NUPUI I NIH CHUAN

Ziaktu: Toni Da Ralte Ahmangaihi

1. I pasal chuan khumlaizawl(sex) ah Nawhchizuar ang maia zei taka i chet a duh a, a beisei ruk a ni. Mi zakzum tak i ni a, i ngam lo a ni mai thei. Mahse,’tiam tlat e’ i lo tihpui tawh chu sex a i tilungawi zo lo a nih chuan in nupa inkar a zau telh telh ang. I tih ngai loh thil danglam leh phurna siamsak thei hmanga i pasal ilêm kual vel kha a duhthusam a ni. Inzir theih a ni a, zei taka i che thiam lo a nih pawhin, tih lawm itum ve hle tih i lantirna pawh khan a tiphurin, a tihlim tawh.

2. Eitur tui tak chhawpsak a, siamsak thin turin i pasal chuan a beisei che. A hnathawk lo haw kawngka a rawn luh ruala chawhmeh rimtui hmel em em a hip atang khan a duhna che a pung tih hre mai rawh.

3. I duat a duh. I pasal kha a lo hahin a chau ve em em thin, i bula pangchan ngher ngher te kha a duh ve, duat taka ilo chiau-au a, naupang chhe duat taka ilo chul hliau hliau te khan a hahdam sawng sawng thin a nia aw.

4. A thinrim laia i lo tawng ve sekte, in inhauh a i ngawih duh tlat lohte hian kutthlak lo tur che in a insum țang țang tih hria la, a thinrim tawh tih i hriat ruala i ngawihsan hmakte khan a chhuang em em zawk che asin.

5. Kohhran leh khawtlanga mi tangkai tak nupui i nih chuan i pasal khan a thiltihnaah tawiawm a, nawrkal a, fuihtu ni turin a duh che a, a thiltih thate i lo ngaihnep sak emaw heng thil avanga in a chhuahsan thin te sawisel a i ngur khum fo khan a rilru a na thin.

6. Naupangchhia taka i bual a phut ve thin, a hnung nawhsak tura a kohna che kha a chhuanlam a ni tih hria la, a taksa pum bualfai a, a theih phei chuan in pahniha inbualdunte pawh a duh fo ang. Ti ve mai rawh.

7. Ruihhlo ti thin nupui i nih chuan i pasal chu tawngtaisak mai duhtawk lovin, titipui la, ruahmanna siam dun ula, zaidam leh dawhthei takin a sim dan tur kawhhmuh ang che.

8. Titi dunte, nuihdun ker ker te, fate tel lova awm fal te a thlahlel thin,i nui hmel kha hmuh nuam a ti.

9. A ex i sawichhuah fo te, a nunhlui i thik fo thin avang khan hrehawm a ti a, a inthlahrung a, ninawm a tih chinah erawh hmeichhe dang a melh tan tawh thin.

10. Tlan fo suh, ngaiah i nei ang a, i pasal pawn a nuihzat ru ang che, theih tawp i chhuah chung pawh a then loh theih loh a a awm a nih chuan then la, kir tawh suh, i pasal chu a buai phili ruai mai ang.

11. I ex te sawi khum fo suh.A ning thin, tin, a thik bawk.

12. A chhungte lakah i vui thu chu a bulah chiah sawi rawh. A nu leh pa rel khum suh, a rilru a na thin, i hmangaih ber kha duhthlanna harsa tak siamsak suh tih ka sawi tumna a nih chu.

13. I nulat lai ang tho a duhawm a hmuh che a la duh fan tih hria la, fai sar la, make up te pawh hman nasat a pawi lo, i pasal tan alawm le; mahse i hmui hnawihsen lutuk suh, fawh che a inthlahrung ang.

14. A laka ilungawilohna te kha thiam taka i sawipui a ngai a ni. I duhdan te hrilh la, thu pe awrawl zawng ni lo hram se.

15. A laka i lawmnaah lawm thu hrilh hreh lo la, inkohduatna tawngkam hmang fo rawh. A lawm ru veng veng mai ang.

16. HMANGAIH THU HRILH FO THIN RAWH.. a zahthlak leuh.

Hetianga i ti chung pawh a then che a la duh țalh chuan – TIHNGAIHNA KA HRE TAWH BIK LO RENG RENG. 😛

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x