FACEBOOK INBOX FEVER! 7 & 8

Chapter 7

 

Dinsanga chuan Zodini leh a fate dinhmun chu a han ngaihtuah a…

 

Fahrah nih hian kentel a nei! A man atân mittui a ngai a, khawhar leh lunglèn a ngai a, mal taka inhriatna pawh a bang thei chuang lo! Chuti ang dinhmuna din chu he chanchin neitu te tân hian a mikhual lo!

 

A naupan lai atanga tunthleng tura a seilen chhoh dan chuan a suangtuahna a rawn luh a…

 

Tuemawin a tawngkhum dan, “I va han puitling lo tak!” tih ri chuan a thinlung riltakah a luh a, he, a chak lohna nun hi manganna avanga sim theih nise a sim daih tawh ang! Fahraha ni saa lo pîang chhuak an awm a, chhungkaw kehchhiat avanga lo fahrah ta pawh an awm thin; chu’ng zînga mi thenkhat te chuan fahrah nun hrehawm tak paltlang zo lovin sual kawng an zawh a, ruihtheih thil bàwihah an tâng a, retheih hrehawmnain sual salah a saltan tir thin! Mahse chu sual sala saltanna chauh chu fahrah nun nghawng a lo ni si lo va!

 

Vanneihthlak kan ti dawn nge, vanduaina kara vanneihna tlazep awmchhun ni turin ani chu langthei sual salah a tang lo hlauh mai; mahse a thinlung chuan derdêpna lai a nei tlat thung! A naupan berh lai zawnga a pangchan ngam ve lohna zawng zawng khan, a puitlin hnuah nghawng a lo nei reng niin a lang! Puitlin hnuah pangchan a va awl si em! Pangchanna tur a zawng a, a tum lawk vang reng a ni bik lo!

 

An unau karah nuhrang lak ami a ni a, Ù ber dinhmun luaha rorelna leh remruatna fingtak neih kawngah a inthlahrun chang a awm lo thei thin lo. Hei hi a chhungte sual vang phei chu a ni lova, fahrah nun ekchhiain a thinlunga ser nasa tak a siamsak vang a ni zawk! Inthlahrung ru tak, a lang lama paukhauh tak sia rem a ruat a, a pa thachhangdawla ro a rel ve a ngai a ni!

 

Khuarel mawina a ngaina em em a, daiah a chhuakvâk fo va, a lunglenna leh khawharna a hrithla mai thin! A chang chuan atan sual kawngzawh a va awl teuh thin!

 

A dinhmun a ngaihtuah fuh chang chuan a mittui a hnamsak a, a fahrah nunin ser a siamsak avanga a puitlin lohna pakhat rawn lang ve sek thinin a kawppui te nena an inkara thil tha lo a rawn thlen ṭhinte a hai bîk lo; chu chu a nin avanga sim nghal duak theih ni se a ti takzet! Chuti chung chuan he khawvel hi a hmachhawn a, a hmaa harsatna awm chu a paltlang a, derdêp tak chungsiin derdêpna harsatna chu a lo sutlang tawh ṭhin!

 

A pangchang a ni! A chang phei chuan a ngaihzawngte laka insum hman lo leh ngaihtuah hman mang lova a lo tihlan vak chang a awm a; chuti ang bawkin a thiante lakah pawh! A naupan laia a natna leh a tawrhna chuan chhelna leh luhlulna ‘thami’ pe mah se; eng emaw chenah nona tha lo tak, a tih tur ni àwm lo tak tih chang leh, mi puitling chêtdan tur ni âwm lo taka chêt chang a nei fo mai! A ngaihzawngte tan pawh kawp a hahthlâk chang leh, a thiante tân lah hriatthiam a har chang a awm leh zauh zauh ṭhin!

 

Heng hi fahrah nun nghawng chu a ni ngei mai si! “Hlauthawnna!” tih hi an thinlungah a lo ri nawn leh a! Hnawl nih tawh avanga hnawl nih leh hlauhna hi a thinlung atanga lâkchhuah sak vek ngawt theih pawh a ni lo! Mite ngaihah sual lo mah se, a thinlung hlauthawng hma leh lutuk zauh zauh thin leh, thil ngaihtuah vak mai a ching hi a puitlinna tipuitling lotu a nih chang a awm ta zauh zauh…a thiante leh a ngaihzawngte tana chhenfakawm lo taka awm tirtu a ni palh ta thin! A chang chuan thiante kâwm lova, an hnaivaia awm loh a duh a; mahse chu erawh thian tha a mamawh zia tichiangtu a ni ting mai si!

 

Fahhrah awm tawh miah lo turin he khawvel hi siam theih a ni kher lovang! Loh-theih-loh avanga fahrah nunkawng zawhtuten hmalam an pan theihna tura harsatna hmachhawn a, paltlang a, an hnunga lokal te tana puihna chhenfâkawm tak lo kawhhmuh hi fahrah thenkhat te duhthusam a ni fo! An tun dinhmun hi anmahni dinhmun anga dingte lo puihlêt theihna

tur remchanga lo hmanthiam ngei an duh a ni! Anmahni hrethiam a, an nihna ang anga pawmtu an mamawh ve em em a, an chak lohna leh panna laia dawmkanga hmalama nawrkaltu tur an mamawh a ni. Puitu hian puih an ngai ve fo a, midangten an tanpui fo mai pawh hian midang tanpui theihna lai an nei ve bawk ṭhin.

 

Dinsanga chuan a ngaihtuahna chu sawi chhuakin, “Ka fate fahrahin ka siam lo vang” tiin a phun sap a. Zodini chian, “Eng maw?” a lo ti vat a.

 

“Engmah a ni lo…”

 

 

Hetih lai hi chuan a nun chu a ruak takzet a, he nun ruak tak hnawhkhah hi a nghakhlel em em ringawt mai a ni. Tun hma, Social Media a luhchilh ve tan lai kha a han ngaihtuah kir a, fb khawihin Pathian thu a post a, thian fel tak tak a chhar a, an inpawhin a nuam, a hlimawm; mahse, tunhnu Pathian thu a post tâk loh hnu hian a thian thenkhatte chu an hla ta tial tial ni berin a hria; la danglam chuang miah lo chu an awm.

 

Chapter 8

 

Kan hriat tur chu hei hi a ni.

 

Naked pic nena Zoremi CK pui kha Remruata a ni. Kum 2015, October thlaa kan kawmthlanga a fasen tè nena lo inawkhlum Remsangi kha ka bialnu hlui ni ta Dintei nutei, Siamthangi fanu a ni a, a chunga thil thlengah Remruata hian mawh phurhna a nei bawk!

 

Khatia kan kawmthlanga an lo inkhai mai hnu fé pawh hian nausen ṭap thawm hi ka la hre fo a; mak ka tih em em erawh, kei chiahin nausen ṭap thawm hriaa midang tumahin an hre ve ngai miah lo chu a ni. Mak ka ti a, ka hlau deuh bawk!

 

Dinsanga chanchin kan sawi tel a tulna chhanah pawh hian Remruata hian telna a la nei ve zel ta cheu a, hmeichhe tam tak nun tichhetu a ni! A tira kan sawi Dinsanga nun hi kan chhui bing chho deuh tawh dawn a; Dinsanga chanchin kan sawi dawn chuan Zodini chanchin hi sawi hmaih theih a ni miah lo vang. Ka chanchin ka rawn zehtel ve leh ṭhin nachhan pawh engkim hi a inzawmna lai a awm zel si a, ka hmaih ngawt thei bîk lo a ni.

 

* * * * * * *

 

Zodini chu nula hmeltha tak a ni! A ti a nung a, a vun a mâm nâl hén a, a ngo satliah a ni lo; a ngo sen sak a. Nisa hnuaiah siam sual palh ang hrimin a bîang a tài sen siah a; hmuhnawm tham, ngaih la tham, ennawn pawha ennawn leh fo chi a ni! Chuti ang mî chuan sipai a ngâizâwng miau mai si!

 

A bialpa hna avangin an kar a hla a, ram rawngbàwl chu Sangliana hnà a nih avangin ngaihzâwng rawng a bâwl hman lo! Hel ramah ramhnuaia ramriah ‘method’ hman a ngâi fo a, hmun râltîah nun râltî a hmang a, a ngaihzâwng midangin an rîmin an lo ‘ambush’ mai ang em? tia ngaihtuahna thinlung râlti tak râlkhêl ri chu midang hriatpui hauh si lova amah chauhin a hriat râlkhêl khêk ri ri ring tak a nih i ring ve miah lo em ni? Chu chu a ni Zodini ngaihzâwng pa khawsak phung ni ta chu!

 

Induh ta na na chu kuta insuih dun hun a lo thleng a, thinlung pahnih kha mi pahnih intawm turin pakhata siam a ni a, khum khatah mudunin zanlâi hlimawm an hmangdûn a, taksa inzawmin rilru a thuhmun a, a dân dik taka taksa inzawm tawhte chu thisena inzawmte aiin an inzawmna a nghet danglam bîk a ni mahna, chhungte tuithlar hial pawh an huam châwk a sin!

 

In tharah mothar niin nupui thar a tlângnêl chian hmai Sangliana chu silai hum turin a chhuah a lo tul nghal mai a; lunglenna filawr uchûak tak chuan uchûak takin sipai nupui nun chhungril chu a’n luhchilh tak tak ta mai tehreng a nia! Bîak reng a rem kher lo thei a; a khawhar thinlung chu ‘social media’ lamah inhrithlain zanrei tak thlengin a hring va va a, ‘inbox’ lamah mipa thinlung hlei, ngaihmelhna mit leh awmhleina thinlung pu hliah hliah ten tawngkam zamawhin an sâi a; a uchûak pâwlin an zahmawh thlalâk an la han thawn zui a!

 

He khawharna zûn zâm, zâm thûi leh, a mi phuar nghet fêt mai hi a lawm tuarchhuak zo lova ‘pasal hmu zo lo’ Sipai nupui te an uire fo theih le! Awmtleitu tur kha hlate khuaah ‘trench’ belin ‘racksack’ lungtum thun puar akin zîng dai far a hul hmain kea ‘paidal’ chungin a ‘long-run’ daih a nih a rinawm! Chutih kara Zodini’n khawhar hnêma ‘social media’ a khawih ve, chumi awmtleitu nih lo tum phêt, tâwk chin nei lo khawpa mipa hur tak takte avangin a thinlungah ‘pressure’ a awm theite a nih ngài chuan thil mak vak a ni kher lo ang! Mipa pawh hi, hur duh chuan nupui neih mai tur niàwm tak a nih vei nen, tlangval chu sawi loh, kawplâi nei mêk te pawh hi kawplâi nei mêkte lakah deuh ngat hur hi zu han châk tlat hlawm a! Mak ve tak a ni; mi awmherh zia!

 

Mite tawngkam hi a mak a sin; enteh mah…

 

“Sipai nupui chu an khawpkham lova, an hur duh!”

 

“An uire duh!”

 

“An rinawm nêp!”

 

Heti ang mi hi an awm ang; mahse hei tak hi, a ni ve lote ‘nì’ anga lantirtu a ni ta hi sipai nupui te tân a lungchhiatthlâk ta bîk a ni! Amah chang dema den a ni lo; a pasal chungchâng chu rinthu leh zeldin thu bâwl phawn hmangin a hriatah sawi a ni a…

 

“Sipai chu an hur tlangpui!”

 

“An Pute nupui an mutpui fo!”

 

Heti ang tawngkam hian a thinlungah hlauhthawnna a tuh palh ve thei tih hriatpui lotu hi a hriatpuitu aia an tam fê chu le! Hei chauh pawh a la ni lo; sipai nupui thenkhat phei chu an pasala nu ten an la han mil lo zui a nia! An famo chu an fapa hnêna hêk tâwkte an awm a, dâwt muhluma puh tâwk lah bo lo; hmeichhia pawh hi mipa ten han humhalh viau che u mah ila, nu leh pa nih hnua mahni famote tairân mai leh sawichhiatna ngawt zawng thin hi chu mipa ni lovin hmeichhia vêk an ni leh thin! Mahni mawnghlimna mai a ni; heti ang nu thenkhat phei chuan an fapa te nupui hi zuk mâk sak lek lek fo a mawle! Mahni nupui pawh ni hlei lo lo mâk sak châk em em hmeichhia ngat hi chuan an ti mah mah deuh chu a ni; heti ang thil a thlen mai theihna hi chu hmeichhe rorelna inchhung a ni duh phîan lehnghal!

 

Fa an han nei a, a tanrual puia nupui thlâwptu tur ber Sangliana awm ta lo chu, amah chauha enkawlin a fate chungah mawhphurhna a la tan a! Sipai chu hlawh a tha, thawn pawh a rawn thawn thei reng; mahse a nihna tak, pasala a neih chhan chu a hlawh, ‘India chêng’ kha ni lovin, amah, ‘A pasal’ ngei kha a ni reng si. A neiha ber chang lovin sawrkarin a chang a, sawrkar chuan a pasal aiah ‘India chêng’ a pe ang lek fang a ni!

 

Ni e, ‘India chêng’ hi a hlu, amah leh a fate mamawh pawh a phuhru takmeuh e; mahse ‘India chêng’ hian chhungril thlamuanna tham thinlung a nei ve ngai dawn lo! Thlahlela kuah lumtu tur pangti lum a ‘support’ ve ngai dawn lo! Ih maw, awmze nei takin ‘India Chêng’ hian a melh ve lul lovang! ‘India chêng’ chuan hmangaihna thinlung nei ve hek lo; chumi lanchhuah theihna ‘Special power’ mitmeng hmuh turin mit nei ve hek lo! ‘India chêng’ hmuh theiha mit awm chu Gahdhi Ji lem tarmit vuah phêna mit awm mai mai chauh hi a lawm le; hei lah hian awmze neiin a melhno lo nasa dawn mai si!

 

A pasal Sangliana kha pa fel tak pawh ni se hmun danga a awm daih si avangin zanlâia nau a damsam loh chângin puak chhâwktu tur pasal a hmu zo lo va, hah rimtawng leh men rei thin avanga mitmeng senramin a fa damlo a buaipui a; a rilru a hah chângin inbunruahna tur pasal a hmuh zawh miau loh avangin zanlaiah mittui nen ding taka a inngaihtuah châng a awm…”Ka bulah ka pasal mu ve se…a âwm nghengin bei hle hle ila…ka sama chûlin min hnèm ve se…” ngawi teh, heti lam chu sawi lo law law ang…a mamawh zual laia a tawn theih loh duhthusam mangram mai a ni; kuaha tawng thlamuantu turin Sangliana awm thei se a duh thin ngawt mai!

 

A rilru hah leh rilru nat a reh fel leh tan tawh tihah a pasal Sangliana, sipai ngei mai chu ‘chhutri’ lain, zan lam hun hlimawm hmabâk a ko hle tih hriat avanga phur takin a rawn haw leh ang nulh nulh roh a; sipai nupui tân chuan a duh, ‘hmabâk ko tak’ pe lo va lo khawn fawk a châkawm duh ngawt ang! A sarhu lai angin rilru hah leh rilru nat thu lo tharthawh leh chiam kha a rem teuhin a hre tawh si lo; àwm pawh ‘a àwmin a ang lo’ thei;  Sangliana chu amah thlahlelin a chawlh hun rei lotè âmin a rawn haw vang vang ve tho a, khami chhung na na kha chu rim takin inhmang se la, inlawm dun hiam hiam rawh se; an phû a ni!

 

Tichuan, chu chawlh hun chu a ral leh ta! Silai hùm turin Sangliana lchu a ‘duty’ hmunah a kîr leh a; a kalsan tâk hmeichhe khawhar, a khawhar hliahkhuh nâ’na pawnlama nuih heh em em leh zau em em, ‘social media’ vela nawi nuam ti em em mai chu, a mamawh zual hun lai takin ‘pasal hmu zo lo’ a ni leh dâwn a ni! A liamsan leh ta a! Sipai nupui a ni! Tap mah se, mi tam zâwkin an hriatpui lo! Na mah se, a hrilh châk a pasal a hmuh zawh loh avangin a thup thin! Duhber te tânga bei chunga pangchang leh, thuthawn hmang ngawta pangchang chu a dàn a dang hle ang!

 

Hmeichhe chhel tak a ni , a chhuanawm; khawhar chhuanlama humsual dai erawh a nun vawlêttu chauh a ni ange!

Share this post:

You May Also Like