KA INPUANNA

(Inchhir a sawt tawh si lo)

Kan nu nen kan inneih atanga kum 3/4 lai mai chu ka uire san thin a, zanah te riahbo sanin a damloh leh ka fate damloh pawh engah teh vak mah ngailovin ngaihzawng neih ka thulh ngai lo. Ka nuin min boralsan tawh a, ka pa hovin kan awm a, mahse ka nupui chuan rilru na leh hrehawm tak tuar tlawk tlawk chungin ka pa a khawngaih vangin ka sual man a lo tuar hram hram thin a. Kei chuan min then ngamloh vangah ngaiin ka duh tawkin ka khawlohsan a. Chuti ang chuan kum3/4 dawn lai ka awm khawlo hman.

Mahse, ka pain, “Mampui, i nupui hi keimah min khawngaih vang chauhva thenlo che anih hi aw, a chang phei chuan ‘ka pa, kan pahnihin kan inlamah i haw mai ang’ tiin min sawm thin” tih thu min han hrilh chu ka harh chhuak chiang ngei mai. Heti anga ka pa min hmangaihpuitu leh kei min hmangaihtu hi khawvelah ka tan an awm tawh lovang tih ka hrechhuak a. Chuta tang chuan tun thleng hian ka nun hi ka nupui tan ka hmang tawh a, kumkhuain atan nun hman ka tum tawh bawk. Heng kan sawi nachhan chu hmeichhia hian hmangaihna leh dawhtheihna hi an lo va nei nasa em! Ka awm ang khan ka nupui hi awm ve se ka ngaidam theiin ka inring lo.

Tichuan, bul kan han tan tha a, ka nunhlui ka han ngaihtuah let thin a, kan nuin ka awmthat duhloh lai zawng zawng khan hmel hlim a pu thei lo va, a hunlai chuan ka demin ka thinrim reng phah a, “Hlim hi i thiam thlawt lo em ni?” te ka ti thin kha a ni a. Mahse, tun hnua keimah chana ka han inchan hian kei zawk hi a tuartu ni ila hlim reng chu sawiloh ngaihdam pawh ka ngaidam thei lovang. Tunah chuan khang hun kha kum 10 dawn a tling tawh a, mahse kan nu thikthu chhiat leh a rilru natna te hi a la reh thei lo, mahse ka tihsual zawk anih avangin a dawhtu ka nih mai a ngai.

Tin, pawi ka tih em em pakhat chu ka nupui thinlunga Ser reh thei lo tur ka hnutchhiahsak hi ka inchhirin pawi ka ti. A siamthat theih tawh mai si lo va, pawi ka ti khawp mai. Ka nupui chunga ka tih ang hi ka farnu te leh ka fanu te chungah a let ang tih reng ka lo ngaihtuah ngai si lo. Inchhir nan khua a tlai ta lua a ni.

Chuvangin, nupui pasal nei tawh te ka chah duh che u chu, tumah in uire san ve lul suh u! A ruka i uire anih pawhin i thisen zawmpui chungah a la tla ve dawn. Tin, nupa inkara thinlung inhliamsak leh ser inhnutchhiah hi a aia pawi nupa inkarah a awm lo hial ang. Nupa chu a theih hram chuan inngaih pawimawh tawn leh inngaihsak tawn aia thil hlu a awm lo asin. I nupui chungah i lo ti ve anih chuan sim hmak rawh, khua i tlai hmain.

He ka chanchin ka post nachhan chu ka awmdan kha pawi ka tiin ka inchhir a, a siamthat theih tawh si lo va, chuvang chuan he thu chhiartu zawng zawng te zingah a bikin mipa nupui nei tawh leh neilo zawng zawng te paw’n in kawppui, in nupui te chungah ti ve lo hram turin ka chah duh che u a ni. A pawizia hre chiangtu ka ni si.

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x