FACEBOOK INBOX FEVER! – 1 & 2

Chapter 1

Zinga a muhil a han harh chuan tho chhuak mai lovin a inngaihtuah nawn rauh rauh a, inchung thuahna(cielling) chu a melh vang vang a…

Zoremi hi inbox lamah a bialpa ten an lo CK pui fo tawh a, nizan kha chuti ang a awm vawi tam tak zinga tel ve mai chauh a ni; mahse a danglamin mak a ti thung a!

“Mami i thiannu a rawn kal a nia…thawh a hun hi chuan tho ve vat ṭhin teh u” tiin a pindan pâwn lam atang chuan a rawn au a. Peih loh hmel zetin a tho a, Darthlalangah a han inthlek leh ngial a; a hmel hi chu a tha a ni, a pian a nalh tawk viau a, a Sam a tibuang chuan a vun rawng ngo paw vah sa chu a chawih hle a. A luck pawh a luck reng a, a la naupan ngaihtuahin bialpa pawh a ngah tawh fé mai; a taka a la hmuh loh, Social Media kaltlanga biak engemaw pawh a nei nual reng a. Hmeichhia hi an luck miau chuan invensen a har a ni ang; mahse chu chu thil tihsual chhuanlam atana tling a ni kher lo.

A thiannu chuan thutkhawmna pindanah a Smart Phone khawih neuh neuh pahin a lo nghak a; hei hi thalaite nun dan chu a ni, khawi hmunah pawh thalai Smart Phone khawih lai hi chu hmuh tur an awm. A thiannu hi a landana thawveng ve tak, vei nei lem lo, nun zalen ve tak a ni; Sex Story group lamah fake account hmanga Sex Story ziah a hrat hle a, tawnhriat pawh a nei hrep tawh ang!

Mizo thalai ten Social Media kan luhchilh hnu hian sex lamah kan thangharh lutuk tawh a, Sex Story group lah kan ngah, chung group vela an ziah duh zawng lah chu pasal pawmlai nei(mînu) mipa dang laka uire, inthiam lohna pawh nei chuang lo va sex a hmang te, nupui pawmlai nei(mîpa) in tîm miah lo va hmeichhe dang leh mi nupui sex a hmanpui te a ni nawk hlawm a; tleirawl te te nia kan ngaihte pawh sex lamah an harhvang ta khawp mai!

A pindan atanga a chhuak chu a thiannu chuan thutkhawmna pindanah a Smart Phone khawih neuh neuh pahin a lo nghak a, “I va tho har…” tih pahin a lo melh zauh a, a Phone chu a khawih zui leh mai a. Hei hi tunlai thalai nun chu a ni; khawi hmunah pawh, eng hunah pawh thalai Smart Phone khal neuh neuh hmuh tur hi an awm reng a, titi paha khawih, TV en paha khawih, chawei paha khawih…engpawh ti se thiltih paha khawih hi an hnehsawh tlat!

Zoremi chu muangchanga a thiannu bula thut pahin a thaw deuh ham ham a…

“Sang…nizan ka mengrei lutuk…ka muhil mang lo…”

“In ti leh a mi…?” amah pawh en chuang lo leh Phone khawih pah chuan Biaksangi chuan a chhang a. Zoremi chu a nui hak a, tawngkam erawh chuan a chhang lo. A han ngawi vang vang a, a thiannu Phone khawih tui em em mai chu a han en a, a tawpah chuan, “Lalbiaksang, i Phone kha dah ve teh…ka rilru a nuam lo a nia…” a han ti ta a.

“Ngeee…zan dangah pawh in ti fo tho a lawm…tukin atak a….?”

“Nia…mahse, nizan chu a danglam a lawm…rilru a nuam lo eee…”

“Engvang…?”

Zoremi chu a han nui seih phawt a, a ngawih deuh hnuah, “Ihh…englo…nizan chu pic kan inthawn tel vak a…”

“A ni maw!? Chuan…a englo pic a rawn thawn che mi?” nui ar ar pahin Biaksangi chuan a lo ti a.

Zoremi chu a nuih leh seih a; a hmel hi chu a tha a ni. “Mmm…” tih ngawtin a thiannu chu a chhang a, a ngawi leh vang vang a

“I englo pic i thawn ve mi?” zawi sapin a thiannu chuan a han zawt a.

“Mmm…ihh…enteh Sang, a zei lutuk ringawt…”

“A nuam em?”

Zoremi chuan a thiannu chu a han en a, a nui ringawt a…

“Hmannia i sawi kha mi?” Biaksangi chuan a han zawt leh a.

“Aw…ni e…”

“A zei ngawt ang…a hmeltha si…chuan…a englo chu ka lo en ve chhin!?”

“Sang…i mawl thei lutuk…” tiin a thiannu chu a han melh vak a. “Ka pic kha ka thawn ve tho sia, min tihmualpho ka hlau a nia!” a ti zawi leh sap a.

“Ka en ve châk a lawm…ho lutuk…i hmel i tilang tel a mi?”

“Tilang tel chuang lo ve…”

“Hlauthawng duh suh…a tih vaih chuan a englo pic i nei ve tho a lawm” Biaksangi chuan a ti liam puat a.

Zoremi hian a tirin ‘naked pic’ em inthawn kha a tum pawh a ni bik lo; mahse a mipa khan a phut tlat a, a ti ve ta mai a ni. A hma chuan tawngkamin vawi tam mipa a lo CK pui tawh; pic nen meuha a tihpui chu nizan kha a vawikhatna a ni. Mihring hian feeling atang chauh pawha phurna leh nawmna kan neih theih avangin Zoremi paw’n nuam a ti lutuk; mahse a awm chu a nuam zui vak lo hle a, a hlauthawng a ni. He feeling, mihring chhunga awm hi nupa ni tawhte chauhin nuam leh hlawhtling taka sex an hman theihna tura bultanna tur dik a ni bawk.

Mahse, hei hi Zoremsangi tleirawl nun bultan dan chu a ni tlat!

Chapter 2

Zoremsangi awmdan ka sawi hi nakina mipakhat chungchanga thil awmdan kan hriatfiah nan a ni.

In hriat angin mi chanchinin bul ka tan a; keimah ka insawi tel leh thin a ngaih dawn avangin inhriatthiam ka ngai hle mai. Hei erawh ka sawi duh; englaimah hi lo ngaihthahin lo hmaih suh ang che! Ruahmanna felfai tak pawh nei chuang lova kal bo ka tum a, ka kal bo hmain thil mak leh ngaihnawm tak in hnena sawi tur ka nei; ka sawi tan mék tawh a!

Ka nun hi belthleng, a thal zawnga awm tha hle hle lai, vawilehkhata khaikhup thawk ang mai niin ka hria! Hmangaihna avangin ka zawltling-vawn-nat a, vawnchhan dapin ka phar ruai a, ka tlu lek lek thin! Thathona reng reng ka nei lo va, hmangaihna hian thinlung a tihnat awlsam ang aiin a lo dam har si; ka mang zo va, thian kawm ka châk lo va, ka mamawh hle thung! Mahniin ka awm cheuh cheuh a; hei, tlaivar ka hnaih chu a ni leh ta reng mai!

Ka hmangaihin mipa dang, Social Media vela pawh tak leh nel taka a kâwm vel hmuh chu ka tân tawrh hrehawm a ni a; Rose pâr kuangah hian mi chhun na thei hling zum tak a awm a ni tih ka hrethiam ve tan ta a nih hi! Ka awmdan hi ka duh dan a ni bîk lo a; mahse, hmalama ke pen chu ka tân a harsa hle si! Thathona tel miah lo va nun hman chu khuang lova chai ang chauh a ni; nun a ngui a, ka tan natna dang a tul lo, hmangaihna avanga ka thinlung hliam hi natna a tling tawk hle a ni! Ka hetih avang hian ramhnuai pilril taka rawlbo ka tum ta a, eng chen nge ka va thang ang a, eng thil nge ka chungah thleng dawn tih chu ka hre lâwk bik lo; a chang chuan tlachawp taka nun hman a, thil tawn apîang pal hmiah hmiah chunga chhawr tangkai tum hi thinlung nâ hian a mamawh ve fo niin ka hria!

Ka sawi tawh angin he ka thinlung natna ka kal bopui hma hian he chanchin hi ka han hrilh hmasa ang che u; chumi zawhah ka kal bo tawh ang!

Chu thil ka hrîat leh zân chu Thla bial zan a ni a, tukverh inhawng lam chu ka pan a, ka thawm hriat chu ngun takin ka han ngaithla a. Kan kawmthlang, Sunhlu kung awmna vela nausen tap, lungrun leh lung la tak maia ring vak si lova tap leh ngâk ngâk thin thawm chu ka han hre leh ta a, chu nausen tap thawm chuan ka tirilah a thâm a, tukverha dâka chu lam hawi reng chung chuan ka tim er er a, ka za chem chem a; a tap ri chuan khawngaih thlâ a la takzet a ni! A khat tâwkin a rawn tap leh thin a.

Kum 2015 Khuangchawi Thla a nih kha; zankhat chu kan thenawmpa chuan a in piah maiah nausen tap thawm hi zinglam khawvar hma hret hian a hria a, tap thawm chu pâwn lam niin lang mah se; chuti ang huna pâwna nausen tah thu awma a hriat si loh avangin thenawmte nau tap ri ni turah a ngai lui a, tap ri erawh ring vak si lo hi a hre leh thin! Mu chungin a ngaithla reng a, naute tap thawm chu a chuai raih raih a, a tâwpah a reh hlen ta niin a sawi. Chu thil chu ka ngaihtuahnaah a lo thar nawn leh a, kan thenawmpain naute tap thawm a hriat tûk zîngah chuan kan kawmthlang thingkungah hmeichhia, la naupang tak, hmeltha tak pakhat chu a naupûak lâi nen thîa hmuh a ni a; an lo inkhai a, inawkhlum ni ngeia rin a ni…!

He nausen tap ka hriat thin hi ka la sawichhuak ngai lo, kan kawmthlang thingkunga lo inkhai hmeichhia, la naupang tak leh hmeltha takte nufa lo inkhai ngawt maite nen ka nun a inkungkaih chhoh tâk dân phei chu ka la sawichhuak chhin lo hrim hrim; he hmeichhia hi kan khaw mi leh sa a ni lo lehnghal a!

A khat tawkin nausen tap thawm chu ka hre ta fo a, zan reh lam, khawvar lam hnaihah a ni tlangpui bawk! He nausen tap thawm ka lo hriat mai theih nachhan pawh hi ka hmangaih châna ka zawltling-vawn-nat avanga ka zan muhil thei lo intan atang khan a ni, ka tlaivar fo si a! A tap lungrun thei hle a, lairil fan ngâih hian a tap ni berin ka hria; midang, hre ve thina insawi hi ka hre ngai miah lo va, an hria a, an sawi duh lo nge, kei chauhin ka hria tih lah ka hre bîk lo!

Ka hmangaih nena kan inthenna pawh thla tam a liam ta; mahse tun thlengin mi hlim thei ka nihnate, thatho thei tak ka nihnate kha ka la nei kir thei lo va, ka thinlung hi a saltâng reng mai a ni. Chuta karah, thla hmasa mai khan kum 2015 khuangchawi thlaa kan kawmthlanga lo inkhai hmeichhia kha, ka hmangaih em em Dintei nutei fanu a ni tih ka hria a; kha thil a thlen lai khan kan khuaah ka awm lo va, engmah kha a kîlkèlhin ka hre ve tak tak lo! A hnua ka thil hriat zui leh tâk erawh, mi tute emaw chhungkaw nun buarchuar tak a nih avangin sawi zui pawh châkawm loh tak a ni; mahse, kei hian sawi tul riaua hriatna ka nei a, kan tihsual avanga kan chunga ânchhe lothleng thei laka kan fimkhur phahna tur a nih ngei pawh ka duhin ka beisei takzet!

He thil chungchanga keimah ka tel vena bîka in lo chhinchhiah tura ka duh chu- I hmangaih tak tak chu i hmangaih tak tak a nih ngat chuan, eng anga tling lo leh bawlhhlawh pawh ni se, i thinlungah mipawimawh ber angin a châm reng tawh a, a tlin lohna i hriat tam poh leh amah i hmangaihna thinlung avangin i natna a thûk telh telh ang tih leh, i hmangaih chuan nangmah a hmangaih ve vang che ni hauh lova, a rilru thatna vang ngawta i chunga a that nasat apîangin amah i hmangaih avanga i thinlung natna a pung zel ang tih hi a ni!

Tichuan, zan dang ang bawkin nausen tap thawm a han reh a, nuam ti lo zetin tukverh chu ka khar a, ka khumah chuan ka mu meng leh ta kar a…ka rilruah naute leh a nu kha an riak reng mai!

Share this post:

You May Also Like