FACEBOOK INBOX FEVER! 3 & 4

Chapter 3

Ka tel vena chu dihtawk rihin ka thusawi lai nena inzawm tho si midang chanchin ka han sawi leh ang’e.

Ani chu a hmel a tha a; mahse a ler! A ngainatawm; mahse a nun a rawng si! A zei hle a; chu chu a hlauhawmna a ni thung! A mitmeng, chezia, a pianṭhatna leh a nu leh pa neihnunna chu a hriamhrei tangkai tak a ni! Nula lakah a hriam a chelek hle a; mahse a nula theih tawh ten a fa an la pai ngai miah lo! Hei hi Lalremruata nihna chu a ni!

Chhiar dawn ta se Remruata kutzungtang neih hian a nula theih tawh zat a daih teuh lo! A duhtáwka a khawih theih hmeichhe derdep hi an lo tam khawp mai; a duhtawka a CK pui theih, a duh hun huna an naked pic a dilchhuah theih hmeichhe thenkhat te chu hmu ta la, i awih loh avangin i nui ringawt hial ang! A hmeichhe kawih thal tawh thenkhatte Sunday nungchang hmu ve ngat phei la chu, Zoram Kristian-te nun pâwnlàn dan thûk leh ril zia chhut thiam i nih ngat chuan, zirchianin tunlai zoram khawvel nun leh Sodom leh Gomorra nun tehkhin inhmeh zia i hmu pha ngat ang!

Chuti ang thil a nih mek laiin Hminghlui chu tleirawltè, zakzum tak, nu hnâp mai, a rualpui khawpui tleirawl dangte ang lo taka tunlaina tha lo takin a la khawih dâk loh, thianghlim fai ser mai a ni; mahse a thinlung chu hnehin a awm ve ta!

Star chu a lo nei ve fo tawh a, ngaihzawng erawh a la nei ngai lo. A tleirawl tituai chu a nalh takzet a, a pian a fel thlep a, sweet sixteen pel chho hlim, nula puitling taksa pu chho tan leh taksa inphut mawi tak a ni.

Thalai ten Phone changkang an nei sup sup a, Social Media luhchilhin thian kawm nan tak an hmang chho a, Social Media chhungah ngat chuan nun a lo zalen halh mai si, tuma’n min khap tak tak thei lo va; khap phak niin kan inhre lo hrim hrim bawk! Kan duh duh Mizotawng hawrawp dik mang lovin kan sawi a, kan duh duh pic kan upload a; chuti ang kan awm dan lo kalha sawiseltu chu kan lim erh ṭhin! He tunlaina nun hian Hminghlui pawh a kal kân tak tak thei bik lo!

Zankhat chu a status-ah, “Ka lug a leg eee…khwge ka lèn tir ag ooo…” tih hi a post a…

A post hnu lawkah mipakhat hian, “Hetah ron len tir rwh” tiin a rawn coment a.

Hminghlui chuan a Profile a’n check phawt a; a hmel a tha, a palen hmel khawp mai. Tihian a va chhang a, “wm hlat hmel e mei…”

“Hla lo lutuk…i bul lokah k om maithei sin…”

“Hla i tihna…”

“Hehehe…i van ce lo…”

“Cuti mi…lom e…”

“Mmm…khoi vengah ge in om?”

Hminghlui chuan a chhang zui tawh lem chuang lo va; mahse chupa chuan zanrei deuh tawh hnuah inbox. lamah a rawn be zui ta nge nge a. Pangngai tak leh polite takin a rawn bia a, ani pawhin tha takin a lo kawm ve zel a, chupa chuan fiamthu a duhin a ninawm lo tawka chhan dan a thiam hle.

Chuta tang chuan an inbia an inbia a, mipa zawk pawh a huangtau sawtin a ngampa tan tawh hle a, huat theih chiah si loh hian tawngkam engemaw deuh hlekin a fiam tan ta zauh zauh a; a ninawm miau loh avangin Hminghlui chuan a haw miah lo! Chutia an inkawm nasat lai tak chuan zan khat chu a chhan sawi miah si lo hian mipa chu a reh ta daih a; ‘a reh’ han tih lemah, reh tak tak chu a ni lo, amah Hminghlui chu a be ta lo mai zawk a ni. Zanthum ngawt a reh a, Hminghlui chuan a ngai ru ta hle mai si, rawn biak a tum tawh der si lo, a mangang ru em em mai a, biak hmasak a hreh si, midang post vel leh pic vel chu a coment tho bawk si a; chu’ngte chu a lo thîk ve em em ringawt mai a ni!

Zan linaah chuan a rawn be ta a; Hminghlui chu a phur takzet a, a lo thinrim rŭk vang erawh chuan a chhang vat duh bik lo. A vawithum rawn inbox naah chuan a chhang lo phal ta bîk lo va, a han titau dawn a; mahse chupa chuan a tilawngawi thiam ngang mai. Hminghlui chuan tawngkam zahmawh lek leka a fiam leh zeuh thin pawh chu a haw phal tawh lo; a rawn biak loh chhung khan a lo ngai hman hle a ni!

An inbe ngawrh chho lehzual a, mipa a zei a, a nawr thiam em avangin an CK tan ta zeuh zeuh bawk! A tawpah chuan hun remchang dapin an inhmu ta nge nge a; facebook inbox lama a lo CK pui fo tawh avangin mipa chuan a zuam nghal hle mai. A vawikhat tihna a nih loh avangin Hminghlui chu a nawr thiam hle a, hemi zan hian Hminghlui chuan a virginity chu a hloh ta ngei reng a!

Mahse, Hminghlui chu a hlim tlat! Remruata hi a duh a, a hmangaih a ni! A tan chuan engpawh a huam a, engkim a phal a, a tana a inpekna hian bituk chin a nei thei lo vang! A virginity hloh mah se, a hmangaih ber tana a rohlu ber pea a ingaihna chuan a hmel chu a tisen siah a, a mitmeng chu a rilru hlim avangin a de sawr sawr a!

Remruata rilru erawh a dang daih! A haw hnu chuan, a online a, Hminghlui a wish hnuah zan tam tak tawngkam zahmawh uchuak tak taka a lo CK pui tawh Sangpui nen chuan an hna ngai chu an chhunzawm zui leh a. Sangpuii hi Pasal pawmlai nei, fa pawh pahnih nei tawh, a hahdam avanga no sen sak mai, nu hmeltha tak, kum 30 bawr vel mi a ni. Remruata nen hian tawngkam maia CK lovin a pasal zin bo hlanin an khawsa dun fo tawh a!

Pain Pa a nih a pawisa lo va, Nuin Nu ka ni tlat a ti phal tawh lo; tisa nawmnain nun a rûn a…Remruata hi hmanrua a ni!

Chapter 4

Thil dang deuh kan sawi pakai a tul leh tlat mai, kan lo dawh hram hram dawn nia; thil thleng zawng zawng erawh a inzawmna lai a awm zel dawn a ni!

Tunhnu hian Naute nu kha Remsangi, Dintei nutei fanu a ni tih ka hria a; chutia nausen tap thawm ringawt ngaihtuaha ka leh ka leh tâkah chuan, tha lo tiin thil dang ka ngaihtuah lui ta a; Dintei nena kan intawntirh lam kha a ni- kha boruak nuam leh hlimawm lutuk mai kha; nimin maia thil thleng ang maiin ka la chîang a ni.

“I hnenah dâwt ka sawi i duh em?”

“Duh lo, dâwt hi ka hua! Mahni thutiam hlen thei lo hi ka hua! Mi rinawm lo hi ka hua! Mi bum chîng hi ka hua…!”

“Nang paw’n ka lakah he’ng zawng zawng hi ti miah suh ang che!”

“Ka tih duh loh vang a ni e tlang taka ka awm, rilru pêk dân tâwk pawh i thiam dawn nia, ka care vak dawn lo bawk che nia! I rilru tihnatna tur chi a thlen lohna turin ka care vak dawn lo che; kan beisei ang kan hmuh leh si loh hian a hrehawm thin, ka lo tawn tawh avangin…ka care theih hun che a lo thleng thei ta a nih leh, kan la ti dawn nia!”

A mi chhanna sei angreng tak chu a dikna lai a awm ka ti a; mahse min tihnual angreng! Eng emaw chen chu ka reh phah ta nghe nghe a!

Facebook leh Whatsapp lamah kan inbe phawt a, a tâwpah SMS pack ka ngîat a, a mak lutuk, SMS pack a thun tak tak; keimah vanga thun a nih thu a sawi a! Chutia ka reh leh deuh daih tâkah chuan a SMS ka hmu ta a; a diktak chuan ka reh chhan kha ka ngaih loh vang a ni lo, a thusawi avangin ka invêng ve deuh ringawt zâwk a ni chauh si a!

“LALCHHANHIM…ka SMS pack thun hi a zawh loh vaih chuan i châk lo vang…ih maw!?” a rawn ti deuh tawp mai a; khawl mai a!

Kei chuan, “Mmm…eng’e?” ka ti a!

“Nikum te khan min ngai thei lutuk tiraw?”

“Hehe…’tinge min dâwp kher a!?”

“Ka dâwp lo che. Ka hre thin aaa…min ngai tih hi!”

“Nia, ka post coment-a i lo lân tam vak loh kha chuan a dân a dang ve lawm”

“Nia, i post coment atang khan mipakhat chuan kan inngaizawng emaw a tia…inbox-ah min rawn zâwt a lawm!”

Chu a SMS rawn thawn ka chhiar zawh chuan, “I va’n nghal reuh tak!” ka han tingawt a; ka lai a niang!

“Engvang chuan maw?” tiin mi rawn reply hâ a!

“I ngaihawm em a lawm”

“Hihi…nang pawh i ngaihawm. Kei paw’n a tir atang khan ka ngaina ve nghal em em ringawt che”

“Nuthlawi piangthar *** emaw ka tih kha, nula diktak a lo ni reng a!”

“Hihi…chimawm!”

“Hehe…chuan, min ngai ve miah lem lo em ni…?” ka’n ti leh ngawt a…a hnu deuhah, “Ka zawhna chu a va’n tul lo tak! Mu tawh ang aw?” ka’n ti leh hrâm a…

Ani chuan, “Fb-a kan in-friend atang khan min tihlim lutuk. I thu post lo coment te kha a nuam ka ti thin. Ka thlalák i lo coment paw’n ka lawm thin; chuvang chuan reh suh la…i reh chuan ka ngai lutuk ang che!”

“Awle…mahse net-pack neih reng hi a har aaa…chuan, mebhi bohut khush hu” ama Hindi min zirtir ka’n hmang nghal zaih a!

“Net-pack chauh ka sawi lo” a rawn ti a…a hnu deuhah, “Hehe…i va’n thiam em em!” tiin min rawn fak zui a, ka reply leh hmain min rawn wish nghal ngawt a, “Mu tawh ang aw…muttui aw…ka tlaivarpui che a nia…!”

Keiin, “Min tlaivarpui ve ziah…thawnthu ka ziak leh dawn khawp mai!” ka ti ve nghal zat a!

“Ziak leh la; mahse min puh tawh kher suh ang che”

“Ka puh leh vek ang che! A changtupa hi ka zîak khawngaihthlak ziah thin!”

“Phakar…!”

A’n nuam thei khawp a…!

Vawikhat chu nilêngin ka text lo va; mahse ka ngai hle tho. Mut dawnah ka text ta chauh a…

“Vawiin eng’e i tih a?”

“Ka sawi peih lo!”

“‘Tinge aaa!?”

“‘Timah…ka sawi awm lo!”

“I lungawi lo ami aaa…Duhtak?”

“Mu rawh!” a rawn ti hmak a!

A va’n buaithlak tak, a thinrim chhan ka hre si lo! Hmeichhe thlem hi ka zei miah lo; tih thinrim zual ka hlau chuan ka va wish ta ngawt a!

“Muttui aw…tui tawkin i muhil dawn nia…duhawm leh lutuk mai!” tiin min reply pawh ring lovin ka va text a; mahse min reply leh duh hlauh mai…

“Blehhh…!” a rawn ti ngawt a; a fuh dawn tan e!

“I tha lutuk a nih mai chu a!”

“David Lalchhanhim Pautu!”

“Ka ngai che”

“Min ngai thlâwt lo…dâwttt!”

“I va han hre lo tak emmm!”

“Hre bawk…min be lo paw’n i awm thei lutuk! Min ngai bawk lo!”

“I text ka hmu si lo…Whatsapp ka rawn check…i lo online…ka lungawi lo hmel i hmu lo a nih kha!”

“I online leh online loh ka en reng a lawm…a lang vat thei lo ka tia lawm…eng’e vawiin nilênga min rawn text loh vel…thinrim zawkah te chuan i la tang zui lehnghal!”

A thinrim chhan ka man ta chiah, chheh chheh mai a, “Ka thinrim tawh lo bawk…ka ngai che” ka’n tingawt a!

“Thinrimmm…min ngai loooooo…!”

“Ka ngai che(100)”

“Ngai lo(100)”

“Duhtak?”

“Eng’eeeeee…?”

“Ka ngai tak tak che a sin”

“Min ngai rêng rawh” a duhawm a sin!

“A nih…nangin?” ka han ti leh a.

“Aw”

“Hehe…a tho hnuhnung hnung bengsûk!”

“Aihhh…a fair lo!”

“Hahaha…a nih inchum!?” ka ti leh a!

A lo ngam hle a, “Aw…min chum pha dawn chuang lo va…hihihi!”

Hun kal tawh a ni ta si a!

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x