I BEIH VE LOH TEN LE

Toni DA Ralte Ahmangaihi

Pathian hi rin tur. Kan rin êm avang erawh chuan, nghah tlawk tlawk loh tur. Naupang pakhat exam tur chuan, “Amah chu ring la, aman a ti vek ang” (Source: The Bible) tih thu kha a chhiar fuh hlauh mai a. “Pathian ka ring, aman min tihsak vek mai ang” tiin a hahchawl ta der der a. Exam Hall-ah chuan a rin Pathian chuan chhanna a rawn hrilh ru sur sur ta hauh si lo a! “Pathian hi engmah a ni lo e” tiin amah siamtu a dem ta hmiah mai le! Pathian kan rin dan hi a ni lo zawnga atchilh chuan thil pawi tak a thleng thin.

Harsatna leh buaina te , fiahna te hi kan Pathian hian kan tawh a phal vek mai. Chu mi rual chuan tlanchhuahna kawng a lo hawng diam bawk. Tlanchhuah tum map lova, “Pathianin min chhanchhuak mai ang” tih sahuai thingvawn tlut te hian damkhawchhuak turin chance an nei tlem hle a ni lawm ni? Mahni ngei che chhuak a, harsatna hmachhawn ngam te hi alawm chunglam pawhin țanpui nuam a tih.

Engvang pawh nise, lungngaia i indawm kun lai chuan, ” Pathian bel tlat rawh. Țawngțai tam la” tih thu hmanga hnem tumtu che an rawn lang țiam țiam ang. Nang erawh chu Pathian belh thut dan leh țawngțai uar sauh dan chu i hre lo a, i tawrhna chauh lo chu thil dang ngaihtuah harsa i ti ang. I lungngai lai chauha Pathian belh lah i inthlahrung ve tum hrang maithei bawk. Lungngai suh. Kha’ng thu, i hnena sawitu te khan i pheikhawk bun ang bun vein, i tlukna angah khan tlu ta se khatiang thu kha an sawi bik kher lo ang.

A sarhu lai chuan hamhaihna leh chíâina te hian kan nun a tibuai a. Ngaihtuahna hi a tawi tûk mai thin. A sarhu lai chuan tuar la, țap rawh. Na ti la, thinrim la, i rilru fim laia i tih duh hauh loh tur, ngaihtuahna tha lo tak tak hmang te pawhin inhrosa rawh. I demawm loh. Mahse, a sarhu kha i nunah behtir kumhlun ngai suh. Mumang pawhin tawp hun a nei thin alawm le.

Tichuan, Khatia i khawvel chep tak, mualphona leh hmuhsitna ten a hual vel, engkim hloh leh chân anga i inhriatna khuarkhurumah khan i damchhunga tan i duh lovang tiraw? “Engvangin nge hetiang hi ka chungah a thlen bik?” tiin i inngaihtuah lungpuam a. Mahse, i vanduai ber lo tih pawm erawh harsa ti mah la, pawm rawh.

Kha’ng i tawrhna te khan maw tu nge i nih tih leh eng anga chak nge i nih pholan sak che an chak alawm. Khawvel hian i nihna dik tak hmuh a chak a. Hmuh tir ngei ang che.

Pathian hi nangmah puitu atan chuan a chak ber a, mahse, i ke pen ve hun a nghak a. I chet chhuah a, i harsatna chu hmun leh hmuna i dinchilha i hmachhawn a nghak asin. Nangmah ber i indawm kun a, i che chhuak ngam lo a nih chuan, i Pathian chu engtianga che tura beisei nge maw i nih le? I tithei a, i chak tih i pawm phawt chuan nangmah nawrkaltu atan i ke chu a lo chak ang a, nitinin i huaisenna leh inrintawkna te chu i neih belh zel ang. Nun hi Fight ve rawh, i damkhawchhuah nan.

“HLAUHNA HNEH DAN ȚHA BER CHU HMACHHAWN HI A NI”

Ka thu duh ber mai chu hei hi – “A harsat lai ber kha i beidawn loh hun chu a ni si a” – Mother Teresa.

(December 9, 2016)

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x