KA NUPUI A TAP…!

Ziaktu – KC-i Pa Khawlhring

Kan upa ber paw’n College a kal ve tawh a. Nau pathum a nei vek a. Kan zavaiin kan inngaihzawn laia ka pa’n In min sak sakah chuan kan chèng a.
Ka fa te chuan an man lo a, hriat lah an hrethiam hek lo! Kei chuan chiang takin ka hmu a, ka hria a, a awm dàn chu ka ringhlel a ni!

Kan inrim lai te, kan inneih tirh leh a hnu thleng pawhin a zia chu a duhawm a, a tawng siam siam a. A nui ri har har te chu ka bengah hian a cham reng thin! Mahse, ka nupui chu tùnah chuan hmeichhe hlim thei tak kha a ni ta hauh lo mai! Biak paw’n a rul tàwk lekin min chhang a, a nui ri chu sawi loh, a hmèl hlim pawh ka hmu khat ta pharh mai! A rilru tinà tùrin ngaihzàwng ka nei lo a, ka hlep ru bawk lo a. Thawmhnaw lah a duh ang ka leisak a. A ei siam lah tùi ti takin ka ei ve mai a. Ka laka a lungawi loh nachhan tùr ka’n dap ngial paw’n ka hmu zo lo a ni ber mai!

Tlai khat chu le…

Garage-a motor ka hung fel chiah chu ka fapa, kum 5 mi hi a lo lang nghàl awt a. “A pa, a nu a awm miah lo. Tlaia ei tùr chaw pawh a la chhùm lo!” a rawn ti ta mai a. Chu thu chuan min dèng dawt a. Mahse, ka fapa hmu-ah chuan ka tilang duh lo a. “A lo haw mai ang!” tiin, ka’n thlamuan tak na’ng a, kei zawk chu ka hlauthawng ru hle a ni! Room-a ka’n lut chu kan khuma note bu lo lèt ngat ka’n hmuh chuan a awm lohna tùra awm a ni, tih ka hre nghàl mai a. Ka inthlàk hma hauh chuan ka la a, ka’n keu nak chuan ka nupui lehkha lo ni rengin!

Hetiang deuh hian a lo ziak a –

‘ …. zànin chu ka nu te Inah ka riak dàwn! I laka ka lungawi lohna hi a rei hle tawh, tih i hria. A hnuaia ka ziah te hi ka chhuah chhan leh lungawi lohna te chu a ni a. Hetiang hi i tih leh hma loh chuan ka lo haw tawh lo vang!

1. Kan inngaihzawn laia min ngaihsakna ang kha tùnah a awm tawh lo!

2. ‘Ka hmangaih che’ min ti leh rawh!

3. I fa te i pawm angin min pawm leh rawh!

4. Kan inngaihzawn laia duh taka min fawh ang khàn min fawp duh tawh si lo…!

5. Hmangaihna mitin min en ngai tawh si lo!

6. Kan Inneih tirha ka ei siam tùi i tihzia i sawi thin ang khàn lawmthu min hrilh ngai tawh lo!

7. Ka nalhzia pawh min hrilh ngai tawh bawk si lo…!’ tiin.

Ka’n chhiar chhuak zet chu ka mur ta ur ur mai a. Ka harh zawkin ka hria. Phek khat chu ka pawt thla hlawk a.

‘Bawiha nu, min ngaidam rawh. I thil phut zawng zawngte hi ka pawm a; tin, ka tihlawhtlinsak vek ang che’ tiin, ka ziak a. Ka fapa chu a nu pe tùrin ka pe ta a.

Tùnah chuan kha mi atang khán thang khat lian zet a liam tawh a. A duh ang chuan ka tihhlawhtlinsak bawk a. Nupa inngeih, inlungrual, inngaizàwng tak mai kan ni chho ta a ni! Kan Nupa Nun kàr hi engtikah mah a chhiat tawh ka ring lo…!

Famkim lo Nupaah hian famkim lohna lai inhnawhkhahsak hi Hlimna pakhat chu a ni!

Share this post:

You May Also Like

Leave a comment:

avatar
  Subscribe  
Notify of