FACEBOOK INBOX FEVER! 11 & 12

Chapter 11

Social Media vanga buaina chu hei hi a ni!

Pricila L Hnamtè chu a nuna a thil tihsual avangin hmeichhe khawngaihthlak tak a lo ni ta; he hmeichhia hi facebook hmanga Dinsanga bialnu hmasa a ni!

Frank takin ka han sawi mai teh ang; pawi tihna ka nei lem lo bawk a! Bialpa fel tak, amah duha hmangaih em emtu Dinsanga a nei a; ani nen chuan tihpalh thil takmeuhin an chesual tawh nghe nghe bawk! An inhmangaih tawn vangah a la sawi thei a; a àwm khawp mai! Hun a kal a, Dinsanga chu thil eng emaw avangin a buaiin a reh thei hle a, Pricila chuan a be khât a ti thin hle, a vui pawh a vui thin!

Chutihlai chuan a Fb Profile-ah mipakhat, a Pro-name atana “Tinuama” tih hmang, hnam hming dah tel, fake account tih chiang reng chuan a rawn be thin a; a tir chuan kawm pangngaiin khawhar hnemah a chhawnchhaih satliah mai mai a! Mahse, chupa chu a kam a hlei zel a; a tirah ṭawngkam polite pangngaiin rawn be mah se a huangtau sawt hle! A tâwpah chuan an inbiakna ṭawngkam, a inbiaa te tana fiamthu ṭawngkama lang si, amah hmangaiha duh em emtu tana mit tikham tak taka an inbiakna chu Dinsanga chuan a lo hmu ve ta thung a, Pricila-i hnenah chuan a ngaimawh hle thu a sawi nghal a; Pricila-i thung chuan, “Fiamthu mai mai a lawm” a ti ve tlat a, a tawpsan duh bik ṭhak lo!

Chu chu buaina a tling chho ṭan ta. A hmalama inngeih tak kha an intithiam lo tan ta zauh zauh a; an intihthiam loh apiangin Dinsanga chuan a pawi a sawi avanga hrehawm a tih thu sawiin ngaihdam a dil ṭhin. A duhin a hmangaih em a ni! Mahse Pricila-i chuan a runluih a, a awmdàn a thlak duh chuang lo; a tawpah chuan inṭhenna thu pawh sawi ni si lovin Dinsanga chu a reh ta hmak a!

Pricila-i ve thung chu Tinuama nen chuan an inbe zel a, an inkawm a, an inkawm zel a; Tinuama chu a lo zeiin a ngaihsak thiam si, a inphahhniam thiam si; khawhar chu a hnem tehmeuh e! Pricila-i pawh chuan a Profile a han check-in mi lerh tak leh hur tak a ni ang tih chu a ring thiam tho mai! Mahse, an inkawm an inkawm a, an inhmu ta zel a.

Tinuama chuan a ‘Profile Name’ chu a pu zo hle a ni ngei ang; a inven zawh loh khawpa an inkawm nasat tawh avangin mipat hmeichhiatnaah a luhpui ta! Chupa lah chuan, a duh hun huna mipathmeichhiatna a hmanpui theih chu a duhtawk em em a, midang a biak CK san leh ta zak zak a! An inbiak tantirha a laka a thutiamte chu a hla ta hle mai! Amah hmangaih em emtu a bialpa kha vawikhattê pawh a lam hawiin a rawn nui leh tawh lo! A reh ta hmak si! Inchhirin awmzia a nei tawh lova, tlailuat a pawi zo tawh!

Pricila-i nena kan inbiak hmasak ber chuan a mangan leh inchhir thu a rawn sawi a; ka hnenah chuan a inphawrh zo vek niin ka hria! Kei chuan, “Khati kha ni mah se, tun atanga tha taka bultan leh kha a theih a nia; i awmdan dik lo ser nghawng tha lo erawh i pawm thiam a ngai ang. Nangmah hmangaih avanga nun zahawma i awm duhtu mipa i tawng leh a nih chuan hai tawh suh!” tih thu ka lo sawi a!

Social media-ah fake account- Neinuami, Neizeii tih ang reng, Lunuama, Tinuama tih ang reng leh hming dang dang a tam hle! Mahni thlalak dik pawh pp lama tarlang lo, mahni profile dik, pian kum, pian ni, awmna dik pawh tarlang lo lakah fimkhur a tha hle! Hengho hi, mahni nihna dik taka sex group lama lut lova, fake account siama sex story ringawt buaipui, mipat hmeichhiatna ngawta tuihal an ni duh! Hming pangngai ve tho, fake account hmangte ang bawka sex ringawta tuihal hi a hmei apain an tam hle bawk! Va sawisel ngawt chi an ni lova; anmahni lakah lo inven mai tur a ni! Social media kan inrun chhiat tir ve palh ang’e aw!

Dinsanga pawh hi a hmangaihna kawng a bumboh fo mai!

Chapter 12

Nunkawng bumboh zawh ve ve Dinsanga leh Zodini chu an inkawp chho ta a, an hlim, an nui, nuamtiin hun an hmang dun a; zep lem lohah chuan khatia sex an hman zeuh tâk aṭang phei kha chuan an hmang an hmang ta mai; an hmang ngun khawp mai!

Mahse Dinsanga nun ruak chu engmahin a chhungkhat tak tak thei lo; a nun chu a rukin a ruak a, sex pawhin a tikhat zo lo! A diktak chuan ngaihzawng a neiha sex hial a hmanna chhan hi a nunruak beidawng awmngaihna hre lo a ni ber. A thinlunga a hmangaih hmasak chu Remremi kha a ni, engemaw avang khan an inṭhen a, Dinsanga thiam loh a ni bawk. An inṭhen hnu khan tumah hi bet takin a la kawp thei lo a ni ber a; mahse Zodini erawh a danglam deuh; Remremi dinhmun erawh a tluk chuang lo!

Chuvang pawh chu a ni maithei, a tira an hlimna chuan rei a daih lo chiang ngawt mai! Dinsanga chuan a natna, hahna, thinlunga a tawrhna laka hahchawlhna tur mi ni turin Zodini chu a beisei a; mahse Zodini chuan chu chu a hrethiam lo! An inhau ta zeuh zeuh a, a punlun zel avangin inṭhen ṭhat awm lovin Zodini chuan Dinsanga chu a be duh lo zui ta a ni!

A tir chuan Dinsanga chu a na khawp mai, na tak a ni! Mahse a na rei lo, a dam ta vek a, a thinlung chu Remremi chungah bawk a cheng zui leh tho; hmangaihna erawh a dawng lét lo!

Remremi kha chuan Remruata zawk kha a hmangaih a; mahse kan sawi tawh angin Remruata chu mi hrang hrang kawp kuala be kual chi a ni tlat. Remremi kha a phatsan a, ṭanpui a ngaih lai berin a kiangah a awm lo va, a tan a ding hek lo! An inkawp chhung zawng khan midang a bekual a, a bum theihte a CK pui ṭhin; chung zingah chuan Zoremi ang te, Hminghlui te, pasal pawmlai nei Sangpuii ang chi te kha an tel an ni!

Zodini nena an han inṭhen leh tâk hnu chuan Dinsanga chu a mal hle a, a thinlung na lutuk inbunruahna tur takngial pawh a nei lo, khawhar leh mal takin a awm a; harsatna a tawh changa a biak ziah ṭhin Remremi lah a be ngam der si lo, theihtawpin tawrh chhuah a tum a, mi hriatpui miah lovin a nun chu a chhungrilah a na ngawt ngawt mai a ni!

Tunah chuan he thila kan inzawm tawn dan chu ka han hrilh tawh ang che u. Dinsanga hi ka ṭhianpa a ni a, ka sawi tawh angin Remsangi(Remremi) hi a hmangaih hmasa a ni. Remremi hmangaih hmasa ve thung chu Remruata kha a ni thung a; Remremi’n harsatna a tawn lai, ṭanpui a ngaih lai takin Remruata hian a phatsan a, inṭhen a rawt zui bawk, Remremi Remruata avanga a rilru a nat lai takin ka ṭhianpa Dinsanga hian a lo bem ve leh chiah a; mahse Remremi rilru chu Dinsanga lakah a beh tak tak theih rih loh avangin an inṭhaṭhen tawp a, ka ṭhiana hian hmangaih taktèin a lo hmangaih hman tlat a!

Dinsanga hian Remremi nena an inṭhen hnu hian a rilru na a dam beiseiin leh Remremi a theihnghilh theih beiseiin midang dang a ngaihzawng kual ve ta a; mahse a rilru midang lakah a bet tak tak thei si lo, rilru bet lo taka midang han kawp chu amah a inthiam thei leh si lo va, a tawpah chhan mumal pawh awm vak lovin inṭhen a rawt leh nge nge ṭhin. A hnuah Zodini nen an han intawng leh a, a hmelṭha, midang lakah chuan a danglam ta bawk, sex pawh an hmangdun ngun malh malh khawp mai; mahse ani nen pawh inkawp lo tur chi an ni leh tho a niang, inkawp hlei thei lovin an inṭhen ve leh ta tho si a ni.

Zodini nena an inṭhen hnu féah Remremi nen chuan inngaizawng ang pawh ni tawh chuang lovin an inbe chho leh ṭan ta a, an chanchin engkim hi Dinsanga chuan min hrilh ṭhin; an inbia an inbia a, an chanchin chu hlimawm takin a kal chho a, a tawpah chuan an innei ta nghe nghe a, an inneih lawiṭhat zan chanchin chu a danglam em avangin a hmasa berah kan sawi tawh kha; ka ṭhianpa hi zahawm khawpin Remremi chungah hian a dawhthei tluan chhuak zak a ni.

Hetia Dinsanga leh Remremi an inbiak ṭhat chhoh leh, an inneih chhoh lai vel hi Dintei nena kan inṭhen chhoh tantirh lai vel a ni ve thung. An nupa chu an hlim zui hle a, fa pawh an nei vat a; mahse dawt hmangin Remruata a rawn inrawlh ve tak avangin buaina a awm leh deuh hat a. Dawt chu a lo tlo vak lo a ni ang, a reh leh thuai thung.

Kan la sawi tel miah loh chu Remremi Patea fanu te zingah hian Lalremsangi, ‘Remremi’ tia an koh ve tho, tleirawl hmel duhawm zet a awm thu hi a ni; a hnuah he tleirawl chungah hian thil ṭha lo tak a thleng zui nghe nghe a. He thil hi kan kawmthlanga thleng a ni; zanrei tawhah nausen ṭap ri ka hriat ṭhin thu ka sawi tawh kha in la hria ang a, he nausen rawn ṭap fo mai hi kan kawmthlang thingkunga rawn inawkhlum Lalremsangii fasen thlarau kha a ni ang tih hi tunhnu hian ka ngaihtuah ṭhin a ni!

Lalremsangi leh a fasen chunga thil thleng hi Remruata vang a ni ber a; Lalremsangi’n a thih zana a lo puak nausen hi Remruata fa a ni tih hi sawi ila thil awmzia chu in chhut thiam tawh maiin ka ring. A hnuah Dinsanga’n Lalrangi chu ka bialnu hlui Dintei nutei fannu a nih thu min hrilh a, sawi tawh angin Lalremsangi hi Dinsanga nupui Remsangi patea fanu a ni bawk.

Lalremsangi nu leh pa, pu Chhuanawma(Remsangi patea) leh pi Mawizuali(Dintei nutei) hi an inṭhen a, pi Mawizuali hian an fate pathum, hmeichhia hlir chu a awmpui ta zawk a, rethei bakberhin an awm a, nausen tè nena inawkhlum ta Lalremsangi hi an fanu upa ber a ni.

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x