MO THA LEH FEL

Ziaktu : Nupa Nun group member pakhat

In rin loh lampang takin ka sawi mai thei, mahse pawimawh ka ti si.

Mo hi 3 ngawt kan kawl a, nuta 3 ka nei tihna a nih chu. Kan vengah chuan keini chhung chiah hi mo fel nei thei min ti thin a, mi hian kan mo ve hi chu chuti khati in mo te hi chu an va han felin an va tha bik tak em an ti fo thin. A ni reng bawk a, kan mote hi an fel a, kan nihlawh takzet a ni.

Mahse, kan thenawm a an mo te ka kawmna leh anmahni mo kawltu te ngei titi ka ngaihthlak atang hian mo fel kan neihna chhan hi kum 10 vel chhung ka zir chian hian ka hrechiang viau tain ka hre ve a, chung chu ka hrilh ve duh che u a ni. A tam zawk hi a mipa lam chhungte thiamloh a ni ve tlat tih hi. Kan fel ber chuanglo mahse fel vak pawh a ngai chuang lo, thil tih har lo leh nachang kan hriat loh te kan tih duhloh ho te te avang hian kan mote hi an sual emaw kan lo ti zawk thin a lo ni.

* Mo te hi an lo lawi luh hian an mizia emaw an nungchang lo zirchian hmasak tum vak hi a ngai lem lo. A pasal a chhungte hi a in neitu hmasa kan lo nih angin mikual an lo thleng a an tlangnel loh kan lo hlau a, tih tlangnel hram hram kan lo tum thin ang a, kan lo lawm thiam hi a pawimawh hmasa ber a ni.

* Thil engkim ti turin kan phut tur a ni lo. A neitu hmasa kan ni a, anni aia chet tam kan tum zawk tur a ni. Kan thahnemngaihna an hmuh chuan mi pangngai chuan min lo zawm ve mai. Phut tlatna rilru hian huatna a siam thin.

* An dam lohin ngaihsak em em tur an ni. An chhungte an dam loha duattu kalsanin kan inchhungah an lo awm a, an dam loha ngaihsak hi kan tih tur a ni.

* An nu leh pa te ina leng tura kan tirh fo zawk hi a pawimawh. A bikin an inneih tirhah fanau an neih hnuin an leng fo peih tawh tak tak lo. A tira phal lo ang taka awmho hian an tichak zual thin zawk. An hun pawimawhah emaw chhungkaw chaw eikhawmah te an chhungte chaw eia a sawmsak te hi an hlimna ho te a ni.

* Chhungkaw tawngtainaah an chhungte kan tawngtaipui hian an thla a muang a, an hlim thin.

* Nau an paiin kan ngaihsak em em tur a ni a, nau pian hun leh hnu a an mamawh tur hi a pasal chhungten kan ngaihtuah tur a ni.

* An fate chungah thuneih tum loh a tha. Lo hmangaihpui mai hi a tawk a ni. An fate kan hmangaih tih an hriat chuan min hmangaih mai. Phut let nei tlata nau awmsak tam tak leh fak hlawh duh ngawr ngawr avanga awmsak a an mote chunga tuan leh si tam tak ka hmu ve ta.

* An fate damlohin kan ngaihsak tur a ni. Kan thinlung zawng zawngin kan khawngaih a ni tih kan lantir ve tur a ni. An fate hi mote fa emaw ti tlat an awm a, a ni lo, keimahni fapa fa ngei ani tih hi pawm tur.

* Nufaa inkawm hran emaw titi hran emaw an awm laiin tih loh tur a ni. Kan sawi ve duh chang a awm lo thei lo, an awm loh laiin a sawi vek theih.

* Kan fapa, kan nuta te pawh an fel famkim bik lo va, an nupui te fel famkim tura beisei bik loh tur a ni. That lohna lai inhmuhsak duh ni ila kan hmu ang a, anni pawn kan that lohna min hmu bawk ngei ang.

* Ei leh inah kan thliar hrang tur a ni lo.

A dang tam tak awm mah se, heng ka sawi tlangpui te hi mipa chhungten kan tih theih chuan tu mo mah hi an sual bikin ka ring lo. A sual duh talh an awm a nih chuan sangah pakhat pawh an ni kher lo ang. A dik tak chuan mo te hian eng teh vak an beisei bik lo, an inthlahrung a an inkiltawih ve reng tho tih hi hriat tur a ni.

An nupui te leh an fate in hmangaih thiam poh leh in fapa/ in nuta ten an hmangaih ang che u. Kan monu pakhat pawh hi nuthlawi a ni a, a mona hmasa te chuan misual kawlin an kawl tlat. An inneih dawn pawhin a chanchin tha kan hre ngai lo a, pasal hmasa chhungte thusawi leng vel atangin. Amah ngeiin fiamthuin ka u hriat hlau takin min enkawl dan ang hi chuan a hma khan min ti ve se inthen nachhan tur kan neih ka hre lo tiin fiamthu ti takin min hrilh ve tawh kan inngam em avangin.

Mo khawngaihthlak tak tak ka hmu hnem em em a, kei pawhin pasal neih hi ka peih loh phah a ni. Kan mo te nen hian kan inhau lo bik miah lo, mahse inhauh chang a awm pawn kan hmangaihna kan lantir hmasak phawt chuan an haw thei lo, nu leh pa pawhin min hauh kan haw rei thei lo ang hian.

Chhungkua anga lo pawm mai hi a tawk khawpin ka hria. Mihrang anga en tlat tam tak an awm bawk, hengte hian mo sual an nei ngei ngei. Mo fel nei tur hian thil harsa tak tih a ngai lo. Kan chhungkua an lo awm hma anga awm mai a kan unau kan fa anga kan lo en mai hian thil fel lo engmah a awm thei lo.

Awm ho dul dul ai chuan in in rel hrang ve then tawh dawn emaw ni le tih pawhin a duh lo leh hlau thawngah an tang zawk tlat nia. Chuti chung chuan inpui chang tur tih loh chu kum 5 aia rei kan bula awm ka pa hian a phal ngai lo.

Kan fapa/nuta ten nupui an nei ngam tawh a nih chuan nu leh pa ah an innghat tur a ni lo va, an enkawl tur chu an nupui fanau te an ni tawh a, keini aiin a tan an pawimawh tawh tih hi pawm bawk tur. Keini chu a thisen zawmpui kan ni a, engtikah mah kan inkar a chhe thei lo. Mo fel, lo nei vek tawh turin ka duhsak a che u.

Share this post:

You May Also Like

5
Leave a comment:

avatar
5 Comment threads
0 Thread replies
5 Followers
 
Most reacted comment
Hottest comment thread
5 Comment authors
Vanlalzawmi HnamteMasaiiXoree pachuauZariHT Tluanga Chc Recent comment authors
  Subscribe  
newest oldest most voted
Notify of
Zari
Guest
Zari

“A tam zawk hi a mipa lam chhungte thiamloh a ni ve tlat tih hi.” A dik ltk tlat
Ka chhiar lo ag tih ka hlau zawk

Xoree pachuau
Guest
Xoree pachuau

Tha hle mai,mi tam tak chhiar a tan lang sar euh a tar chhuah deuh va ka chak😊

Masaii
Guest
Masaii

Fapa pahnih kum khat leh kum thum mi ka nei a, an lo puitling ve anga mo neih hun a la awm ang he thu hi vawi reng theih ka duh zirtir na tha tak a ni. Zirtir na tha tak a ni e.

Vanlalzawmi Hnamte
Guest
Vanlalzawmi Hnamte

A dik khawp mai mo tam tak hi nulat lai pawh a fel tak2 te an ni a mahse an mo na in a zir miau loh avang a inthen hlen ta hi an tam khawp mai mi zawng zawng in hei hi chhiar vek se ka ti khawp mai