KA FANU (Heart Touching)

Ziaktu – Hmingthup

Mihring kan nih chuan, harsatna kan nei te a nih loh chuan Nupui/Pasal nei vek tura ruat chu kan ni a. Ngaihzawng te kan nei a, hmangaih te kan han tawng chho a, kan hmangaih em em, min hmangaih ve emaw kan ti a, kan lo rin ve em avangin kan thianghlimna hial kan hlan thin a ni ti raw? Pathian hmangaihna haiderin luhlul te kan han chhuah vel a. A tawpah Pathian bawk kan dem leh a, kan sual teh e!

Chutiang bawkin kei pawhin min hmangaihtu emaw ka tih kha ka lo hmangaih ve thin a, a fa hial ka lo pai a nih kha! Kan inkar chu sawi tam lo zawk mai ang.

Nau chu Nu leh Pate karah kan pai chho ve zel a… Ni e, Nu leh Pa te bulah chuan kan nuamsa a, kan thla a muang thin alawm. Mahse rilru erawh a dam si lo, rilru a nat chuan mittui nen hun kan hmang reng a, engmah tih chakna reng reng kan nei lo a. Kan chau thin a ni!

Ka naupai chu ngaihtuah viau mah ila, ka rilru nain min kiansan thei si lo. Ka pum chhung ami hian a tuar ka hlau thei em em a, mahse Lalpan min vensak tlat a ni tih ka hria. Kha mipa kha ka duh lutuk nalamah Pathian chu ka hawisan a nih kha! Amah aia ka ngaih pawimawh dang ka neih kha a lo phal reng reng lo chu niin.

Zan khat chu, Lalpa ka au ta a, heti hian ka tawngtai ta a.. “Lalpa,harsatna tawk thei dinhmuna ka la ding te hi ka lawm e. Nangmah aia ngaih pawimawh dang ka lo neih thin avang khan min ngaidam ang che. Ka thinlungah nang Lalber zel tawh ang che aw..” tiin ka tawngtai ta a. Kha mi ni atang kha chuan ka dam nghal sawng sawng ta sia!

Ka nau neih a lo hun chho ta der mai le! A va huphurhawm em…. Pa tel lova enkawl tur ka ni si a, eng tin nge keimah chauh chuan ka enkawl tak ang? Zawhna tam tak min la zawt ang a, eng tin nge ka chhan tak ang? Ka rilru chu a buai kher mai… Mahse, Lalpa ka nei alawm, Pa neilote pa Pathian ka nei alawm le tiin ka inhnem chawp ta a…

Naute a lo piang chu kan va lawm em! Mittui nen nau neihna room ah chuan “Lalpa,ka lawm e.” ka ti leh ta ringawt a. Nau fel tak, tah pawh tap ngai lo, a damloh pawn eng tin mah hian min tibuai ngai lo a, a nui sen sen ringawt a. Ka van phu lo lehzel em aw! A lo lian chho zel a, ka pai tirh khan chhungte thin tirim bertu kha tunah chuan chhungkua min tihlim bertu a ni leh lawi si!

Kum a lo inherliam ve zel a, biak ka nei ve ta a.. Pathian hnenah chuan ka dil ta phawt a. A nih loh chuan a hma khan ka tisual tawh si a, ka nat leh kha ka hlau em em a..

“Lalpa, ka tana i ruat a nih loh chuan min lak kiansak leh mai rawh” tiin kan dil leh ta ngawt pek a nih kha. Reilote hnuah inneih hun tur vel kan sawifel ta ringawt a. Pathian min chhanna nge keima thuin ka kal le? tiin ka inzawt nawn leh ta mawlh mawlh a…

Kan inneih dawn te chuan ka Fanu pawn “Apa” tia koh tur a nei kha a va lawm em! Kan pa lah chuan a duat thiamin, kei aiin an inngai zawk daih a, ka thik lek lek thin a. Kan pa hi mi rilru tluang leh mi zaidam tak a ni a, vannei ka inti khawp mai! Thiante leh chhungte pawh min lawmpui thiam hle.

Palai an lokal a, “Naute kha chu kan chan tur aw” an ti mawlh mawlh a.. Ka nu leh pa te chuan an phal dawn lo, mahse a rukin ka lo hlim ve em em a..

Le…. Inneihni a lo thleng ta!!
Ka fanu mo kawr nalh ti em em thin khan “I kawr hi a mawi lo, phelh rawh” min ti ta daih mai le..! Bawihte…. Min ui a ni ti raw? Ka van inchhir hnuhnawh leh si em!! Mo kawr kha phelh a, tlanhawpui vang vang mai kha ka duh ta rum rum a sin. Kan innei ta cheng a, ka Fanu, ka rila rah, ka hmangaih em em, ka neihchhun kha ka chhungten (pasal lam) an hnawl leh ta si maw? A va na em!!

I hming sawi rik pawh an phal lo a, a khât tawkin min vo bet reng a. Mi bulah phei chuan nuthlawi ka ni tih an zep tlat a nih kha! A va na em!! Mahse, ka fanu i ni miau a, ka sawi lang zel ang che Bawihte….

“Lalpa,I remruat dan hi hriatthiam a va har em” Ngati nge…? Ngatinge…? Ka fanu ka kalsan a ngai maw? Ka fanu hi ka tel lovin a awm ang maw? A theihloh…. A theihloh….!!! Nu mamawh rual lek a la ni asin!!!!

Bawihte… min lo call kha ka la hre reng asin.
“Ngatinge min kalsan daih a?”
“I bulah ka mu duh, i beng ka khawih chak”
“Lo haw rawh”
Bawihte…. I nu hi ka va han nep tak em!!!

Khatiang tur tih hre lawk ila, pasal hi ka nei malek ang… Lo haw ka duh, i bula awm ve ka duh tho alawm bawihte.. Mahse Ka dinhmun a laklawh tawh si a, ka pum chhung ami hi ka ngaihtuah tel a ngai si a.. Theih ni se, i bulah ka rawn tlan vang vang ang a, ka kuah vawng vawng ang che.. I lo riah chang pawn, inthlahrung takin kan awm dun a nih kha ti raw? A va rapthlak em!!!

NAU KA NEIH ALO HUN LEH TA A…

I nau a lo pianni a i lawmzia kha ka mitthlaah a la cham reng. I intithei em em a, sawi nuam i ti em em bawk a. Naute en turin in lo leng leh a, ka bulah i thu a, inthlahrung takin “Min lo pawm” i tih te khan maw Bawihte.. ka van khawngaih tak che em aw! Ka pawm che a, mi an lo luh ve leh (Kan pa te lam) rang zetin i chhuk a, “Nanau hi duat zawk rawh, kei chu u ka ni tawh sia” i tih te khan maw Bawihte… i nu hi min vel a sin!! Ka pawm che avang khan tuman an hau dawn lo che a sin, hau che pawh nise ka awm alawm… Engkim hi keimah vang vek a ni… Min ngaidam rawh!

In haw a lo hun a, hreh tak chungin min Bye bye a. Motor chhungah i lut chiah a, i tap ta vak vak a nih kha ti raw? Motor glass an up tawp a, i beng vak vak a, “Lo hawng rawh” i tih te khan maw, rawn hawnsak che kha ka va chak tehlul em!

Thlah liam che kha a va har em! Ka bianga i rawn fawh khan maw Bawihte, engkim ka hrethiam vek a sin! I bulah hian awm ve ka chak, ka ngai che, ka duh che, ka hmangaih che….!!!
Inah in haw ve leh i tap ta vak a..

“Anu chuan min duh lo a, min kalsan tawh” i ti maw? Mamte… Ka duat, i nu hian nangmah tluka duh hi ka nei lo a sin! Tinge ka bulah khan i tah ngam loh? Kan pahnih khan tap dun vak vak ila, a zia deuh tur… Mahse nang chu i chhel a, i fing a.. Ka hmuh laiin i tap duh lo a nih kha..

Bawihte…..I nu hian ka hmangaih reng ang che. Pathian hnenah kan tawngtai zel ang a, kan pahniha kan awm dun leh vat theih nan nang pawh lo tawngtai ve ziah ang che aw… Engkim tithei Pathian nung kan neih kha. I hla duh em em hi hre reng la…

“Ka chhandamtu’n min vengin, a hnai reng,
Thil eng pawh lo thleng se, ka him a ni…”

Harsatna te, manganna te kan tawh te hi Amah kan hnaih theihna tur a lo ni zel zawk si a. Engkim hi kan tana tha turin a ruat thin a, mihring te hi kan lo vui leh mai thin. Kan tawrh hi Lalpan a phal alawm, vui thei kan ni lo. Eng pawh kan chungah thleng se, eng pawh tawk ila, harsa tak chung pawn “Ka lawm e Lalpa” ti hram hram zel thin ang u.

Share this post:

You May Also Like

Leave a comment:

avatar
  Subscribe  
Notify of