lak thu leh ngaihtuahawm a nih loh thu min hrilh a, kan thil ken te pawh chu hawn let leh lovin kan hnutchhiah ta a. Engang pawn ka nun chu hoin chhe mahse ka fapa chu ka theihnghilh ngai lo. Vawi khat tal hmuh leh ka duh a, mahse tihngaihna reng reng ka hre si lo. Han zawnna mai tur pawh ka hre lo. Zan lamah kan vak chhuak a, chhun lamah chawlh kan lo thlahlel nen. Khawi hmunah nge a awn ang ka hre bawk si lo. Mipui tamtak zingah hian engtinnge ka tih tak ang le? A ngaihna reng ka hre lo. Theihnghilh ka tum leh ka theihnghilh thei bawk si lo. Kum te lah chu muang chang hian an liam ve zel a. Kawng kam vela condom fakna an tar hi i hmu fo thin ang. Thisen test pawimawh zia an sawi leh ziah te pawh i ngaithlain i chhiar tawh ngei ang. Kei pawn ka thisen chu vawi tam katest tir ve alawm. Mahse a result ka hre ngam lo. Possitive ka ni ang tih ka hlau tlat. Mitin mitang ka kawp a, ka hriau hman lah a ngaihtuahawm lutuk. Ka lo positive a nih pawn tihtheih engmah a awm chuang lo, a damdawi a awm tlat lova. ka hre lo. Theihnghilh ka tum leh ka theihnghilh thei bawk si lo. Kum te lah chu muang chang hian an liam ve zel a.

Kawng kam vela condom fakna an tar hi i hmu fo thin ang. Thisen test pawimawh zia an sawi leh ziah te pawh i ngaithlain i chhiar tawh ngei ang. Kei pawn ka thisen chu vawi tam ka test tir ve alawm. Mahse a result ka hre ngam lo. Possitive ka ni ang tih ka hlau tlat. Mitin mitang ka kawp a, ka hriau hman lah a ngaihtuahawm lutuk. Ka lo positive a nih pawn tihtheih engmah a awm chuang lo, a damdawi a awm tlat lova. Tumkhat chu Vanapa Hall-ah thil tihpui a awma, kan kal ve alawm. Kan kal chhan tak chu programme chawlh kar laka eitur an sem kan beisei vang a ni a. Mipa damdawi ti thin, mahni ina tuitla tawh si lo te hian mitthi lumen te hi an thlahlel thei lutuk. Zan lai sawhchiar pir hi. Hmeichhe nikhua lo tan chuan va lan ve kha a tihchi ve miah lo thung. Chu programme chu positive network ho buatsaih a lo ni awm e. Mipui hmaah te chuan HIV+ an nih thu an sawi chhuak ngam te chu an huaisen hi ka ti khawp a. Mi endawng leh hmuhsit pawh an hlawh ngei mai, mahse an mahni hrethiamtu chhungte an lo nei tha bik em a ni.

An thu sawi te chuan min hneh khawp mai a, ka thiannu hnenah chuan, “thisen chu i test tir ve leh ang” ka han ti a. Ani chuan a ho lutuk, mahni rilru hahna mai mai tur a ti tlat si. Ka thisen chu ka test tir leh ta nge nge a. Ka thisen ka test duh te chu an lo lawm lutuk. Ka test result chu tumah an hrilh thiang lo, kei pawn ka hre leh duh lo a nih pawn ka hre lo a ni mai. Mahni dinhmun pawh chiang ngam lo a, ka vei ang nge, vei lo ang tia awm reng chu ka hne ve tawh. Ka fihlim erawh ka ring lo. Kei tluka veina chance ngah hi…kalo him mial a nih leh ka la rethei rei dawn a ni mai a, ka lo him ta lo a nih erawh chuan…..

Ka thisen test result chu chanchin ngaihven chuan ka kal ta. Result chu hriat ka chakin ka phur teh hurh lo kher mai. A tir atanga kai inring ka ni a, thu tam tak a sawi kual a, ka rilru nat loh dan turin fuihna thu te min hrilh a, kei chuan pehhel lovin min hrilh mai rawh ka ti a, ka thianghlim loh thu chu min hrilh ta. A tirah pawh vei inring khan ka vei ngei a ni tih ka han inhriat meuh chuan ka zam chhe hle. Ka thutna thutthleng ban chu ka hmer tlawk tlawk a, ka lu te hai rum rum in, ka tha te chu an zawi zo ta. Ka kawchhung te chu so let but but hian ka hria. Ka tuhrah ka seng ta, tihngaihna a awm tawh lo. A hming chauh ka hriat thin natna tihbaiawm, a damdawi awm si lo chuan keimahah bu a lo khuar ta. Chu natna hrik chuan zawi zawiin min ei chhia ang a, ka rawp ral mai dawn a ni si a. Beidawng em em in chu hmun chu ka chhuahsan a, dam chhan tur ka nei ta lo. Keimah atang hian mi engzat takin lo kai chhawng ang maw ? Tunah chuan keimah atangin midangin an kai chhawng leh tawh lo ang. Ka nun ka hman dan ka ngaihtuah let a, hun kal ta te khan min lo bum a, ka hun hman mek te hian minti hrehawm a, hun lo la thleng turte chuan min ti lungngai zo ta!!!

Ka fapa ka hrechhuak nghal zawk a, engtinnge ka tih ang le ? Ka natna hian min ei chhiat hma ngeia hmuh ka duh a ni. Sikul hrang hranga ngaihven mai chu ka tihdan hriat chhun a ni. A va hau tak em!!. A la tu te Aizawl lam pawna mi an lo nih phei chuan tih ngaihna reng a awm dawn lo. Aizawlah pawh a awm ngei angem tih ka hre si lo. Ka inti fai ve deuh a, ka fa zawng tur chuan ka thawkchhuak ta. School thuneitu te zawh a rem si lo. An chhungten naupang school bang an lo nghahna hmunah hian ka lo nghak ve tawp thin. Midang te tan kha chuan ka mak viau thin ang. Nghakchhuak zo lovin beidawng leh hrilhhai takin ka kal sawn leh thin. Mahse ka tan hian beidawn a thiang lo mai ni loin a sawi ringawt pawh a rem lo. Keimah atanga chhuak, ka thisen zawmpui ka ta ngei a ni si.

School hrang hrang a tamin a buaithlak em em a, ka school tlawh kha vawi khat chauh tlawh a rem si lo. Ka va kal niin rokhawlhna avangin a lo kal thei lo mai thei si. A tawpah zawng ka rilru a hnual in ka beidawng leh tan ta. Lo hmu pawh ni ila engtinnge ka tih chuan ang ni ? Hei hi ka fa a nih hi mi zingah va ti dawn ila, a awm ang lo lutuk. Tuman an ringin an awih lo ang. Chu lovah a nu leh pa tan leh ka fapa tan chuan mi zingah zahna ka va siam sak mai mai a ni ang. Engahnge ka hmuh leh kher chu a tulna awm ta le ? tiin keimah leh keimah chu ka inzawt let a.

Ka beidawn tawh hnu, zawn leh pawh ka rilruk tawh loh hnuah mak tak main ka hmu leh si. Thawhtan ni a ni a, a ni zat leh a thla erawh chu ka hre ta chiah lo. September thla a ni mai thei, ka tan hian ni leh thla hian awmzia an nei ve vak lova. Nu valai, ngo deuh hian motor atang hian ka fapa chu arawn chhuahpuia, mak ka tiin ka lawm ngei mai. Ka lungphu te chu an su phu dup dup a, a nun a kut a vawnna dinglama kutchuk awm te kha, kum engzat atam pawh hmu lo mahila ka hai thei lo vang. Chu a kut te chuan kei a nu hi thlahlel takin min lo kuah ve thin. A nu chuan a school bag chu a khaisak a, phur em em hian shool lam pan chuan an inkai a, an kal dun rial rial a. A school uniform hak te chu a thiante hak ai chuan a mawiin a nalh zawk a ni. A thiante nen chuan hlim takin school tual zawlah chuan an infiam a, an han in um kawi zawr zawr a. Hmana naupang bawrhsawm tak kha a ni tawh lo. A biang te chu a senno chek a. Amah chu ka thlir ngawih ngawih a, han kuah a, a biangah te chuan han fawh a, han pawm vawng vawng ka va han chak tak em. Ka bianga lo lum thla pap pap chu ka hria, lawm avangin nge ka mittui a tlak, lungchhiat vang ka hre lo. School tan dar a rawn ri a, an pawlah chuan an lut ta dial a. A school bang chu lo chan a, vawikhat tal biak ka duh a ni. Mahse a tihchi leh lo tih ka hre chhuak a. Kei mahni rila rah ngei pawh enkawl thei lo hian ka va tibuai tur a ni lo. A school kal chu hmuh tumin ka chang ta fo mai. Ka thiannu pawh min hmuhpui tur chuan ka hruai ve nghe nghe a. Ka thil tih chu thil tha leh dik lo a nih ka hre chhuak. Amah ka hmuh fo chuan ka inthunun zo lo ang a, kan la mualpho ang. Ka thiannu pawh chuan hmuh fo hi a tha ber lo a ti a. Ka theih laia amah hlat chu ka tih ngei ngei tur a ni. Tichuan be chak ngawih ngawih, be ngam si lo, hmu chak ngawih ngawih hmu ngam bawk si lo chu ka dinhmun a lo ni ta.Ka thinlung hi chhun angin a na a ni. Hmangaihtu nu leh pa tha tak a nei a, kei chuan tih ve tur ka va nei tawh lo.

December thla kan lo thleng leh ta reng mai. Mi tin an sum neih ang anga an pawk lai a ni. Chrismas hmang tur chuan mitin an inbuatsaih mup mup a. Keini tan pawh dawrtu kan hmuh that hun a ni. Veng tin leh khawtinin a hlimawm leh a nuam thei ang bera hman a, muanawm taka hman an duh vek theuh a. Khawtlang/Veng chhungah duty te an in dah a, kan tan pawh he hunah kher hi chuan man a hlauhawm a, fimkhur a ngai zual thin. Ka thiannu ber chu a chesual a, man pawlah a tang ta tlat mai. Jail lamah nge Home lamah an thawn pawh ka hre lo. Chu thlasik nunrawng tak chu thawmhnaw lum pawh nei lovin ka hma chhawn a, Zan khawvawtah, thurualpui neih lova, mahni chauha mi inhnuai belh hi enganga rapthlak leh hrehawm nge a nih a, mut bu lum tel miah loha thlasik khawvawt tuar chhuah hi engnge a nih ka hre tawh asin. Kum te chu a ngai te hian an lo thar leh a, mitin ruahmanna thar nen an hmalam hun beiseina nen hlim taka an thlir lain kei erawh chuan beisei tur leh dam chhan tur reng ka nei ta lo.

Chaw kaw puar a ei loh leh ei chhiat nen, ka natna chuan min zuamin min ngam tawlh tawlh leh nghal a. Ka taksa mawina leh duhawmna te chuan nitin hian min kiansan tual tual bawk si. Ka hma ah chuan duhthlan tur pakhat chiah a awm ta. Ka intehkhin ber chu miin in mal din a luah a, a in chu a chhiain a tukverh te chu a tla balin, a chhuat leh a bang, a chung te chu a rawih chhe zo tawh a, a luahtu te pawh chu thli leh ruah, nisa lakah pawh humhim zo tawh lo khawp a chhia ang hi a ni. Mi ngaihah pawh chu in chu luahtlak a ni tawh lo. Mahse tlusawp lova la ding ve hram hram si hi a ni. Chu in chu siamthat theih leh thawm that mai theih a ni tawh lo. Thiat vek sela, a bul atangin sa tha leh se a tha zawk ang. Chutianga in chhia chu ka ang ber hian ka hria. Ka pawisa neih zawng zawng chuan damdawi ka leia, ka duh ber thihpui tur chuan rilru ka siam fel ta. Enge duh ber thihpui tluka thlakhlelh awm awm chuang le ? Tumah min dawm hlumtu ka beisei lo. Ka taksa hi ramsa ten an rawn ei zo a nih leh an tan ruai ka theh sak ve a ni mai a. Chuti niloa, ka ruang hi an rawn hmu chhuak a, thlana zalh te ka lo hlawh ve chuan, chu ka thlan hmun chu KA RAM NEIH CHHUN a ni ve ang. Mahse ka thih hnu chuan ka tan engmah awmzia a nei tawh dawn si lo.

Ka tan thlanmual chhung leh pawn , kuang chhung leh pawn dang lam na reng a nei tawh dawn si lo. Aw… thihna te hi a lo va duhawm tak em. Tiang reng reng a hringnun hman ai chuan thih ka duh zawk. Thi theia siam ka lo ni chu ka lawm em em a. Thihna chuan engkim a hneh ang a, ka vanduaina, manganna leh hrehawm ka tawhna zawng zawng chu a la bo tawh dawn si. Ka invit a, ka in vit thi phung a, nidanga ka tih let zet damdawi chu ka hmang a, overdose ngei a thih chu ka tum a ni. Reloteah damdawi chuan hna a rawn thawk tan ta. Ka mur chem chem, muang chang hian he khawvel lungngaihna leh buaina ram khawvel chu ka chhuahsan ta a ni. “Engtinnge he dawmdawi in hi ka thlen dan pawh ka hre lo. Min rawn hmuh dan pawh ka hre lo. Kei Lalrinpuii hian thatna leh tangkaina reng ka nei lo. Mihringin hun pui pathum kan tawng an ti thin. KAN PIANNI, NUPUI PASAL KAN NEIH NI leh KAN THIH NI te hi. A hmasa pahnih khi ka lo tawng ve tawh, a hnuhnung berah tal khi chuan mi ka tibuai tawh lo ang tia, kha hmun pan kha ka ni si a. Engtin nge min rawn hmuh le? He hmuna min dah hian hlawkna engmah in hmu lo ang. Sum leh pai, tha leh zung in seng thlawn mai mai a ni. Engvanginnnge ka nunna chhan in tum ni?” a ti a. Hlawkna engmah kan beisei lo. Ka huan kal turin ka hmu che a. Kan beisei chu i thih dawn darkar pawh nise, hmangaihtu leh lainattu i nei a ni tih i hriat hi kan duh chu a ni ka ti a.

“Hmangaihtu mamawh ber berte hi a dawng lo ber berte chu kan ni si a lawm” a ti dul raih mai a. A taksa a chauh em avang chuan a muhil leh ta a. Tihdamtheih loh natna tuar avang leh natna hrang hrang a kaih hnawih a vei tawh a vangte, reitak chaw kawpuar mumala a ei tawh loh avangte chuan ataksa chu a chhe em em tawh a, rei a dam tawh dawn lo a ni tih kei ngei pawh chuan chiang tak in ka hmu a, Doctor te pawh in chu chu an hmuh dan a ni. Chuvang chuan he khawvel a chhuah san hma ngeia Lal Isua nen an intawh angai a ni tiin ka rilru chu a hmanhmawh hle a, theihtawp chhuah pawh a ngaih zia ka hria a ni. Doctor leh Nurse ten thisen chaw te an rawn fit tak a vangin In lam pan chuan ka haw san leh ta a. Ka rilru ah a awm reng thin a vang chuan a theih ang angin Damdawiin ah chuan ka va tlawh thin a. Ni leh thla a lo liam meuh chuan Rinpuii pawh chuan hma a sawn chho ve zelin hun awl kan neih a piang chuan theih ang angin kan in kawm ve thin a (mahse a daih rei dawn toh lo tih chu a mahah chuan a hmuh theih a ni) A hmel chu a lungngaiin a rilru a hah hmel hle thin a, a theih ang ang chuan Pathian in a hmangaih thu te ka hrilh ve thin a. Rinpuii pawh chuan a chanchin te min hrilh in hun te kan hmang chho ve zel a.A tette atanga nu leh pa kara selian a nih loh avang leh chhungkaw kehchhia atanga rawn chawr chhuak a nih avangin Pathian Biak Inkhawmte chu a tih ngailoh a ni a. Pathian Thu lah chu a hrelo in a ngawng em em bawk si. ‘Hospital Chaplain i hmu duh em ? Kan ko ang e’ ka ti a, min hnial hreh hmel hle a, ngaihna hre lo leh hrilhhai zetin min en a. “He Damdawi In Pastor nen hian in hmu ula a tha ang” ka ti a. Chaplain chu a lo kal a, kal sawn ka tum chuan awm ve tur chuan Rinpuii chuan min ngen a.

Chaplain chuan thu tam tak a sawi a. “Mihring suala kan tluk dan, mahni duhthlanna ngeia sual a tlu, mahni inchhandam leh thei si lo te chhandam nana a fapa mal neih chhun petu Pathian a nih dan te, bawhchhe thin mihring, famkim lo, hmangaih tlak loh nimahila, Pathian min hmangaihna chu a ngai reng a ni Pathian chu mi fel te Pathian a ni lo. Misual, a duh leh mamawh apiangte pathian a ni zawk. Mite an sual ngaidama, sim tura pui tu a ni. Amah pan tu te a hnar ngai lo. Nang pawh Rinpui, A hnen pan tur chuan a sawm che a, a nghak reng che a ni’” a ti a. Rinpuii chuan “Pathian hi a awm pawh ka ring lo, a awm loh pawh ka ring chuang lo. Biak In-ah te hian eng thu nge an sawi thin tak le ? Ka naupan lai kha chuan chu Pathian chanchin leh a hmangaihna thu te an sawi thin. Pathianin min hmangaih ang bawk chuan kan mihringpuite pawh kan hmangaih tur a ni an ti thin. Mahse chu thil chu duhthusam mai a lo ni e. Kum tam ka inkhawm tawh lova, eng thu hi nge an sawi thin ka hre ta lo. Hmangaihna te chu a dai zo ta. Ka hriat ve chu hei hi a ni . Biak In chhung chauh a piangthar, chawlhni a Kristian, sakhaw dang ngai thei lo khawpa sakhaw mi, kristianna kawra hmanga, ngaihdan ti khirh a, nun dan uluk leh si lo, mi hlemhlete’n Kohhran chu an tihsual inphen nana hmang, mahni meizial zuk leh sahdah hmuam tak ngial pawh nghei thei lo lehnghal. K.S leh Drugs ngawlvei te vei ve lehchhawng a, an sim theih nana tawngtai tlaivar thei si, an tawngtai saka te hmusit leh si, Pathian hming lam reng chunga thinlunga tihna nei leh si lo. KTP ah te hruai tu ni reng chung si a mipat hmeichhiat na laka filhlim leh si lo. Ka chauh a Kristian! khawngaih takin sawi tawh teh suh. Ka tan phei chuan lo tawngtai ve reng reng suh u” a ti ta hrep mai a Biak In kawng pawh zawh ngai miah lo te hian ti khawp hian a ni maw inkhawm thin te hi an lo chik thin le!? Rinpuii chuan kan nihna dik tak a sawi niin ka hria; Chaplain chuan engtin tak chhang ang maw ka ti a.

Dam thluam hian Chaplain chu a rawn tawng chhuak a, “Rinpuii thlirna atang chuan kan kristianna chu a dal chhe zo tawh a ni maw? Mi dik lo tam tak awm mahila, mi dik leh rinawm hi kan ramah hian an la awm asin. Kei ngei pawh hi i sawi aia nasa a sual kha ka ni. Mahse ka sual chuan min ti lungngai tawh lo, Pathian chu he ka thinlungah hian a cheng a, ka sual pawh angaidam a ni. Min hmangaih a, min chhandam tih ka hriain ka pawm tawh si a” a ti a. Rinpuii chuan chutia thu a han sawi ve chu a taksa chuan a zo lo a, a chau thut a, rang takin nurse leh Doctor an lo kal a, kan chhuahsan ta rih a. Chaplain chuan “A thinlungah beidawnna nasa tak a nei tawh a, a rilru pawh a luhlul em em tawh ang, mahse Pathian a mamawh zia chu a hriat si.

A dinhmun atang chuan rin a harin pawm a harsa ang. A taksa chu tihdam theih tawh loh mahse, a nunna chu Doctor te hmangin Pathian zarah pawh sei a ni a, a thlarau tal chu chhanchhuah tumin kan theih tawp kan chhuah zel ang chu. Bang lovin in lo tawngtaipui sauh sauh dawn nia” a ti a, min chah ngawrh hle a. Thinlung sak ber pawh ti nema, tidanglam thei Pathian chuan Rinpuii pawh a tih danglam ve ngei ka beisei. Kan beisei ang ngeiin a hma zawng ai chuan Chaplain thu sawi pawh a ngaih ven a, a chang chuan zawhna te pawh a han zawt ve ta zauh zauh a. Chaplain chuan Sam 126-na kha a han chhiar a, chu chang chu Rinpuii’n a naupanlaia a recitation sawi ngei kha a ni. Rinpuii mittui chu a tla zawih zawih a.

Nun siam that nan leh Amah pan nan tlai lua a awm reng reng lo. Enganga sual nasa leh rapthlak pawh an sual te sim a, Isua lam an hawi chuan ngaihdam theih loh reng reng a nei lo. Mihring thil tihte hi chhinchhiah se, tunge A hmaah tling zo anga, chhandam ni thei ang le? Famkim tumah reng kan awm si lo. Kan tih that leh fel vanga chhandam kan ni lo, rinna avanga khawngaihnaa chhandam kan ni zawk si..Keimahni thawhchhuah pawh a ni lo. Chu rinna chu neih a, pawm mai tur a ni. Chu chu pawm turin Rinpui nang pawh Krista chuan a sawm reng che a ni. Ring turin ka nawr lui thei lo che, ka rin kep thei hek lo che. I chhia leh tha hriatna, nangma duhthlanna ngei kha a ni, chu rinna nei tura pawimawh ber chu chu” Chaplain chuam a han ti leh a.

Rinpuii chuan “Kei Lalrinpuii, K.S, AIDS vei, Drugs ngawl vei lehnghal tan hian nun siam that nan leh Amah pan nan chuan a tlai lutuk tawh a ni, a tlai tawh a ni” mangang tak hian a rawn ti chhuak a. Aw….Pastor, lo intawng hmain lo inhre hma deuh ila chuan a tha tur. Amah chu ringhlel lova rin theih leh rin ka va duhtak em” a ti ta ngawih ngawih mai a. Ka sualna zawng zawng ngaidam a, ka thlarau min chhandam theitu ngei chu a ni ka nun hian a mamawh a, a tui hal huam huam ni, a ti a. Rinpuii chu a la chak lo si, a taksa chuan a zawh leh loh kan hlau a. Tawngtaipui pawh duh lo khan tunah chuan a lu chunga kut nghata tawngtai a ngen ta. Chaplain chuan a han tawngtaia, kan thu sawi chu chhunzawm chak viau mahila, naktuk lamah kan chhun zawm leh zawk dawn nia tiin beiseina sang tak nen kan in mangtha ta rih a. Zan hun a ral anga, Rinpuii chuan a rinhlelhna zawng zawng te chu paih boin Krista chu a Lal leh Chhandamtuah a pawm ngei kan beisei a ni.Kan rilru pawh a hlim kher mai. Tichuan atuk lama inkawm chhun zawm leh tur chuan kan inthlah ta rih a.

Kan sitting room kila kan hun telephone rawn ri rawl rawl chuan min rawn tiharh a, ngaihtha lo zet leh hlauthawng tak chuan kan la a, Damdawi In atangin a lo ni a. Rinpuii zual thu leh a rang thei ang bera kal turin min rawn hrilh a, Kan han insiam a, kan han peih meuh chuan zanlai dar sawmpahnih a lo ri tawh a. Taxi service a awm tawh si lo. Thenawm ngam tlak motor nei chu kan kai tho a, kan in hruai tir ta ngawt a. Damdawi In kan thlen meuh chuan Rinpuii chu biak tur a lo awm tawh lo. A ruang bulah chuan hrilhhai leh bang bo zet hian ka ding a.Ni chin lawkah hlim takin kan inkawm ho kha a ni si a. Dan rual lohin ka mittui a lo hnam chhuak a. Chaplain chu a lo lut a, a hmel en chuan a hrilhhaiin a lungngai tak zet tih ka hria. “Mihring mihrinnaah, ka hna thawhnaah thawk tha leh hlawhtling ve thinin ka lo indah thin. Khang ka chapona te kha a lo va zahthlak tak em. Pathian leh Puipuii hmaah hian ka zak ngawih ngawih a, thiamthu sawi tur reng ka nei ta lo. Mitthi tur hi vawi tam ka hmuin ka lo buaipui ve tawh, mahse hetiang reng renga ka nun khawih hi ka la tawng ngai lo. Nun siam that duh, pianthar duh em em, Krista pan chak ngawih ngawih chu NAKTUK kan nghah avangin kan chhan thei ta lo. Rilru a na in inthiam a har a, a va zahthlak tak em. Ka hna hi bansan mai ila a tha ang” a ti dul raih mai a. Kei chuan “E, bansan lah love, thihna hi mihringte dan theih a ni hlei nem, Rinpuii thihna hi a thlawn lo tawp ang, he kan khawpui ngeiah hian Rinpuii anga tanpui ngai tam tak an awm a lawm, chung chhanchhuah nan chuan kan theihtawpin kan thawk tlang zawk ang chu” ka ti a, ka kut chu ka phar chhuak a. Ka kut chu Chaplain chuan lawm tak hian a lo hmer vawng vawng a. “Ni e, a thlawn mawlh lovang” a ti ta a. Khawtlang hruaitu te leh vantlang remtih nain Rinpuii ruang chu kan in lamah kan la ta a.

Dawm hlumtu pawh beisei ngam lo, thlanmual pawh chan phak inring lo kha, Doctor leh nurse fel tak tak te enkawlna, lainatna leh hmangaihna dawngin dawmhlum a hlawh a, tlangval tlawmngai ten a thlan thuk taka an laihah chuan ropui taka vui liam a ni ta a ni. He khawvela a ram neih chhun, A THLAN HMUN hlawhchhuak tur chuan diriam leh tihduhdah, mualpho leh zahna tam tak a tawng a. He kan Zoram, Kristian ram ngeiah hian a lo vakvai a ni. A vuinia a pangpar dawn zozai leh amah suna a lo kal te, a thlan te chuan atan hian hlutna leh tangkaina reng an nei tawh si lo. A pangpar dawn zozai te chu a dam laia a dawn ni se a va hlimin a va lawm dawn tak em. Thihna chu mihring lo piang chhuak tumahin kan pumpelh theih a ni si lo. VAIVUTA SIAM CHU VAIVUTAH BAWK A KIR LEH TUR A NI SI A.

Note : He chanchin hi a tak tak (true story) a ni a. He chanchin hi NGO hrang hrang Valcolm, CHAN, Shalom a thawk te min puihna zara ka neih theih a ni. An chungah pawh ka lawm hle.

 

Source :

https://www.facebook.com/photo.php?fbid=10150563072619461&set=o.149730425139413&type=3&permPage=1

https://www.facebook.com/photo.php?fbid=10150563078309461&set=o.149730425139413&type=3 .

Share this post:

You May Also Like

Leave a comment:

avatar
  Subscribe  
Notify of