KA VANTIRHKOH THLA NEI LO KHA! (My Beautiful Angel Without Wings)

KA VÂNTIRHKOH THLA NEI LO KHA!
[My Beautiful Angel Without Wings]
@
Khuangchàwi Thla a ni; ka pa, Stroke avanga kan awmpuina Civil Hospital Staff Sick Room-ah beisei loh zetin a cousin ne’n an rawn lang hlawl a, kan chanchin engmah kha ka hrilh duh lo lui kha a nia; mahse, a rawn lang tho, a cousin khân a hrilh a niang! A cher nàa a ‘slim’ zaih mai…a Chàwn hi mâwi ka ti em em thin!

Khatihlâi kha pawisa kan harsat zual lai a ni! Kan unau hi kan thahnem a, upa ber ka niin ka mamawh leh duh ngawih pawh lei ngam tur chuan midang thukrua mahni indah hmasak fee a ngai ve a; chu chu thil rem a ni miah lo! Pheikhawk kha inkhawmnaa bun chi, ‘Smart Boot’ pakhat bâk ka nei lo va, a peh avanga vawi eng emaw zât ka thui tawh ‘Sliper’ sen, a hrui dum kha, eng hunah pawh, eng hmunah pawh ka bun thlap thlap thin a!

Ani ne’n chuan ka pa damdawi tur leiin kan chhûak dùn a, sawi lâwk loh tawpin Pheikhawk sen ‘fresh’ tak min lei sak! Heti ang hun taka ka rilru hlim zia tih-lan dàn ka thiam lo tlat thin hi a hrehawm thin ngawt mai! Pheikhawk dawrah khan min han luhpui talh a, kan han lût a, lei lo tura hnial ka duh, a hnial pawh ka hnial ve; mahse, a tilui tho tho dâwn nia a lan avangin nuam ti vak lo chungin Pheikhawk chu ka han bun kual chhin ta a ni; a man a pêk dâwnin a pawisa phawrh lâi ka en a, a mitmeng ka chîk a, ui hmel ka hmu lo; mahse, a nei ngah bîk loh avanga hrehawm ti-hmel, ngainatawm deuh kha ka hmu! Khatihlâi khân Pu Ghandi-a ‘notes’ kha a hûm tam bîk lo tih ka va hmu a sin!

Khatihlâi vêk khan Kekawrtè pakhat chiah ka nei a, ka pa damlo buaipuia rilru leh taksa a buai em avangin inbual apîanga Kekawrte sûk kha a buaithlâk ve riau mai a, Kekawrtè a ro ziah hman lo; awlsam deuh mai erawh chu, filhthuaua inbuala Kekawrtè tihuh lovin a letling zawng leh a dik zawnga nitin hâk thlak mai kha a ni a; kârtâwpah chauh sûk tur a ni! Khami ni ber kher kha a letling zawnga Kekawrtè ka lo hâk tum a ni kha a pawi ta a ni; chu aimaha la pawi chu, a letling zawngin Kekawrtè ka hà tih hmu tura a mit a lo vâr lutuk kha a nia! Engtin nge a hriat theih ni!? Kekawrtè pawh chu pakhat chiah ka nei tih a hriat phah leh ta pek!

Ih maw, Siamtu hian a siam mihringte tanpui tur hian a Vantirhkohte a tir thin a nih ngai chuan…ani kha ka Vantirhkoh chu a ni! Ka chunga a thiltih kha theihnghilh tur chuan ‘theihnghilhna’ hi a awm tih ka theihnghilh hmasak a ngai ang a; aww LALPA, ka Vantirhkoh kha…[a kîanga awm leh a, eng emaw tihsak ve ka va duh em]…rullêt theia ka awm na’n i duhsakna leh malsawmna ka dil che aw; ka ti tak tak!

Share this post:

You May Also Like

Subscribe
Notify of
guest
1 Comment
most voted
newest oldest
Inline Feedbacks
View all comments
Mamawii Hualngo
Mamawii Hualngo
2 years ago

Haha..van ziak thiam.

1
0
Would love your thoughts, please comment.x
()
x