FACEBOOK INBOX FEVER! 9 & 10

Chapter 9

Chuti ang khawhar chu kum 7 zet a paltlanga a tawrh hnuah Zodini chu Sangliana chuan Malaria natna avangin a boral san a; a nunah tawrhna hi a mikhual lo ve ngawt mai! An rawn chawrchhuahna inchhungkhur kha a ngaihtuah lét fo a!

* * * * * * *

Inchhûng chu a hnawk niaih a!

Zankhûain âng thawm hriat tur a awm a! Rosiama’n zu a rui a; Zotei’n pa ber zurui zah zo zai tawh bik hek suh! ‘Zankhûa’ ka han ti tak na a; mutchhuak tawngkhawng tawh avanga, dar 2;00am vel bawra a muthilh tâk hma zawng kha chuan, Zodini chuan a pâ âng thawm a hria a ni!

Rosiama awrawl ring tak leh, Zotei vin that that thawm a inpawlh nawk a; a changin thil ri deuh bur bur hriat tur a awm leh zauh thin bawk! Zodini chu, thâwkkhat laia hlau thlabara a awm tawh avangin; chuti ang ri deuh bur burah chuan a phu leh dawrh thin a; a lungphuin a zo lo ni berin a lang!

Rosiama chuan zu a duh ve viau a; Zotei lahin, a pasal chu zahawma a awm loh avangin a zahzo lova, inchhungkhur zahawmna phurchhuah a tum bik hek lo! An fate chu hmeltha leh duhawm tak an ni a, an û ber Zodini pawh kum 10 bawr vel chauh a la ni nghe nghe a. Zotei a awm loh tumin Rosiama’n eirawngbawl tum lovin zu a rui a, khawlaiah a leng vel mai mai fo; chuti ang chuan thimhlim thleng a teihawi thin a!

An fate chuan, mi chhungkuaa naupangte chawei hun angah chaw an ei thei lo fo a, buhfai chhum tur nei lova an awm pawh a awm zauh zauh; mahse, naupang, thil la hrethiam famkim lo na na chuan an tuar mai mai a, an inah chawei tur chhum a la nih loh chang chuan, an pi leh pute in lamah,”Chaw ka duh” an va ti mai thin a ni!

Zu zawrh leh zawrh lohah hian buaina ka nei lem lo viau a; mahse hetia, pa ber zuruia fanaute ngaihsakna rilru thi thak mai a, thle mai mai tunlai thleng pawha an la awm erawh runthlâk ka ti ṭhin! He thu hi ka ngaihtuahnaah a lo lut ta hial a- ‘Fanaute enkawl thei lo leh ngaihsak thei lo khawpa thil dang buaipui duh nupa chuan fa nei lo ngam mai rawh se’ tih hi!

An fate chu an hmelthain a duhawm riau a, an nupa nun hi khaw lo chho zelin, inthen hial ta se; chu’ng naupang duhawm takte chu an fahrah ang a, an nunah, an puitlin thlengin ‘ser’ reh thei lo an nei tawh ang tih lam reng an ngaihtuah lo pawh a ni ang; a tâwpah chuan Zodini nu leh pa te chu an inṭhen ta nge nge a ni!

An ṭhenawm khawveng te leh chhungkhat ten suihzawm leh an tum nasa hle; mahse, loh theih loha min nawrtu thil thleng a awm tawh chuan,”Inthen suh u!” tih a rem loh chin a lo awm ṭhin a; fate fahraha siam a that loh rualin, nupa innghirngho reng chhungkua atanga seilian naupang nun chuan ser a nei ve dawn tho tho mai si a ni!

Zodini chuan tunhmaa an chhungkua kha a han thlîr a; an buaina chu hei hi a ni- Zu! Thatchhiatna! Rilru puitlinlohna! Chhungkaw tana ruahmanna tlachham! Pathian hnaih lohna! Inzahlo tawn! Pizawn/Puzawnte emaw, nu leh pate rin lutukna!

A nu leh apa an inṭhen zan khan, a nau, an unau zinga naupang ber chu a tap hlap hlap a. A mittui a tlingpam a; chu chu, thimhlim zanriah kîl hunlai a ni tawh! Mahse, a nu chu thilpawimawh tehchiam lo tiin a kalbo a, a pa zurui tlai lêng a la haw lo bawk! Chaw an la chhum lova; chhum a hnekin an tapchhak chu a dai dak mai! Chaw chhum tur a awm lo a ni! Chu mipa naupang tawngthei tantir chuan,”Anu bulah…” tih hi, thiam lo leh fiah lo takin a han sawi a! Chutih lai taka an Ina an ṭhenawmpa lénglút thinlungah khawngaihna rilru leh thinrimna inpawlh chu a rawn piang a.

Chu thimhlim, zân rorelna intan tantir hnûai-ah chuan, ngaihtuahna tithui tak thil thleng chu an ṭhenawmpa chuan a ngaihtuah ta vang vang a; chutah, chu mipa naupang chu a pawm lawk a, a chhuahpui ta ngawt a! “Hemite nupa hi engtikah nge an puitlin ang?” tih zawhna a thinlungah a awm pawh a ni mahna!

Chu’ng chu hun kal tawh ni mah se Zodini rilruah a reh ngai lo; a lo ngaihtuah leh ṭhin!

Chapter 10

Dinsanga nun erawh kawng hrang hrangin a vir vel nasa khawp mai; an chhungkua kha an hlim ṭhin, an hlim ṭhin tak tak a nia. A lo chhut ngai miah loh chu chhungkaw hlim ni reng tur hian kan mawhphurhna kan hlen vek a ngai tih hi a ni; leia tui luang darh tawh ruh leh erawh a namai lo deuh ta chu a ni!

Hringtu hmangaihna kutin duat taka a kuangkuahna dawng miah lo a ni ber a! Mite’n anmahni hringtu, nu hmangaihna an sawivul chûk a hriat hian, a thinlungah,”Dâwt a nih chu!” tih hi a lo ritel ve ziah thin! Tuna a awmna khûa chiah hi,”kan khûa” tia a chhâl theih ni mah se, khawdanga piang a ni; chu chu amah hringtu,”ka nu” tia a koh tura a bula awm ve ngai lote khûa a ni! Chumi khaw Damdawi ina piang chu a ni a.

Amah hringtu leh a pa kha inṭhen ta lo se tuna a dinhmun tam zawk hi chu a nihna a ni dawn si lo.
A hriatnaah, “Fahrah!” tih hi a lo ri fo a!
Nu hmangaihna a dawn ve theih awmchhun chu ‘nuhrawn’ tih hmingpu hnen atangin a ni si! Engtikahmah hringtunu kut dam takin a kuangkuahna hi a dawng ve ngai tawh lovang!

A pa hna avangin khawdangah an pêm a; kum hnih pawh a liam hman hmain amah hringtu leh a pa chu an inṭhen a; amah hringtu chu an khaw lamah létin, ani chu a chhawm bawk a. An inthen hnu reiloteah amah hringtu chuan a pa hnenah,”Nupui dang nei rawh!” a ti a. “Chuti na na na chu…” tiin a pa chuan tuna amah enkawl seiliantu ni ta, a nuhrawn hi a nei ta a ni. Hetih lai hian nikhua a la hrethiam lova, kumhnih pawh a la tling lo! A hriate’n an hrilh dan chuan; naupang hrisel lo, samkir chip chep leh, hrisel lohna avanga dulkiar lang mai a niin an sawi thin! Hnute a khawpkham lova, chaw tha eitur a tlachham a, amah hringtu bula a awm chhung chuan dyngaihtuahawm tak a ni! Chu achhapah amah hringtu chuan a enkawl duh ta lova; a pa bulah,”Rawn la rawh!” a ti ta hial a!

A rilru a na ngawih ngawih thin. Ngaihtuah loh a tum pawh hian a thinlungah a lo lût a; a thin a rim thin a ni! A pa chuan a hnenah a hruai ta a. Theihtâwpin a enkawl a; nu hnutetui lum mamawh khawp hmu lo kha, siamchawp bawnghnute chhuanlum chawp ringin a seilian a. Hringtu hmangaihna kut lum dawng lovin khawvel a hmachhawn a. Tun ang kum thleng tur hian, fahrah naupang, hringtu diktakin a thlavang a hauh ve ngai loh nun zawng zawng a paltlang a! A tap a! Mite’n an vel a! Amah hringtu-in a thlavang a hauh ve ngai si lo! Mahniin a tap bang a; a cho leh a zuam vang ni miah lovin hrehawm a hmachhawn thin! Rilru na taka a tah laia, an thenawmnu chiah tapbang tura thlemtu a hmuh tumte kha a theihnghilh thei lo!

Amah hringtu hnen atanga a pa te’n an lâk lai chuan a khawngaihthlak viau a nih a rinawm, tuna a nu mittui hi a titla zung zung hial a ni! Chumi hnu chuan fahrah nun awmzia a zir tan dawn chauh a lo ni a!

Naupangtê nichungin engkim a ti a. Tinpui liantakin a pumraw phu lova rit tui a kawt a. A naute a pua a. Eirawng a bawl a. Chhuat a nawt a. Nâ a neihin a sawi ngam lova; a nat tawpkhawkah, amaha a lanchhuah loh theih loh chinah chauh a chhungte’n an hre thin! Chu chu, a naupan lai thil mai ni mah se, naupang chumchiap tawrh atan chuan,’a lutuk’ a ti deuh a ni! Kum nga leh kum ruk inkar vel a nih hian, a khûpah khawihlipui na tak mai a vei a, tiang hawla a bai lauh lauh thlengin a sawi ngam lo a ni!

Mi zuam a hlawh a, mi velh a hlawh a; thiante zingah kawmserhah a tang fo a. Mi nute’n an fate thlavang hauh avangin an inah an luhchilhin an bêng a; chuti anga a thlavang hauhtu tur amah hringtu lah a bulah a awm ve ngai si lo! A pain a vohbik avangin a nuhrawn laizawnte’n thinlungtakin an la pawm lo zui a! Awww…hmeichhe lâktlak loh sulhnu hi a va runthlak ngai em!

A pa hian amah hringtu kha, ‘uire’ ti dawt chuan a sawi ngai lo nà a; finfiahna tura kutman a neih loh vang mai phei chu a ni tih a hria! Tichuan, nikhua a hre tan a, a tleirawl chhuak tihah amah hringtu lehkhathawn a hmu ve ta nge nge a. Naupang chumchiap, a hringtunu hmangaihna kut a mamawh em em laia ngaihven hlawh lo chuan, a leikâna, tihtheih a neih ve veleh, ngaihsakna der nge a tak tih hriat hleih loh a dawng ve ta chauh chu a nia! Amah hringtu lehkhaah chuan,”Thisen tam tak senga ka hrin…” tih hi vawi eng emaw zat a chuang a; a run thei em em a! A lak atanga a dawn loh thil hriatchhuah tirtu mai a ni si! Ni e, a hria, thisen tam tak sengin a hring ngei a lawm; mahse, mite chuan an fate, thisen tam tak senga an hrin hnu-ah, chhawmdawl an ngaih lai zawng zawngin an hmangaihna leh ngaihsakna an pe thin a sin!

Pathian khawngaihna azarah Pathian rawngbawla, thuhrilin a kalchhuak ve zauh zauh a, amah hringtute khûaa a kal châng hian, rawng a bawlna Kohhran member-te ina thleng lovin, a hla a hlain amah hringtute in a pan hram hram thin a; chuti ang tum chuan a lo duhsakin, ei leh in tur tui tha tha a hlui a, a châk zawng apiang a hmehpui a, thawmhnaw a leiin Phone pawh a leiphak loh khawpa man tam lei a, a mamawh phuhruk tumin a chungah a tha thin. Mahse chungte chu a lem zo ta vek a! A mamawh hunlai chu, nausen buhchip a nih lai kha a ni si!

Mahse chhiartu duhtak, he chanchin hi hmabak nei lo khawpa mi beidawng chanchin nia i chhinchhiah tura tawp tir ka rem ti lo. Fahrah niin ngaihzawng neih kawnga tluang lovin, rilru na taka hnawl ni fo mah se la- Hmangaih a la hlawh ve ang!

Tunlai ṭhalaite nunah chuan Social Media(Whatsapp leh Facebook) hi inrîmna khawvel a ni!

He kan khawvel siamchawp hi mak ve deuh a sin! Fiamthuin bul kan tan a, a takah kan pakai a; hmangaih thu kan thlung chho a; status kan in-coment tawn a, a nuam chho a; kan inlaichinna a pârvul zel a ni. Mahse, pangpâr pâr vul chu a lo chuai ve thei reng mai!

I status coment peih tak kha liker satliahah a tang ta a, i status liker satliah pawha a tan tawh loh chinah phei chuan…hrethiam la, tawpsan rawh!
In thutak ta lutuk a, a hne ta che a nih kha! Midang status a hlimpui viau kha thlir zui dûk dûk duh bîk tawh kher suh ang che!

He facebook khawvelah hian nun lem kan hlimpui a; a nuam phian mai! Thian kawmin fiamthu sang kan thawh a, hlimna kan neih phah chuan, chu tluka hlu a awm lo! Mahse nun lem hlimpui tawk chin nei lova nun lem khawvela inlaichînna lem hlimpuia khawsak tawk chin neih loh hian, nun tak tak zawka inlaichînna min neihpui duhtute nena kan inlaichînna a hawlhphel palh ve thei a ni! Chu mî tifiah turin nun taka inlaichinna tak hi nun lema inlaichinna lem hian a lo thiat tawh thin ngei mai!

Kei tak chuan ka tawng pawh a ni lo; mahse, Dinsanga hian hei hi a lo tawng tawh a; a taka tawng tawhtute tawn tak tak hi ka hre ve ta zauh zauh bawk! Mahni zahawmna hloh khawpa chêtna reng reng hi thil zahawmah a chhuak ngai lo! Mahse…inkawmhlimna khawvelah inkawmhlim nuam vek u le!

I kawppui i rinna, duhna leh hmangaihna tidai theitu tawngkam emaw, i kawppui nena in inlaichînna hawlhphelh zawnga i bula tawngkam chehtu emaw reng reng kha ring hlek suh ang che! I kawppuiin a humhalhna che kha thîkin rilru verther takin nangmah a beisei ve che a nih kha! Hei hi Laldinsanga nuna thil thleng chu a ni!

Social Media nghawng tha lo chu a awm chîang a lawm! Vawikhat chu Dinsanga a chesual ta zauh mai!

Mi coment chhanlêtna-ah(ka inrawlh ngeina turah) a lo inrawlh palh pek a; mîpa(?)/tlangval(?)/pathlawi(?) emaw ni chu a thin a tirim palh ta hlauh mai! Dinsanga pawh chu a rûk tak chuan a thin a rimin a zak ang reng hle! A sim chîang ngawt ang!

Mahse, heti ang thil hi a ngaihtuah chîang ta a- ‘Social Media’ lama kan fiamthu sâng lutukin(mipa leh hmeichhia an inlêmna fiamna kawngah), mi nupa emaw, inngaizawng mêkte emaw karthu a tihkhaw loh vang zawk a ni thin ! Heti angah hian inenfiah thin a tha khawp mai. Kei telin; nang pawh!
A chhan chu, kawplai nei rengte hi, kan kawp mêkte ni lo; midang nen- Fiamthuin kan inhmangaih a! Fiamthuin kan in-muah a! “Fiamthu fiamthu” kan tih chhungin kan kawppuite nena kan inkar hi zâu takin a lo khi kéu kâu tûar tawh thei tlat mai! He inkawmhlimna nuam tak mai hian mi nupa ṭâng a lo tiṭhen fo tawh a, a la tiṭhen fo ang chu, lehnghal a!

Kan hmangaih leh duhte humhalh kan tumna hi, kan hmangaih leh duhte’n an ngaithei lo a nih chuan, inthen a hnai tihna a ni! Tu emaw tana fiamthu kha, tu emaw tan chuan sawisel rem chiah mang si lova ‘fiamthu runthlâk’ tak a ni thei! Kan duh chu tumahin min duh ṭawmpui lo se ka duh ang a; kan hmangaih chu tumahin min hmangaih ṭawmpui lo se kan duh ang chu! Hemi chiah hi a ni Dinsanga te ingaizawng buaina bul chu!

Share this post:

You May Also Like

Leave a comment:

avatar
  Subscribe  
Notify of