NUPA NUNA THIL PAWIMAWH KA TIH VE CHU!!!

Mipa leh hmeichhia kan han inngaizawng a, theihtawpa inngaihsakin hun kan hmang a ni mai thei. Kan inhmangaihna pawhin a vawr tawp a thleng tluk hiala ngaih changte pawh a awm theiin a rinawm. Hei erawh kan hre zui lo fo, kan inngaihzawn laia kan inkar boruak tha ang kha nupaa kan insiam hnuah a tha reng kher lo thei a ni tih hi. Inngaihzawn lai kha chuan hmangaihna par kan tem chauh a, a par kan tlan hun tak chu Nupaa kan insiam hnuah, ni tin zan tina kan khawsak dunnaah a ni tih kan ngaihtuah hmaih thin niin ka hria. Thenkhat chuan, nupaa an insiam hnuah hmangaihna thu infah leh hmangaihnaa inlawm hi a tul tawh lo emaw kan ti fova. Kan nunpuiin kan inhlan thar zel tur zawk a lo ni tih hi kan hriat a tul hle. Chu hmangaihna chu mahni inphatna atang zela parmawi leh rimtui chang thei thil a lo ni. Mahni hmasialna ni lovin.

Nula tlangval na na na chuan khawhar taka mahnia awm keuh keuh hi kan thiam lo pawh a ni mahna, kawppui kan mamawh a, chu chu siamtu min duan dan pawh a ni. Chutah chuan famkim lo mihring kan nih miau avangin kan thinlung duh zawng leh mamawh zawng ngaihtuahna ti dal rawih thei tur khawpa sakhmel tha kan hmuh meuh chuan kan vei tut² a, kan ngaihtuah rauh² thin. Mahse, hei erawh kan ngaihtuah tel leh pek thin lo. A parmawina hi kumhlun tur a ni bik lova, a nun leh mizia hi damchhunga kan neih tur zawk a ni tih hi. No mawi tak chhungah pawh thihna tûr a lo awm thei ang hian, pawnlam lan mawina chauh thlira nupui pasal nei chuan a thinlung chhunga vertherna leh suahsualna tinreng hmanga tûrin a lem pil mek tih a inhriat chuan a lo tlai tawh thin. Inngaihzawn lai atanga tanin, kan kawppuite chu nakina ka nupui/pasal atan a tha angem tih hi thinlung takin kan thlir thin tur a ni.

Kan nupui pasalte hi midang nena khaikhin fo hi a him lova, tih reng reng loh turah ka ngai nghet tlat. Midang nena kan khaikhin ni apangin an tlinlohna lai kan lo chhui thui hman viau a, duhkhawp lohna sualin min lo hneh tawh zawk viau thin a lo ni. Kan nupui/pasalte thiltih theih tawk leh tlin tawka lawm thiam hi hmangaihna zia a ni a, chu hmangaihna zia chuan an thinlungah fuihna thu a fah zawk thin tih hi hriatreng atan a va duhawm êm!

Thian hnai infiam danah chintawk kan neih thiam a hun. Kan thiante zingah pakhat kha thaibawih hmuha hmua fiamthua kan inchhuah fo chuan a rukin mi nupa kar thu kan tibuai thei tih hi a bik takin mipate hian i hre nawn ang u. Mihring rilru a in ang lo ang bawkin, thenkhatin an nuih liam pui theih laiin thenkhat tan chuan an nupuite laka tlawm ta riaua inhriatna thinlung kan tuh sak thei tih hi theihnghilh chi a ni lo. Mipa zingah hmeichhe ngam lo an awm hauh loh rualin inzahder thiam apiangte nun a hlim zawk tih hi a tak ngeia tawngtu kan tam ka ring. Chutiang bawkin hmeichhe lam pawhin hei hi kan hriat a tul. In pasala thiante lenkhawm laiin a tihtur kawhhmuhin tir chung thin lo la a tha, ho tê anga lang mah ni se, kha thil khan a thiante laka thaibawih hming put tir tu a ni thei tih hria la, a hma zawnga in tanrualna phet zawnga a tawrh zawh loh hun a thlen meuh chuan i tlin leh si lovang tih hre reng la, fing takin a thiante lakah ti thang tlawm ngai suh.

A tawp berah chuan, mipa leh hmeichhia hi hmangaihna avanga NUPA (pumkhat) an nih si chuan, hmangaihna chuan a hmangaih thinlung chu a hmuin a hre thei tur a ni a, hmangaihna avanga inchawimawi tawn hi NUPA NUN a thil pawimawh berte zinga pakhat a ni e.

Share this post:

You May Also Like