FACEBOOK INBOX FEVER! 13 & 14

Chapter 13

Lalremsangi te chhungkaw nun hi sawi mai aia khirh leh khauh a ni; a pa pu Chhuanawma hian a nu nena an inṭhen hnuah nupui dang a nei vat a, anni lam hi chu an khawsa thei hle a ni. Lalremsangi te lam erawh an khawsak a harsa em em thung, a nu hian a hmeithaipui a, hah takin thawk mah se chhungkaw eikhawp an nei ṭawk ṭawk rih a ni ber mai; chutihlai chuan Lalremruata a rawn lang a, facebook aṭanga inhria an ni a, inbox lamah inkawmin an chhungkaw nun khirh tak avanga Remremi nun khawhar tak chu hneh a harsa lo hle dawn tih Remruata chuan a hria. A duh anga hman tur sum a tlachham lo va, pi Mawizuali pawhin a ngaina nghal hle a ni.

An han inngaizawng chho a, Remruata chuan midang kawmhlim a thiam hle a, sawi tur a hriain fiamthu a duh hle ni hian a lang a, Lalremsangite chu a tlawhpawh ngun ta em em a, anni chhung lam pawhin an hlimpui ṭhin khawp mai. Pi Mawizuali pawhin Remruata chu a rin em avangin a fanu nen chuan zalen takin a inkawm tir a, eng emaw changa a haw hman loh pawhin Remruta chuan a fate chu a lo riahpui mai ṭhin a ni; ngaihṭhat lohna tur khawpin Remruata chu a awm ngai miah si lo va.

Chuti ang khawpa inchenchilh ngun ta chu Remsangi leh Remruata chu an khawsa dun ta fo a, Remsangi chuan a hmangaih em avangin inthiam lohna pawh a nei chuang lo, Remruata fa chu a pai ta hial a; Remruata’n hmeichhia a kawp zînga a fa pai tu awmchhun a ni nghe nghe. A fa a pai tih Remruata a hrilh chuan Remruata chuan engmah a sawi miah lo, ngawi rengin duat tak hian a lo kuah ringawt a, chumi ringawt pawh chu ani tan chuan a thlamuanthlâk hle a ni.

An inkar chu hlauhthawn tur awm lovin lang mah se Remsangi hian Remruata mizia leh awmdan hi a hrechiang lo hle niin a lang! Hetia an inkawp chhung zawng hian lehlamah midang kawp a bansan chuang lo va; hei hi Remsangi inawhhlum hnu féa ka hriat a ni. Hei hi ka hriatna chhan pawh Zoremi, Remruata nen inbox lama an khawsak dan avanga rilru hah leh inchhira ka hnena a rawn inbunruah vang a ni; Remruata leh Hminghlui awmdan ka lo hriat ve ngawt dan erawh ka sawi chhuah a rem rih lo thung!

Facebook Account ka neih ve ṭantirh aṭang tawh khan Social Media hmansual avanga harsatna neite hi ka lo pui ve tawh ṭhin a, fuihin ka hau a, thurawn ka pe ṭhin; ka hetih avanga anni chanchin pawh hi hre thei ka ni a, an harsatna sawiin midang dang pawh hian ka hnenah thurawn an rawn beisei ṭhin; mahse, an mualphona tur emaw, an tana ṭha lo tur zawngin ka sawichhuah sak ngai lo va, ka sawichhuak a nih pawhin an phalnain midang tana ṭangkai tur zawngin ka sawi ve ṭhin, an hming pangngai ka tarlang ngai miah lo bawk.

Ka hriat chian tak em em erawh chu, midang puia thurawn pe ṭhin tu pawh hian puih an ngai ve fo tih hi a ni ta; tunah pawh damlai lusun dinhmunah ka ding a, ka rilru na leh hrehawm ti hi ramhnuaia kal bo ka tum mék a nih hi; mahse ka kal hmain ka thil sawi hi ka sawi zo phawt ang.

Remsangi’n Remruata fa a pai thu a nu hnena a hrilh vel lai hian a rukin Remruata chuan midang a kawp reng a, amah ngei hrilh a nih lai pawh hian Zoremi nen hian an inkawp chho ṭan mek a ni; Sangpuii, pasal pawmlai nei nena an inkawp pawh a ṭhulh phah chuang lo, he nu hi fa nei tawh mah ni se, fa nei thei tawh lo tura insiam tawh, la valai leh tinung sen sak mai, îtawm tawk chauha ria chumbat mai a ni a, a pasal a vannei a, Remruata a vannei tel fo bawk!

Engmah hi thup hlen tak tak theih a ni lo tawp. Remruata awmdan chu tute hnen emaw aṭangin Remsangi chuan a lo hre ve ta a, a hriat tirh chuan a tlîakhnâwp a ni ber mai, a thinlung chu chhun angin a na a; amah hi tleirawl duhawm leh nu hnâp, pawisawi lo zet a ni a.

Chuti chung chuan chân a tum lo; Remruata hi a hmangaih a. Inneih a rawt a, Remruata chuan engmah a sawichiang duh ngai lo; hun a kal a, Remsangi chuan nausen mipa duhawm zet hi a nei ta a, Remruata pawhin a nun dan a la sim chuang lo; chutih a hnekin nau a neih hnu lawkah inṭhen a han rawt zui lehnghal a!

Remsangi chu a tawrhna chuan a eichhia a, a nunphung a mumal thei lo, a ṭap a, a ṭawng mang lo, a fapa chu a en ngawih ngawih fo a, a chang chuan a chul heuh heuh ṭhin. A fapa ngawi renga a en chang chuan a mittui hi a rawn hnam ṭiam ṭiam ṭhin a; a thinlung tawt chu 2015 Khuangchawi thla khaw nawm vanglai takin a fa sen puain zanlaiah a chhuak a; zandangah pawh nau nen a chhuak fo a, a rawn haw leh mai ṭhin, hemi zana a chhuaknpawh hi a nu chuan a hre reng a, a rawn haw leh mai ringin a ngaihven zui duh lem lo va. Mahse a rawn haw ta lo a ni!

Kha kha nausen ṭap ka hriat ṭhin lo inṭan dan chu a ni a, envanga kan kawmthlang kher khera thleng nge tih zawng ka sawi thei lo, tunthleng hian nausen ṭap ri chu ka la hre ta zauh zauh reng a! Ka bengchhe ri mai ni chuan ka hre bik lo, kohna aw pawh a ni mahna; ka hre lo!

Ka ṭhianpa Dinsanga leh Remremi erawh kha chu an inneih lawiṭhat zan hnulamah khan nupa hlim tak an ni chho a, kawng engkimah, sex nheiah pawh an thinlung a inhmuin an inlungrual a, an tan khawvel hi a nuam rih a ni. Dinsanga hi virgina nupui nei chu a ni bik miah lo, mithianghlim famkim pawh a ni chuang miah lo; mahse sex chungchangah pawh thianghlim bik lo mah se, a hurherh ve hran lo, inbox pawh a leklam lo, a CK ve ngai hek lo; humsual erawh a dai ve! Remremi erawh virgin a ni a, a lakah a inthlahrun phah lek lek fo mai!

Nikhat chu Dinsanga nen kan inhmu a…

“Chhante, kal bo rih chu i tum ṭalh a maw?”

“Nia…hawiharh ka mamawh a ni”

“Khawilam nge i pan ang?”

“Ka hre mai lo…” ka hre lo takzet a ni!

“I tana hmun remchang deuh tur ka hria a sin”

“Dina, ka kalna tur hi nang pawhin hre lo la ka duh a sin…”

Dinsanga chu a nui hak a, “I ho e a…i rilru na chu a dam leh vat mai ang” a han ti a,”Tak takin, Novelist tia la sawi theih tur, lehkha ziah nuam ti chi i ni a, i thawnthu ziah mek chhunzawm nan ka sawi chu a remchang ngawt ang” a han tih chhunzawm a.

“Khawiah maw?”

“Ka pute khua aṭanga hla vak loah ka chhungten Farm an nei a, anmahni an buai deuh avangin an farm house nghaktu tur an duh hle a, ka lo bia ang chu…a hmun a nuamin a reh a, current an la lut tho bawk si…chutah chuan hun hmang mai rawh…net signal pawh a ṭha”

“I pute khua chu eng khua nge?”

“I duh dawn chuan kan inhrilh chiang leh zawk dawn nia; mahse…” tiin Dinsanga chu a ngawi dat a.

“Mahse…eng’e?”

“Ka pute Farm House aṭanga 1km khat vela hlaah chuan Farm House dang a awm ve tho a…”

“A lo awm ve a ni mai lawm” tiin ka han nui a.

“Chanchin duhawm vak lo a nei a lawm…” Dinsanga chuan thutak zetin a han ti a.

* * * * * * *

Chapter 14

“Inchung lamah chho ang” a han ti thâwp sat a; tisa châknain a nawrna tawh takzet!

Chu ṭawngkam leh a sawitu chetzia leh amah a sawngbawl dan avang chuan Rinsangi chu a tirilah a khur ru der der a; hlauh avanga khur chu a ni si lo! A thaw chu a lo rang a, a thâwk zawngin a àwm chu a insép dat dat a; chu chu mipa chuan a hai hauh lo.

“Zo…ka…ka…kan…ṭhian te saw…” a han ti bah nak a.

“Tuma’n min hre lo vang…kan tel lo pawhin an hlim khawp saw” mipa chuan a han ti a, tisa châkna avangin a meng thim raih a, “Kan pahnih chauh pawhin hlim takin kan awm thei a sin…an tel ve kher a ngai lo” a han ti chhum leh hmak a.

Rinsangi chu a la khur ru der der a, a aw pawh a pangngai lo hle, Zorema’n nghet taka a Kawnga a kuah laiin derdép hmel zetin a Nghawngah a lo kuah hnâp a, an thaw dun ham ham a. A kuahtu mipa taksa chu a insangmar ṭang a, a mitmeng thûk raih chuan amah Rinsangi chu a melh reng a, a mitmeng chu a ngenngawl kher mai.

“Ka duhna che hi i tihhlawhtlin ngei a ngai a ni…heta kan inhmuh hma pawh khan khawih che hi ka duh tawh a sin…” mipa chuan a han ti tlang leh hmiah a, Rinsangi chiai hmel chu hnaitèah chiang zetin a han bih a, a ngawih vang vang hnu-ah, “Min hnial leh tur si engvangin nge inbox leh whatsapp ah khan khatia min tih pui?” a han ti bul leh hmak a!

Rinsangi chuan hnial ngaihna a hre lo, mipa chuan a dang chep hneh hle hian a hria a; nia, an inhmuh hma hauha inbox leh whatsapp lama an khawsak dan kha; zanin hi a taka a inhmuh vawikhatna a ni. A sawi dik a ni, khati khan a chetpui fo tawh a, a phur ṭhin hle a, engvangin nge a taka an inhmuh tâk avanga a dan tlat kher ang; diktak chuan hepa hian a taksa, ngaihtuahna, a phurna leh engkim hi a chawk tho takzet a ni!

“Tirawh, Inchung pindanah khan i chho vat teh ang” dawhtheih loh hmel zet hian mipa chuan a han ti leh a; Rinsangi chu dimtèin a han fawp a, a taksa chu a chul kual ruai a, a han fawp kual dan dan a; a nghawngah te, a bengkawm te, a mit leh a awm bawr lang laiah te chuan, dimte hian…

Rinsangi chu a thaw a rang leh zual sauh a, a âwm chu a thâwk zawngin a pawng leh dat dat a, zawi leh chauh hmel zetin mipa khabe hnuaiah chuan a kun nghaih a, a sam chu a inzam hnawk niaih a; chutah, “Zo, kal rawh…i chho vat teh ang” a ti thâm ta chhal a! Mipa chu a nui sak a.

Anni pahnih Inchung lama an chhoh laiin Inhnuai pindan zau berah chuan an ṭhiante chu an bengchheng hle thung a, Woofer play in zu ûm nen, beer nen an inchhawp hnawk a, Rinsangi te ṭhian dun chu an hre chang miah lo emaw tih tur a ni. He hmunah hian intihlim turin a kawp te te in an kal khawm a, chhungte mitmei venthawn tur a awm lo va, hetah ngat hi chuan an zalen a ni. Kum lama la naupang tak tak an ni hlawm a, an vaiin pariat an ni a, a ṭhen chu inhre sa, inkawm tawh sa an ni; a ṭhen erawh whatsapp leh facebook lam chauha inhria an ni a, zanin hi an vawikhat inhmuhna a ni hlawm; he lai hmuna inhmuh khawm hi whatsapp group lama an rawt a ni nghe nghe a; he hmuna an kal theih nan an chhungte ṭheuh bulah dâwt chhuanlam an nei vek bawk!

“En teh…Singapore house-maid ho an tihdan hi chu a over mah mah zel ka ti…Zosap ah lah hian an post ve ziah lehnghal” tiin tleirawl hmaifai veng pakhat hian a ṭhiannu chu a han kheuh a, Dawhkana beer chu a han lem hlak a, a bula mipa tleirawl pakhat chuan Wihsky a a lo thli chhuak mék bawk; anmahni vil rengtu a awm tih lam chu an ngaihven lo hrim hrim.

“Kei chu Zosap hi nuam ka ti” mipa tleirawl chuan a lo ti a.

“An post hoh theih theih nen”

“Fb group zinga i active na ber a nih kha…ho i ti lo tawp a niang”

Hmeichhe hmelṭha tak pakhat chuan, “An thuziak tam tak hi chu Troll post mai mai a lawm…an trolling ve dan lah hi a class a la hniam em em zui” a rawn ti ve bawk a.

Hetih lai hian chung mi pariat te zinga pakhat chu pâwnah a va chhuak a, an kal chhuah dawna a unaupa thu sawi kha a rilruah a riak reng a, a tir khan eng vakah a ngai lo; mahse, thim thet thetah he hmun hi an ṭhian zahoin an rawn thleng a, a hmunhma leh khaw awmdan avang chuan a unaupa thusawi kha a nih duh hmel hlein a hre ta rum rum mai!

Thla a éng no nghulh a, hemi zan ber kher hian chhum a zing chiai chiai a, chu chuan boruak chu a tihnawng churh hian a hriat a, khaw awmdan chu a hnîm ruih mai a ni. He farm-house hi a pu tà, a papuia’n a rochun a ni a, eng emaw chen chu a neitute hian an tlawh ngai tawh lo nghe nghe; mahse, nu upa lam tawh pakhat hian khua aṭangin karkhatah vawikhat tal a va tih fai ṭhin avangin bal ṭawp lutuk chu a ni bîk lo. Chhawnghniha sak a ni a, a kawtzawl a zau thawkhat a, phaitual hnim a ṭo khat tlat bawk; hmun ṭihawm ni lo se hmun nuam tak a ni!

Farm-house chhak mual pawng pharh ṭha angreng takah chuan enkawl ngun tehchiam a ni lo tih hriat tak Oil-Palm hmun hi a awm a, Ṭin hnih hmun vel chu a ni ang; a kawtzawl hmun ṭhenkhatah erawh Serthlum leh thei dang tlem azawng a awm thung a. Farm-house aṭanga metre sawmnga bawr vela hlaah chuan eng thing nge tih pawh a hriat loh, kung lian tak hi a ding ther fur a; mak tak maiin he thingkung hi hring reng mah se a hnah a tlakawlh deuh reng mai a ni. A zar lian deuh pakhat chu hmar lam hawiin a zar phei dû mai bawk.

“Thla èn zan hian thingzar pakhat hnuaiah hlimthla mak tak a lang ṭhin a ni!”

Heta an kal hmaa he farm-house chanchin hrilhtu a unaupa thusawi kha a ni; chu chu a han hrechhuak zawk a, tuna a thlir mék hi a thing sawi chu a nih ngei a ring. A rilruah chuan, “Zanin hi thla a éng a…” tih hi a lo lût a. Hrehna rilru nei chung siin thingzar hnuaiah hlimthla chu a awm leh awm loh hriat a duh hle a; a unaupa khan a tihder mai a nih a ring tlat a ni.

Thing awmna lam pan tuma a ke a han pén chiah chu, “Sangte, khawnge i kal dawn…ka lo kal ve duh” tih ri a han hria a, a hawi lét a, a bialnu Rinpuii a lo ni a.

“Khawiahmah ka kal dawn lo; lût tawh zâwk ang”

An ṭhiante chu an thawm a lo reh deuh tawh a, a kawp hian an lo inṭhut hnaih hle a; Sangtea chuan, “Khaw’nge Zorema te hi an awm a?” a han ti a. Rinpuii chuan, “Inchung pindan lamah an chho” a lo tisap a, “Sangte, thil sawi tur ka nei a” a tizui leh sap a.

“Han sawi la…eng’e? Nuam i ti lo mi?”

“Aih, ni lo…chulam pawh ni lo”

“Inṭhen i rawt dawn tihna maw?” Sangtea chu a han nui deuh a, “Hmannia i inbox kha ka hmu a lawm…Rinpui, password inhriatpui hi ṭha ka ti lo, hei hi chu ti tawh lo vang” a han tihzawm a.

Rinpuii chu a han ngawi vang vang a, “Remruata te chu i ṭhian a lawm…i ho thei e mai” a han ti a.

“Ni e, a ṭhian ka nih a theihnghilh a ni maithei” tiel awkâ hi a tel a, “I ṭawngkam pawh a bialpa ṭhianpa biakna ṭawngkam a nih kha tiraw?” a han ti leh ngat a!

“Kan fiamthu mai mai a nih kha…hrethiam ve la…”

“Eh..ka lo hrethiam nange?”

“Sangte, heti ang chuan awm lo hram teh…hetah hian intihlim turin kan kal a ni lo’m ni? A nuam lo a nia”

“Kei pawh hian fiamthuin bul ka ṭan ziah ṭhin a sin…nang ka bém che pawh khan…” Sangtea chuan a han ti leh hrâm a; Rinpuii chu a meng hnual raih a.

“Maw, Inchungah chuan chho lawk ang…hetah chuan ṭhiante an awm ve sia thil sawi a nuam lo a nia…”

“Zorema te kan tibuai ang”

“Pindan pahnih a awm tho a lawm”

Sangtea ngaihtuahnaah chuan thildang a leng lo hle mai, a unaupa thusawi khan a rilru chu a luah tlat a, khaw awm dan leh, chu farm-house chu a ṭha lo zawng hian a inhmeh ruih ni hian a hria a, a chhan sawi tur em em hre si lovin nuam lo a ti ru hle a ni. Inchung lama chhohpuia Rinpui’n a sawmna pawh chu a phurpui thei vak lo va. He hmuna kal rawt chhuaktu chu amah hi a ni a, Social Media lama a ṭhian chharte nena inhmuhna remchang a nih dawn bâkah, Rinpuii nena an inkar hi a ṭhat phah a beisei bawk. Mahse, a rilru chu a nuam lo a ni, engvang nge a hre chiah si lo; he hmunah hian karkhat awm an tum chu a ni si a.

Rinpuii chuan a lo la en reng a, ngen taktè hian Inchung lama chhoh puiah a han sawm leh a, Sangtea chuan a lo hnial ve zel bawk.

“Heta kalpuiah min sawm a, min ngaihsak ṭha leh duh si lo…” Rinpuii chu a lungawiloh hmel hle.

“Ka tihpalh a ni; ka ngaihtuahnaah thildang a tam em a ni”

“Eng thildang nge?”

“Ka hre bîk lo” a ti leh tlat si; hrilh kher ṭul a ti lo!

“Hmmm…Inchung lamah chuan chho lawk ila, ka bula awm i peih loh viau chuan ka sawi zawhah kan chhuk leh dawn nia”

“I sawi ho àwm sia…”

“Ho lo…a hrim hrimin zanin hi ‘tinge beer takngial pawh i in loh a?”

“Ka hre lo…ka in châk lo…nang paw’n inbelh tawh suh…rui deuh bulah ka mu peih lo a nia”

“Ka hre lo’ i tifai vek mai a…tu’nge i bula ka mu dawn ti? I nupui pawh ka ni hleinem…”

“Zaninah ka bulah i mu dawn!” Sangtea chuan a lo tichhum hmak a.

“I zakthei lo…i bulah ka mu peih bawk lo e”

“Nuam i tih theih hle kha a” tih pahin Sangtea chuan a kutah a han hmer a, “Chho ang” tih leh Inchung lama kaih chhoh a rual a; Rinpuii chu a nui rah rah a.

Inchung chhohna kailawnah chuan an chho a, an awm tumna pindan va pawh tur chuan Zorema leh Rinsangi te awmna pindan pelh phei a ngai a, chu pindan kawngkhar zawn an thleng ṭep tih chuan Inhnuai lamah ṭe ṭhawt thawm hi a awm thut a, anni pahnih chu an ding chawt a, Sangtea chu Inhnuai lamah a tlanthla lehnghal vat a.

Inhnuaiah chuan hlau tih hriat ngawih ngawih hian, “Saw..saw…saw…tah saw…saw…sawn ka hmu!” Lucy chuan a lo ti nawk nawk a!

Sangtea chuan ngaihṭhat lohna a lo neih tawh vang a ni maithei, Lucy kawhna lam en tur chuan pâwnah a tlân chhuak ta vat a, a va kal kual thuak thuak a, farm-house chu a kal hual bâkah, farm-house aṭanga hlam nga vela thing hmun lamah pawh chuan a va phei a; mahse engmah a hmu lo! A rawn lût leh a, Lucy pawh a lo ziaawm ve tawh bawk.

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x