Ziaktu : Irene Chhangte
Ani chu mi zawng zawng chunga leng ni lo mah se, a van tlang tal a ni tur a ni. Ngo lampang tawi chhe lutuk lo ni ngei bawk sela. Mipa zahthiam leh zaidam nunnem, tuman an la khawih chhiat loh a ni ngei bawk tur a ni. Chutiang mi chu kum tam tak a lo melh ru ve ngar ngar tawh a, hmu ve nual tho mah se a ta tur chu a la hmu fuh hlei thei bik lo a ni chek ang chu.
Chutianga duhthusam nei ran chunga hun a hman mek lai chuan, a tum loh lutuk leh mumangah pawh a la hmuh ngai reng reng loh mi chuan, a ngaihtuahna zawng zawng chu a luah ta tlat si. A’n thlir thin a, amahah chuan a lo suangtuah thin leh duhthusam reng reng chu hmuh tur a awm hauh si lo. Nikhata vawikhat tal hmu lo chuan awm harsa a ti tan ta der mai.
Nuthlawi tia mite hmuh hniam ni mahsela, a nun zia reng reng leh a intihzahawm thiamna te chuan a thinlung chu an hneh takzet a ni. Amah ngei pawhin a lo hmuh hniam thin chu a duh ta em em chu a ni a. A chang chuan a zahpui ve deuh hial thin a, mahse a tel lovin a awm thei tawh der si lo.
A ruk tak chuan a buai ve em em a, then tuma rilru a siam chang pawhin, chu nuthlawi khawngaihthlak tak chu tuin nge hmangaih ta ang a, a nunhlui avanga rum mek chu tuin nge hnem ta ang? tih chuan a thluak a tibuai takzet thin. Mi tu emaw bum tur zawng reng reng ang chi te kha a tawng palh ang a, a nun chu hreawm reng rengin a hmang ang tih chu a hlau zek zek tawh mai a ni.
Dik tak chuan a lo duhthusam thin ang mi chu a ni mawlh lo. Mahse, a thinlung luah nghet tlattu a ni lawi si.
Awle hringnunah hian tupawh mai hian duhthusam kan nei vek a, mahse kan duhthusam te hi kan nunah hian a thleng vek kher lova. Chuvangin kan nuna thil thleng engpawh hi remruattu remruat ang a nih miau avangin, keini tihdanglam theih a ni miau si lova. Duh lo thin teh mah ila eng pawh hmachhawn a, lawm thiamte nun hi a lo hlim ber thin a ni.
Awle, hringnun tinuamtu pakhat chu, mi pahnih inkara hmangaihna lo piang chhuak hi a ni awm e. Hmangaihna tel lo chuan hringnun hi a Kim tlat lo. Chuvangin i duhthusam nupui / pasal nei lo mah la, khawvel kan duhdan ang taka thil engkim thlen lohna hmunah hian, chan tawka lungawi thiam apiang hi mi vannei ber an lo ni.
