KAN PAHNIHIN KAL DUN ANG AW!

Kan Pahnihin Kal Dun Ang Aw?

Chhantea Pautu

I Lungngai A Ni Tiraw!?
©
I ke chheh a rem lo laklawh a, hmangaihna kawngah i kawngzawh a tluang thei lo! A then chu nangma zir loh pawh a ni ngei ang; i thiam loh ni hauh loah pawh i tuar a ni mai thei! Mi te’n i nun lairil hrechiang lo leh i tawn thil, a chhan dik leh i dinhmun dik tak rawn hrefuh si lovin an dêngin an dem che a, chu’ng avanga chuan i nun a lo ngui a, phurna nei lovin i nun i hmang thin a ni tiraw!? I chhîatna lai leh dik lohna laiah chat chat epa ertu te chuan an rawn kher che pawh a ni ngei ang! I hmangaih kha i tân a rem lo va, i duh ber kha i kîangah a awm thei si lo! I hmangâitu emaw i tih khân a tielin a nuihel che a; i dinhmun leh chhungril natna hriatthiampui si lo chein pâwn lama a landan atangin i dinhmun a tehsak thin che a ni tiraw!? A châng chuan i zam thin a ni; mahse, khawthim hi êng lo mah se maw, a tûkah khua a lo var leh thin! Nuna harsatna hi beilêt ang aw!

I Hmangaih Vangin I Nà Maw!?

©

I tân tah a tul leh thin!

I zuam lo chungin i hlat a ngai a; i ngam lo chungin i kal kìan a ngâi a; i pawm ngam ngài loh kha i pawm a tul ta si; i duh reng vang ni lovin i khawhar a; a langa nuiin i chhungril i thup a; harsatna i tawhin thlahlelin ngâi em em mah la, hrilh tawh lo tura i insum a ngâi a; i inbunruah thinna khàn midang, khawdang, kawngdang a hawi san che a; amah hnaih thlahleltu khan amah hlat i zir a ngâi ta a ni tiraw!? A châng phei chuan a thlawn maia hmangaihna pechhûak niin i inngâi thin hial a nih kha!

Tap rawh; mahse din phah suh! I natna kha thup suh; mahse hmalam thlîr chungin aw! Khawhâr la; mahse hawichhûak rawh aw! Lunglêng mah la a pawi lo; mahse michak tak i ni a sin!
I hmangaihna ang tîata a dawnsawn loh che paw’n a thlawna hmangaihna pechhûakah inngâi duh suh aw; pêkchhuah hi a thlawn ngài lo! Tunah tap mah la, i nuih hun a la thleng ang! Khawhar mah la, i mal reng dawn lo! Lunglêng mah la, hnem i la ni ang! I hmaa kâwlkil êng saw i hmu em? Saw lam saw pan la, i dinhmun anga ding tawh hian ka kài ang che aw; ti rawh, i kal dùn ang! Tlâng chu lian hle mah se kan la lâwn chhûak ang.

PHATSAN NIIN I THINLUNG TIHNAT SAK I NI A!

©

* Mi tuemaw hmangaihna i lo pêk tawh avang khân midang i hmangaih thei tawh lo tihna a ni lo a sin!
* Midang hmangaih leh hi inthlahrung suh aw. A harsa rih ang; mahse a theih a nia!
* Hun rei tak hnu pawha phatsantu che avanga i nat fona chhan hi i thinlungin a la thlah phal loh vang a ni thei a; thlah tawh la, kal tir tawh rawh aw!
* A hnèna kir i duh tawh si loh chuan, i tâna awm tlat tura lo awm ne’na nun hlimna neih hi i phu ngawih ngawih a ni!
* I tâna awmze nei lo, hnunglama thil awmte i thinlungin a la vawn tlat chuan; kumkhuain i hlim lo thei mai ang tih ka hlauhpui che aaa!
* Hmalam panin kal tawh ang…aw, i duh em? Kan pahnihin!

Share this post:

You May Also Like

Subscribe
Notify of
guest
1 Comment
most voted
newest oldest
Inline Feedbacks
View all comments
Jeel Tochhawng Maq
Jeel Tochhawng Maq
Editor
2 years ago

Ngaihnawm e

1
0
Would love your thoughts, please comment.x
()
x