INPUANNA | SUM MAMAWH VANGIN MI PA KAWP

“Hmeichhia kum 22 a upa ka ni a, ka nuin min pai lai hian ka pa nen an inthen a. Ti chuan, thla 5 mi ka nihin ka nu hian pasal dang a nei a, kei pawh chu min chhawm lut ve a. Ka pahrawn hian min duat ve hle thin, mahse ka nu nen chuan fa dang te an nei chho ve a, ka pahrawn chhungte hian min ngai thei vak lova, ka pa hi an fuihpawrh thin nge, a mizia a dang sawt em em a. Nikhua ka hriat chhoh ve hnu chuan min en dan bik hi mak ka ti a, ka hrethiam lo hle thin.

Ka pahrawn nau (ka ni) chuan tlai khat chu an inah ka kal lawk a, ‘i pa a lokal’ a tia, apa emaw tiin ‘a rualin ka haw duh asin le’ ka ti a. ‘I pa (ka u) hi i pa dik tak a ni hleinem, tuna lokal te chu i pa dik tak alawm’ a ti a, mak ka ti lutuk chu ka tap haw a. In ka thlen chuan anu ka zawt a, anu rilru chu a na em em a. A tan engmah sawi tam tur a awm lo, apa chu a hrilh a, apa chuan, ‘dawt a sawi hleinem, thudik alawm, engmah thinrimna tur a awm lo’ a ti mai a. Min chhuahpui dawn pawh nise tumah belh tur a nei bik si lo. A nu rilru tur hi ka hriatthiampui ngai lo a a hunlai khan, ka lo haw em em ringawt a, mahse inchhirin awmzia a nei si lo.

Ka pa diktak chu ka hre chak em em a, hmuh ka duh em em thin. Ka pahrawn lakah chuan theih tawp chhuah mah ila hmusit taka ankhum leh misual nih bak ka hlawh ngai lo. In chhungah te chuan inthlahrung takin ka awm a, ka nihna chu ka hriat chhuah ngai lovin hriattir ka ni reng thin.

Ka pahrawn chuan, “ka chawm tur i ni lova, inthlahrung hle rawh, i nu hi boral ta se tunge i belh ang, fa chuam kawl hi chu a hahthlak a nih hi, ka lo inngaihtuah chiang lova ka inchhir ngawih ngawih” tiin min tawngkhum reng thin. A chang chuan, ‘hlim taka an awm theih nan ka intihlum mai ang, kei hi buaina chu ka ni’ ka ti hial thin. Mahse anu ka ngaihtuah bawk si.

Ti hian rilru ka siam ta a, “ka pa diktak hi ka zawng chhuak ang a, lehkha nasa takin ka zir ang a, tuman min hmusit thei tawh lo ang” tiin.

Ni khat chu, Lalpa’n ka tan kawng a hawng a, ka pa dik tak nen chuan phone atangin kan inbe thei ta a. Apa chuan ‘bawihte i dam tha em? I pain a duat che em? Bawihte, min ngaidam rawh aw, rawn tlawh tur chein i hre chhuak ang a, hrehawm i tih ka hlau si, i pa ka la dam a, zam reng reng suh” min rawn ti a. Kei chu ka insum zo tawh lo, ka tap chhuak a, “Apa, tah chuan a hrehawm lutuk, min hmusit lutuk a” ka ti ringawt a. Apa chuan, ” lunngai suh, kar lehah ka rawn kal ang a, kan tifel vek dawn nia engkim” a ti a.

Karleh chu ka nghakhlel em em a, mahse ka tan karleh chu eng tikah mah a lo thleng tawh dawn si lo. Apa chuan motor accident ah min boralsan a, apa nen chuan a thih ni kha kan inhmuh hmasak ber ni kha a ni mai. Ka thawpikin Pathian hi ka dem ngawih ngawih thin. Apa kha ka mamawh a ni.

A thihnaa an pek pangpar leh puan chu ka hawn ve a, pangpar chu kan sitting room ah ka khawi a, ka nau hmeichhia chuan ka hlau a ti a. Apa chuan ‘dah bo nghal rawh ka paih hma hian’ a ti a. Ka thawmhnaw bawmah ka dah tha ta a. Apa thih atanga thla 3 hnuah chuan anu chu lung na vangin a boral ve leh a, ka tan hian khuanu remruat hi a va lawmawm loh em! Anu kha ka engkim, ka khawvel, ka damchhan a nia sin.

Ti chuan, ka pa chhungte chuan min enkawl ta a, depression te ka nei nasain rei tak chu ka normal thei lo va. Ka pa chhungte chu an harsa ve si a, zir zawm ka duh bawk si, Aizawl ah ka putea bulah ka awm ta a.

Ka putea chu nupui fanau chawmin an khawsa thei ve tawk tawk chauh a ni a, ka la tanpui theih loh bakah keimah ber hian ka zirna atan sum ka mamawh bawi si, ka mangang em em mai a. Ti chuan, ka mangan em em laiin ka putea te ina lo leng ve thin min ngaizawng rutu ka putea thianpa chuan midang awm loh laiin, ‘ka pui ang che pawisaah, ti chuan ka mutpui thin ang che’ min ti thin a.

Ka dinhmunah duhthlan tur ka nei si lo, sum ka mamawh apiangin a thusawi chu ka hre chhuak a, a tawpah chuan ka lo pawm ta a. Ti chuan, tunah hian sum ka mamawh vangin mi pa kawp chungin class ka kal mek a. Ka rilru a na, ka zak ru bawk, ka hlim thei mawlh lo. Inzir chhuah ka duh bawk si……

(He post hi 2016 kum tir lama ka post tawh kha a ni a, thurawn pek a ngai hran tawh lo. Mahse, in rilrua awm apiang in comment thei tho e.)

Share this post:

You May Also Like

Subscribe
Notify of
guest
2 Comments
most voted
newest oldest
Inline Feedbacks
View all comments
Albêrt Khüma Hualngo
Editor
2 years ago

good post!

Lalrammuanpuii
Lalrammuanpuii
Reply to  Albêrt Khüma Hualngo
2 years ago

I dinhmun chu a va han rapthlak zok em,,,…….mahse i huaisen hle mai,,,…..huaisen tak ini i chhunawm ka ti takzet,,……….i nu leh i pa boral ta pawn van a tangin an dem bik che ka ring lo,,,…………hlawhtling ngei ang che…..

2
0
Would love your thoughts, please comment.x
()
x