FACEBOOK INBOX FEVER! 17 & 18

Chapter 17

Ka thil hrilh tur che u ka sawi zawhah ka kal bo dawn tih thu ka hrilh tawh che u ang khan kal bo chu ka tum ta kha a ni a, ruahmanna felfai tak ka nei chuang lo va, ka tum dan chu ramhnuai khawi maw laia rawl bo kha ka tum dan a ni ve tawp mai a ni.

Mahse, Dinsanga min rawtpui angin ka awm ta zawk a, a Pû te farm-house lama hun hmang turin ka kal ta zawk a ni.

Chu farm-house ka thlen chuan manhla ka ti hle mai. A reh a, a bul lawkah thing hmun ngaw a awm a, a thlang deuhah lui lian vak lo a luang bawk; Sava hram chiah chiah hriat tur a awm reng a, thlifim a thaw heuh heuh reng bawk si, hahchawlh nana hmun thlannahawm tak a ni. Current a lût a, zanah ka Novel ziah lai ka chhunzawm a, zingkar leh chhunah farm-house bul velah chuan ka teikual ṭhin.

Helai hmun ka thlen aṭangin vawiin hi ni ruk ka awmna chiah a ni ta; ka beisei loh lam aṭangin buaina karah ka tel ve leh dawn ta a ni! Hei hi he lai hmuna Muanawma nen kan inhmuh tak nawlh aṭanga lo inṭan a ni ber mai. Muanawma chu a ṭhen chuan in hre tawhin ka ring; ‘PARADISE LODGE’ buainaah khan kan hmelhriat tawh kha, kan inhmuh tirh chuan zép lovin tlang takin Lunghlu dang awmna kha a chhui zui thu min hrilh a.

Helai hmun ka thlen hian a nikhatna aṭanga a nithumna thleng chuan eng thil dang lam mah ka hre lo tluk a ni. A nithumna zanlaiah erawh kha chuan ka mutna pindan ni lo, pindan danga thil ri rum rum thawm chu ka hre ngei a; mahse heti ang hmunah chuan Sazu an tam ang tih chu ka hre ve mai a, ka ngai thupui vak chuang lo. Ka tho a, ka va enfiah ve ngei a, choka lamah chuan thil a lo tla hnawk niaih a; Sazu an ni ang. Thil mak anga ngaih theih tur pakhat erawh, ka mut dawna kawngka ka khar chu a lo inhawng hiau a, chu chu ka khar ṭha a, ka mu zui leh mai a, eng thil danglam mah ka hrezui leh tawh lo.

A nilina, chawhma chanve velah chuan farm-house bathlarah Pen leh Lehkhapuan nen, Dawhkan chawichhuakin ka inchhawp hnawk a; chutih lai chuan ka piah thinghmun ngaw aṭang chuan mipahnih hi an rawn chhuak hlawl mai a, ral aṭang chuan ka lo thlir reng a, an lan danah chuan ka awmna farm-house lam chu rawn pan an tum niin a lang. Hnathawh thawmhnaw emaw, ramvah thawmhnaw emaw leh Iptepui emaw takngial pawh an ak lo va Silai niàwm tak an ken avangin mak ka ti deuh a; ka awmna lam pan tura an rawn kal ṭan tih chuan ralkhatah hmeichhe ṭe thawm hi a rawn ri ta phut a, chu thawm an hriat ve leh mipahnih te chu thinghmun ngawah chuan an lét leh ta daih a. Hmeichhe ṭe thawm a rawn rik rual chuan ka dingchhuak a, chumite an lét leh tâk mai bawk si avang chuan mak ka ti hle a ni.

Chumi hnu, chuta ka awm aṭanga a nirukna chawhma lam thleng chuan eng thil danglam mah ka tawngin ka hre leh tawh lo, lehkha ka ziak a, Lehkhabu ka chhiar a, luiah ka zuk kal bawk; ka awmdan chu ka nin deuh avangin chawhnu lam chuan farm-house piah thinghmun ngawah chuan ka lût phei ve ta ngawt a. A lo thelhin kal vel a lo harsa lem lo va, ka kal ka kal a, ka kalna hnu pawh chu ka chhinchhiah lem chuang lo va.

A chhan ber pawh ka hre chuang lo, hmalam pan chuan ka pawng kal satliah a, a nakkinah chuan ka hma lamah chuan a lo veng deuh huai a, farm-house ni ngeia lang hi ka va hmu nghal a; ka rilru chuan, ‘Dinsanga’n farm-house dang awm vea a sawi kha a nih dawn saw!’ ka ti a. Dinsanga khan a chanchin a sawi ṭhat teh vak loh avangin va pawh phei kher pawh ka chak hran lem lo va, lét leh mai tuma ka rilru ka siam lai chuan, Inchhung aṭangin, hmeichhe hmelṭha tak pakhat leh mipa pakhat hi an rawn chhuak a, hmeichhia zawk chu a bai saih saih a, a thin a rim ni ngeiin a lang bawk.

“Sangte, Zorema hi ka ngaina tawh lo, haw ka duh a ni” hmeichhia chuan a han ti a.

Mipa zawk, ‘Sangte’ tia a koh chuan, “Kan kalpui a ni a, hawsan ringawt chu dik ka ti thei lo” a lo ti ve thung a.

“A awmdan te hi i hre lo a mi? Mi pangngai pawh a ang tawh lo, ka hlau deuh hial a nia!”

“A awm dan hi chu a mak khawp mai…nizan a rawn lét bawk si lo” mipa chuan a han ti ve a.

Kei, anmahni lo thlir rengtu chu mipa zawk chuan min rawn hmu ta a, min rawn pan hnai a, “Ṭhianpa, ka va hmu ngai lo che ve enge ni ta?” a rawn ti a. A hmel chu a pawr deuh chap a, a thawmhnaw chu a pangngaiin a zahpuiawm loh hle mai thung.

“Chawlh hmangin heti laiah hian ka rawn kal mai mai; saw lai farm-house ah khan ka awm a ni; saw mi thing hmun ngawah sawn ka rawn lût a, ka kal ka kal a, he lai hi ka rawn thleng ve ringawt a nih hi” tiin ka chhang a.

“Mi pakhat, Jeans dum lam pang leh T-Shirt pawl ha i lo hmu em?” tiin min han zawt a, a ruka mangang hle hian a lang a. Ka hmuh loh thu ka sawi zawh chuan a thaw halh a, “Muana pawh chu rawn kal leh se ka va duh tak!” a han ti ngawt a. Hmeichhe hnenah chuan, “Kan ṭhiante kha i va be teh ang, Lucy pawh a ziaawm theih loh chuan kan haw mai pawh a ngai tak tak ang” a han ti leh a, hmeichhia nen chuan an kal ta a.

Farm-house lam pana an kal phei chu ka en reng a, eng emaw buaina a nei a nih ka ring a ni. Mipa zawk chu a rawn hawi lét leh a, “Kan buai viau na a, lo leng ve ta che” min han ti hnuhnawh mawihnai a. Kei chuan, “Ka lét leh zawk ange” tiin ka lo hnial a. Inchhungah an lut a, kei pawh thing hmun ngawah chuan ka lût bo ve ta a ni.

A hmaa ka kalna hnu chu ka hre tawh miah lo va, ka innghahna awmna lam nia ka rin chu ka pan ta tawp a.

Muangchangin ka kal a, ka awmna hmun thlen vat ka duh hle a ni. Chutia ka kal chhat chhat lai chuan ka sir thlang lamah chuan thawm ka han hria a, ka ding det a, ka han ngaithla chiang a, ṭawng ri ka hria a ni.

“He thilah hian i rawn inrawlh a ṭul lo khawp mai, keima’n ka zawng hmu ang a, ka nei ngei bawk ang”

Vîn deuh féa chu thu chhakchhuaktu chu a thinrim hmel hle mai; mahse a mi biakin a chhanna erawh ka hre pha lo a nih ka ring, eng chhanna mah a awm si lo va. Hriatchian tuma pan hnaih ngei chu ṭul riau hian ka hria a, kha thu sawitu khan biak chu a nei ve phawt ang a, anmahni pawh chu ka hmuh theih ka inring a ni.

Ṭawng ri lo chhuahna lam chu ka hnaih ta hret hret a, phun bul bul thawm a rawn awm leh ṭhin a, a sawi erawh chu ka hrechiang thei tawh lo. Ka hnaih zel a, an awmna chu ka hnaih tawh hle niin ka hria. Ka hmaa hnim chu ka han vai kiang a, ka thil va hmuh chu a ṭha lo hle mai!

Thing pakhatah hian mipakhat hi phuar beh a ni a, a lu a kun deuh avangin a hmel ka hmu chiang thei lo va, amah phuar bettu àwm ang pawh ka hmu mai lo; mahse, chupa sir deuhah chuan thawm a lo awm a, mipakhat dang hi a rawn kal a, thinga phuar beh chu a han kuai dak lawp a; e heu!

A phuar beh pa hmel kanhanhmu chiang chu mak ka ti kher mai! Muanawma ani tlat mai.

Amah dinchilhtu chu a meng sen rûm a, anmahni ka hlat vak loh avangin ka hmu chiang hle a, hriat tham mang loh hian a phun nuah nuah a. Muanawma chu a rawn meng a, amah kuaidâktu chu a han nuih a, engmah phei chu a sawi lo. Chupa chu la phun nuah nuah chungin a kal ta a.

Rei lo deuh ka han nghak a, khapa thawm kha ka han ngaithla a, a rawn lét leh mai loh avangin Muanawma lam chu ka pan phei thuai a, amah a phuarna chu ka phelh sak ta vat a. Mak takin Muanawma chuan min hmu chu mak a ti lo!

“Min va rawn phelh har ve!”

“Ehh…ka rawn kal dawn tih i hria mi?”

“Hre tawp nang; mahse helai hnaihah i awm tih chu ka hria”

“Engtin?”

“Hman zan khan ka rawn tlawh che a, ka fimkhur loh lûatah thil kha ka titla a ni; nang chuan thlahrâng emaw i ti leh pek ang chu” Muanawma chu a han nui a.

“Engtin nge helaiah i awm theih a…enge i tih?”

“Heta i rawn thlen hma khan hetah ka awm tawh” tih ngawtin min chhang a, ka hmela zawhna awm chu a chhiar thiam leh pek tawh a ni ang, “Kal vat teh ang, Zorema kha a rawn lét leh ang’e…nakkinah ka hrilh ang che” a han ti leh a.

“Zorema a!?”

“Aw”

* * * * * * *

Mikhual, an hmelhriat lohin a hnek avanga nikhawhre lo va a awm a rawn harh chuan Zorema chu a awm dan a pangngai lo hle a, a meng à deuh ruai hian a hriat a, amah lo en rengtu a ṭhiante chu a han enkual te te a, “Khapa kha khawiah nge a awm?” a han tinghal a.

“A kal bo tawh”

“Ka hmu leh dawn”

“Rinsangi a inhliam a…Zorem, haw mai a ṭha a ni” Sangtea chuan a lo ti a.

Lucy chuan, “Kei pawh haw vat ka duh”

“I duh leh haw rawh” Zorema’n a lo ti hmuk a.

“Zo, ka mal hi a na lutuk…haw vat ka duh” Rinsangi chuan a lo ti ve vat a; midang ho pawh chuan haw an duh vek.

“A duh chu haw ula a ni mai, khapa kha ka khawih leh hma chu ka haw dawn lo” Zorema chuan a lo ti leh hmuk a.

Rinsangi chu nâ tiin a ṭhen chak chak a, “Zo, a ṭul lo, haw ang, kan haw a ngai a ni” a han ti leh a.

Zorwma chuan, “Nang kha lo ngawi reng rawh…kan haw dawn lo” a lo ti leh tuar a, Rinsangi a melh dan chu a rapthlâk hle a; engmah pawisak nei lo mitmeng hi chu a dangdai tak zet a ni. Chutih laia Zorema hmel leh mitmeng hmu chiang chuan chu chu an hai lo.

Midang ho chu an ngawi ṭhap a; Sangtea chuan, “Zorem, haw chu a ṭha zawk a ni” a han ti veleh nghat a. Zorema chuan a lam a rawn hawi phei a, mengsen rum chungin a rawn en run run a, a awm dan chu a duh loh em avangin Sangtea chu a lo inring ve hle; mahse Zorema chu a inher vut a, pâwnah a chhuak ta daih a.

Zorema chu a reh vang vang hnuah zanrei tawhah a rawn kir leh a, midang ho chu an lo meng phawk deuh hra a, ani chu a berh deuh phung a, hrui hi a la chhuak a, ngawi rengin a chhuak leh ta a.

* * * * * * *

Hmanhmawh zetin ka awmna farm-house chu kan pan a, Muanawma chuan, “Phuarin min kalsan a, hrui chaih a rawn hmubtawh dawn si a, a sa khawp ang” a han ti a, a nui sak a.

Kan thlen chuan zawhna hlirin ka khat tawh a.

“He thil hi ka han hrilh phawt ang che” Muqnawma chuan a han ti a.

“Hun rei deuh tawhah khan Khawbungah khian chhungkaw pakhat an awm a, chumite chhungkua chu he ka thil bawhzui lai kaihhnawih avanga lo tuar ve ngawttute an ni!” a han ti phawt a; a sawi zawm lehnghal a.

“Zâmpuii te chhungkua chu an retheiin an harsa ve hle țhin, amah hi unau rual tak zinga milai chhang chiah niin zirna lam leh kut themthiam lamah a tui hle a, nulât a hre harin Class-X a zir lai pawhin a la naupangchhia hle.

“Rethei ta na na chu lehkha thiamthei viau mah se a zir kumtin thei lo a, a chawlh leh a kal hi a inchhâwk reng mai. A rawn tleirawl chhuak a, ama tâwkah a vul chhoh vanglai a hmang dawn ṭan a; chutih lai chuan khualkhua ațanga rawn kal, Pro. Pastor tlangval pakhat hi an khuaah chuan a rawn awm ve a. Zâmpuii hi hmeltha vantlâng tâwk tak a ni; chu tlangval chu an khua leh an Pastor Biala nula hoin an beisei hlawm hle laiin tlangvala erawh chuan Zâmpuii chu a beisei ve tlat thung.

“Tlangval chuZâmpuii’n hnialin han hnar viau mah se la, zak miah lo va a nu leh pa bul lama a ṭuan tâk zel avangin duh chin a lo nei ve ta nge nge a; chu tlangval chu rei lotèa Pastor ni mai tur a ni nghe nghe. Chutia an han inzui tâkah chuan an chhungte lamin tihdàn tur an sawiho ta a. Zâmpuii chuan lehkha zirzawm leha Matric zir chhuah ve ngei a duh ta tlat a; a chhan chu, ramdanga awm thei dinhmuna ding a nih vangin a pasal tâna zahpuiawm lutuk bîk lova awm a duh a ni. A ngaihzawng pa erawh chuan inneih a duh deuh tut tut mai thung. Zâmpuii’n Pastor nupui, ‘Under Matric’ nih țha a ti lo va, a pasal a thlâwp zawh loh lutuk a hlau a ni.

“Hetih lai hian Zâmpuii chuan kum 18-na a hmang mêk a; tichuan, mipa lamin palai tirin December, Matric exam zawha innei turin thu an dah ta a, Zâmpuii erawh chu Aizawlah March thlaah chhukin lehkha a zir zawm leh ta a ni.

“Hun a kal a, a hlimin nuam a ti hle a, țhahnem a ngâiin a zirlaiah pawh a tițha thei hle mai, a hma hunin a nawrna nen, a ngaihzawng neih chuan a tichhe lo va, a țan tir hle zâwk a, a lût tlai ber kha a tițha pawlah a țang ta ziah bawk. A nungchang pawh a zawi raih a , kawng engkimah a fimkhur ve thei hle thin. Amah chhangtu a û chiah hi lehkhazir lai tho a ni bawk a, țhahnem an ngai dun thei hle.

“Tlangvala ve thung kha chuan, “Min ngai lo e mai” tiin thla khatah vawikhat tal Zâmpuii chu a tlawh ziah a, an Sikulah te a tlawh țhin! Zâmpuii te Headmaster chu Kohhran Upa a ni a, a kâwm nêl thiamin an inngaina hle a, Zâmpuii nena an chanchin pawh a lo hrilh vek mai lehnghal a; Headmaster chuan, “Chuvang chu a ni ang, Zâmpuii hi a kum phu loin a puitling a, harh rûal lek si a nungchang hi a cool raih țhin” a ti ve bawk. A changin an Headmaster hnenah chawhnu chawlh a lo dil sak a, Uniform ha chungin Synod Office pawh an kal zeuh zeuh țhin. Zâmpuii chu a zak thei hle a, a bialpa lah, zah chu khawi lamah, an thlen chin apîangah mite leh a chhûngte zawng zawng a hrilh bawrh bawrh mai zel a, a zahpui ngai lo.

“Hlim takin hun an hmang a, a chhûngte a tlawh kualpui a, chu tlangval chu a Pain a rawn chah a, kan tlangvala chuan Zâmpuii sikul kal hlanin a û te hnenah hruai a lo dil diam a, a dil diam tawh tih hre lovin Zâmpuii’n a hnial a, “Ka û ten an phal dawn lo, ka rawn kal ve lo mai ang” a han tih chuan, tlangvala chuan a nui mai a!

“August thla tâwpah Zâmpuii te sikulah tlangvala chu a rawn kal leh a, hlim takin an inkâwm a, a haw chho leh ta a ni. Zâmpuii’n selection exam ngawrh takin a bei bawk a, a tițha ve thawkhat pawhin a inhria.

“September ni 5 a lo thleng ta; Zâmpuii chu a tûk maia exam zo tur a ni tawh a, subject pakhat chiah a awm tawh; a huphurh bîk lo hle a, an haw dâwnah an Sir Siama’n a ko a, a hmuh țhan tak lehkha chu an section mi 60 chuang hmaah fiam chungin a pe a; chhiar nghal loin Lower Khatlaa an In a thlenpui a, a Necktie chiah dahin lehkhathawn chu a han hawng ta nghal a…

“A tawrh atân chuan a na khawp ang; chu lehkhaah chuan tlangvala chuan nupui a rûk thu leh, hmeichhia chu a rai thu te, Zâmpuii chiah neih a tum thu leh hmeichhe nuin a nawr nasat si thu te, amah tlawha a kal khân a hrilh ngam loh chhan chu a exam theih loh a hlauh vang a nih thu te, tuna a nupui rûk chu a nei phawt ang a, a țhen leh ang a, amah nena inneih a duh zâwk thu te leh thildang a rawn sawi teuh a!

“Zâmpuii chu lehkhathawn chhiar zo lovin a lo tlu a ni awm e, a bek vei lam tauhin a beng a tauhchilh a, engmah hre loin a awm ta a ni. A û ten an rawn hmuh chuan khawsik namenloa sâng lo neiin, a mittui hruksen rual loha tla chungin chhùatah an rawn hmu a! Zâmpuii hian a chhungte hriatpui lohin ngaihzawng a nei ngai lo; lehkha a lo hûm chu a û te chuan chhiarin thil awmzia an hre ve nghal mai a, an thin a ur ngang mai.

“Harh mumal thei loin chawlhkar tam a awm a, an biak reng rengin engpawh kha, “Aih…aih…aih…” tih vekin a chhâng ṭhin! Damdawi Inah hruai an tum pawhin, “Aih” tiin a ṭang tlat a, an hruai ta lo a ni; mahse chu’ng thil thleng zawng zawng chu pakhatmah a hre lo! Thlakhat hnu velah chuan țawng ri thei lo, ri hre thei chang chang chauhin a rawn harh ve ta a, an inentir hnuah damdawi ei chungin zawi zawiin a aw leh beng pawh a inhawng ve hret hret a; mahse, a hnu thlengin a pangngai thei ta lo a; a tlûk khân a awbâwm leh ri hriatna nerve a lo sawh chhia a ni!

“An selection test result chu a rawn chhuak a, tling lo saa inngâiin a en ngam lo va; mahse mak tak maiin a tițha ber pâwl a ni ta hlauh a. Tichuan, damlo chungin Matric exam turin a theih ang angin a inbuatsaih ve ta tho a, lehkhazir erawh a tân a harsa tawh takzet! A hrisel ṭha ta lo leh, an Sir te thusawi a hre ṭha thei ta lo chu a tân buaina a tling phâk ta tlat mai a!

“Han kîr leh lawk ila; khatia lehkha a zir țhat leh hma khan Kohhran leh YMA lamah a inhmang hman fê a, an Bial mai ni lovin, Tuipuiral huapah pawh mite hriat a hlawh ve phian hman a ni. Khati ang boruakin a han dêng ta si kha, ‘Mualphona hi a va han zauin a lo va nasa thei ngai em!’ tia inngaihtuah tirtu a ni ta fo mai. Miten lo hre lar lo tawpin tuma hriat hlawh loh kha lo ni ta zâwk se a inti hnuhnawh hial a ni!

“Mahni tâwka lar leh, a mawi chhoh vanglai, a taksa leh a hmêl pawh a vul chhoh vanglai takin a nun chu ngaiawh leh tawh ngai lo tura tihchhiatin a awm ta a ni! A hnu thlakhat lek ațangin a nun tichhetu tlangvala lah chu Aizawlah a rawn chhuk a, rem leh rem lo pawh sawi lovin Zâmpuii chu hmuh a tum thin; amaZâmpuii lahin ten taktèin a lo ten tawh si! A hmaa amah rawn rîm thintu, a phu loh Officer, he tlangval avanga a hnar tâk zawng zawng te a ngaihtuah lêt phéi chuan a thinrim ṭun ṭhin. Zâmpuii rîmtu pakhat phei chu Minister a ni chho hial a nghe nghe; a hming chu ka hrilh lo zawk ang che! Chumi nen chuan kum 30 dâwnin an inthlau a; mahse Zâmpuii chu a âtchilh ve tlat a ni awm e!

“Mahni nun tichhetu na na na chu, a hmu duh thlâwt lo leh a ten em em mai chu buaithlâk hi a tithei hle zâwk a, tlangvala lah chuan amah chu a ngai ve hlein a la ring ve ta dah a; mihring rilru hi a inhmu lo thei teh e! A nun a tihchhiat sak hmeichhia chu vawi sawm vel zet thlem pah ni siin a la vau ngam cheu a, engmah a sâwt thei tawh si lo! Zâmpuii chu a țap tawh lo a, ṭap leh chuang tur pawh a awm lo, a ngawng zo vek tawh zâwk a, thla thum chhûng vel chu khawlâiah a chhûak lo a ni!

“Matric chu harsa takin leh damlo nasa tak chungin St. Paul-ah hian a exam ta tho a; mahse a hlawhchham lêt der a ni! A nun tihchhiat saktupa tlangval han phakar zia leh suahsual zia lah chu, midang bulah, “A beng leh aw țha lo vang hian ka îai a, ka nei leh duh lo a ni” te a lo la ti ngam zawrh zawrh cheu a! A hma, kha chenah, an Pastor Bial leh Tuipuiral huamchhungah, Kohhran leh khawtlângah Zâmpuii tel lo va thiltih kha a vang ve țhin hle a; chupa ṭawngdan chu a tân chuan thangtlâwmthlâk tak a ni ang!

“Zâmpuii Aizawla a chhuk leh tirhin lehkha sei tâwk tak, type writer-a type-in a rawn thawn a, “Nang ka tawn hma che hian hmeichhe tam tak ka lo tichhe tawh a, pawi tih leh inchhirna ka nei ngai lo, anmahni duhthu a ni a; mahse nang ka tawng che a, i rilru thianghlimna leh nula thianghlim zia diktak mai, nungchang leh hmelțhat kawnga ka duhthusam, sawiselna tur reng reng ka hriat loh i nih avang hian i hnena inpuang lo thei lovin min nawr tlat a, kha’ng ka thil tih tawh te khàn hlîng zum takin min chhun ang mai hian min tina ngawt ngawt a, i mi hmangaihna leh ngaihdamna vang chauhin ka dam leh thei ang. Mi tenawm ka ni a, min ngaidamin min la pawm thei ang em?” tiin ngaihdam a la rawn dil nghe nghe a. Amah kha Pastor ni mai tur kha a ni a; mahse khatia Zâmpuii a awm tâk leh, a hnena nasa taka ngaihdam a dil a, Zâmpuii’n a bîak duh tâk si loah chuan a chhuanchhe zawngin thil a sawi leh ta hlauh a, a inpuanna leh ngaihdam dilna a thawn kha Zâmpuii’n Synod Hotute a pêk ngei a ring a ni ang chu, Zâmpuii thawn anga lehkha ziakin, “A hmaa ka lehkha pêk che u, ani inpuanna ka sawina lehkha kha lâk lêta hê’ng thil thleng hi theihnghilh ka duh a ni” tiin Synod Hotute chu lehkha a thawn ta ngawt mai a; Synod Hotute lah chuan a hmain Zampuii lehkha pakhatmah an la dawng si lo va, an mak ti chuan Zâmpuii chu an zawh chian phah ta hlauh a, amah leh amah a inhêkthla a ni ta ngawt mai si, Pastor chu a ni zui thei ta lo va.

“Hetih lai hian Synod Moderator chu…” Muanawma chuan a han ti zet a, “Ngawi rawh, ani hming hi chu sawi loh a ṭha zawkin ka hria” a ti ta tlat a, a rûk tak chuan ka hre châk hle a.

“Synod Hotute chuan a inpuanna lehkha a thawn kha Zâmpuii hnenah an dìl tâk miau avangin ani chuan a pe ta a ni. He tlangval awmna khua hi Reiek chhehvela khaw pakhat saw a ni. Synod lam chuan a chanchin an han chhûiin an han hrechiang a, a rawngbawlna zawng zawng an chawlh tir ta vek bawk. A thiltihah a inchhir hle a, khaw pakhatah eng hna emaw ni a thawk a, tunah hian engtin nge a awm tih erawh hriat a ni lo!

“Zâmpuii erawh a nun rahbi tleu tawh mah se ngaihtuahawm a ni tawh lo va, a nu leh pa an thi tawh a, pasal a nei a; mahse naupangtèin a hmeithai leh a ni. Laizâwn pathum leh nuța pali a nei a, mifel tak vek an ni. Amah Zâmpuii chawmtu nih an duh theuh a, an ngaihtuah hlawm khawp mai. A u fa, a pawmtlei sak, hna zahawm tak thawk tawh pawh a awm; a ngaihtuahawm vak lo. Hmeichhe lunglian tak a ni a; unaute a tinui nasa thei hle. A û chiah hi tunah Sawrkar Department pakhatah Officer-in a awm mêk bawk!

“Zâmpuii nun tichhetupa Pû hi he ka thil chhui laiah hian telna a lo nei a, an chhungkaw chanchin hi ka chhui ka chhui a, Zâmpui chanchin lungchhiatthlâk tak hi ka hriat ve phah a, ka han hrilh ve mai mai che a nih chu….mu tawh ang, ka chau…naktukah tih tur ka nei” a han tihzawm zat a.

Hepa hi sawi tur khék a chîng a, ka run ṭhin takzet.

Chapter 18

Thil awmzia ni thei nia ka rin suangtuahin ka muhil thei lawk lo va, zînglam khawvar dawnah ka muhil ve ta chauh a; Muanawma erawh a muhil hma hle thung.

Ka han harh chuan Muanawma chu a lo awm tawh lo va, khawiah emaw a chhuak bo a nih ka ring; kan piah farm-house lamah a ni bawk ang. Chaw ka lo ei san a, a rawn lét hun chu ka lo nghak ta ngawt mai a, mut ka kham loh avangin ka mut a chhuak hle a, ṭhuthlenga ṭhu chungin ka lo muhil a; eng thawm emaw hi chiang lo riai hian ka han hria a, ka han men chuan ka bulah Muanawma chu a lo ṭhu ve reng tawh a ni.

“Eng’e chanchin?” tiin ka lo zawt nghal chawt a.

“Kan khaw lamah lo zin ve zawk ta che, ka lo mikhual leh che anga, tunlai chu keimah chauha awm hi khawharthlak ka ti ve riau”

“E…e…e…eng a? Helai thil thleng chu i chingfel tawh mi?” haw tum anga a lan avangin mak ka ti hle a.

“Fel lo; chuti maia tihfel theih a ni lo, helai hmun ni loah hian thil hriat tur ka la ngah mai; Zorema kha na deuh takin a inhliam a, thih chu a thi lo vang!” tiin Muanawma chuan min lo chhang mai a.

“Engvanga inhliam nge? A chesual tihna em ni?” tiin ka han zawt a, Muanawma chu a nui sak duh chauh a. “Haw chu i tum tak tak a ni maw?” ka han ti leh a.

“Tum mai e; saw farm-house saw a hrâng deuh roh lehnghal a, ka awm peih tawh rih lo…min rawn zui ve mai teh” tiin thutak zet hian min han sawm nawn leh a.

“A ṭha lawm; mahse saw ta farm-house ami te kha engtin nge an awm dawn a?” tiin ka han zawt leh a.

“An haw dawn; an tan sawn haw a ṭha zawk a ni! Hmeichhia kha hmanniah a inhliam tawh a, Zorema pawh a che thei lawk rih lo vang. Haw mai turin ka hrilh tawh a, ka sawi anga an awm vat loh chuan an chungah thil ṭha lo a thleng zel tak tak ang!” tiin a han ngawi deuh vang vang a, “Kan Dawithiamnu tehhrep pawh hi a tum hi a ṭhelh chiang nasa dawn si a, ani pawh hi lo inthiarfihlim zawk se a ṭha ang” a han ti leh hmak a, min bia pawh hi a ang.lo.

“Dawithiamnu a!?” ka lo ti chiam a.

“In siam ve vat teh, i haw vat teh ang” ka zawhna pawh chhang lem lo chuan a han ti leh a; ka thinlungah chuan a chhanna ka hriat châk zawhna chu a pung tam telh telh mai si.

Ka han insiam zawh chuan Muanawma te khaw lam pan chuan kan haw ta a ni.

Muanawma hi, ‘The Lone Investigator’ tiin ka vuah ve ngawt mai a, amah phei hi chuan Detective anga inchhal a duh ngai lo. A In kan thlen hnu chuan ka awmna farm-house piaha thil thleng, ka la hriat ve loh awma ka rin tlat avangin ka zawt ka zawt mai a; mahse engmah a sawi chiang duh lo! “A hunah kan pahnihin kan la kal leh zawk dawn nia” a ti tlat zel. An khuaa kan thlen hnu nihnihnaah chuan inléng a nei nghal a.

Chumi tûk, zîngkarah chuan tuemaw hi a call tlut tlut a, a Phone call chu an lâksak duh si lo va; Muanawma chu a rum nghat a, a lungawi lo hle a ni! Ṭhutkhawmna pindana a ṭhu chu a tho a, tukverh, nizung lo luh iarhna lam chu a pan a. Kut hnung suih meuhin a In bul huana Phengphehlep Pangpâr zû dawt lai chu a thlir a.

A In chu mahni chauha khawsak nan chuan a lian a ti mah mah mai; chu thu chu a sawi fo a. Zinglam dar 7:30 a ni a, parawl ho tihdan dungthulin nizana kan chawei bang kha rin a rawt a, chawthing kan bar ang a, chawhmehah artui pumhnih vel a kang leh mai dawn a ni!

A vawi sarih nan a ngai bawk chu a han call leh a, a la ‘ring kuit’ ṭhak fo a.

“Tunge biak i tum a?”

“Ramnghahi” tih chauh hian min chhang a; chu chu a biak ve ṭhin deuh a ni awm e.

Hetih lai hian a damsam vak lo va, farm-house bul ramhnuaia a tal nasat vang pawh a ni maithei. Ramnghahi chuan a ‘sms’ a chhâng hek lo! Khawhar leh damsam loh avanga a mamawh lai taka, biak theiha a awm lo chu a hrethiam lo lek lek a; a hun kal taa a thil tawnte kha ka lo ngaihtuah lêt a…hautak ve tâwk tak chu a nih kha!

Chutih lai chuan kawngka an rawn kik a. “Lo lût rawh” tih paha muangchanga inherin kawngka lam chu a han hawi a. Pu Rokhûma a lo ni a; a hnungah chuan nu te reuhte, sam mam than mai, mitmeng bial kal leh a nu têt aia hmaifang fuh fêt mai hian a rawn zui ve nghal a!

Muanawma chuan, “Lo leng rawh u….ka pa Khûm eng’e ni ta a?” a han ti a.

“Muana, i tanpuina dil duh kan awm a nih hmel; hei, kan thiannu hi Ruatsangi a nia…”

“Eng kawngah nge ni ta!?”

Pu Rokhûma tawng hmain, Ruatsangi a tih chuan, “Ka fapa a bo a ni!” a lo tivat a. A mitmeng a val kalh a, tunhnaiah a mu tha lo hle a ni ang tih a rin theih.

Muanawma chu, “Tikhan lo ṭhu lawk teh u…!” tiin a tho a, choka lam a pan a; reilotê hnû-ah a lo let leh vat a, ṭhuthmun a remfel hnu chuan, chu nu lam pawh melh chhin eih lo chuan Pu Rokhûma chu a han en daih a, “Ka Pa Khûm, eng’e thil awmzia hi!”

“Eng i tihna nge Muana?”

“Hei, ka pi hi, a fapa a bo a, chu a fapa bo thu min hrilh tur ngawt chuan em ni i rawn hruai?”

Pu Rokhûma chu a han ngawi vang vang phawt a, “Aw ni e. Chumi thu hrilh tur che chuan a ni ka rawn hruai” a han ti ta a.

“Chu chu ka tan eng’e a tangkaina?” tiin Muanawma chuan a han zawt khauh a.

“I tan chuan a tangkai lo tawp ang Muana!”

“Chuti si…eng’e…?”

Muanawma’n a sawi zawh hma chuan Pu Rokhûma chuan a lo pawt chat a, “Muana, min lo ngaithla teh. I tan a tangkai kher lovang; mahse ani tan hian a tangkai dawn a ni”

“Ka hrethiam e; mahse Detective ka ni lo!” Muanawma chuan a lo ti bul hmak a!

“Mami thihna i buaipui dan kha Ruati hian a lo hre ve a…”

Pu Rokhûma’n a sawi lai chuan Ruatsangi chu a lo inrawlh ve a. Amah hi kum 30 bawr vel a niawm e. A hmelchhe lo hle a, a incheina mawlmang zet chu a felfai riau thung.

“Ka fapa bo min zawn sak la ka duh a ni!” tiin Muanawma mitah a en kal a. ‘Aw i tih hma chu’ tih melh hian a han melh ngal mai a. A pumrua en ang aiin a luhlul ngat ang!

Muanawm chu ngawi rengin a tho a, chokaah a lut a, eng emaw chen a va awm vang vang a. Chutih lai chuan Ruatsangi chuan, ‘Engtia tih chi nge?’ ti niawm tak hian Pu Rokhûma lam chu a han hawi a, a mitmengin a râwn a; Pu Rokhûma lah chu a lo nuisuk duh chauh a!

Muanawma chetla chu ngun deuh hian ka lo en a. Ani chuan Tray-a thingpui no thum chawiin leh, chhang hmeh tur keng tu tu chungin an lam chu a rawn pan leh a. Ruatsangi chu melhin, a bula dawhkan chu hung rem turin a han ti a. Ka in tur min thlit kep ve lo chu chhuahchhalh ka châk deih viau na a, kan inléng te an thutak deuh avangin ka ti ta lo.

“Ka pi, engtik kumah nge in inthen?” Muanawma chuan a han ti ngawt a.

“kum 2013-ah…” a han ti tha ve mai a. Chutah, hrechhuak thut niawm tak hian, “Engtin nge pasal then tawh ka ni tih i hriat a!?” a han ti hâ a.

Muanawma chuan, “Ka hre lo!” a lo ti ringawt a. Pu Rokhûma chu a lo kiai leh suk a.

“I fapa chu kum engzat nge?” Muanawma chuan a han ti leh a.

“Kum ruk a ni”

“A beng a parhin a mitmeng a fiah em?”

Ruatsangi chuan Muanawma zawhna chu mak a ti hle a ni tih a hriat hle. Chhan ngaihna hre lovin a hawi â hau mai a. Pu Rokhûma pawhin mak a lo ti ve deuh tih, a awm danah a lang a!

“A lu a mumin, a chal a arh em? A chalsam tona a chhak em?” tiin Muanawma chuan a la zawt ta deuh deuh a! A nui der si lo!

Pu Rokhûma chuan,”Muana…aaaa…!?” a han ti vak ringawt a!

Chutah, Ruatsangi chu a meng taltap a, a hmel a dik lo nghal bawk! Chu chu Muanawma chuan a lo man thiam thuai a, Ruatsangi a tawng chhuah hma chuan a tawng ta vat a, “Ka Pi, pawimawh ti lo ila ka zawt lo vang che. Tha takin min chhang la ka duh a ni…i fapa bo hi ka zawng dawn a nih chuan…” a han ti a. “A beng a parh em?” tiin a han zawt nawn leh nghal zat a!

Ruatsangi chu a hmel a han buai deuh a; chutah, “Aw, parh e, a lu a mum a, a chal fai pawh a thui ve e” tiin a han chhang tha ta a!

“Naupang fing tak…” tiin Muanawma chu a han phun sap a.

“A Pa nge a ngainat Nangmah?” tiin a han zawt zui leh a.

“A pa a nih ka ring; mahse zu in mi a ni!”

Muanawma chu a han ṭhu ṭha a, thingpui chu a lem ri khalh a, chhang chu a tep chap chap a, “A nih leh, i fapa bo dan chu min han hrilh teh. Kim takin ka hre duh dawn a nia aw Ka pi” a han ti leh a.

“Inrin ni zan a ni a, zanriah chawei kham hlimin Bawiha chu dawra kuhva lei turin a pu-in a tir a; chumia a kal chu a rawn haw ta lo a ni” tiin Ruatsangi chu a ngawi zui daih a.

Rei fê hnû chuan, “A va tawi leh si ve!” Muanawma chuan a han ti boh a! “Engtik kumah nge pasal i neih?” tiin a han zawt zui leh a.

“Kum 2012…”

“In pûk lâwk em ni!?”

“Aih, pûk lâwk lo” tiin Ruatsangi chuan a lo chhang vat a!

Muanawma chuan a mitah chiang zetin a han en a; Ruatsangi mitmeng chu a khup lap a! “Ka pi, heti ang thilah chuan dawt sawi zeuh hian kalna tur kawng dik ata kawng dik lovah min hruai thei ngei ang…” Muanawma chuan a han ti a!

“Dawt ka sawi lo. U Rinsanga nen hian kan pûk lâwk lo tak tak…!”

A han ngawih vang vang hnû-ah Muanawma chuan, “Ka pa Khûm, Hriangtlângah ka zin lawk dawn a, in hi min lo thlithlai ta che aw; mahse hei, Chhantea hi a lo awm leh si mai a niang chu” tiin Pu Rokhúma lam chu a hawi ta daih a.

Ngawt ngawt a, In ka nghak duh bîk vak.lo a sin le.

“Ihhh…eng lo…Hriangtlângah chuan…” kan inlengnu chu a lo ṭawng ve leh a.

Muanawma chuan, “Eng’e ka pi?” a lo ti vat a.

“Aizawla kan awm hma hian kan awm thin â…”

Muanawma hmel chu phur avangin a a nung ta sarh a! “A nih tak chu. I fapa chu ka zin haw hunah kan hmu ang; ni hnih bak ka thang lovang” tiin a tho a, thingpui no chu a han seng fel a.

Choka atanga a rawn lêt leh hnu chuan Ruatsangi chuan, “Engtin nge hma i lak dawn?” a lo ti a

“Ka ngaihdan a dik leh dik loh hre turin ka chhuak lawk ang” tiin Muanawma chuan a lo chhang liam puat a. Pu Rokhûma lam chu hawiin, “Ka pa Khûm, biak lawk duhna che ka nei” a han ti leh a.

Pu Rokhûma chuan, “Aw le…Ruati, min lo va haw san mai ta che…” a ti a, Ruatsangi chu a haw ta a.

“Muana, Hriangtlangah chuan eng’e tih i tum?”

“Ka pa lehkha hnuhnunga a sawi chungchangah khan thil hriat chian duh ka la nei a; chumi hrechiang tur chuan kal ka ngai a ni!”

“A ni tak e…tun hma-a i pute khua maw ni kha?”

“Aw ni e…Pi Ruatsangi chanchin kha zawhbelh che ka duh deuh a…”

Pu Rokhûma chuan a chhuah hmain pawisa tam tham tak hi Muanawma kutah hmehbel a tum a, a fanu, Zorinsangi thih dan a chhuichhuah lawmman hi pék a tum fo tawh a ni; mahse Muanawma chuan a la duh lo!

(Zorinsangi tualthih thu leh a nghawng zel chu, ‘PARADISE LODGE’ lamah a kimin a la awm ang; a bialnu thihna kha heti lama Muanawma kal tirtu ber a ni!)

Muanawma chu, “Rintei kha ka hmangaih a, amah thattu zawnchhuah kha ka mawhphurhna a ni” tiin a ṭang tlat a; pawisa chu nidang ang bawkin a la duh ta tlat lo a ni.

Nilênga a lêngchhuak a rawn haw meuh chuan khua a thim chhawlh tawh a; tuivawt ver vawrin a inbual a, a harh hawk a ni ang, a zangkhai vah a. Muangchanga ei relin, a tuka a zinna tura thil tulte a buaipui zawhah, thutkhawmna pindan thuthlengah tluzalin a chhing ta riai riai a. A tûkah chuan kei min hnutchhiahin a zin ta a ni.

Hriangtlâng aṭanga Muanawma a haw leh hnu chuan, mipa naupang fel tawh tak, beng parh, hmaifang fel tak, hmeltha reuh tak, mitmeng fiah fê mai hi, pa pakhat nen a rawn hawpui a; chu pa chu chu naupang pa chu a ni! An pafa chuan Muanawma Inah an rawn innghat nghal a, an thlen tuk zanah chuan naupang pa leh a fapa chu inchungah an inchhaih nui ar ar a. Chutih lai chuan Muanawma chuan ṭhutkhawmna pindanah, ngunthluk zetin, ‘The Good, The Bad, The Ugly!’ tih lehkhabu, cowboy chanchin chu a chhiar a. Hollywood lamah pawh Movie-a an siam, Cowboy Movie changtu lar tak, Clint Eastwood-a channa kha a ni nghe nghe.

Dar 7:00pm chiah a ni a. Kawngka chu an rawn kik ta karh karh a. Muanawma chuan a va hawng a, Pu Rokhûma leh Ruatsangi an rawn inzui lut a! Ṭhutkhawmna pindan lamah an thu a, Ruatsangi chu a rawn tawngchhuak hmasa ber a.

“Muana, ka fapa chinchang chu ka hre châk tawh takzet a ni” a han ti a.

“Ka pi, hmanhmawh lutuk mah ta che, ka sawi dawn a lawm; chumi hmain zawhna tlem azawng zawh che ka duh ang, tha taka min chhang turin ka beisei nghal bawk che a ni…” tiin Muanawma chu thingpui lum turin choka lam a han pan leh rih a. A lo let leh hnu chuan, a thufel chauh tihin, “Ka pi, i fapa bo ta hi, i pasal ṭhen tâk nena in fa a ni lo ti raw?”

Ruatsangi chu a ngawi reng a!

Muanawma bawk chuan, “I pasal ṭhen tâk nena in inneih hma khan midang, tu emaw nen fa in nei ti raw?”

Ruatsangi chu a la tawng chuang lo. A meng tak ran a, thinrim leh lungawi lo hmel erawh a pu lo!

“I chanchin leh i fapa chanchin kha ka hriatah i sawi tlem hle a; mahse, i chanchin hi hriain ka inhria!”

“Eng ka chanchin nge hriaa i inhriat a; ka rawn panna chhan che chu ka chanchin chhûi tur ni lovin, ka fapa bo min zawnhmuh sak turin a ni! Chu chu i thei lo a nih chuan ka kal ang’e!” tiin Ruatsangi chu a tho ta phat mai a!

Pu Rokhûma chuan, “Ruati, ni rih love…Muana hian thil eng emaw hre lo se, heta kal turin min koh ka ring lo” a lo ti vat a.

Muanawma chu a han ngawi vang vang a, “Ka pi, i fapa chu tunah i hmu ang!” a tibung nghat a, “U Thansang, in rawn chhuk lawk hman em…in pafa khan…” tiin inchung amite chu a han au zui a.

Chumite pafa rawn chhuk a hmuh chuan Ruatsangi chu a sen tawn tawn a; a fapa chuan a rawn pan nghal vat bawk a. Chu naupang chuan a nu chu a pawm cheng cheng a, a ngai ve viau tawh a ni ngei ang. Chutih lai chuan, Muanawma mikhual ni ta, Thansanga chuan Ruatsangi chu a lo en reng thung a; Ruatsangi hmaisen chu a la reh lo hle a, thinrim mitmeng erawh a pu zui ta miah lo thung!

Muanawma hi a tih loh chinah chuan mi frank tak a ni, a chang phei chuan a frank mah mah fo! Pu Rokhûma pawh chuan, a rûka boruak a zangkhai vak lo chu a hrethiam nghal mai, “Eng’e thil awmzia Muana?” tiin Muanawma hriat tawk chauh ni maia zawi hian a han ṭawng a.

Muanawma chuan, “Pi Ruatsangi hian a hre duh lo vang; chuvangin tun tut tutah chuan ka sawi rih lo mai ang’e!” a lo ti a.

Ruatsangi chuan Muanawma chu a han melh zawk a, engmah phei chu a sawi lo.

“Thingpui i inho ang u aw?” tiin Muanawma chuan Choka lam pan mai a han tum a; mahse Ruatsangi chu a lo tawng vat a, “Kan in tawh lo mai ang’e Muana…ka lawm e…” tiin pha aw dai hian lawmthu a sawi a.

“In thu thu le…”

“Bawiha, i haw tawh ang le…” tiin Ruatsangi chuan naupang chu a han pawm kang a. Naupang chuan Thansanga lam chu a melh zak zak a; Thansanga chuan a remti tih a lan nan, chu naupang chu a han nuih a, Pu Rokhuma leh Ruatsangite nufa chu an chhuak ta a ni.

“U Thansang thingpui ka’n lum ang’a, in pahin Chhantea te nen hian kan inkawm dawn nia”

“Awle, Bawiha chuan a ngai ve viau a nih dawn kha”

“A nu a ni tlat a lawm; a vannei e, amah hringtunu ngei ngaihtuahtu a la nei tal a”

“Ni e tiraw…?” Thansanga chu a ngawi vang vang a.

“Kei chu min hringtunu enkawl seilen ka ni hlei nem” Muanawma chuan a han ti leh a.

Muanawma thusawi pawh chhang lem chuang lovin,”A la hmeltha hle mai, hman ang tho kha a la ni” Thansanga chuan a lo ti daih a.

Muanawma chu a nuisak a, “U Thansang, hmangaihna mitmengin i en tlat a ni; nu hmeltha tak chu a ni a, a pianphung avang khan hmeichhe lang nalh rei chi a ni ve reng reng ang” a tivei duah a.

“Ni e; mahse…” ti hian Thansanga chuan a han chhang a, sawizawm lem lovin a tawp leh a!

Muanawma chuan, “Ho mai mai, U Thansang ani i hmangaihna thinlung mu hnu kaihthawh ka duh rih lo…kha thingpui hi in mai mai teh…” a lo tihsak hmiah a, “Kei pawh, tun ni li chhung chu tuma’n min be lova, tuma’n ka biak an chhang hek lo…ka lung a leng ve tho; chuvangin lungleng ve ve kan inchhemalh tawn chuan mipa puitling ve ve si kan laktlak loh lutuk palh ang, thên kual mai mai teh ang!” a tizui a, a nui suk a!

9:00pm

Thingpui in pahin kan titi a, kan titi tui ṭan viau a, kan nui ho hak hak reng a; chutah kawngka kik thawm kan han hria. Muanawma chuan a va hawng a. Kan hmuh phak chiah loah chuan tuemaw, hmeichhia nen hian an inbia a.

“E heee…!”

“Eng’e?”

“Eng lem ni love; i lo va lêng tlai ve?”

“Nia, tlai tâwka lên i phal lo em ni?”

“Phal loh pawh a awm lo…lo lut la…”

Inchhunga an han lut chu Muanawma chuan ṭhutkhawmna pindanah a rawn luhpui nghal a, Kei leh Thansanga hnenah a inleng chu min han inhmelhriat tir a.

“U Thansang, Chhante, hei hi Ramnghahi…ani hi U Thansanga, thian hlui, thar leh ta…ani hi Chhantea” tiin Muanawma chu a nui var var a.

A rin loh taka Muanawma’n mikhual a lo neih avang chuan Ramnghahi zak chu a kimki deuh a! Rei vak lo chu kan thu ngawi ran hlawm a, Muanawma hian mi tuemaw chhuahchhalh chak deuh a nei tih a lang reng mai!

Thansanga chu a tho nulh a, “Muana ka mu dawn, ka mut a chhuak”

“Ka pindanah khan han mu rawh…”

“Aih, helai ṭhutkhawmna sira mikhual pindanah hian ka mu duh zawk!”

“A ngai lo, helaiah chuan mu lovang, ka pindanah han mu rawh!”

“Ka duh lo; i zakkha rim a la chambang pek ang!”

“U Thansang, heta mut chu ka phal lo, ka pindanah han mu rawh, a fai vek!”

“Heti laia mut pawh chu i va ui reuh e aww; mi tuemaw tan i hauh deuh a ni lo maw?” tiin Thansanga chu a nui huk huk a.

“Kal mai teh” Muanawma chu a vei kiai suk a!

“Kei pawh ka mu dawn…ka chau” ka han tinui suk a, Inchunglamah ka chho a, thawm dim takin ka chhuk leh dⅇm dém a.

Muanawma pindan pana a chhoh hnu chuan tawng zui mai lovin an han ngawi dun ren rawn a, an inṭhut hnaih vak lo! Chutah, Ramnghahi chu ṭawng tuma a ân zuau laiin Muanawma chu a tho nulh a, Bath-room a pan a, minute nga vel a va zun huau huau hnuah a lo chhuak a, ṭhutkhawmna pindan luh dawna dawhkan inhung kil sir chu a khupin a han tauh ta nghek a.

“Awihahhh…!”

“Fimkhur ta che…che phut phut suh…che dap dap ve la…”

“Ka che phut phut em ni?” Muanawma chu a nui suk a.

“Aw…i che phut phut zel”

“Che dam dap i duh zawk em ni?” a nui leh a.

“Aw…”

“Chuti chu dinhmun a va derthawng ve!” a nui leh suk a.

“Mai thei…”

“I bula ka awm hi chuan ka lai ve deuh roh thin a lawm le…”

Engkim a kaltluang leh vek tawh a; Muanawma tan mi chhuahchhalh hun tak a ni!

“Mi i be miah lo va; ka biak dawn chein i chhang hek lo! Engvang nge?”

“Ka Phone a bo daih a”

“Hmm…”

“Muan, haw har thei ka ni lo…”

“Ngai lo; riak rawh…”

“Chi loh…”

“Ka ngai viau che a sin…”

“Kei paw’n…” tiin Ramnghahi chuan Muanawma chu a kuah chèih chèih a…

Ka nui suk a, thawmdim takin ka mutna tur ka pan san ta a ni.

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x