INLAICHINA HMA HRUAI

INLAICHINNA HMA HRUAI
– Chhantea Pautu

Inlaichinna ṭha nei tura thil tih ngai hi ho tak anga lang a ni thei.

Hmeichhia chuan- a chang chuan zanrei pawh sawi lovin a rawn call che ang a, lo pick-up turin a duh che ang a, i buai thu i hrilh erawh chuan ṭha takin a dah thung ang.

In han inbia ang a, a thil vei leh sawi duh a sawi par par ang a, i ṭawng vena hun remchang reng reng a siam lo vang.

Zanah in han inbia ang a, zing a thawh phat aṭanga tuna in inbiak hma deuha a thiltih, nilenga a thiltih kha sawiin i hnenah a report char char mai ang. Ngaithla ang che.

Dawh thei taka i lo ngaihthlaka, i ngaihven a ni tih i lantir chuan atan mipa zahawm leh duhawm tak i ni tih a thinlungah a awm ṭan ang.

Eng emaw chang chuan i thil tih laklawh lai leh lai lo pawh a sawi lo vang a, i Bike khalh lai paw’n a rawn call mai thei che a, lo pick-up ang che.

Phone-a in inbiak hunah, i tana ṭawng ve na hman awm miah lova darkar chanve lai, a ṭawng char char hun pawh a awm mai thei a nia aw.

Thil chikhat chauh a sawi dawn lo va, a duh duh a sawi ang a, mumal vak lem lo pawha thil chi hrang hrang a sawi kual dawn avangin hre lawk ang che. A thiam danin i hnenah report a pe a nih kha.

Mipa khirh lutuk bula awm hahthlak a ti. A duh lo. Hei hi val seniorte harsatna a ni.

Ngai em em reng turin a beisei che a; mahse, i ngai a ni tih i sawi reng chuan a induh khum che emaw, a ngaihsak lo lui lawi si ang che. Hei chu a buaithlak dawn chiang.

“I van chimawm thiam reuh…ka khawng keuh mai tur che asin…” tih ṭawngkam ringawt pawh a hlimpui ang a, a duh phah sawt ang che.

Tak renruna inngaihzawn a duh lo va, a hun lova fiam chhen erawh a duh miah lo vang.

Naupangchhia deuh taka inkawp a duh hun a awm ang a, zangkhai takin; mahse, puitling anga en a phut hun a awm ang. Chutiang mi chu ni mah sela, naupang taka i chhaih fiam ṭhin chuan, a hlim phah veng veng ṭhin ang.

Mipa i nih ang ngeiin pa taka awm turin a beisei che a; mahse, a ṭul hunah, hmeichhe tih tur ni-a kan ngaih, thleng sil, chhuat nawh leh in chhung chet i khawih ve mai hreh lo a nih chuan a ngaisang ngawt ang che, a zah bawk ang che. Inti mipate harsatna.

A duh dan anga awm ve duh leh a tih ve theihte chu a ngaina. Hetiang hi hmeichiate duhzawng mipate chu an ni. Mahse, tlang tak leh pa taka awm turin a duh thung che.

I hriat thiam a phut a, a lakah dawh thei la a duh a, ngaihsak thiam la a duh a, a dam lo a nih chuan,”A la na em?” “I ṭha tawh em?” tiin a dam tih i hriat hnu-ah pawh zawt la, i mark a ṭha ngawt ang.

A chang chuan a hne thut che ang a. A ning thut ang che. A be lo vang vang dawn che a, a nun insiam rem a mamawh a ni. Nghak rih la, dawh thei la, hre thiam ang che.

Mi chhawih ni chiah si lo, ‘fing huihin’ a bulah han awm ve zauh zauh la maw le. Mahse, ṭahtir zauh zauh rawh! ‘A lakah sual rawh’ tihna a ni lo a nia.

Inring rawh! Phone a dah tau dawn a nia, i tan chuan zaidam hunlai tak a ni, i lakah a pangchang a nih kha.

Hei hi theihnghilh suh, a chhungte chanchin ngaihven la, an dam ṭha em tih zawt fo rawh.
____________
PS: Hruihrual thum a ni fo tur a ni- Pathian+Nang+I Kawppui.

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x