CHU ZAN THIM TAK HNUAIAH CHUAN

Chu zan thim tak hnuaiah chuan, kalna tur bik pawh hre lovin a hmalama kawng thim ruih maiah chuan, muang changin a kal chhat chat a, a mittui chu a tlak nasat em avangin kawng pawh chu a hmu hleithei lo hial a, khawilam nge a pan anga, tunge a belh tak ang? A ngaihtuahna chu a buai takzet a ni.

Kum kalta maiah a nu chuan a lo thihsan tawh a, a pa phei chu eng ang hmelpu nge anih pawh a hre hman lo. Anu chuan pasal dang ngaihsak tawh lem lovin a tulpui kha a ni a, unau pianpui pakhat te mah nei lovin mal takin he khawvelah hian a lo piang ve a, a nu chuan tha taka enkawl seilianin, pasal nei rual anih chuan mipa fel tak nen chuan inneihin, hlim takin a hun chu a hmang ve thin.

Fanau malsawmna dawngin fa duhawm tak tak neiin a nun chu a hlim ve em em thin. Mahse hun a lo kal zel a dinhmun in anglo lutuk innei an nih vang nge, hmuhsitna tinreng dawngin, a pasal chuan ngaihzawng neihsanin, a hnawtchhuak deuh reng thin a, han chhuahsan ve mai te pawh a chak rum rum thin. Mahse a fate chu amah anga fahrah ni tur chuan a phal thei silo….

Chutiang reng reng chuan a nun chu a hmang chho ve zel a, a in nghahna neihchhun a nuin a boralsan lehzel phei chu, tawrh thiam har a ti takzet a ni. Mahse engmah tih theih reng a nei silo…. A mala a baihvaih tawh tehlul nen a pasal duhtak chuan, hreawm tinreng tuara mal taka awm turin a hnawtchhuak chu a ni si a…. A nun chu a beidawng takzet a, tih ngaihna a hre chuang der bawk silo….

Dam chakna reng reng a nei tawh lova, a fate a ngaihtuah erawh chuan a chak vang reng nilovin, nu hmangaihna chuan hreawm tuar turin chakna leh chhelna a siamsak hram hram zawk thin. Engtik ni ah emaw chuan a fate nen chuan an la awmho leh anga, hlim takin a nun chu a la hmang leh mahna…… Hringnun hi chu a hahthlak thin teh e, thenkhat ten nun tluang leh hlim taka hun an hman mek laiin, thenkhat tan lah tah na hlir a ni si a…..

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x