NUTHLAWI ZÛNAH KA UAI!

NUTHLAWI ZÛNAH KA UAI!
Chhantea Pautu

©
Zûn zawng zawnga zûn uai nâ bera an lo sawia ka uai thu ka’n sawi mai teh ang!

Anmahni rawn uai lêt lem lo mah se, nuthlawi zûnah hian ka uai zeuh zeuh tawh a; tuna ka sawi tur hi a tu ber nge tih kan thup a ngai dawn tlat hi a va tha em!

Ka hmel ka han en a, a hmelte vir ver chu ka phu lo ka ti takzet a. Keia kara chawmpang kara atanga pawhchhuah hlim ang maia hmel pawr chip chep, lukir bap mai, thau mum vei kâng si, pumthum chenghnih man vel min ngaina ve hle tih ka han hre phei kha chu, ka lawm lutuk hi midang hriat loh hian ka khek vei thut thut thin a, ka ha chu a lang reng mai bawk!

Tawn tirh lamah chuan Phone kan han bih dun a, ka Phone bih lai min rawn bih pui pahin ka lamah a rawn âwn phei a, mi rawn nêk tàlh tàlh a. Chu thil thleng chuan ka ngaihtuahna chu a tipûk nghal ruih mai a! Ka han melh rulh a, ka meng mitak rûn a, a chêtzia chuan min duh ve a ni tih a tilang chiang mai!

Insum hle lo ila chuan lawm avangin ka khek chhuak leh thut pek ang chu!

Ka hmel en ang hi ka ni lova; keimah leh keimah hi zei hi ka intiru em em zel ve ringawt a, ka zei zia erawh tu hmeichhia tak takin an sawi ngai lo!

Tichuan, kan han inbia a, kan inbia kan inbia a, kan inbe ta em em mai! Kei chuan fing takin tawngkam chhawrthlapui ka hmang duh ngai miah lova, kan inhaw lo ve ve nia a lan hnu pawh chuan bem duh lovin inbem hmasak tir chu ka project lianpui a ni nghal! Mi ka bem dawn hian ka hlau pawh ni chiah si loh hian ka tiril a khùr ru tlat zel!

Mahse, min bem duh tâk miau loh avangin ka hlawhchham ta phawt mai!

A tâwpah chuan fiamthu nena tan la chhoin chatuan thunung thû-ah thu chu kan han thlung ve ta poh a; ka thuziak lam hawi kî ka thlâk nghal bawk!

Pathian thu ziaka status update thin khan nuthlawi thlavang hauhna thu ka’n ziak chho nghal pang a. Nula pangngaite aia nuthlawi chhai a fair zawk zia chu rilru-ah a thanglian chho thur thur ta mai!

Virgin thu hlaah pawh, a langa nula pangngai si virgin lo an tam tho si zia chu titi lamah ka’n han vawrh chho tan a. Naupang ka’n ngainat belh sauh a; an lawm zawng leh ei duh zawng ka’n hre thei chho tan ta em em khawp a; engtin nge khati tak mai a ka inpêk thûk theih tiin ka inzâwt thin?

A chhan chu keimah bawk hian ka hria; nuthlawi zûnah ka uai a lo ni!

A nu ka rim rualin a fa rim tel a ngai a. A nu titau ka thlem rualin a fanu chocolate pêk zeuh a ngai a. A fanu chocolate pêk rualin a nu tihlungawi nan pêk ve a ngai a.

Nula pangngai kan rimin kan rimate tân chocolate kan ken thin kha; nuthlawi zûna han uai ngat chuan naupang pêk tura ken a ngai tlat!

An fate an lo fel chuan min ‘pa’ deuhthaw nghal a, “Min mutpui rawh” an tihpalh tak hlauhin an In panna kawngah thawnthu hrilh tur ngaihtuah chawp a ngai a. Ka hriatchian vak tawh loh, ‘MAURUANGI’ thawnthu leh ‘RUNGI NU leh THIALTEA’ thawnthu ka sawi pawlh tak nual tum pawh a awmin ka hria!

A châng leh Bingtaii kha Muauruangi dinhmunah ka din tir a! A chang leh Rungi nu kha kan ti Bingtaii chho nawk nawk bawk thin.

Tichuan, mizo thawnthu dik takin a fate lam kan han awi mu te te a; a nu lam ka belh bulh hman meuh chuan zan a lo rei tawh a, haw a lo hun leh chawpchilh tawh mai bawk si! Ka rima ber kha ka rim hman lova, ka bialnu rim tura ka kal kha nau awmin ka hun ka hmang a, thawnthu ka hrilh a, ka chawi mu a, zunhuh ka thlâk lo chauh chu a ni e! Tlangval, kum 30 pawh ka tlin hma hian fate home work ka tihpui dawn a ni tih hi ka pa takngial pawhin a hre lawk lo tawp ang!

Nu leh pa bula fing takin tawngkam ka rawlh tan a. Nu leh pa tlawn pahin, “Ka pa, ka nu, mo atan nuthlawi a pawi ang em?” kan han tinui heuh heuh a. Kan fiamthuah ngaiin, “Pawi lah love” an lo ti a. “Fa chhawm ngai pawh a pawi lo tiraw?” tiin kan han nuih tlawn ngial a!

A thuma ruh ngai zûna uai chu tih namai a lo ni lo; thluak hman hi a ngai em em a, hisáp kitáp nei sang tak tân lo chuan tihrual a ni lo!

A nu ka han tihlungawi loh tumte hian, a fanu chu ka ngai ta em em mai thin a. A lungawi loh avanga min be tha duh lo kha ka han call ngei a, “Matei kha ka ngai, ka be châk tlat, min lo biak tir teh” ka han tizaih mai a; a diktak chuan a nu ‘hello’ tawngkam khat lek pawh kha a thlakhlelhawm riau nia! Nupa an inthena an lunglêng khawharin an fate an chhuanlam ang chauh hi a ni!

Heiha…huiha…nuthlawi zûna uai zet chu nupa nun zirlai hi kan zir a ni ringawt!

An zûna uai chu a lo na tak tak a niang; khawi lo kal dawn hlek dawn apianga lirtheia chuan thlahlel em em zel kha, a nu rim turin, a fanu ngaih chhuanlam siin ke ngatin kan han paidal tlauh tlauh mai a nia. An In panna, an In thlen hma theihna short-cut te hi ka hrechhuak zung zung a. Thil tul danga hah hma em em khan, zantin kal chungin hah ka hre ngai miah lo nia!

An In chu panhnah cheh leh roll training nana duhthusamte pawh a lo ni lehzel a; nuthlawi zûn nei chin ngat hi chuan panhnah cheh leh roll lah hi an ching duh riau lehnghal a. Nuthlawi pathum chin zûna uai tawh ngat chuan rang tak hian panhnah kan roll zet zet thei tawh mai thin!

A ho ang reng sia a sei tawh mah mah. A tawpna atân- A tam zawk hi duh reng vang leh awmher vanga thlawi ta an ni kher lovang; chuvangin, chhaih a, dem a, fiam nawmnah a, zahmawh tawngkama sai ngawt hi kan tih tur niin a lang lo! A thlawiate lam pawh hian zahawm taka nun tum ve bawk se la!

Nuthlawi zûna uai chu, intihthiam loh avanga inthen hnu pawhin an fate zûnah kan lo uai tel hman a, naupang hi kan ngai vung vung mai nia! Kan thudang alai chuan, tunlai chu kha nuthlawi hmelṭha fanu tâna ka Sairawkherh siamsak kha chhuhsak leh tawh a nih ka duh; naupang dang pékah!

Share this post:

You May Also Like