PHATSAN I NI A
©Chhantea Pautu
Phatsantu chu i lak aṭangin zalentir la, a lak aṭangin i zalên ang.
Phatsan avanga thinlung natna thûk tak neiin awm mah la, phatsantuin a hloh tak zahawmna i nei asin.
Phatsana awmte hi na mah se, an hlutna hriat chhuahin a awm leh ṭhin.
Phatsan i ni tiraw? Ṭapa zakin i mittui luang mah se, thinlung dik pua i hmangaihna pêk chhuah ang kha mi dik lak aṭangin i la dawng ve ang.
Phatsantu chu mi thar tawngin a nui a; phatsana awm chu thinlung nain a ṭap! Ih e, i natna tuam damin a la awm ang a, phatsantu hmuhah i nui hmel a la pâr chhuak ang.
Chutih hunah chuan maw, i hlutna a rawn hre chhuak ve tawh ang a, i hmangaihna hlutzia chhûtin a indawm ve tawh ang.
Hmalam pan la pen khat te tein natna ram chu i hlat zel ang a, natna dang pal dan i zir thiam tawh ang.
