INPUANNA | FAHRAH VANGA HMUHSIT LEH HNAWHCHHUAH

Kan pa nen hian kum 9 kalta khan kan innei a, kan fanu pawh kum 8 a ni ve tawh. Kei hi pa nei tawh lo, fahrah ka ni a. Kan inneih tirh atangin zu a in nasa em em a, ka naupai lai te chuan ngaihsak leh duat ka hlawh ngai lo. A hlawh hi cheng 1 pawh min pe ve ngailo a, ka mamawh ngawih² leh ka chak zawng leina tur takngial pawh ka nei ngai lo. Ka nau pawm lai te chuan kawrhnuai (bra) 1 chiah hak tur ka nei thin. Min ngaihsakloh em avangin a chhungte pawn min hmusit thin lutuk. Zantin a rui a, tlai tak² ah, zan rei tak² ah te rawn hawin, ka chungah hian a rawn thinrim thin.

A chhungte hi kan inneih tirh te atangin an sual ve hrim², fahrah ka nih vangin kawng tinrengin min hnuaichhiah a, min hmusit tlat a, ei leh in thlengin min thlei bik thin. A nu hi nu nasa leh sual ve hrim² a ni a, thenawm khawvengah amah ngei lo an awm mang lo. A pasal hi a thuhnuai hneh bawk si. Mi hausa leh neinung ngaisang chi a ni. Ka mopui chu an milian bawk a, a lakah chuan a tha lutuk. A pasal chhungte ah pawh nei deuh leh neilo zawk te chu a endan a dang deih.

A tawi zawngin sawi mai ila…. hrehawm tin reng ka tuar nasa a, beidawng leh hrehawm ka tih ngawih² pawn a chhungte hian ka chhuah an phal leh thin si lo. Zu ruia buaina te a siam thin avangin ka chhuahsan chuan anmahnia tawrh kha an peihlo niin ka hria.

Hunte a lo liam ve zel a, kan fanu kum 1 a tlin hnuin min indantir a. Kan indan dawn pawn ka huphurh ngawih² a, hrehawm tam tak keimahin ka tuar tawh dawn tih ka hria.

Tichuan a nun pangngai ang chuan nitin hun kan hmang liam ve hram² a, mahse kut thlak te a chin em avang chuan a tawpah thui ngai leh ha te bal hial khawpin kut min thlak ta a. Tun thlengin ser reh theilo ka nei ta a ni. Mahse ngaihdam min dil nasa em a, kei pawn kha leh chen hrehawm tam tak tuarin awm mah ila ka hmangaih lutuk tho. Ka thinlung zawng²in ka ngaidam vek.

Mahse, a nun a sim chuang lo. Rilru na leh zan pawh mu thei lovin ka awm thin. Ka beidawng lutuk, chhuah ve pawn ngaihdam min dil a, insiamthat a tum tawh thu nen…. a that ve tawh beiseiin ka fanu pa a nia ka hmangaih bawk a ka haw leh thin a, mahse awmzia a nei ngai chuang lo.

Chuan, nikum khan kan inthen ve ta tak² a thla 9 dawn chu. A tir chuan hrehawm ka ti ve lutuk. Mahse kan innei tha thei lo a, ka lakah lawmna a nei ngai chuang lo va. Ka tlinlohna zawng² leh dawt thleng pawn chhungte bulah min rel duh zel a. A thiamloh eng angah pawh a chhung ten an tan tlat zel bawk si a, ka beidawng tawh a ni. Ka hmalam nun thar atan ka rilru te ka siam ve tan tawh tihah chuan kan pa chuan theih tawpin ngaihdam min dil a, intiamna hrang² nen.

A inchhirin hrehawm a ti ngawih² tih pawh ka hria. Mahse ka hlauthawng ngawih² tawh a, ka ring hlei thei tawh lo. Mahse a beidawng duh lo, camp ah te a lut a, theih tawpin ngaihdam min dil a, a tawpah chuan kei pawn a inhmuchhuak ve tawh tak² a nih hi tiin ngaihtha deuhin ka haw leh ta a.

Chuan anu te inhnuaiah kan awm ve ta a, a tir chuan kan hlim ve lutuk. Zu te pawh a in lo. Mahse nau ka pai zui ta mai si a, tun tum ka naupai chu ka la na em² mai bawk si a, dam that ni hmel ka hmu ngai meuh lo. Ka inthlahrung ve thin lutuk, amah pawh ka hrilh thin.

Ka naupai hmasa zawk te leh a hma zawng khan min duàtna dawng ve ngai ta lo chu nun inhmuchhuak leh a awm tawh dan te a inchhir ve nia ka hriat vang khan ka pangchangin ka rilru pawh a no ve lutuk. Min ngaihsak ve se tih te ka ngaihtuah thin. Mahse ka beisei ang reng² ka hmu ngai ta chuang lo va.

Zu chu a nghei tluk a ni. Mahse thil a kal fuh lo chho ta zel a, a nu leh pa inah a kal tam em² a. Zing atangin a chho a, a zia a dang tawlh² a. Kei min ngaihsak that duhloh em² làiin midang tha tak² a biak vang te hian ka thik rilru thin.

Zan khat chu thikthu vangin kan inhau ta a, kan inhau nasa lutuk. Ka raino a, ka rilru a noin ka pangchang em em a, amàh te hi ka ngai ngawih² thin tih te pawh ka hrilh a. Mahse min hrethiam duhlo nge, awmzia a nei ngai chuang lo. Chutia kan inhauh takah chuan a chhung te nen ka chhung te an phone a, “Rawn hruai rawh u,” an ti a. Ka chhungte an rawn kal hman si lo a. Ka cousin te, ka chhung te hrang² an phone a, an rawn kal hman mai hlawm si lova. Chumi zan chuan kan pa chu a nu te inah a riak daih nghe². A tuk khua a lo var a, “Insiam la, chhuak rawh,” min rawn ti leh a.

Tichuan, hmanni lawkah kan inhruai haw leh chauh a, ka haw leh dawn pawn khati khawp khan ka hreh a. “Inthen leh tur chuàn rawn haw ka duhlo a nia” ka ti ngawih² a. Amah pawn a chhungte hi ka lakah an tha lo tih a hre ve tho. Ka nun zawng² ka sim ang a, tu lakah pawh kan intan tlat tawh ang te a ti kha a ni sia. Chu bakah nau ka pai leh tawh bawk si, ka chhuak duhlo a. Mahse zingah, chhunah, zanah, englai pawn ka chhungte hrang² chu an phone a, rawn hruai rawh u an ti ta ngat² a.

A nu te inah a chho reng a, chaw te a ei a, a rawn chhuk pawn an rawn phone zel a. A nau pasal nei tawh te pawh an rawn phei thin a. Eng ro nge an rel a, eng ang takin nge kan pa thluak hi an suk sak ka hrethiam lo. Min tih hrehawm hrim² hi an tum em ni ang? Khati khawpa hmanni lawka a intiamna leh a inchhirna te kha, kum kha leh chen a zu in nasat vanglai zawng² a ka tawrhna te, ka ngaihdamna zawng² te kha min khawngaih letna pakhat mah an nei lo.

Chuan, chhuak lo chuan ka tuar lui ta ngat² a, mahse eng emaw a awm hlek chuan “Chhuak rawh, duh lo mah la i van chhuak dawn chiang tak, ka pawt chhuak tho² ang che,” te min ti ta ziah a. Ka taksa lah hi a chak lo em em mai si a, kan inentir apiagin ka Bp a hniam tual² a, ka weight ka lost belh ziah bawk a, ka chau thei hle a, ka lu a hai nasa thin bawk. Chuti chung chuan nidanga min puih ve zeuh thinna angah pawh khan min pui duh tawh ngai lo.

Rawng ka bawl mai theih loh pawn ka bawl hun nghakin thim dawn thleng tv bulah a thu thin. Min be khat lutuk tawh. A thiante ina chaw a ei dawn pawn, “Lo haw hma hram rawh aw.. ka ei tur rawng pawh ka bawl thei lova,” ka tih lawm² pawn, zan dar 11 pelhah a rawn haw a. Nitin hian ka tap a, ka beidawng ngawih² thin. Ka fanu hi awm lo se chuan dam chakna ka nei tawh lo ang.

Chuan, hmanni lawk khan kan inhau leh deuh a, eng pawh hi sawi ve ila a haw vek tawh a ni mai. Ka sawi chu dik lo turah a ngai vek. A nu te inah a chho leh a, a han awm vang² a, a nu chu a rawn chhuk a, min rawn ankhum hrep a. Kan pa chu a rawn chhuk a, ka chhungte a phone leh a, message nen. “Rawn hruai ru a va ti leh a, a nu ten taxi te an ko a, phei ru min ti a. Khuma ka thu min pawh thlak te a tum a, ka rilru hi a na tawp a ni.

“Ka duh tawh lo che, khawngaih takin kal rawh u” min ti a. Mahse ni khatah kan kal mai ang ka ti a. Driver (a thianpa) te kha an awm ve bawk si a, ka zak lutuk. Zanah te pawh lungawi tak chu ni lovin kan titi a, kan mu a. Zingah pawh pangngaiin rawng ka bawl a, mahse a pain a rawn ko zauh a, a chho leh vang² a. A rawn chhuk chuan lo thu teh a ti a, a ngaite bawkin boruak a intan leh ta a. Insiam ru min ti leh a, a pate inah bawk chuan a chho leh a. Ka tan awm luih ngaihna a awm tawh ngang lo.

Ka damdawi lehkha lak tumin ka han chho ve a, a pa chuan kan pa hnenah min lo rel mawlh² ri chu ka han hria a. Ka pawisa hman dan dawt vek lehnghalin. Aw.. Pathian khian thudik chu a hre vek si a, a na hi ka van ti vawng² tak. Hetianga an tih thin vang hi a lo ni a, kan pa danglam sawt em em nachhan chu. Amah lah hian inhnial hlek ila a chho nghal a, a han sawi vek a. Annin a thin tirim belh turin an lo fuih char² thin a lo ni a. Anmahni chu rawn tawng duh silovin duh ang² an rawn sawitirin an rawn tihtir a ni ber mai. An duh² in a thluak hi an khalh kawisak char² mai a ni.

A mizia an hre hneh si, amah lah hian a hrethiam der si lo. Tun hma zawnga a zu ruih nasat lai chuan ka laka tha duh miah chuang silovin ka chhuah an hlau ngawih² thin kha a nia. A chhan chu a zu rui buaina siam te kha an hrawn peih lova. Veng dang hla takah min indantir kha àn ni reng a. Tunah zu a in lo ve deuh a, hetiang hian ka chungah an ti nghal duh a, ka rilru hi a na ngawih².

Chuan, kan pa hian a phone hi khawihsak a hlau thei lutuk. Khawih theiha a awma han en chang lah hian message, whatsapp, call list a lo in clear fai vek zel.

Tin, naupaiah pawh ka chak loh leh ka hriselloh ber laiin hetianga min tiduh hi a na ka ti a ni. Amah hi chu ka hmangaih lutuk, mahse heti em ema intih hi chu ka tlawmngai ve em em tawh.

Tunah chuan kan in lamah ka awm a. Ka nuta te pawh an rilru a na ve tawh lutuk. Haw tawh lo se min ti a, engmah lungngaih tur a awm lo min ti. Kan pa awmdan hi a rilru zawng² a ni lo tih ka hria. Kan kal dawn meuh kha chuan hrehawm a ti ve lutuk. An fuihna ata harh chhuaha inchhir hun hi a la nei dawn tih ka hria. A thiltih hian amah hi a la vaw let dawn si a. Hmangaih te tel lo hian eng tin nge ka awm zel tak ang le!!!

(He thu hi 2015 Sep’ thlaa post tawh kha a ni e.)

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x