I LUNGNGAI TIRAW!?

SAM BU CHHUNGA KA DUH ZUAL TE
Chhantea Pautu

Sam bu-a ka duh zualte behchhana ka thuziah hi a mamawhtute tan ka hlan e…

I mamawh ngawih ngawih, i duh em em, i thinlung luah khattu kha LALPA hnen atangin i hmu thei. Nghak rih ta che. (Sam 2:8)

Vawn tur leh rinchhan tur nei ve lo niin i inhria a; mahse i muthilh lai pawha vil rengtu che a awm. (Sam 3:5)

Tahna ruamah i lut a, natna leh lungngaihnain a tlakbuak che a, mahni chauha dingin i lamtang an bo zo a, khawvel hian a hnuchhawn che niin i hria a; mahse chu hmunah pawh chuan i him a ni. (Sam 4:8)

Nangmah Siamtu’n a duhtawk hmain i lo duhtawk ve ringawt a! I nih tura a ruahman leh, a duansak che i hmu kim tawh reng em? I dawn tur leh i thlen chin tur nangma’n bithliahin i ding mai a ni. Hmalam pan zel ta che. (Sam 21:6)

I nu leh pa in an kalsan che a. A nih loh leh, thihna avang ni kher lo pawhin an chhuahsan che a, ‘misual’ ti-a enhranin i awm a; mahse i tana awm reng thin a la awm. (Sam 27:10)

Bul tan tha leh thei tawh lo khawpa tisual nasa-ah i inngai a; mahse duhsakna dawngtu i ni. Chutah chuan nunna a awm! Harsatna lo thleng zawhah lawmna pawh a lo thleng thin. (Sam 30:5)

I chunga lo thleng thin harsatnate kha, i tana tha tura herrem hi Pathianin a thiam teh a sin. (Sam 30:11)

Finna dilin tawngtai fo rawh. I tana LALPA thutiam a ni. Thutlukna dik siam harsa i ti a, i nunkawng engkim atan finna i mamawh a ni. (Sam 32:8)

Rilru tibuai ram ram khawp manganna i tawk a; mahse chhanhim i ni dawn a ni. LALPA chu chawimawi tlak a ni tih, i hria ang. (Sam 50:15)

LALPA-a i lawm leh lawm loh hi i thinlung tehfung pakhat a ni. I thinlung putzia kha LALPA i chhuan leh chhuan lohah enfiah fo rawh. (Sam 64:10)

Chhungkaw kehchhia atanga lo chawrchhuak i nihna kha nangmah inngaih hniam nan hmang suh. I khawhar reng dawn lo. (Sam 68:6)

Mî endawng!
Cheksawlh!
Rél chhiat!
Sawi sep!
Mak tih!
Hengte hi i chungah a thleng a; mahse an hmuh thiam ve loh kulh nghet a awm. Tlan lut thuai rawh. (Sam 71:7)

Tlachhamin i awm reng dawn lo. LALPA i rin a, Amaha i innghah chuan i mualpho lovang. (Sam 81:16)

I hmelma avangin i hlauthawng a. I natna avang khan i mangang a. Damrei pawh i inring lo hial a. Mahse damrei tura malsawm i ni. (Sam 91 pumpui leh chang 16)

LALPAN i felna rah, lawmman a pe dawn che. (Sam 92:12)

I daipelh a. I tlu palh a. Mahse chelhtu kutchak tak leh dâwmtu thinlung ngilneiin a hmuak fo che. (Sam 94:18,19)

LALPA tihtute hmabak a êng fo. Thil thain a hmuak thin. An rilru-a hlim leh lawmna thlentu lam ngaituah tlat a, a êng zawnga thil thlir mi te an hlim thin. (Sam 97:11)

Retheite, ensanin an awm hlen dawn lo. Mal takin i awm reng lovang. Pathian hnathawh i thinlungin vawng reng ang che. I chunga thil tha lothlengte, theihnghilh suh. (Sam 107:41, 43)

I rilru tinatute, nangmah dotute, i pawi sawitute tan malsawm tawngtai nei fo rawh. Anmahni avanga i rilru na a dam thlengin. (Sam 109:4)

I tawp mai dawn lo a ni tih, rinnain puangchhuak rawh. A thiltihte puanga midangte hriattir turin LALPAN a duh che. (Sam 118:17)

I ril a tam a. Tlachham niin i inhria a. LALPA-ah innghatin nghak phawt mai teh. (Sam 132:15)
________
Bible keu la, Sam number leh chang tarlante khi en pah zelin, khawngaihtakin han chhiar nawn leh teh!

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x