KOHHRAN DAN HMANGA INNEIHNA VRS MIZO SOCIETY

 Kristian denomination hrang hrang leh Kristian chiah lo te thlengin kan awm a. Kohhran chuan inkaihhruaina dan leh dun fel tak anmahniin an nei vek bawk a. Nupui pasal inneihna kawngah pawh kohhran mi deuh leh mi lo deuhte thlir dan pawh a inang thei vek lo.

Nupa a insiam, Inneihna hi a hlu a, a zahawm bawk rualin famkimlohna khawvela chengte hian tihluih thil ni hran lova rah leh dai sual chang erawh kan nei tam hle bawk si. Kohhran Dan… a thra e, a zahawm e. Mahse, ka ti leh thin ang, mihring khawsak dinhmun inanloh bakah, kan mizo society zalen sa angah chuan sualna sawi mawi tum vang ni lovin, “kohhran dana innei lo chuti khati…” tia sakhaw mi fir deuhten an sawi tam lutuk hi chu a ninawm lampang deuh mah mah a ni.

Mizo dan kalhmangah chuan nupui ruk te, inneih hmaa a ruka lo chesual te an awm nawk a. A then an mualpho lova, a then an mualpho a Kohhran (denomination)in a hriat chuan a phuar mai. Chu mi karah chuan, thlawi an tam ve em em thova, tunlaiah ngat phei chuan inthenna chhan chi hrang hrang avanga nuthlawi, pathlawi kum naupang deuh atanga upa lam deuh thleng pawhin an kat nuk a. Mi hmaizahna nasa ve laklawh tawh si, mipui vantlang hriat lutuka inneih ngam chiah tawh si lo, dan puitling pawh tlin tawh chuang lo te an awm nawk mai.

Dan puitlinga inneih tur tih lai hian a neilo leh rethei, chanchhe zawkte dinhmun a tichêp fo thin lai hi a pawi. Hei hian mi thenkhat a nei deuh ho sa te chu dahtha ta ila. A nei lemlo te pawhin, loan hmangte, chhungkhat laina atanga sum leh pai puk chawpin, phurrit kan insiam ta vak thin a. Mi te tih anga tih ve loh chu a mualpho thlak e tiin a ropui leh mawihnai tur ang berin, lirthei changkang tak tak leh tam tham ve deuha mo hruai, ei leh in, ruai thlengin insenso a nasa em em a.

Sâp(western culture) inneih dan changkang chin deuh emaw, Vai hindu ho dowry system ang zia zanga materialistic lutuk hmanga inneih bung bung hi eng nge a tulna? A pawimawh ber chu thinlung chhungril ber atanga ‘INHMANGAIHNA’ diktak neih hi a pawimawh ber chu a ni lawm ni?

Pathiana Piantharna diktak chang chuang si lo, inhmanngaihna pawnlang tak atanga mite mithmuha lanmawi leh rilru pawnlanga kohhran zah der avanga dan puitlinga inneih ve ringawtna te hian a hnu leh zel (future) ah rah thra a chhuah vekna chhan tur hi kan chiang chiah bik em le?

Hetianga kan khawsak dan a buai(complicate) nuai ai chuan Christian Marriage Act hmanga awlsam leh felfai taka inneih mai te hi a practice chi zawk mai ang em?

Chutih rualin heng a chunga ka sawi takte hian Kohhran Dan Puitling emaw, Kohhran Dan hrim hrima Inneihna hi a tha lo ti a, a pawng a puia ka va sawichhiatna a ni hranpa lo tih ka rawn tarlang bawk e.

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x