NGAIHTUAH NAWN LEH TEH U…

Bumna ngaiah vawi engzatnge i la inbum tir dawn.

Hmeichhia chu bumna ngaiah vawi sarih an bum theih an ti.

Vawikhat bum i tawng a, i thiam loh a ni lo. An bum fo tawh che chuan i thiam loh ani tawh zawk tih hi i hria em le.

Tinge bum leh bawla i awm reng le?

A tan i neih sum leh pai i ui lova, i phak ang tawkin i tih theih ang ang i tihsak a, mahse i tan erawh a rinawm ta lo a, i na tlawk tlawk a, ani erawh a duh dan danin a tal a, i na tih reng a ngaihtuah lo, i hmangaih luatah i taksa i lo hlan tel bawk si nen, a kalsan hnuah che hrehawm ti reng rengin hun i hman phah a, ani erawh a na ve der si lo.

Hun a liam a, i rinloh deuhin a lo kir leh a, i hmangaih kha a la ni tlat si, a tawngkam thaah i tlu lut leh a, eng vanga lo kir teh tlat nge a nih tih erawh i lo ngaihtuah hauh si lo. Lo ngaihtuah ve la chuan bum nawn i ni lo ang a, i tap nawn fo lo ang.

I neih sum leh pai kha, a tan i ui lo tih a hria a, i taksa pawh a laka lo hlan tawhtu i ni tih hre rengin, midang lakah i pek ang thil a dawn theih loh vang te, a duh ang a hmuh theih loh vangtein, a tana ui nei lo, eng pawh lo hlana lo tihsaktu lam chu rawn hawi lehin, i lakah that a rawn chhuah der leh a, nang erawhin a inchhir vangah ngaiin i lo pawm leh tawp a, a hnu lawkah a ze ngai bawk chhuahin a kalsan leh che a, a ngaite bawkin i na leh ta a.

Thiannu… Han dawnve teh.

I neih sum leh pai chauh duh, i taksa chauh duh kha, i natpui leh thin dawn em ni? I tah lai te, i nat em em lai tea, hmeichhe dang kuaha hlim taka awm khan a hmangaih che i ring meuh maw? I taksa chu a tan nawmchennaah i siamsak a, i sum leh pai chu tute emaw thil tihsak nana hman turin i pe a ni lek zawk asin. Dawn chiang la, thil zahthlak tak anih zia i hre mai ang.

I tah leh i nat pawh pawi ti lo a, eng pawh atan i tihsak pawh hrethiam duhlotu che kha chuan a hmangaih lo tawp che tih hria la, i sum zawng zawng pawh pe la, vawi tam pawh mutpui mah la, duhzawng a tawn hunah a kalsan leh tho ang che.

Hetiang dinhmunah i ding a, i na a nih chuan tuar tlang la, lo let leh pawh ni se, a laka i lo inhlan tawh vangte khan lo tlawm, lo zawr duh tawh reng reng suh. Pasalah pawh nei la, a rinawm tak tak kher lo ang.

Hmeichhe awmnem zawk te u, mipa tha lo hi inbum nawntir fo tawh lo teh u.

*Mafaka Aleks Ralte*

Share this post:

You May Also Like

Subscribe
Notify of
guest
2 Comments
most voted
newest oldest
Inline Feedbacks
View all comments
Mali Ralte Khawlhring
Mali Ralte Khawlhring
2 years ago

Tha ltk.

2
0
Would love your thoughts, please comment.x
()
x