“HMEICHHIA MAI MAI!” TIH CHI PAWH AN LO NI VAK LO!

“Hmeichhia Mai Mai” Tih Chi Pawh An Lo Ni Vak Lo!
Chhantea Pautu
©
An duh hun tèah min rawn bia a, an duh duh an rawn sawi teuh a, mipa kan lo ngawi kar a, an thusawi chu kan lo ‘aw’ ‘e’ sak thlap thlap a; an sawi duh an han sawi zo te te a, an rin aiin kan lo inbe rei ta si a, kan inbiak zawh meuh chuan zan a lo rei tawh thin, “Min be rei thei lutuk; Phone dah hi i ui thei si!” an han ti hleuh mai a; an remhria a nia aw!

Inbiak inbiak tákah chuan mipa kan ṭawngduh tum a lo awm ve tho mai a; chuti ang tum chuan ṭawng inchuh a ngai ta tlat thin! An ngaihdan kha kan han kalh deuh tawh phei chuan, “Mipa ve si; inhnial i hrât reuh zit zet!” min han ti erh a! Lu thak lo pui hîatin mipa hi kan phun nuah nuah fo nia!

A chângin min rawn vin hrep a, a chângin min zilh vak a, a chângin kan lawmah, “Ka ngâi che a” an han tia(h)! Hehehe…a ngaihna hi an hre em em a; a chângin an bialpa hluite chanchin min sawipui hrep a! An ngaihdan kalh palh vaih chuan zan dar 12:00 pelh rawk thlengin an inhnialpui theih; han khing ve dawn ila, “Mipa ve si; hmeichhia khing tawk lek i nih hi!” min han tia(h)!

Nia, mipa nih ve miau mai si chuan hmeichhe khing tawk lek nih kha kan duh miah bîk si lo va(hei hi an hre ve kar a); a tâwpah chuan pà deuhin mipa chu kan tlawm leh nge nge thin! “Mipa hnial zawt zawt leh khing ar ar hmeichhia…chuti…khati…” ti zawngin thu han la vaih teh, “Hmeichhia leh mipa chungnung bîk kan awm lo, kan intluktlâng vek” tiin an vawthla leh tho tho dawn che; dik ti mang meuh lo, dik lo ti mang meuh bawk si lovin, lungthlu lo deuh siin i pawmpui leh tho tho a ngai ang!

A duh hun tèah a rawn bia ang che kan tih tawh kha; a thusawi i ngaihthlâk a, i lo hriatthiam sak chuan a tân i hlu ngawt ang! Nupaah, nuho titina hmuna Pa ber inrawlh ve vak hi a mawi lo va; Paho titi vawrhna hmuna Nuin ngaihdan a lo sawi ve zat zat pawh hi a mawi lo riauin a hriat! Inmualpho tawn a hlauhawm thin a nia!

Hmeichhia hi mipa mamawh zawng zawng neitu kha an ni miau a!

“Hmeichhia angin sawi peih ve ni ula mipa in ni nang!” an han ti deuh zaih mai a; rem an hriain thil sawisel ve lo tura mi khap dan te hi an hria a nia! Lang vak chuang si lo vin ‘DÂN’ han zam zeuh dàn an hre riau a; mipa phunchiar chu, “Mipa ve si, phunchiar lutuk!” an tih zawhah, “Mipa chu hmeichhia anga phunchiar ve tur a ni lo” an han ti zui a(anmahni nihna an puang tel tih an inhre miah lo!); chu chu an ‘DÂN’ zam pawimawh tak pakhat a ni!

N’e, mipa chu phunchiar loh tur a ni; mipa ten hmeichhiate ‘DÂN’ zam hi kan hretlâng ang chu maw!? Inchhûng sekrek khawihpui nachâng i hrìat theih na’n emaw, a phût rilru ve che tih i hríat theih na’n emaw, “Tunlaiah thâibàwih an awm tak tak tawh lo, nupa inpui tawn chu nupa tangrual an ni!” an han ti a. “Mizote chiah hi thâibàwih nei Hnam kan ni!” an han ti lehnghal zat a; hei pawh hi dik lo ti deuh mah la a dik i ti deuh tho bawk si ang a, a buaithlâk i ti fu ang!

An ‘DÂN’ zam tè reuh te te zawm sak fo chu mipa tha nihna a ni ve tlat a nia aw! Mahse mak ve tak chu maw, hmeichhe fing takah chuan, a thuphung chauh pawha, “Engtin nge maw ni dawn le? Mami nu thu thu a ni mai!” tih tawngkam hian mipa zah lêtna leh a tha zawnga rulh lêt châkna a neih tîr ve tlat thin zu nia; thil lian tham leh khirh tak tak a lo thlen meuh chuan, mipa an ngâiin an thlahlel a, an thlamuanpui fo va, an kutah an innghat leh thin! Mipa mimal nuna harsatna ni lo, hmeichhe mimal nuna harsatna a lo thlen emaw, chhungkuaa harsatna khirh a lo thlen emaw chuan, innghah na’n mipa an mamawh thin a ni tih kan hrîat sak a tul khawp mai!

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x