HMEICHHIA CHU! III

HMEICHHIA CHU!
Chhantea Pautu

An nèp lo! An theuneu lo! An namailo! An mai mai lo! En rawh le-

Tapa mittui tla chungin chhel takin an ding! Vawikhat a nuih seih che khàn khawvel hi thar ta ser serin i hre thei a! “Ka hmangaih che” a tih chuan nileng zankhuain i hlim veng veng thei!

A fakna che tawngkam khat lekin a tiphur hurh thei che a! A rinna che thinlung dik tak khan, i thlen phàka i ngaih loh hmun a thlen tir thei che! I hnathawhna kîanga a lo awm ve ringawt khàn phur takin hna i thawk surh surh ang!

A zahna che tawngkam khat lek khàn, pawimawh leh chak tak angin a inngaih tir che a! A ring ngam che tih a tih-lan paha hmalam pan tura a fuihna che khàn, hmalam chak takin a pan tir che a; a tawpah a hlawhtlin tir thei che a sin!

Mak ta riau chu- Mi pangngai ang leka inngai kha; mipa ropui tak leh hlawhtling tak ni turin a nawrkal thei che! Chubâkah; i khing lehlam ni tura ruat, awm nêm tak ni chung si a tuarchhel em em a ni!

E hiau! “Mipa ropui tak phênah hmeichhe ropui tak an awm châwk!” tih lampang khân an sawi an tia mi!? Hmeichhiate u, in ropui; in tih tur pawh inhriat tâk hi!

Hmeichhia chu maw, a mittui tla mah se a chhel a! Awmnem mah se a huaisen a! A nui hmel phênah a tuarna a awm! A rilru na thin mah se a thup zawk thin! Natna tam tak tuar thin chunga a hmangaih tana mittui seng thin a ni! A lang lama nui mai thei leh tap mai thei; hrehawm tam tak tuar chhuak thei tura din a ni! A pasal leh a chhungte lakah a duh leh mamawh tam zawk thupin a hun a hmang reng fo bawk!

Ka hrekim emaw ka tia; ka hrekim lo! Ka man thiam kim emaw ka tia; ka man thiam kim lo! Ka hrethiam kim emaw ka tia; ka hrethiam kim lo! Ka hrethei zel emaw ka ti a; mahse, ka hrethei zel miah lo! An duhzawng ka hre viau emaw ka tia; ka hre viau hlek lo! An titau thlem ka thiam hmel viauin a lang a; ka thiam viau lo! An lawmzawng ka sawi dawn emaw ka tia; ka sawi si lo! Pch ka châk viau a; ka pch leh dawn lo! A ngaihna ka hre dawn emaw tiin ka pan a; a ngaihna ka hre si lo! Ka haw mai dawn emaw ka tia; tawitê kalin ka lêt a, ka haw leh lo! Ka che fuh turah ka ngai ngawt a; ka che fuh hlek lo!

Mahse, hei erawh ka hria; hmangaih tlâk leh hmangaih tur an lo ni e! Dawha, hriatthiam ngai an ni! I hmangaihna an pawm loh pawhin an pawm theih tuemaw hmangaihna an la mamawh tho a, an la dawng tho ang! An kal duh chuan kal tir mai rawh!

A then pawh ka hre lo…he luikamah hian; hmeichhia hi! Mawlmang takin han hmangaih phawt mai teh le!

Share this post:

You May Also Like