KA FANU – RUTHI

By Sora-i Nu.

“Hello, Anu, ilo haw dawn tawh em?
I lo haw hunah damdawi min lo hawn rawh aw”

A ãw chu a dik chiah lova, hna ka ngah avang leh ka buai em avang chuan ka ngaihtuah chhunzawm lemlo.

Ka pasal fa bik, Ruth hi kum 4 chauh nimahse, a fingin a fel hle a, a hmelthain, a sam a kir chiat bawk a, a duhawm thin em em a, hmeichhe naupang duhawm tak, pawisawilo zet ani.

Mahse, kei hmeichhia azawnga hmeichhe nêp tak mai hian ka kuahin, ka fiam ngai lova, ka hmangaih theih ka ring ngai hek lo!!

A hmel ka hmuh apianga ka rilru natna leh thinrimna chuan amah chu min hnaih tir thei ngailo ani.

A hringtunu pawhin a enkawl theih loh chu kei hian hmangaih takin ka lo kuah thei bik dawn emni?

Nupui nei reng chunga hmeichhe dang laka fa hial nei ka pasal chu haw viau thin mah ila, tinge kha naupang pawisawilo Ruthi te reuh kha ka huat tel tlat?

Naupang rilru thianghlim leh pawisawilo na na na chuan min ngai em em a, ka pawm te, ka bula mut te kha a thlahlel em em thin anih kha!! Office kal nitin, ina awm ngailo ka nih vang chuan kan inkuah tam lova, kan kawmthlangte nupa khawchhak lam mi chuan an duat viau a, an ina lên nuam a tiin a tlei hle thin.

Kei chuan ka ngaihsak ngai vak lemlo, office bãn a kawngka atanga min lo hmuah a, “Anu, enge min lo hawn?’ a tih chang pawn ngawi rengin ka thil hawn sak ka pe a, a pi leh pute bulah lawm taka
tlanin ava inti thei hle thin.

Pi leh Pute awm than, puitling bula awm tam na na na chu a tawngkam a felin, a fing hle a, thu a awi em em bawk si.

Inkuah tamlo, in chul nel tam lo hle mah ila, min ngai em em thin a, ka pawm ngai lova, ka paw ngai lova, ka bulah a mu ngai heklo, ka awmdan ah a pi leh pute pawn min dem ru thin ngei ang ka ring.

Mahse, an vui lang ngai lemlo, chutiang chuan hringnun hi a kal ve bek bek zel a.

Khua chu avawt in ruah a sur nasa hle mai a, current awmloh vang chuan office ah pawh hnathawh a har a, sikri ai pahin thawhpuite nen kan ti ti ho a, Ka phone alo ri a, ka’n pickup a, Ruthi chuan lungchhe takin, ” Anu, lo haw tawh rawh, ka ngai tawh che asin, ih,….ih maw, Anu” a sawi zawm hma chuan phone chu a tawp ta daih a, tinge niang aw tiin kan call back a, a ring ral thak ta sia, ngaih thalo em em chuang silo in ruahsur ban nghakin kan thu hlawm a. Khua a tlai a, ruah te a ban hnu chuan kan haw darh ta sang sang hlawm a.

In ka han thleng chu Ruthi chuan min lo kuah a, a tap hliam hliam a, min kuah na kher mai!

“Tinge i tah?? tunge hau che” min chhanglo, a tap chiam a, pawm a ngen a, reilote ah “Anu, pawm chu a nuamlo, mu ang,” ati leh a, ka thinrim lek lek zawk anih chu!

Nidanga ka tih ngai loh angin, ngawi rengin ka mutpui a, reilote ah “Ka mu duhlo, Anu, min paw rawh” ati leh a.

Thinrim ru teuh chung chuan ka pua a, reilote ah a muhil a, mahse, a muhil tha theilo, a rawn phu zawk a, a rak nawk nawk a, a rawn tap chhuak ta fo mai a,a mizia a danglam em avang chuan kei
pawh chu ka ngaih a tha lo telh² a.

Ka mangang tan ve deuh a, api hnenah vawiin a a awmdan enge? tiin ka zawt a, Api chuan, kawmthlang a a lên thu leh ina a haw pawn chaw te a ei a, engmah chian lohna a neih loh thu chuan min chhang ve mai bawk a.

Hemi zan hian ka bulah mu in kan mu tlem ang reng hle a, a phut nasat theih em avangin Lung lam thalo te a nei dawn aniang ka ti rilru a, mahse, zingah chuan a zia viau lawi reuh a.

Office kal dawn chuan min ngen a, a tap ta hial a, hetiang hian a vawikhat awmna ani a, mak ka ti ang reng hle a, mahse, thil tui deuh ka lo hawn ang che’ tiin ka kalsan lui a.

Chawhnu Dar 1 vel bawr chuan ka pasal nu chuan min lo phone a,Ruthi damdawi inah an admit thu min lo hrilh a, haw ka dil a, office atang chuan hmanhmawh takin ka chhuak a, damdawiin lam
chu ka pan rawk rawk a, enginnge min mawlh ni, ka mitsulh a, ka mittui a tla fap fap mai a, damdawiin khumah chuan Ruthi chu alo let ngat a, chau tih hriat tak hian min lo melh a, ka kut ka
va phar chhuak a, a ban te takte chu lo lek kangin “ANU” thildang a sawi lo. A muhil siai siai ta mai a.

Doctor chuan min rawn kova, thu pawimawh tak a sawi dawn tih ka hre nghal, mahse,eng thu nge ni ang? Ka thin chu a phu dawt dawt mai a, inthup rual lovin ka khur chhuak hial ani.

Doctor, ka fanu hi engtin chiah nge a awm?

“Ka Fanu” he tawngkam hi Ruthi nen kan intawn atanga ka vawikhat sawi chhuahna chiah ani.!

“I Fanu hi Pawngsual ani”!

Engtin maw?? Ani theilo.

Ka awmah min hnawh a, ka ãwm ka dawm a, ka dingngil zo talo, ka ãwm ka chum a, ka mittui a far zawih zawih a, nikhaw hrelo mumal lovin, ka tlu ta thlawrh mai a. Ka nu chuan thlaphang em em in min lo vuan tawk tawk a, Mahse, thidang hman ka nilo, ka fanu bula awm ka ngai, ka tho hluai a, ka hawi kual a, mi ã ang maiin ka hawi ã ruai a, doctor leh ka chhungte inbia pawh enge an sawi ka hre tawhlo.

Ka fanu khum bul chu engtiklaiinnge ka thlawh phei pawh ka hrelo, a bulah ka va bawk thlawrh a,

“Bawihte, min ngaidam rawh, min ngaidam mawlh rawh, ka thiamloh ani” Ka fawp a, mahse, ka fanu chu a zawi ngiai mai si.

Ka ãwmah min hnawh leh a, ka ãwm ka chüm a, ka tap theilo, ka rilru na lutuk leh thinrim si chuan ka thaw ati chham a, ka lei ka seh thi phah hial ani.

Ka fanu pawngsualtu kan kawmthlangpa chu police ten an man a, a inpuang tawh tih thu an sawi avang chuan Ruthi kalsan chu hreh hle mah ila, Police station lam pan chuan kan pa nen kan chhuak ta a, kan va thlen chuan chu misualpa chuan en pawh min lo en tha ngamlo, alo khur beuh beuh a, ka rilru na lutuk leh thinrim chu ka puakkeh a, ka insum hmanlo, na tawkin ka’n beng a, a pai khut khut a, ka duhtawk theilo, that hial pawh ni ila, ka duhtawk ka ringlo, ka bawh rawk rawk a, tawngkam lah ka insum zolo, mahse, ka pasal leh police te chuan min lo dang ta vat a.

Aww….. ka rilru natzia hi tunge hrethiam ang le?

Naupang ka enkawl that loh luatah thil pawi a thleng a, a tlai zo tawh si.

“Vante u, min pui ru’ tiin ka au chiam a, a sawt hek lo, khang hun zawng zawngah khan ka Fanu kha hmangaih takin lo enkawl ila, tunah hlim takin kan awm thei tur. Ka inhua a, ka inten a, ka zak ani.

Engatinge, hriatchian loh mikhual mai mai te ka lo awmtir a, engatinge kan inah ka lo khawi ngam mai le?

Bawihte, ava na tehlul em!! I nu hi min ngaidam rawh aw.

Piangnawn leh ila, bul tan tha ang hmiang?

mahse, a tlai tawh tiraw? Bawihte…

Ka fanu hliam tawrh chu ana em a, ani naupang kum 4 mi lek tawrh atan chuan tawrh zawh rual ani lo.

“Bawihte, ka kalsan tawh ngai lovang che, min ngaidam rawh aw’ tiin ka kuah a, peih leh peih lovin alo meng a “Anu’… chu thubak chu a sawi lo, a phu zek zek a, a kã a ãng phiau a, min
kuahna kut chu a zawi thla hnak a, kalsan tawhlo tura ka tiam ka fanu chuan min kalsan ta zawk anih chu!

Ava rapthlak em! ka ãwm ka chum dawt dawt a, ka thaw kawk kawk a,

” min ngaidam rawh Bawihte.”

A kuang chhunga ka fanu pawisawilo hmel chu ka thlir kham theilo, Bawihte, kan intawn atang khan i lakah ka tha ngai lova, ka kuah ngailo che a, ka bulah ka muttir ngailo che a, ka infiampui ngailo che a. An sawi thin pialralah kan la intawng leh te anih ngai chuan Min chhuah chhual tur ringawt chuan min lo hmuak suh aw. Chutih hunah chuan I nu ni ngailo, mahse, “Anu ‘tiha i koh thin, i nu nep tak leh derdep tak hian ka kalsan tawh ngai lovang che.

Bawihte” Ka tihpalh, ka thiamloh ani, min ngaidam rawh.

Ka taksa hi a zawi vek a, na tur chuang awm lovin ka thinlung hi a kehsawm a, ka indem a, thawk harsa ka ti ani.

Nu leh pate u, In fanu kha hriatthiamna nen, hmangaih takin enkawl rawh u.

Pasalte u, nupui pawmlai nei reng chung chuan hmeichhe dang melh lo ula.

Nupuite u, i fa ani emaw nilo pawh nise, nangmah ngainatu naupang rilru chu hliam lul suh u aw.

Thiante u, eng mi pawh, kan hriat chian lohte lakah fimkhur ila, ina leng lut turin i khawi ngam lovang u.

Naupang fahrah siam lo la, an rilru milin in ngainat tir tum thin rawh.

Chutichuan, ka fanu Ruthi laka thil thleng hi i pum pelh dawn asin.

Awmpui i nei duh anih ngai pawn i hriatchian chauh awmpui rawh.

“Bawihte, enteh, i laka ka zirchhuah leh hriatte hmangin kei I Nu nep tak hian midangte ka’n hrilh/zirtir ve chu anih hi.

Mahse, tlailua a awmlo tiraw?….

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x