LABOUR MAI MAI!

Chhantea Pautu
Paradise Lodge
©
“Hey, Labour ho kha, helai hi rawn phiat fai ang che u” tia patling pui pakhatin hnuaichhiah àwkâ taka a biakna(thù a pe a ni ber) chu, “Awle” tiin tha takin a chhang mai a; mahse, “Labour ho kha” han tih tur êma tam chu a ni lo! A thawhpuite chu lang lo liamah an awm a, chu patling palian pui maiin a hmuh theih Labour chu amah chauh a ni si! Amah chhawrtu pawh a ni si lo va.

Chu Labour chu a ngaihtuahna a kal thui ta riau a; Labour regular a ni lo va, a hman châng chânga inhlawh ve mai thin a ni. Mi thenkhatin, “Labour mai mai” tih rilru pûa heti ang mite an dawr thin chu pawi a ti hle.

A thiltih lai chawlhsanin chumi te kawt zîmtèa Silpoulin bal hnawk nuaih chu a pawm khawm a, hmunphiah lain ngawi rengin a phiatfai ta a.

Labour mai mai thenkhat hi chu zirlai an ni a, an mamawh lei nan inhlawhna an dap a, theihtâwpin pawisa thawhchhuahna tur hna thawh tur an zawng thin. Labour mai maia kan ngaih thinte hi nakina kan ram kaihruaitu tur te an ni a sin!

Mi Hausa Rilru Dik Lo!
– – – In lian pui pui sain he ram, lirnghing nasat hle theihna hmunah hian i hnuai ami te tâna mangkhawng hlauhawm tak ni turin chhawng sang tak takin i tung khir eih uaih a, i In ban te kha a va han hrawl ngai em!

Mahse vawikhat chauh chu kha i In ropui leh ban hrawl tak takte kha uluk takin han en ve teh mah; Labour mai mai kuthnu i hmu ve thei em!? Kha i In ropui tak i en rual khân Labour mai mai thlantui i mitthlà ve thiam em!?

Vai Mistiri te chu hlawh sang pui puiin i ruai a, a hah zâwk leh thlantui far tam zâwk chu hlawh tlem zâwk Labour mai mai an ni! Ni e, i ngaihtuah chu ka hria a sin; Mistiri thiam chu a thiam ve lo mai thei e, a nih, Labour mai mai tel lo hian Mistiri hian a thawk kawp vek peih meuh ang maw!? Hlawh tal hi inthlau lutuk lo deuha tihdàn a awm ve lo’m ni?

I fapa rangkachak, a chânga i ngam mang tawh loh, i thawhchhuaha i lei sak Bike lawm em em maiin kut hmawr pawha a khawih hreh tur cement, balu leh rawra kha Labour mai mai chuan a dai bawrh bawrh a, a chawk kawi a, cement-in a kut zungtang hmawr leh ke zungtang hnuaite a ei pawp thliah thluah a sin; ih maw, slap chhun lai phei chuan a taksa pawpte chu a thip na têk a, lei rap tha ngam lovin a bai seih seih a, a tuk zingah sil thumin a tho zi thalh thalh a, chuti chung chuan Labour mai mai hna a thawh leh a ngai tho a sin aw!

“Ka fapa chu Labour a nih a ngai ve hleinem” i ti ang tiraw? Nia, a dik, hnial ngaihna che ka hre lo; mahse Labour mai mai dahhniam tur tawk lekin i fapa kha nangmah, a pa ngei enkawlna hnuaiah a lo seilian zel ang em!? Kut hnathawh hreh leh kut hna thawktute dahhniam tur khawpa rilru puthmang dik lo mi hausa fapa a ni palh mai ang em!? Labour mai maiin a sak In nuam leh ropui tak chhungah a cheng mêk a nih kha!

Mi hausa leh awmthei zawng zawng rilru puthmang hi a dik lo vek ka ti lul lo ve; a hausa chin tak tak phei chu in rilru a zau hle tih pawh ka hria; mahse chapo tawk lek leh an tha leh zung tel lo va an awm theih miah loh Labour mai mai te hnuaichhiah tawk leka inti awmthei ho hian an rilru puthmang an thlâk a ngai a ni!

Nu Leh Pate Hi…
– – – Labour mai maia tan hreh fapa nge i neih a, engmah thawh hreh lo, nula ten an hmusit deuh chung pawha Labour mai mai ni ngam fapa? I fapa chu eng ang mî-ah nge i chherchhuah? Engtin nge i fuih thin? A zirna kawnga i fuihin eng tawngkam nge i hman thin? Chu chu min hrilh thei ang em? Kut hnathawh hreh turin nge i fapa chu lehkha i zirtir a, a nunkawng engkim develope thei turin?

“Taima takin lehkha zir rawh, chuti lo chu hna i thawk ang, hlo i thlo ang!” tia fuih nge thaa i rin…
“Taima takin lehkha zir la; mahse hnathawh hi hreh tur a ni ngai lo. Eng hna pawh nise a tul phawt chuan thawhhreh neih loh hi mi puitling awmdàn a ni ngai” tia fuih…
Khawi fuihna thù zâwkin nge i fapa chu rilru puthmang dik pu tura chherchhuak ang?

I fapa i fuih dàn a dik loh chuan lehkha a zir zel anga, a thiam viau pawh a ni mai thei; mahse hnathawh hreh tâwka lehkhathiam, Graduate hna hmu lo laklawh ni si, Labour mai maia tan hreh lawi si fapa i chherchhuak ang! Inchei nalh taka khawlai lengin a thiante, Labour mai mai te chu a enhniam rilru ve ngawt ang a; chuti ang mi chuan Labour mai mai hmusit thin fapa a hring leh mai lo’ng maw!?

Awmtheiin chàwmzo hle mah la i fapa chu Labour mai mai nih tir ve zeuh zeuh pahin kuthnathawh hreh lo turin kaihruai la, Lehkha zira mi thiam a lo nih a, politic khela ram Hruaitu a ni hlauh a nih pawhin kuthnathawktute zahna neiin ram a kaihruai anga, mipuite hriatthiamna thinlung tak tak a nei thei ang!

Aw Nula…
– – – Cement, balu leh rawra chawhpawlh a chawk tawrh tawrh lai i hmu a, “Labour mai mai” tiin i ner ru em ni? Chhass atan phei chuan i iai deuh tiraw? Nangmah chawmzotu che a nih i ring miah lo a ni maw!?

I ngaihven chu, mi hausa fapa, Bike-a phur kual ziai ziai theitu che kha a ni mai thei. Hnathawk lo pawha eitur a hmuh theih avanga Labour mai mai zah derna eih pawh nei lo kha maw!

Kha mi hausa fapa, thawhrim awmzia pawh hre lo, mahni thawhchhuah ngei sum hlutna pawh hrethiam lo khawpa neikeh chêta chea a pa sum ringtu, tlangval a thawhchhuah ni lem lo va a lei Bike-a phur kual ziai ziai theitu che kha, nakinah inneiin, a pa sum a rin ngawt theih loh hun lo thleng se la emaw, ruihtheihthil bàwiha tângin chhungte pùr tawn reng renga khawsak ngaiin i nun chhungril kha retheihpui leh ta si che se la engtin nge ni ang!? Naupangtèin nuthlawi i ni hlauh ang’e aw!

Mi rethei nei rawh ka ti lam lam lo; zirlai ni chunga Labour mai mai ni ngam mipa puitling melhtài zâwk rawh ka ti mai a nia! Labour mai mai te hian an phu lo che a ni lo; nalh taka inchei chunga i bialpa nen Bike-a in leu ziai ziai lai khan thlantui farin a mamawh intum ve turin a lo thawkrim a, Labour mai mai a ni ngam a sin! Heti ang mi hi i îai a, i ner a a nih chuan Labour mai mai pawh phu phâk lo nula inchei nalh tak satliah ve mai i ni! Bike hnungah chuang la, fawr ziai ziai mai rawh lem!

Labour mai mai ni chunga lehkha zir tauh tauhtu a hlawhtlin nî chuan i bialpa nuamsa kha a lo OD tawh palh thei a nia…HIV avangin a nun a beidawng mêk maithei a nia…a awmdàn avangin a nu leh pa a timangang mêk maithei a sin!

Aizawl khawpui hi han fang ila, Sawrkar building hrawl pui pui te, mimal In hrawl pui pui te a ngir khep khup a, Aizawl khawpui plan fuh lo zet hmuntin mai hi ‘step thlarauin’ a fang a, step a awm tam em em; he’ng hi han thlir teh, Labour mai mai kuthnu a tel vek a sin! Labour mai mai tel lo va side drain siam a har a, Labour mai mai tel lo va In sak a har a, Labour mai mai tel lo va step siam te, lungrem te, culvert siam te, kawng laih te chu thil buaithlâk tak a ni ve ang! Labour mai mai thawhrim rahah i nuamsa ve chauh a nih lêk kha; hmusita hnuaichhiah hi i bat a ni lo, a phu tâwk zahna pêk hi i bat a ni zâwk!

Mi thenkhat chu nalh taka an incheite hian nula lakah an confi tlat a, suite an hâk zaih mai te hian nula melh an huai thin; Labour mai mai te zahawm zia ka hmuh châng hi chuan, kei, mi mak tak, nalh taka inchei aia hnathawh thawmhnaw ka inbela nula laka ka confi tlat mai hi ka herh pherh bîk vang a ni em tih ka inzâwt ve ziah; ka inchei chuan ka ni deuh huih zel!

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x