I NA A NI TIRAW!? (Dedicate to Admin Malsawma Hauhnar)

I NA A NI TIRAW!?
(Dedicate to Admin Malsawma Hauhnar)
Chhantea Pautu

A tân i inpumpek a; hmangaihtu chu a hmangaih tân a inpumpek ṭhin tlat si.
A tân engkim i huam a; hmangaihtuin a hmangaih tân inhuam chintâwk a nei ngai si lo.

A tân engmah i ui lo va, theih loh anga lang pawh tih theih hram dan i zawng tlat a; hmangaihtuin a hmangaih tâna a inpêkna hian chintâwk a nei meuh si lo, a ni tiraw!?

Lei leh van Lalber dinhmuna ding thei meuhin mihringte a hmangaih avanga a tawp thlenga a tuar a, a thih tâk hial kha; kha kha hmangaihna vawrtawp chu a ni tih i hria.

Atir chuan i hmangaihna pawmin, i thlakhlelh rualin a thlahlel che a, i ngaihna a nasat rualin a ngaihna che a luang liam ve a.

Tuifawn hi thunun theih loha a fawn a, tuipui kam ṭiauvut a pawm lut ang hian, i hmangaihna chêna a lo pawm avanga a thinlung luang liam fawn vel chuan i thinlung chu a la duak duak a.

I thinlung pawh thunun hleithei lovin a zûnzâm chuan a hneh che a, nang pawh, a hma aia nasain i luang liam a nih kha. Amah i hmangaihna kha chelh thei tur khawpin i inthunun hman lo; amah i hmangaihna khan chelh theih loh tur khawpin a lamah a hnuk ta zawk che a ni.

I va han luang liam tak, tiraw!?

A sarhu inlawmna boruak zualpui a liam a, i hmangaihna thinlung avanga a tâna i inpêkna a lo dawnsawn dan a dang ṭan a.
Amah i hmangaihna vanga i inthunun hman ṭhin lo chu a tan hriat thiam a lo har ṭan ta.
I ngai a, i thlahlel a; mahse, a tâna i inpêkna chu ninawm a lo chang zo va, hmangaihna dawngtu ni lovin hmangaihtu chu i lo na ṭan ta.

A tân hmel hriat loh mikhual ang mai i lo ni ṭan ta.

Mahse, i thlakhlelh ngaiin i la thlahlel a, i duh ngaiin i la duh si. A tâna i inpêkna thinlung pawh a la ngai reng.

Mi dang hriatpui lovin i hui pap pap a, i kun tlawk tlawk a, i ṭah mittui hru hultu an awm lo. I khumah, puan hnuaiah, inlukhupin i mittui a dir a, miten i natna an hmuh hlauvin i nun tak i thup a; i na a ni tiraw!?

I mitthlaah hlim taka in inlawm lai a lo lang a, nangmah avanga a nui hmel te, i hlim lai hunte kha theihnghilh rual a ni si lo. Naupangin an thil duh leh awh ngawih ngawih an neih avanga an phurna ang maia inpahnih inkara hmangaihna so liam avanga in phur tawnziate kha, i hriatna khan a hriat hmaih lo.

A thinlung kha i duh ber a ni.

Hmangaihna avanga hetia i awm hi demawm i ni lo ve; mahse, tih tur i nei ve a nia. I thei ngei tur a ni bawk.

Hun pe la, thlahfal la; nang pawh han hawi thawveng ve teh le. Inhriat thiam tawn hi a pawimawh fo a ni; a tel lova awm han zir ve la, a harsa mai thei, tihtheih loh tawp erawh a ni lo.

I na a ni tiraw!?

Nakkinah chuan i natna kha nangmah tichaktu a la ni ngat ang.

Share this post:

You May Also Like