NU PHUNCHIAR KHA NU ZAIDAM TAK A LO NI

By Hausanga Hauzel

Kan chuanna motor a tluan loh avangin, chhun pachan lai takin thingtlang khaw pakhat, in sawmruk bawr vel tur awmna khuaah kan ding ran mai a. Driver-in motor a siam buai em em lai chuan, tih tur hre lovin ka hawi kual ve mai mai a; chutih lai chuan, naupang sikul bang hi an rawn haw nak nak a, naupangho hnungah chuan zirtirtu pali/panga awm vel hi an lo kal bawk a. Zirtirtu lo kalte zingah chuan ka ṭhianpa High School kan kal laia ka kawm ve ṭhin kha a lo tel reng mai a. Kan han inchibai a, chanchinte kan inhrilh hnu chuan an in lama chawl turin min hruai a nghal a.

    Tum anga kan motor chhia kan siam ṭhat leh theih mai loh avangin, ni thum lai mai chu khuaah chuan kan cham phah ta a. Ka ṭhianpate chhungkua chanchin a chhia a ṭhain, ka hriatchian phah hle thung a ni.

Ka ṭhianpa hi he khuaa piang leh seilian a ni lova, zirtirtu han thawk turin he khuaah hian kum tam vak lo liam ta aṭang khan a awm ve chauh a. Mahnia parawlin, mi in luaha a awm kual zar zar hnuah, tunah chuan hemi khuaa pa neinung pawl ber fanu chu nupuiah a nei a, fate neiin in leh lo pawh an bengbel hle tawh a ni. Chhungkhaw khawsa thei pawl tak an ni a, Kohhran leh an khawtlanga a langsar pawl tak a ni tawh a. Mahse, a nupui phunchiar em avangin mi ngainat an hlawh vak lo chu pawi ka tihpui hle mai.

Ni thum emaw lek an ina ka cham chhung chuan vawi tam a phun hman a, a nupui phunchiar avangin ka ṭhianpain hrehawm ka tih a hlauh vanga a inthlahrunnate chuan min tihrehawm zawk a. Naupangin an zar buai emaw, an ninhlei emaw, rawng bawla buai emaw vang mai maite hian a phun a phun peih a, a taima ang reng hle chuan ka hria.

Kan kal leh hma chiah zan chuan ka ṭhianpa nen inkawm falna hun ṭha kan nei hlauh a. Ka ṭhianpa chuan a nupui phunchiar vanga vawi tam tak a zah tawh thu leh a tihngaihna hre lovin a vuak ringawt thu te, a sim phah chuan si loh thute chu beidawng takin min hrilh ta a. Fate avanga inṭhen lo mai niin an lang a, nupa inthlakhlel tak zawng an ni lo tih a hriat theih a ni.

Kei chuan nupa inṭhen ṭhat lohzia te, nupui fanaute chu mipa kuta awm an nihziate ka hrilh a, nupui fanaute awmdan siam ṭhat hi ṭhenawmte mawh ni lovin, pa ber mawh a nihziate ka thiam ang angin ka hrilh a, a nupui phunchiar reh dan tur ni-a ka hriatte chu ka hrilh ve bawk a. Kal lo thei kan nih ni si lova, kan tum lam panin kan kal leh ta a, haw lamah lah an khua chu kan chhunpelh leh si a, an chanchin ka hre lo ta vang vang a, ka ngaihtuah chhuah chang chuan ka vei ru hle ṭhin a ni.

Ni khat chu, rin loh takin ka ṭhianpa nen chuan Aizawl Dawrpui pheiah kan intawk hlauh mai a. Thingpui dawr-ah inzui lutin an nupa chanchin ka hriat chak em em chu tihian min hrilh ta mial mial a.

“Tlai khat chu, ni dang aia ka haw tlai avangin, kan nu chu a lo phun a lo phun leh tawhin ka ring a. Pawnah naupang hovin min bawr laih laih a. Ka fanu chu pawm pahin, ‘Hei hi a hmel a ṭha a ni, anu a la chhun ang a, nula fel leh zaidam a lo ni dawn a ni’ tiin ka fanu chu ka sep kang vel a. Ka nupui chuan hlim hlel pu takin zanriah ei tur a siam nghal mawlh mawlh mai a ni.

Naupang hovin an zar buai changa a phun dawn te hian, ‘I nu hi a nulat lai pawhin nula zaidan leh fel a ni a. I ninhlei em avangin hreh tak hian a phun leh mai ṭhin a nih hi. Mi nute chu ni se, an phun nasa ṭhin ngawt ang. Fel takin awm ula, a thu hi awih vat vat ta che u,’ ka lo ti thuai ṭhin a. A phun zawm ngai reng reng lo.

Khual khuaa chhungkhat laina leh ṭhainte an rawn zin chang a, ‘Hei hi maw in nu chu, khawilam mi nge?’ tia min zawh changte hian, ka nupui chanchin chu, a nu leh pa, a pi leh pute aṭanga min nuntluang leh zaidam tak chhungkua an nih thute ka sawi ziah ṭhin.

Chuti ang te te chuan, ka nupui chu a nungchang nasa takin a siam ṭha a. Tunah chuan a phun ngai ta reng reng lo. Kan khaw nu zaidam ber a ni hial tawhin ka ring. Kan nun pawh a hlimin mi pawhin min awt viau tawh a sin. Ka lo ṭhen mai ang tihte ka hlau hnuhnawh khawp mai. I thu min lo rawn chu ka ṭangkaipui ngawi mai, lo zin leh teh, arpui tui lai chu i hlawh hrim hrim ang,” min ti a.

Hun remchang chu nei thei ila, zin leh pawh a chakawm khawp mai, nu phunchiar kha nu zaidam tak a ni tawh si a.

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x