KA PERIOD VE A!

Chhantea Pautu, Paradise Lodge ©

Thil mak tak leh pawimawh tak a nih avangin zahmawhah min lo ngaih sak lo hrâm teh u.

Ni e, a mak, mak tak a ni! Mipa ka ni; mahse ka period ve avangin mipa mak tak ka lo nih belh ta a ni! A tir chuan ka dawngsawng thiam lo hle a, hmeichhe chan tur chauha ka lo ngaih avangin mahni tâwka inti mipa ve tak ka’n period tlat mai chu ka hrethiam lo em em a! Mahse, mipaten hmeichhiate dinhmun kan hriatthiam phah tâkin ka chunga thil thleng mak tak hi ka han phawrh mualpho mai teh ang!

Thlaruk chhung ngawt a ni! A hrehawmin ka rilru-ah nghawng a nei lian hle. A hmasa ber chu Febuary thla, chawlhkar vawihnihna, ni 8(Nilainî) takin a rawn intan a; tichuan, a tahtawlin a ka period hun chu a insawn chho ta hret hret a ni! A châng phei chuan ka lana thei hle a, ka lute a nâ a, ka mood a off em em fo a, midang ka hua-in ka ngei em em ringawt a, ka tài hi a fuh tum chuan na fuh thei mai mai tak a ni! Mi tupawh ka hnè em em a, tumahin min be lo se, mahni chauha awm ka châk hliah hliah fo! Chuti khawp chuan a intham a na thin!

Febuary thlaa ka period hmasak ber tum phei kha chuan ka chunga la thleng ngai eih loh a nih avangin min barakhaih hle a, ka hlauthawng a, ka zakin ka kímkî a, ka ngaihtuahna chu hlauhthawnnain a kamki nasa hle! Ka hetih tur hi ka nu leh pain min hrilhlâwk lova, min zirtir ngai hek lo; chuvang tak chuan hahdam taka dawnsawn ka thiam thlâwt lo a ni! Mi ang ve lo ang hial ten ka inngâi a, ka thiante zînga awm hrehawm ka ti a, ka zakzum thar ta em em a!

A diktak chuan khatia ka han period ve ta mai kha Tùai ka ni ve ta mai emaw ka inti hial a; mahse Tùai kan tihte hi an period ngawtin ka ring si lo! Patil angte tal niin an neih ang nei ni ila, period ila chu ka la hrethiam; mahse, serhthlâk(trangender) ka ni lova, a dâwt séi chi nei ka nih mîau avangin ka tân chuan a pangngai lo em em!

March thla a lo thleng a. Ni 11(Inrinnî) takah a vawihnih nâ’n ka han period leh a!

Febuary thla khân ka englo hmawr chu bandage in ka tuam ve ngawt mai a, lapua tlem ka tuam hnan bawk; a tih ve theih naw naw a! Hei hi a tul nachhan chu, hmeichhe serh ang hi mipain kan nei ve lo tih kan hre vek a, chuti a nih chuan Stayfree-pad chu ka tân hman a rem ve lo tih in hrethiam maiin ka ring! Hmeichhia chuan an underwear chhûnglamah remthlapin an bel mai a, ka tân erawh a rem lohna chin a awm ta tlat a, pem tuamnain lapua ka tuam hnan ve ta mai a ni!

A tir chuan hmeichhe hman ang, ‘lukhamtè’ chu hman ve mai ka tum a; mipa e ti lovin Stayfree, chutah pawh Sophie ngat chu ka va lei a; chutia mipain Stayfree ka han lei chu a mak a ni mai thei, Dawr nghaktu nula chhe lo tak chuan, “Tu hman tur nge?” tiin min lo zâwt fiamthu a, kei lah chuan ngaihtuah chîang mang hlei lo leh ka matea lûak lam ringawt ka rilrua dah chung chuan thutak zet hian, “Keima hman tur!” ka han ti ngawt a; ka inchhir! Nula chu a nui ta vak vak a!

Febuary thlaa ka period chhûng khân Stayfree ka heh hle a, vawithum ka lei hman! Ka lei apîangin nula kha a lo nui ziah lehnghal a; ka vawikhat period-na a nih avangin ka heh a niang! A hnuah erawh tihdân ka thiam ta a; March thla phei chuan ka zei sawt!

Appril ni 14, Good Friday ni takin ka period leh a; May thlaah ni 18(Ninganî)ah ka period a; June thlaah mak tak maiin a thla pumin ka period ta hlek lo! Ka hlauthawng em em a, a thla bikima lo period thin, thlakhat tawp mai ka’n period lo chu a pangngai lo hle hian ka hre tlat! Chutia ka han hul hiau mai chu ka râi a nihte ka ring a; mahse râi turin tumah ka chêt khawlohpui der si lo! Ka ngaih a tha thei hlawl lo! Tumah lah chu ka zâwt ngam teuh mai si lo; a hnu-ah erawh period hunbi kal dân a zirin Calendar thlabi inzîaka en chuan thlakhat lek chu a àwl theih tih ka hre veleh ta tho a!

July thla tir a lo ni ta. Ruah a sur cherh cherh a, ni 5(nilainî) a lo thleng a, ka matea chu a rawn lûak ta tak tak mai a; ka pad siamchawp pawhin a dawl lo, a tlang vek! Chutia ka pad siamchawp tlang khawpa a pût chu ka buai ta em em mai a; ka kap ka bih thul, ka dap thul, ka zen thul, ka buai ngei mai! Mangangin ka thaw leh hawk thin…ka buai em em lai chuan ka matea lûak tur chuan mi tham ta et et a, a tâwpna a ni tawh dawn a niang; chhuah hnem a tum hmel takzet! A tur ut ut a, ka englo chu a na ngut ngut bawk…ka englo nâ avang chuan ka harh ta hlawl a; chu mumang chu(h)! Ka kap chu ka han dap vat a, zun ka lo la cheh lo hlauh! Ka tho vat a, Bualinah ka va zung ta tur tur a!

Hmeichhia an fing zel a, Mizo mipate’n hmeichhia kan finkhalha an dinhmun kan hriatthiam sak a ngai ta hle; i mawngkuaah emaw, i serh dâwt hmawr atang emaw khân thlatin hmeichhia angin thì pût ve ta reng mai se; chumi avang chuan i lu nâ se la, i tai na viau se la, i mood off hlein thinchhe viau ta la, midangin i dinhmun hriatthiampui si lo che se la…he’ng hi i chunga thleng angin han suangtuah ve chhin teh; a hrehawm i ti ve ngawt lovang maw!? Dûat, hriatthiam, dawhthiam an ngâi a ni; khi’ng khi hmeichhiaten an paltlang hnem a sin.

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x