NU, MIN CHHAN RAWH

Tlarana Michimawm Chenhrang
By Jeel Tochhawng Mag

Ka nu duhtak,
Awm lo ata awmah min siamtu ka nu.. ih maw, ka pa nen in mutdun atanga ni reiloteah khan, nunna neiin ka lo awm ve asin. Tuiril mai ka nih lai pawh khan nunna nei ka ni ve tawh asin Nu…

Ka nu, ka nu neihchhun leh ka nunna i ni asin. Ka taksa insiam tura thisen khal ka lo nih tirh a, i pum chhungah ka awm ve a ni tih i hriat khan ka hlim lutuk asin. Mahse Nu, i pum chhungah ka awm tih i hriat khan ngati nge i rilru a hah em em a? Nu, i rilru hah ka hmuh khan ka khawngaih lutuk che asin, lo piang tawh ni ila, ka hnem ngei ang che.

Nu, i awmdan hi ka hlauthawng, ka pa bulah i va kal a, min pai thu i hrilh khan ka pa chuan “TI TLA RAWH (THAT RAWH)” a lo ti che a nih kha. Nu ka hlau a nia, min en teh, hei ka taksa pawh a insiam ve tawh asin. Vawi khat tal i fa hmel hi min hmu chak lo em ni Nu? Ka pa thusawi kha ngaithla suh aw Nu. Ka nunna zuah hram rawh, ka ti lungngai ngailo ang che. In khawvel eng hmuh ve ka duh a ni Nu.. khawngaihin min ti lo hram rawh.

Ni lo ni lo, nu nang leh zel pawn min thah i duh a maw..!! Nu, i thiante, i rawngbawlpui te laka mualpho leh lehkha zir zawm theih loh i hlauh avangin min tihhlum i duh a maw? I kawng daltu ka ni dawn lo asin. Nu, kei chuan i fa nih ka zak ngai lo ang.

Nu, ni reilote chhung chauh nunna neiin ka la awm a, thih ka la duh lo. Nu, naupang dangte anga tuallai a infiam te ka chak ve a, nu hmangaihna dawnte, i hnute tui hne paha i mal chungah thlamuang tak a mut te ka chak ve asin; Nu, min pian chhuahtir hram rawh, hma hun ka la ngah em mai.

Nu, i lakah enge ka tihsual a, i eng pawi nge ka sawi le? Ti nge ka chungah hetiang thil rapthlak tak tih duhna thinlung i neih tak mai le? Khawvel eng hmuha nu hmangaihna thlum tak dawn ka thlahlel ve tho asin. Nu,i fa mangang au rawl hian awmzia a awm si lo a maw! Ka hlau tak zet a ni, nu, kawng dang a awm hram lo a mi?

Nu, ka ngen lawm lawm che pawhin kawng dang a awm si lo maw?

Awle, a tawp nan, zawhna ka zawt ang che anga min chhang rawh aw Nu…

Nu, min that ta la, khawvel kin hunah, i duh loh, i fa hi ka hmel mi rawn hmu ngam ang em?
Naupang tual chai hlima nui thawm i hriat leh i hmuh chang ten min lo hrechhuak ve thin ang em?

Anu, i ril a rah ngei vawi khat mualpho i hlauh avang a ka nunna hlu tak i tih tawp hnuah i la nui thei dawn a mi?

Mahni fa ngei that chungin Biak Inah rilru dam takin i la kal thei ang em Nu?

Nu, vawi khat tal ka hmel hmuh te i chak ve lo a mi?
Nu, ka nu duhtak, khawvel hmaah i fa hi vawi khat te pawh min mualphopui ngam lo a maw Nu..?

NU MANGTHA AWWWW…

Reilote chhung nunna neia ka awm chhungin, i chakna leh i nunna hmanga min damtir avang khan ka lawm lutuk; mahse maw nu, in nawmchenna avangin ka lo awm a, mahse, khawvel eng ka hmuh ve phal loin leh nu hmangaihna dawng hman loin, khawngaihna leh lainatna nei hauh lova ka nunna intihtawp avang khan ka ngaidam tawh ngai lo ang che u.

I fa atan a i duh loh leh i fa nih chak em em…

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x