NUPUI TIHHLIM DAN

Ziaktu – Papari Robert KC (L)

(Nupui tha nih dan tur lam hlir kan sawi a, pasal ten nupui te tihhlim ve dan tur thung aw.)

Nupa hlimdun lem lo pawhin a inneih ve reng theih laiin hlim taka dam hun chhung hman dun hi chu duhthusam a ni a, kan tum ber tur pawh a ni. Nupa hlimdunna kawngah hian a tu ve ve pawhin mawhphurna nei mah ila mawhphurna nei sang zawk chu mipa in ni, a chhan chu chhungkuaah Lu Ber in nih vang a ni.

1. RINNGAMNA :
Inneihna hlawhtlinna bulthut chu Inrintawnnaah hian a innghat a ni. I nupui chu a rinawm ang tih i ringngam tur a ni a, a thil tih apiang leh a kalna apiang te, a thian kawm apiangte ringhlel nghal mai zel lo la, a thiltih reng reng hriatpui tuma dilchhut taka zawh thin ai chuan zalenna pe thiam ve ang che. Amaherawhchu, a awmdanah duh loh zawng leh lungawilohna i nei a nih chuan rilru lungawilo taka ngawihsan ai chuan thinrim lovin i duh dan leh duhloh dan te chiang takin hrilh zawk thin ang che.

2. THINRIMNA BENG DAIH THIAM TUR :
Nupa, tupawh mai hi inang chiah chiah an awm lo reng reng a, thinrim ngai lo leh lungawilo ngai lo hi kan awm lo. A then kan insum thei a, a thenin insum lovin kan lan chhuahtir mai chauh zawk a ni. Duh loh zawng taka thil a lo awm a nih chuan thinrim inbengdaih hnuah ‘Khatianga i tih kha chu ka duh dan zawng a ni lo….’ tiin zaidawh takin hrilh thin zawk ang che.

3. I NUPUI AWMDAN HRIATTHIAM I TUM TUR A NI :
Hmeichhiate hi thla tina thi nei leh an thi neih hun lai leh neih loh hunlaia zir tea rilru put dan danglam zing em em an ni a. Chubakah, mite khawngaih theihna hmeichhiate hian an ngah rual rualin thinrim, tauh leh lunghnur maite pawh an awlsam em em a. Heng hunah tak hian mipa nihna a rum zawnga lantir lova dawhthei zawng leh hnemtu nithei zawnga lantirna hun tha a ni zawk. Nupaa chhungkaw din a, fate nena awm hrang ni lova mahni nu leh pa te nena la awmho dual dual in nih phei chuan i nupuiin inthlahrunna avanga rilru nawm lohna a neih fo tur te pawh i ngaihtuahpui thiam a tul hle a ni.

4. I NUPUI CHU A DIK LOHNAAH I NGAIDAM THEI TUR A NI :
Mihring hi tumah kan famkim lova thil tihsual palh leh tih dikloh palh kan nei fova; amaherawhchu, hengte hi kan hriat reng thin chuan kan kawppui te tan a nuam lova, chuvangin, dik lohna te reng reng intheihnghilhsak tum tur a ni. Theihnghilh dan tha ber chu “Sawi Lan Nawn Fo Loh” hi a ni.

Benjamin Franklin chuan, “Inneih hma chuan zau takin meng la, inneih hnuah erawh chuan zim tein meng rawh” a ti. Chuvangin, i nupui diklohna hmuh tuma i rilru hman ai khan a duhawmna hmuh tumin meng zau zawk la, a diklohna hmu lo turin maimitchhing thung la, chu chuan in inlaichinna a siam tha zawk ngei ang.

5. I NUPUI PUI THIN RAWH :
Nupui ten inchhungkhurah khawih neuh neuh tur hna an nei ve reng a, ina i awmlai a nih chuan i theih ang angin pui ve thin la. Thaibawih nih hlauh vang hian in nupuite in pui lo fo niin a lang, nupa Tangrual, nupui te duata hmangaih tihna a ni zawk. Hmeichhe tan zangkhai phahna a ni a, fate tan nu leh pa inngeih taka rawngbawl dun/ hnathawk dun hmuh hi a hlimawmin hmuh an nuam bik em em a ni.

Chuvangin, nupui duat thiam leh enkawl thiam nihah hian inel tawh zawk ula, I nupui hlim taka i siam khan chhungkaw him tak i din tihna a ni mai.

(Sei tih vanga chhiarchhuak peih lo paho an tam leh ang chu… hehe. Nuho khan in pasal te chhiar rik sak keuh r’u  )

Share this post:

You May Also Like

Leave a comment:

avatar
  Subscribe  
Notify of