INPUANNA | MI PA NGAIZAWNGTE TAN

Mi pa ngaihzawn chungchanga harsatna nei kan tam khawp mai a, a pawi ka lo ti ve thei lutuk a; chuvang chuan tangkaipui in lo awm tak mialin ka experience tlem han share ang che u!

Mizoram a mobile phone rawn awm tirh khan mi pakhat nen hian kan in text thin a, a felin fiamthu a duh sia, kei lah nuih heh ve tak leh fiamthu duh ve tak mai ka ni si a, kawm nuam ka ti thei lutuk a, kan mizia a inang deuh bawk nen kan inngaina tawn ve ve khawp mai a.

Reilote emaw tih chhungin thla thum vel chu a lo liam hman ta reng mai. Kan la inhmu lova hming pawh kan inhre lova. Enge kan thawh tih leh mimal nun kan inzawt ngai lo ve ve thin. Kei chuan venthawn thil thuah tiin “Nang hi pa i ni tawh ngei ngei ang, i nuihdan atang hian ka hre mai”, ti tein ka dawp zauh2 thin a.

Chutia ka tih ka tih takah chuan nupui a neih tawh thu leh fa pakhat a neih tawh thu min hrilh ta a. Kei chuan, “I titha lutuk, thudik min hrilh a lawmawm e. Tun atang chuan inbe tawh lovang”, ka ti ta a. Ani chuan, “Inhmu ila, tichuan ka inbe tawh dawn lo nia”, tiin min tiam a, “Ni e”, ka ti ve mai a; ‘chuan inhmu tur chuan ruahmanna kan siam ta a.

Kan inhmu ta ngei a… a thrianpa a rawn kalpui a, kei erawh mahniin ka kal a. Kan inhmu chu sawi tur vang khawp mai, a thianpa chuan min lo chhaih vel a, eng tin mah ka chhang lova, ka nui bawk lova ka ngawi hmak. Chuan ‘kan rawn thlah ang che’ an tia, ‘ni e’ ka ti ve mai a, kan in thleng min rawn thlah ta a. In ka lut fel chiah tihah chuan mi rawn be leh nghal a. “I thutiam kha hlen rawh mi pa i nih kha inbiak leh inhmuh ka duh tawh lo”, ka ti a.

Mahse, ‘a zualzopui vaihlenhlo’ tih ang chiah, a hma zawng aia nasain mi rawn call thin. Lak loh hram ka duh thin, mahse ka lo ngaina ve hman lutuk tih erawh chu ka hria. Ka lunglengin ka khawhar lutuk chuan a changin ka pick up a, ngawi rengin a tawng chiah ka ngaithla thin. A ni thei ngang lo nia ka hriat avang chuan a rilru tihnat dan ka zawng tan ta a.

‘Min rawn be tawh suh, i zak lawm ni? I nupui leh I fate kha tha takin enkawl la a tawk, eng atan mah ka ti lo che”, ti tein ka va message thin a. Tap chungin ‘ka hmangaih che’ a rawn ti a, a rilru tihnat tuma sms ka thawn apiangin ka thinlung hi a na ve ngawih ngawih thin.

Hun a lo kal zel a, state dangah ka awm ta a, ka number pawh ka thlak a; mahse kum 4 vel a liam tawh hnu pawn khawi atangin nge ka no. a neih ka hre lo, min la rawn text a nih chu! A number ka hriat avangin amah a ni tih ka hre mai a. Chuan ka no. ka thlak leh tak hnu chuan mi rawn be leh ta lo tun thlengin.

DUH LO CHUNG CHUNG A INNGAIHZAWNTIR THEIH RENG LOH tih hi ka sawi duh a. Tihpalh chu a awm thei teh meuh mai; mahse Pathian i hlauha i duh lo takzet a nih chuan a pumpelh dan kawng chu a tam khawp mai. Amah va ngaihzawn zel a, pasala va neih chu sawi loh, khatia a rilru ka lo la peng ringawt pawh kha ka inthiam lo khawp mai.

Ama hnenah pawh chuan ka sawi a, “Pathian ka hlau a, ka chunga thleng ve turin ka duh lo; chuvang chuan engtikah mah min kawm leh hi beisei tawh suh”, te ka ti a. A tawp a tawpah chuan a reh hlen ve ta.

(Amah chu mi fel leh pangngai tak, Kohhranah pawh inhmang tak mi a ni).

A duh vang reng a ni bik lo mai thei; mahse mihringah chuan thil awm ve thei a ni tlat. A pumpelh dan erawh a awm reng a ni tih hi ka han sawi leh hram duh a ni. Vawiin ni thleng hian kei pawh Pathianin min la humhim a, pasal tur tha tak min pek hun lawm takin ka nghak reng a ni.

(He thu hi 2014 August thlaa post tawh kha a ni e.)

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x