FACEBOOK INBOX FEVER! 5 & 6

Chapter 5

Evang Nge? II

 

Engvang nge ni ang le!?

 

Ka hre lo, ka hre miah lo; a chhànna ka hrechhuak zo lo va, ka zawngin ka dap thiam hek lo! Demawma langte ka dem thei si lo va, chawlhna ka zawng a, tihdan ka dap a, vawn tur zawngin ka mit ka lèn kual a, rinchhan tur dapin ka kut ka phar a; mahse, ka hmu lo, zah pawh ka zah zawh loh khawpa ka harsatna hrilhfai kêlh tur mi ka hre lo a ni! Tlâwmah ka la a, zahthlâk ka ti a, ka dinhmun sawi tur khawpin ka pûakkeh ngam lo a ni! Mite hnena tanpuina ngen ka duh lo; ka zak tlat!

 

Nui chungin chhungrilah ka tuar a, hmel hlim pu chungin ka âwmah hian mi hnawh ep ep a, a va hahthlâk tak! Engtin nge ka tih ang? Engtin nge ka sawi tâk ang le? Heti ang tak hian thil a lokal thei em ni?

 

“Ka zâm a ni; LALPA, I kut chauh lo chu innghahna tur ka nei ta lo! Nangin ka mamawh i hria a, min pe ang che aw!” tiin ka thinlung chu a rûm a!

 

Hetih lai hian ka hnathawhin a kentel tlat avangin nui chungin midang ka hmachhawn a, tawngkam thlumin midang ka dawr thin; ka chhungrila nun inlumlet vel nen chuan inhmeh lo ka ti kher mai! Duh chuan mittui ko chhuak thei ka ni; mahse ka tap tawh lo vang! Tumah ka haw lo va, huat lah a tangkai hek lo! Ka dem lo va, an tanpui beisei pawh ka tum tawh chuang lo!

 

“Tunah ka dinhmun phet mah se…” tiin ka inngaihtuah a…ngaihtuah chhunzawm duh lovin, ka hna ken tel thil chu ka ziahzawm zui ta daih a!

 

Zanthum zet chu naute tap kha ka hre leh ta lo va; ka chauh deuh avangin ka lo mu nghet ve ta deuh nge phei chu ka hre lo. Mak ka tih em em chu, kha naute tap thawm kha tumah hian an hriat ve thu an sawi ngai miah lo hi a la ni reng mai! Ka bengah erawh a chîang hle si a!

 

Ka hna thar chu nithum chu ka thawk ve ta a, zep lem loah chuan a hahdam lo; mahse, hnathawh chu a hahdam viau thei lo tih ka hria a, lung ti dam lo boruak dang nena han chawm pawlh erawh a tui lem lo thin ngawt a ni!

 

Ka nuna thil thleng- hmangaihna lama ka tluan lohna, chhungkaw boruak tha lo, dinhmun leh rahbi tleu, bultanna retheihthlâk leh, hna ka han thawh dawn tak taka taksa lama harsatna lo awm ve leh sek thin te hi engvang nge tih ka hre lo takzet a ni! Nun zir ka ngai em ni? Pathian hian eng’e min zirtir a tum? Nge, ka dàisual rah ka seng em ni?

 

Hetia ka han inngaihtuah thlen tâkah chuan, ka dàisual rah seng ni ngeiin ka inhre ta a! Ni e, humsual kha ka dai tak a sin! Ka ke kha ka chhep sual tak a sin! Ka tih loh tawp tur thil kha ka tih tâk kha! LALPA leh!!!

 

Ka phu zawk a, ka hnunglam chu ka han hawi vat a, kan nau pakhat a rawn kal hi a lo ni…ka rilru a kal ding a leiah a rawn luh lai ka lo hre miah pek lo a…

 

“U Chhante, In chu luah dun ila…”

 

“Kan tum dawn nia…In luah tur lo dap ve deuh la…”

 

“Aw, ka lo dap ve ang…kan College hnaih deuhah ni thei se”

 

“Kan hmuh a thu le…zâna ka muthilh tawh hnu leh, chhuna ka awm loh deuh apîang hian helai chhuat hi thlahrâng leng tawk lek hian a lo kaw ziah a sin…” ka han ti a. Ani chuan a awi lo nasa mai.

 

Chhuat lo awng ziah chungchangah hian ka daw miah lo va, thawm danglam erawh ka hre ngai si lo a ni. Tun dinhmunah ngat hi chuan thlahrâng pawh rawn inlâr hlauhawm teh mah se eng he huah ka ngai miah lo vang; ngaihtuah dang tam nâk a lai a!

 

“Heti reng chu ka ni lo vang” ka ti rilru a!

 

Dem tur chu ka zawng chawp thei a lawm; chu chuan sâwtna a nei lo tih ka hriatchian em avang erawhin tumah dem tul ka ti ta lo a ni!

 

A tira a hming ka sawi lan tawh Dinsanga chanchin chu ka han ngaihtuah a

 

Chapter 6

 

“Ti suh…”

 

Chu ngenna chu a pawisa lo a ni lo va, a tisa châkna sosang nasa tak chuan a tâwp tir thei tawh lo a ni!

 

Zodini chu nuthlawi, fa pahnih nei tawh a ni a, a la upa hran lo va, mite han sawi hat khawpa mualphona pawh a la nei lo, hmel fai veng mai a ni a, a ngo vák reuh a, nute cher lam niin a awm bawr pawh a pawng nep hle a, hetia a tlawm ta mai hi a duh dan a ni lo hle a…a tir chuan an infawp ringawt kha a ni si a!

 

Zanrei, mi mutreh tawh hnu a ni a, Dinsanga nen chauh an meng tawh a, a fate chu an mu nghet hle mai. An titi sap sap a, an nui dun leh hak hak thin; inpawh takin an inkâwm a, an inkuah chial a, an titi kârah chuan an inmelh leh zeuh thin, Zodini chu a meng sîsap a, ngaih la tak hian a meng hniam raih a; Dinsanga hi a ring a ni.

 

Zan a rei tawh hle; Dinsanga chu a la haw si lo! Zodini chuan haw se pawh a ti lo, a ngai a, a thlahlel a ni. Thawklehkhatah tek a rawn tla ri puak thuai a, Zodini chu a phu zawk a, a tawm chàwih a, Dinsanga chu a kuah chàih chàih a, “Ka hlau a nia…” a han ti a. “Lo haw vat zawk ila ni tur” Dinsanga chuan a lo ti a, pawi tih hmel deuh hian a han awm a.

 

Pawi a ti tak tak a ni; bialnute Ina han riah ngawt mai chu mawi a tih chiah loh avangin a inngaihtuah neuh neuh a. A mipatpui thenkhatte chuan an châk zawk ngei ang chu. Tek a rawn tla leh a, a bula hmeichhe hlau chu a phu leh aih a chu chu hriain a han kuah nghet sauh a, ruah chu a rawn tla tan ta bawk. Curent a rawn thim a, anni pahnih chu an la inkuah chial a…

 

“Didi…?”

 

“Eng’e…Din?”

 

“Ka haw thei lo vang”

 

“Nia, a sur hnem khawp mai; mahse…”

 

“Mahse eng’e?”

 

“Hâw thei hrâm zâwk la ka duh…”

 

“Ka hretthiam a lawm”

 

An han ngawi dun vang vang a, biang insi châtin an inkuah a, Dinsanga chu a thaw ham ham a…

 

“Didi…?”

 

Zodini chuan a chhang lo; Dinsanga chu a insiamrem hlek a…

 

“Rawn hawi teh Didi…”

 

Zodini chu a han hawi phei a, Dinsanga chuan muangchangin a lo fawp a. A hmui, pan lam lek lek, nĕm nel thep chu a hne dek dek a! A duham telh telh a, a fawh dan a han thlak a, a kut chuan Zodini taksa chu a dap vel ruai a, chumi zawhah a kut pahniha a biang dawmin duhthawh zet hian a han fawp a, a kut chu a awm mai mai thei lo! Zodini awmbawr chu a han khawih a, duhthawh teh mah se, hmanhmawh lo leh dam deuh hian a han fawp leh a, Zodini chuan a lo chhanglét ve mial mial a. Dinsanga chuan a kut awmna chu muangchang hian a sawn thla hret hret a; Zodini chu a meng phal lo!

 

Dinsanga chuan a dim lo tan ta hle mai, a tisa châkna rawn so sang chuan a nawrna tawh takzet a, a thaw ham ham a, Zodini thawmhnaw chu a phelh tan ta a. Zodini chuan a la dang lo, mit chhing diar diar chungin Dinsanga fawhna chu a lo chhanglét mial mial a; mahse Dinsanga’n a kekawr a han phelh dawn chiah chuan harhchhuak thut ang mai hian a rawn meng a, Dinsanga kut chu a han chelh ta tlat a. Dinsanga erawh a chhungrilah nawrin a awm laklawh tlat tawh, tawngkâ nena phun sap sap chungin Zodini chu a han ngen a, a kekawr chu a han phelhsak talh a…

 

Zodini kekawr a phelh zawh chuan a tawp thlenpui nghal bawrh bawrh tum pawhin a lang tawh lo, Zodini taksa erawh a chul kual ruai a, engvak sawi zawm chuang lo hian, “Didi…” a ti leh sap thin a. A hnuai lama a tuan zui tâk loh avangin Zodini ngaih pawh a ngam leh deuh tawh a ni ang, hahdam deuh hian an infawp dek dek a.

 

A diktak chuan Dinsanga hian insum harsa a ti takzet a ni. A chhia leh tha hriatnain tha ti lo mah se, a thinlung chu a tuihal a, a tisa châkna sosang tak chuan a nawrin a nawr tlat mai si; a taksa chu a insangmar ṭang a, Zodini taksa chu a taksa chuan a mamawh takzet a ni. A khawih dan chu a han thlak a, a Panty chu a phelh sak hmawk hmawk a; chutah Zodoni chuan, “Din…ti suh…khawngaihin ti suh…maw…ti suh” a ti mawlh mawlh a; mahse Dinsanga chu amah leh amah pawh a indang thei tawh lo!

 

A tisa châknain a kiansan hnu chuan a thiltih chu Dinsanga chuan pawi a ti hle mai, inthiam lo zetin Zodini chu a kuah chawt a, “Ka tihpalh lutuk…pawi ka ti lutuk…ka hmangaih che” a han ti ringawt a; pawi a ti takzet a ni!

 

Share this post:

You May Also Like