KA NU VANGIN MAW!

By – Chantea Pautu, Paradise Lodge

Kum 1998 khân sipai ah ka lût a, pa nei tawh lo ka ni. Ka nu hoa awm kan ni a, ka nu chuan dàwr lian vak lo a sîam a, chu chu kan eibêl bera kan rin ve tâwk tâwk lâia sipaia ka han lût thei chu kan lawm hle. Hetih lâi hian kan farnu neihchhun chuan pasal a nei tawh a, mipa 3 kan la awm thung a ni.

Tichuan, sipai training zoa ka haw chuan tleiràwltè, ka duhzâwng tak hi ka tawng a, Kohhran Upa fanu a ni nghe nghe. A chezia leh nungchang chu ka duh êm êm a, ani pawhin min duh ve hle bawk. Chumi hnu, ka hna lama ka kala ka haw leh vawi hnihnaah chuan chan loh ka hlauh em avangin palai tirin tluangtakin kan innei ta a; ka hlim hle a, ka hna lama kir leh pawh chu hreh taktè hian ka hreh tawh a.

Hna zawma ka kir leh dawn chuan, “I chhungte bula lo awm mai i duh em?” ka ti a. Ani chuan, “Ni lo ve, hei hi ka In a ni tawh a lawm” a ti a, tha takin kan inthlah liam a; lung a lêng duh vawng vawng thin hle mai. Chutih lai chuan Phone a la tam lo va, keini phei chuan kan la nei phâk lo nasa a, kan inbiakpawhna ber chu lekhathawn a ni mai, chu pawh a thangrei phian zel lehnghal.

Engemaw chen ka awm hnu chuan ka nu lehkha ka hmu a, ka nupui fel loh thù leh lènchhuah a hràtzia te, ngaihzâwng a neih ngei a rin thù te hlir ka dawng ta fo mai a; rilru a va han hah duh ngai êm! Min hringtu chuan dâwt min hrilh êm ka ring si lo. Ka nupui lehkhaah lah min ngaih thù leh ka tân a tawngtai thin thù te a inzîak a; ka chhungte chanchin chhia a hnen atangin ka dawng ve lo.

Ka haw leh hmasak ber pawh chuan ka nu thu min hrilh chu a ngai bawk! Kan hlim mawlh lo! Ka nau tlangval lah hnathawkin a awm bo a, zawh tur a awm si lo; a rûkin kan thenawmte ka zâwt ta ngawt a, anni lah chuan ka nupui felzia, inchhung a enkawl felzia te, nupui fel tak ka nei chu lawm tur ka nih thù te min hrilh ta deuh deuh mai si a, chu chu ka nu ka han hrilh lahin kan thenawmte a huat phah a, ka nupui pawh an Ina lêng tawh lo turin a hrilh nghal hmiah a! Kan nupa pawh kan innghirngho phah nasa ta viau mai; ka va’n lo â tak em! Ka harhchhuah meuh chuan a tlai tawh si!

Kan naupang ber chu mipa naupang chauh a la ni a, kan nupui chu a ngâi lutuk a, ka nupui pawh kut ka thlak phah hial! Ani chuan a thiam thu pawh a sawi tawh lo, a mittui a tla zawih zawih ringawt mai a ni!

Tichuan, ka hna lama ka kal a lo hun leh ta. Rilru nuam lo tak chunga ka hna ka zawm hnu chuan, ka nuin ka nupui chanchin a sawi chu a ngaitè bawk. Ka rilru a hah tak zet; a tâwpah phei chuan uire ang hialin a rawn sawi ta mai a! Ka thin tertek chuan ngaihtuahna fîm pawh hmang hman lovin ka nupui nu chu an thenawmte phone atangin an fanu ka mà tih thu ka hrilh ta a nih chu! Ka thiltih tawhah ka la inchhir ber awm e!

Ka haw leh hnu chuan ka lung a lêngin hrehawm ka ti hle a, thenawm khawvêng hoin thudik pawh hriat tum lova ka nupui fel tak ka mà ta mai chu min dem sup sup a, ka va inchhir tehreng em! Ka nupui lah chuan inchhira ka kir leh pawhin min be duh tawh lo thak a, a chhungte pawhin min be duh hek lo; ka beidawng chu zu ka in a, lu lam leh mawnglam hre lêk loin ka rui ta thin a. Ka nu hi ka haw ngawih ngawih bawk!

Nu tamtakin in lo chhiar ve a nih chuan ka nu ang hian in fate inthen nâ’n dâwt hrilh ve lul suh u aw. Mahni nu te na na na chu faten kan lo ring si a!

Chutih lai chuan ka tlangval lai atanga min ngaizâwng em em tu khân min rawn lenchilh thin a, ka duh ngai lo kha a ni a, ka thawmhnaw te sùin ka tân a inphal em em a; mahse hetih lai hian kan inngaizawng lo.

Vawikhat chu keimaha ka awm laiin a lo lêng a, zu ka lo in mêk a, ka rui tawh hlê bawk; min duh thù te a sawi seuh seuh tâkah chuan kan chesual ta a, a bâk chu ka be ngâi tawh chuang lo. Ka hna ka zawm leh atanga thla 3 hnuah chuan a rai thù ka nuin min rawn hrilh a, rilru a buai duh khawp mai. Ka haw chhoh leh chuan an chhungkuain nei turin min nawr ta a; ka lo va tisual chiang tak em! Ka hmangaih hlawl si lo va, a hrehawm takzet! Mi hausa chhungkua an ni a, a nu lah chuan kan inneih chuan In-hmun min pêk a tum thù tein min thlêm nasa mai bawk si, ka buai a ni! Ka nu pawh chuan, “Nei mai rawh, fate tih fahrah ka duh lo” a lo ti ve sek bawk a.

Lungsi lo hlé mah ila ka nei ta nge nge a. Ka nupui thar chu ka lakah fel viau mah se ka hmangaih hlawl si lo; fapa duhawm tak min hrinsak pawh ka hmangaih ber nena kan fa ni tur tein ka suangtuah thul, khawvelah hian kei aia rilru rethei an awm ka ring lo hial thin! Ka tihsual hi siamthat theih nise ka va ti tak em! Ka mangang tak zet! Chhuah leh ngaihna a awm lo! Ka nupui chhungte lah ka chungah an tha tak zet a, min duatin min lîak lo chauh a ni ber mai.

Ka nupui hlui chu ka theihnghilh thei lo va, a chanchin a thiante atangin ka zâwt fo a, kan inthen dan khan a rilru a tina lutuk a, depression a neih phah a, a â lo chauh a ni! Doctor enkawl ngaiin a awm ta reng a ni awm e! Ka lainat lutuk; keimah vang a ni si, ka inchhirna thù lehkha ka thawn fo a, min chhâng ngai lo!

Hun a han kal a, Mobile Phone ka han nei ve a, facebook khawihin ka nupui hlui duhtak facebook-ah ka han hmu chu ka khur thei hial nia! Ka ngâi lutuk hi ka mittui a tla ringawt thei! Friend request ka thawn a, tha takin min chhang a, thian angin ka bia a tha takin min chhang zel; ka insum zo ta thlâwt lo… Ka la hmangaih thù leh engkim huama neih leh ka duh thu ka hrilh hnuin min block ta hmiah mai; a va hrehawm tehreng em! A thiante bawk chu a number ka zâwt leh a.

Ani pawh a chhungten amah hmangaih taktu, Sorkar hna tha ve deuh thawk an lo neihtir a, fa 3 lai nei tawhin nupa hlim tak an ni. A pasal chuan keimah avangin rilru lam fel lohna a nei tih hre rengin enkawl huamin a lo nei a, tunah chuan a dam fel tawh a. A pasal chhungte pawhin an fakin an ngaina hle a ni tih ka hriatin ka zak chem chem a, a pasal chu thîk ru chungin ka ngaisâng lawi si!

Tichuan, a number ka neih tâkah chuan ka han be leh ta nge nge a, tha tak chuan min chhang thin; mahse ka ngaih thù leh a laka ka awmdàn te kha ka tihsual a ni tih ka sawi ve leh ka phone call leh whatsapp-ah pawh min block leh ta zel a, awmngaihna ka hre thlâwt lo. Vawikhat phêi chu intihhlum hial ka tum a, ka nupui û-in min rawn hmu hman ta si a… Vawiin thleng hian ka thinlung hi a kehchhia a, ka na ngawih ngawih a ni!

Ka mipat puite u, i hmangaih/nupui kha i chhungte’n an hêk a nih chuan, thudik i hriat phawt loh chuan awih ngâi suh u, in ruih laiin inhmangaih loh te chêtsual pui hek suh u. Keimah ang hian in awm ve hlauh ang’e.

Hmeichhiate pawh, in duhzâwng an nih avangin an tân inpumpêk ngawt suh u; in lo rai palhin fate vang ringawta inneih chu a fuh lo a nia. In pasalte taksa chang mah u la, an thinlung in neih tel si loh chuan in hlim chuang dawn lo! Nu leh pa te paw’n fate nupa inhmangaih hle hle lai inthentir duh avanga dâwt hrilh hi tudang inhremna a ni lo, in fate bawk an ni a tuartu chu; hei hi a dik tih ka hrechiang. Heti ang lo chîng te chuan sim a tha khawp ang.

Ka damchhungin ka nupui hlui hi ka theihnghilh tawh dawn lo, ka ngâi em em reng a ni tawp. Khawvelah hi chuan lêngdun thei tawh lo mah ila, an sawi pîalrâlah tâl lèn dun leh ka beisei…

Share this post:

You May Also Like

2
Leave a comment:

avatar
2 Comment threads
0 Thread replies
2 Followers
 
Most reacted comment
Hottest comment thread
2 Comment authors
Xoree pachuauL T Khuma Recent comment authors
  Subscribe  
newest oldest most voted
Notify of
L T Khuma
Guest
L T Khuma

A tha hle mai

Xoree pachuau
Guest
Xoree pachuau

Nu leh mipa zog2 hian chhiar se k va ti tak em