NUNO-I

NUNO-I
[Short Story]
Chhantea Pautu, Paradise Lodge

[Dinsanga’n mi chanchin inbox-a a dawn ka rawn zeh tel hi a tak tak a ni e…]

“Engvanga min duh nge i nih? Kha zât ka ze tha ka hloh tawh hnuah…”

“Ka hre lo; samkir hian zûn an ngah an tia lawm!”

“Samkirin zûn hran an nei lo…tumahin!”

Nunoi chu a nui seih a, chhâng zui tawh lovin a bula mipa luhlul tak chu a hnunglam atangin a han kuah a, a hnungah chuan a bei ta hle hle a. Ngawi rengin eng emaw chen chu an han awm a, an thinlung erawh a inpawh hle thung si! Thlifim a thaw heuh heuh a, khua a thiang tha hle a, an piah ralah chuan romei a zâm paw chêk a.

Dinsanga thinlung chu nasa takin a vak kual a, a nunah harsatna leh buaina namen lo a tawh avanga a awm dan khawlawi lo tak takte kha a ngaihtuah kir a; Nunoi laka a awm dan te kha…a zahpuiawm teh e!

Kawng leh lamah chuan, khatih lai khan mal leh khawhar takin a awm a, hnêma puitu a mamawh a; a harsatna chu sawichhuah mamawh ve bawk mah se, sawichhuah thiam kha a harsat tlat a; boruak rit tak delhna avanga a manganna kha a zual deuh deuh a! Hmeichhe lakah zahawm lo khawpin a awm a, tlawm a sawi lova, a mamawh ber chu a thinlung ruak khawhar hnawhkhattu tur kha a ni; chuvang a lawm, khati tak maia Nunoi a vial chial tâk!

“Ka dinglam sirah hian han ding teh…” tiin a kawnga kuahtu Nunoi kut chu a pawtphelh a…”I chunga ka awm dan kha, keimah ngei hian ka zahpui a sin…” a han tih zawm a…

Nunoi chu a ngawi reng a, an piah ral hla tak chu thlirin a mit a khap sak sak a, lungawi lo hmel erawh a pu lo; a sam ngil nel thep mai chu thlifimin a chhem leng seng seng a. Amah a ngo paw vang a, hmaifang bial, hmaifang lian lo, hnarlian lo tak, zum vat si, hmui chhah lutuk lo, hmel tha lutuk tia sawi tur aia duhawm em em thung si a ni. A nu lian lova, a sa a chhah lo bawk, thau tak a ni lova; hei tak hi Dinsanga duh zawng a ni. Engtik lai mahin hmeichhe thau leh awmbawr lian leh luah a ngaina ngai lo!

Dinsanga chu a ngawih vang vang hnu-ah a han tawng leh a. “Kha tih chhung zawnga ka ngaih zia che kha…biak pawh che tumin ka bei nasa tih pawh i hriat kha…” a han ti leh a…

“Min atchilh niin ka lo ngai a…” Nunoi chuan a lo ti ve thung a…

“Ka nun kha a ruak a, hnawhkhah ka duh a, nang kha i tling tâwkin ka hria a, ka thlang ta che a ni…”

“Ka laka i awm dan kha chu a zahpuiawm khawp mai…” nui seih pahin Nunoi chuan a han ti leh a…

Dinsanga chu a then sak a. “Midang ka hmu lo a ni lo…nang angin ka thinlung an luah lo a ni…”

An piah thingah chuan Tlaiberh an fu chiar nak nak a, thli chu a ngawi a, khuavang kal lai ang maiin a reh dak a; tumah mah chu tawng leh tawh chuang lovin an ngawi dun reng a.

Dinsanga chuan a kekawr ipte zenin a melh ngai a melh vang vang a; a thil tawn avang hian mi tawngmawh a lo ni thar ta thut nge; sawi tur hi vang a ti em em mai a! Nunoi chu a han mitsir a, a mitah chuan a la ngai reng, pawm lawka hrawm nawk nawk chu a chak thar ta em em a; a ngai a ni! Kha chen kha inhmu lovin an awm a; a dik tak chuan a chawlhna zawng, awm chintâwk hre lo kha a ni ber awm e. A nunphung tha hloh vek khawp khan harsatna, mite hmuhpui theih si loh khan a tlakbuak fo a!

Nunoi chu a rawn tawngchhuak leh a. “Din, nuthlawi zuna uai hi a na an tia…i ring em?” tia melh phei pahin a nui rah rah a.

“Nuthlawiin zûn hran an neih ka hre hlei nem…”

“An nei an tia lawm…”

“Dawt pawh va ni suh…!”

Dinsanga ring lo hmel chu Nunoi chuan a nuih rah rah a…

“Hmeichhe mawl tak chuan an hmusit ve ngawt zel a nia…” Dinsanga chuan a han tih zawm a…

Hun rei lote chhungin van boruak zia a rawn inthlak a, thlifim ni lovin thli a thaw vur vur a, Nunoi sam chu a phe hlep hlep a, a meng nur sêng a. Chhum var chu chhum dumin a thlak tan a, vanlaizawlah pu vana thleng hnuh ri a ri kal ruih ruih a…ruah a sur dawn chiang mai!

Khaw awm dan tur chu hai rual a nih loh avangin Dinsanga chuan Nunoi kutah a chelh lawk a, “Haw ang” tih leh tlanpui a rual a, nui pah hian a tlanpui hlawk hlawk a.
Ruah a rawn tla tan nghal a, In an thlen hmasak ber bathlarah chuan an tlan lut a, an thaw dun hlap hlap a…

Nun hi chawlhna zawnga a phêt nasat a ngaih chinah chuan chawlhna zawngin khawi hmun pawh a pan tawh mai thin. Ipik ai chuan vavaih a thlang fo a, thinlung zalen loh avanga rûm reng ai chuan, taksa khawsak phungah awhawm lo mah se, zanlen châkin khawi hmun emaw chu a pan mai thin!

Mihring hian taksa na tawrh aiin thinlung ipik tawrh hi hrehawm a ti zawk fova, chu ipikna chu a tha lo zawnga a lan chhuah palh vaih chuan, zahpuiawm leh tenghneng takin mi a nun tir thei! Rilru hi thunun a harsa a, thunun lova a tha lo zawnga thlah zalen hi mihring ti thuanawptu chu a ni! Mitin hian, kan hmuh phak baka chawlhna thlahlelin ke kan pen a, zalen châkin kan nun kan thap thin; chu chu a ni mihring nun chu!

Ruah chu a sur tam fê mai, ruah bawhawk tam mumal taka sur a ni a; tuihawk chu a luang nu bat bat a, rial tlem a tla var pheuh pheuh a, khua pawh a vawt tan ta mah mah mai lehnghal. Nunoi chu a khur ru hleuh hleuh a.

“Naktuk hi i pasal boral champha a nia…”

“Nia…” a hmel chu a thutak hle a.

“Engtia hun hman nge in tum ang?”

“Ka hre lo…”

“Ah! Ka tihpalh a ni…sawi tawh lo teh ang…” tih pahin Dinsanga chuan Nunoi chu a han en a, a vawt ti hmel leh khur ru hleuh hleuh a hmuh chuan a nui sak a, a Jacket a phelh a, a hak tir ta a. Ani chu a lo nuih seih a, inbe lovin an ngawi dun ta vang vang a!

Hemi nî atang hian a ni Nunoi natna chu a rawn lanchhuah tan tâk…

Ruah a han a, Nunoi chu lengchhuak rei hman a nih loh avangin an haw nghal a; a diktak chuan, a fate pahnih a nute In lama an awm zawk avanga thil tul dang ti paha lengchhuak hman ve chauh kha a ni reng reng. A kal zawi hnek hnek hlein Dinsanga chuan a hria a, a rûkin a ngaihven ru reng a.

“Nuno, i tha em?”

“Umm…ka lu hi a na deuh a…a vawt ka ti riau mai bawk si…ka mur chem chem mai…”

“I khua a sik a ni lo maw?” tih pahin Dinsanga chuan a chal chu a han khawih sak a.

“Chulam pawh a ni lovang…ruahsur vang mai mai a niang…” a lo ti a, a nui seih a. An ngawih dun deuh vang vang hnuah, “A vawt riau mai…” a han ti leh ngawt a!

In an thleng têp tawh tih chuan Nunoi kechheh chu a zawi thut ni maiin a lang, a tluzawi hnak a Dinsanga taksa lam ngheng deuha kal a nih avangin a tluna lo hlauh. A meng dava riai a, a mitmeng a dul hnek a, Dinsanga chuan koh mawlh mawlh pahin a han sawi a, ani chuan dul hnak hian a rawn melh hram hram a, a nui seih a a maimi’chhing ta riai riai a…

Aizawlah an phur chho a, Civil Hospital-ah karkhat zet chu a awm; a natna erawh chiangtaka han sawifak tur a awm lo a nih hmel. Karkhat hnuah dam tha takin a chhuak a, a hnu thlakhat vel chhung chu insawiselna nei lovin a awm ve leh tawh. Mahse a cher kiam a, a mitkhur a thûk kêk a, a mit a dum val kelh hian a hriat bawk! A fate pahnih chu a lo en leh ngawih ngawih thin a. Dinsanga pawh zantin a leng a ni ber mai, buai avanga zan hnih khat a leng lo zeuh zeuh tih loh chuan Nunoite Inah chuan a In pakhat niawm fahranin a awm tam a, an nufa ho chuan an hlimpui tak 6zet!

12 Febuary, 2017(Zirtawp ) zan a ni a. Dinsanga chu Facebook lamah a online tui hle a.

“Khawngaihin ka thu ziah hi min lo post sak thei ang em? Thil tak tak a nih a vangin ka post a rem lo tlat a!” A inbox chu a han en a, a hnuah hei hi a thawntu ngai chuan a rawn thawn leh a; chu chu hei hi a ni…
* * * * * *
“He thu hi tuemaw talin hlawkpui nan leh chak nana in lo hman ngei theih nan ka rawn sawi a ni.

“Tunlaiah nula(kei chuan nula pawh ka ti lo) leh mi pawmlai inngaizawng sawi tur an awm ta nual mai; he’ng ho hi chu mi pangai pha zân lo an ni ti ila a dik ber ang. Heti ang ka hmuh hian ka lo thinrim thin, a taka tawngtu ka nih avang hian a nâ em em a, khawvelah hian a aia nâ hi a awm dawn emaw ni le ka ti thin; heti ang tuar hoten ka chanchin atanga chakna in neih theih nan ka han sawi ve ang’e.

“Kum 12 kal ta khan pasal ka nei a, kan hlim hle. Min hmangaihin min duat hle a, engkimah min ‘care’ a ni mai. Tichuan hun a lo kal zel a fa 2 kan neih hnu chuan ngaihzawng naupangtê min neihsan a, buaina neuh neuh kan nei chho a; an inngaizawn rei hnu chuan a bialnu chuan kan nupa inthen tir chu a tum ta hle mai a, kan nupa pawh kan intithiam lo ta fo a, ka pasal chuan kut min thlâk ta reng mai bawk.

“A bialnu chu nei tura ka tih pawhin, “Heti ang hmeichhia tu’nge nupui atân duh ang” a ti tlat zel a. Kei chuan, “A nih leh then la” ka ti a. “Min then duh lo a, ka laka a inphalrai duh ahnu” te a ti thin.

“A tawi zawngin sawi ang aw. Zan khat chu nasa takin kan inhau a, “Chhuak rawh” min ti a. Ka tlawmla hle mai. Tichuan ka chhuak ta a, kan In pawh tlawh lovin Ka Pu te Inah ka kal hmasa a, anni hnenah chuan ka chanchin zawng zawng ka sawi a, an thinrim lutuk chu a tukah bungrua la turin kan kal nghal a. Lâk an lo phal lo a, ka pasalin nasa taka ngaihdam min dil vangin vawikhat chu ka haw leh a. Thla a vei a, kan hlim dun ta hle mai, min ngai em em a; a hnu thla 5 vel ni tain ka hria, ka pasal Phone-ah chuan a bialnu bawkin a rawn biakna, “Ka ngai che, in hmu ang, in nu chu then vat vat rawh” tih hi ka hmu leh ta a.

“Engmah sawi lovin ka hmelah lungawi lo tih hriat takin ka awm a, a hnu karkhatnaah chhuak hlen tawh turin ka chhuak ta ni. Ka chhuahsan zan chuan na ka ti hle, kan inngaizawn atanga kan inneih nîte, hlim taka kan inkawmte leh ka ngaihtuah ngai loh leh ka rin phak loh thil ‘Uirena’ hialin kan nupa min then tir dante ka ngaihtuah a, a na vawng vawng hi a ni tawp. Mahse maw thiante u, a mak lutuk a sin, khami zan bak kha ka tap lo a sin, ka lunglen dâwn apîangin hrehawm min tuar tir hnem zia ka ngaihtuah lêt a, ka ngai lo reng reng.

“Kha’ng ka hrehawmnate kha kan inthen huna hrehawma ka awm loh nan Pathian hian min lo ‘training’ tir a lo nia; ani kha chu khami zan atang khan hrehawm reng rengin hun a hmang tih ka hria a. A bialnu pawh chu a nei duh ta chuang lova, an inkawp laiin midang fa a pai san a, a fa paina nen an innei ta ni awm e. Ka hriat leh zel dan phei chuan, kha nu, ka pasal nena min pawtthentu kha a pasalin a lerhsan reng mai an la ti zui! Chu chu a ni mai a sin! A turah a seng chiang hle a ni.

“Deusawh tak taka, “I pasal khamkhawp pawh i pe thei lo, a hmangaih che avanga nei che a ni lo!” tih leh tawngkam na tak tak danga min tawngkhum ham ham lai kha ka ngaihtuah lêt a, ka khawngaih zawk. Kei chu ka fate leh kei min hmangaih em em tu kawppui neiin hlim takin ka awm tawh a, ani chu bul a tan ve dawn chauh si a…

“Chhangchhiat buai laia pasalte hmeichhe dangin an lo ngaizawng reng mai hi a manganthlâk zia chu a hre chiang tawh khawp ang!

“Hetia ka han sawi duah nachhan chu, keimah anga harsatna namen lo tâwk in awm thin tih ka hria a, ka khawngaih lutuk che u hi e…a nâ a ni! Fate leh inchhung enkawl ngai, chutah, pasalin ngaihzawng a nei a, a khât tâwka an bialnute deuhsawhna han dawn reng mai changte chuan nulat laia min duh ve deuhtute kha kan ngaihtuah kir vawng vawng zel mai a ni.

“Inthen hi a tha lo a, Pathian hmaa thutiam tichat hmasatu phei chu an vannei duh lo khawp mai; mahse, loh theih loh chinah, pasalin ngaihzawng an neih reng a, kut min thlâk reng mai chuan, “A tâwp ta” a tih loh theih bik loh a ni.

“Nuthlawi nih kha ka hlau thin hle; mahse, mi thenkhat awm khaw loh vang emaw, pasal neih awmzia hriat loh vanga lo thlawi ta ni lo…’uiresan’ nih avanga thlawi hi a lo zahthlâk lem lo khawp mai. Hei, tunah fa 3 ka enkawl a, pasal tha tak, min hmangaih em em tu, ka hun kal tawhte avanga min lainat leh khawngaihtu, min chawm zo bawk si, ka fate 3 tâna hringtu pa ang chiah ka nei bawk. Khawvel hi amah vang hian nuam takin ka hman leh phah ta; engkim kan ti dun a, kan inneih zana ka bula a thusawi te hi, “Bawihi, kan hlim paw’n hlim dun ila, harsatna pawh tuar dun ang aw; engmah nangmahin i tuar ka phal lo. I fate tân pa tha tak ni turin ka intiam e” a ti thlap mai.

“Tuna hian amah nen fa 1 hmeltha deuh, apa ang deuh kan nei a; tichuan, fa 4 kan nei tihna a nih chu.

“He’ng ka thusawite hi, pawmlai nei si ngaihzawng neite, mi nupa tibuai mêkte, Kawppui ten an lerhsan avanga beidawng tawhte tân hlâwkna lo ni mawlh rawh se”

* * * * * * *

Chu hmeichhe inpuanna a inbox dawn chu a siamrem zung zung a; hawrawp tlem tlem thlak leh thumal dik lo thenkhat siamthat tih loh chu a rawn ziah ang ang chuan group lamah a post sak ta nghal a. Chutih lai chuan a mesenger tone hriat than tak chu a rawn ri a; Nunoite Inah zan thum ngawt a leng hman tawh lova, a ngai tawh khawp mai.

A inbox-ah chuan, “Mizo-Laldinsang, rawn thlâwk phei nghal rawh…!” tih hi a lo awm a, ‘angry emoja’ a awm tel vût mai bawk!

Dinsanga chuan ‘smiling emoja’ hi a va thawn ringawt a…

A hnu lawkah, “Nui ringawt suh…i hre ve tawh khawp ang…!”

Dinsanga chu a nui sak a; a ngaihtuahna chu Nunoi nena an inkar chuan a luah zui a.

A thinlung a pe a, a hmangaih a ni. A nihna engkim hi a nih angin a pawm a, a tâna din tlat a duh bawk; mahse, a ngaihtuahna a kal thui chang chuan amah zawk hi Nunoi tân a induhkhawp lo fo thin a!

Tun dinhmunah pawh nuamsa tak, hrehawm kalsan leh taksa khawsak phung, sum leh pai chena nuam sa taka siam theih a duh hle a; a nupui a nih hma ngei pawh hian chu chu tih a duh! Mahse, a tun dinhmunin a zir bîk lova, ama mimal sum leh pai khawlsa ve pawh an chhungkaw tâna a hmanral a ngai fo a; an inchhungkhurah natna harsatnain a tlakbuak mêk vang a ni!

Hmeichhia hi sum leh pai hmanga tlawn emaw, pawhbeh emaw, thilpek emaw hmanga ama lama phuarbeh luih hi a damchhunga a tihduh ngai miah loh tur thil a ni tlat a! Mahni neih sum leh neih thil hmanga hmeichhe rilru hneh tuma tan lak leh, dinhmun sânna hmanga bem thluk tum hi a ngaihnep zawng tak thil a ni bawk! Mahse, Nunoite nufa ho tân hian a neih ang ang chu a ui hauh lova; a rilru hneh tumna ni lovin a hmangaih avang zâwka a thinlungin ti tura a nawrna vang zawk a ni! A theih chhung chu, nei lo mah se neikeh chêta chêt zel hi Nunoite tan pawi a ti thung miah si lova!

Mak tak a ni! Mak tak!

A ngaihtuah thui zel a- a chang chuan ngaihtuahna dik vak lo puin, Nunoi hian mihausa tak, nuamsa tak leh sum leh paiah pawh vur hneh hlêtu tawng zawk se tih ngaihtuahna a lo lût a; chu a ngaihtuahna chu amah vek chuan a pawm loh avangin ngaihtuah tawh loh tumin a lu a thing nawk nawk thin! A ngaihtuahna engkim chu amah Nunoi a hmangaihna thinlung atanga lo chhuak a ni thung si; mahse, dik ang taka lang, ngaihtuahna dik vak lo chu a awm tih pawh a hai lo!

A messenger tone chu a lo ri leh a…

“Min reply ta cheee…MIZO LALDINSANG…!”

A nui leh sak a; amah nena an inkar a ngaihtuah nasat aleiah Nunoi inbox chu a lo la reply miah lo tih a hre chauh a, “Tihpalh…ka beng ka pawt aw…”

“Nui ziah suh…rawn thlâwk phei nghal rawh…!”

“Aw le…ka rawn thleng vat ang…”

A chang chuan amah hmu tura a kal zing deuhte hi a han tîm leh deuh thin a, midang mitmei a veng lo thei lo; amah avanga mualphona a tawn a hlau thin a! Mahse, amah a thlakhlelhna chuan kal lo thei lovin a tur kal leh nge nge thin. A thlahlel a, a ngai a, a tun dinhmunah phei chuan mamawh a inti hle bawk si a!

A insiam sawk sawk a, a awm a nawm vak loh avangin kawrlum a ha a, a Jeans a inthawlh a, Converse a han bun a, a hrui chu suihpâr lovin a bilh tha thlap a, “Pawi lo…naktukah ka zo hman dawn tho a lawm” tih sap pahin Nunoite In panin an In chu a chhuahsan a; kawngpuiah chuan a kal thauh thauh a…

Hmangaihna kawngah hian harsatna paltlang eih lova he kawnga kaltluan an awm lovang! Eng emaw harsatna hi tawh tur a awm fova; a chang chuan kan hmangaihte kan hmangaih avangin, an thatna tur nia kan rin kan duhpui luatah, ngaihdan dik vak lo puin kalsan mai duhna rilru kan nei thin; chu chu mite paw’n an lo nei fo mai! Mahse chu chuan inhmangaihte inkarah thil tha a chhuah vek si lo; thinlunga inthlahlel leh khawhar ru takin an nun an hman phah fo zawk si a ni!

Dinsanga kawnga a kal lai chuan a massenger tone a lo ri leh a; a han en a, “MIZO-Laldinsang…i va rawn thleng har ve a…!”

Dinsanga hmingpum hi, ‘Laldinsanga’ a ni a, ‘Mizo’ tih hi Nunoi phuahbelh, a koh fiamna a ni!

Dinsanga chuan a reply vat a, “Min nghak rei tawh lovang…ka hmu chak lutuk tawh che…”

“Hmm…!”

A phone chu a kekawr iptea khung pahin, “Hei hi, ‘Kan nun lairil thawnthu’ chu a ni a…” a ti rilru a…Nunoite In panna pêngah chuan a peng ta a…

An In a thlenthlâk hma deuhin kawngpui atang chuan an rawn au a, a han hawi chhoh chuan an YMA President a lo ni reng mai. “Dina, tun mai khan Pu Thansiama a boral a, an In i zuk singsa lawk ang hmiang” a rawn ti a. Nunoite In pawh lût hman ta lo chuan mitthi In chu a pan leh ta rih a; Darkar khat dâwn hnuah chauh Nunoite Inah chuan a kal ta a ni.

A han lût chu Nunoi fanu upa zâwk Siamsiami chuan a kutah a lo kai chat a, “Âpa Dinsang, ânu kan kaitho thei lo!” a lo ti a!

Dinsanga chu khum lamah a kal vat a, Nunoi chu kaihthawh a va tum a, ko mawlh mawlh pahin a sawi nawk nawk a; mahse a chhang miah lo! Hlauhthawnna hlirin a khat a, a mar a han en a…a tâwp tawh! A kal tawh! A liam tawh!

Hamhaihzetin a awm a, Nunoi fanu pahnihte chu a han en a, a mittui a tla ta zawih zawih a…

“Heyyy…i phakar lutuk aw…!!! I hriat kha, ka bem dawn chea ka zah zia kha; ka thinlung khan min tur et et mai bawk si! Zak tak, tak tak, sak tak sia ka tawng chhuah laia i mi dawnsawn dan hmel awmzia, duhawm leh ngaihawm si zia kha! Nun zir ila, chhir ila, chhiar ila, harsatna pal dun ang tih thinlung kan put dun laite kha…i hriat reng kha aw…i phakar lutuk, nangmahin kal daih bîk suh…hawilopâr thliaka lunglohtui i dâwn tur ka ngai ngam teuh lo a nia! Hringlangtlâng i chuana min rawn thlir hun chu i mi hriatna thinlung bo hun a ni si ang…phakarnu, kal daih bîk suh…!!!”

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x