NULA VIRGIN LO INPUANNA

Tunah hian kum 26 mi ka ni a, kum 19 ka nih lai khan ka thianghlimna ka hloh a ni. Ngaihzawng ka neih khan sex hman ka duh loh avangin mi pahnih ka ṭhen tawh a, chung mi te 2 chuan sex an hmanpui theih an nei ve ve. Pakhat te kha chu an inru a, pakhat te kha chu a lo rai avangin. Chuan, pakhat chuan “sex min hmanpui duh ni la chuan nupui dang ka neihsan lovang che” min rawn ti nghe nghe.

Chuan, kum 19 ka nih khian ngaihzawng ka nei leh a, kei aiin a upa zawk bawk. Nupui/pasal neih hmaa sex hman ka duh loh thu te, ka ngaihzawng hlui te pawh ka ṭhen hmak thu te ka hrilh a, ani chuan “sex hman chuan kan inkar a tinghet sawt dawn asin, i ngaihzawng hlui te pawn sex an hmanpui theih a nih chu nupuiah an neih, sex ber hman tawh chuan a inṭhen mai mai theih tawh hleihnem” a tia. Kei tleirawl, ngaihtuahna la hmang thui thiam lo tan kha chuan thil ni awm thei tak kha a nia. Kan inngaizawng rei a, min thlem min thlem a, hmin hun ka lo nei ta a, ka nuna ka inchhirna ber a thleng ta.

Chuan inneih min tiam a, “tuna i zirlai hi i zawh hunah” a tia. Zir zawh chu sawi loh, ka zir zawh hmain min ṭhen a, ngaihzawng dang a nei a, ka rilru kha na em em a, min hmusit a ni tih hriat tak mai a, “sex hman i chak changin min rawn be ṭhin mai dawn nia” tih min rawn thawn te khan min van ti tlawm vawng vawng tak em! Khatih lai khan, keimah chauhin, tuma hriatpui loh hrehawm ka tuar a, school tlanboin councelling centre ah khan a rukin ka kal thin.

A tawi zawngin, kum 2 hnuah ngaihzawng ka nei leh a, ka nihna zawng zawng ka hrilh a, ani chuan thiam takin, chhuanlam ṭha tak siamin min ṭhen a, he thil ka tawn hian min ti beidawng zual a, insit a na a, pasal ka hmu zo dawn lo a nih hi ka ti rilru a. Ka thianghlimna ka vawnghim thei lo kha nep hi ka inti ngawih ngawih mai a ni. Mahse, chutiang nun chu ni mah ila, Pathian kha ka bel tlat a, a chhan chu Pathian tello inngaihzawnna hi a tlo lo tih hrechiangtu ka ni miau a.

Chuan tunah hian ngaihzawng fel tak mai ka nei a, kum 3 dawn chu kan inzui ta. Ka nihna hi a tirah chuan ka zep ve a, mahse a hnuah engkim ka hrilh a, “i duh chuan min then mai rawh, mahse ka nihna avangin min timualpho lo la” ka tia, mahse “ka ṭhen lo ang che, chu thil avang mai mai chuan ka then thei lo che. Mahse ka rilru erawh a na hle” a tia, a awm ve reng. Vawiin ni thleng hian ka nunhlui min sawichhuah sak ngai lo, min zawh belh ngai bawk hek lo. Tin, vawi khat pawh hi sex hman chungchang min sawipui pawh hi ka la hre lo. Kan hma hun lehzel tur erawh Pathian thu thu a ni.

Ka thiannu pakhatin, “mizo mipa, ka virgin loh vanga min hmusit leh si tu neih ai chuan, ka virgin leh gin loa buai lo hnamdang hi ka duh zawk” a tia, negro kha pasal ah a nei hmiah mai a, mahse ka tum ve hauh lo. Mipa te u, hmeichhe virgin tawh lo hi kan tlawm ngawih ngawih tawh a, hlutna nei tawh lo kan ni tih hi kan inhria a, kan hlutna ber laksak kan ni tawh tih hi chhungril hian a hria, kan chapo ngam ngai lo.

Mahse, hmeichhe virgin tawh lo sawi ngam loh ka hrilh ang che u, kan thianghlimna min laksak a, min bumtu hi e, engtik lai mahin kan HERO an ni ngai lo. Kan hmangaih tlat turah te, an pa kan ti ber turah te, tu mipa mahin an khum zo lo turah kan ngai ang hian engtin nge in ngaih tlat le. Hetiang mipa hi maw, kan mi huat ber an ni. Kan thianghlimna min tihchhiat sak a, kan thinlung hliam a, min diriamtu hi e, Mipa kan ti lo. Kan hua asin. Kan hmangaih reng lo nasa lutuk. Chu ai chuan maw, kan nihna engkim hre chunga min hmangaih theitu mipa hi kan zah a, kan ngaisang zawk.

He thu post hi, nula/tleirawl virgin tam takin in chhiar ngei ang. Pasal in neih hma chuan in thianghlimna kha hloh suh u. Hmeichhia hi e, kan thianghlim tawh loh chuan hlutna kan nei tawh lo. Kan thianghlimna hlutzia hi kan thianghlim tawh loh hnuah, inchhirin awmzia a neih tawh loh hnuah a hlutzia hi kan hrechiang tulh tulh a nia. I bialpain sex hmanpuiah a sawm tlat che a, sex in lo hmang a nih chuan i bialpa chuan a duh emaw duh lo emaw, zui haw hmiah ang che. Tin, i lo tisual tawh a nih chuan tisual nawn tawh miah suh. I lo tih sual tawhna kha i nun siamṭhatuah hmang ang che.

Hei hi ka tawn ngei a ni. Midang kaltlangin ka rawn post a, ka chanchin hi midangin hlawkpui nan in lo hman ngei ka beisei. A bik takin, nula leh rawn tleirawl chho a, ngaihzawng rawn nei thar ho kha ka thu sawi khi zawm rawh u. In awih loh chuan e, ka tawn ang bak hi tawn tur in nei lo. In awih chuan in tan a ṭha nga, in inchhir ngai lovang. I thianghlimna roh la, nupui/pasal i neih hma chuan sex hmang suh.

Share this post:

You May Also Like

1
Leave a comment:

avatar
1 Comment threads
0 Thread replies
1 Followers
 
Most reacted comment
Hottest comment thread
1 Comment authors
Kca Recent comment authors
  Subscribe  
newest oldest most voted
Notify of
Kca
Guest
Kca

A dik khawp mai. Mahse, hmeichhe thenkhatah chuan a ni lem loin ka hria.