CHHÛNGKAW HLAWHTLING

Chhûngkaw Nun Serh Thianghlimna

                 Chhûngkaw tin hian nunna thurûk vawn up tlat tur kan nei theuh a. Chutah chuan tumah an tel ve a thiang lo. Nupa chu engkimah an inta neih fai vek tur a ni. Nupui chuan a pasal a hrilh ngam lo thurûk, midang a hrilh ngam tho si engmah a nei tur a ni lo va.  Pasal pawhin a nupui hriat thiam loh midang hriat thiam thil a nei tur a ni bawk lo. Nupuite thinlung chu pasalte thil tihsual palh leh rilru hah phûm bona thlan ni sela. Chutiang bawkin pasalte thinlung pawh nupuite rilru hah leh tihsual palh te phum bona thlan ni bawk rawh se. Rilru na khawp khawpa infiamte hi chin loh tur a ni. Pasal te chunga  nu rilru nawm lohna te, hrehawmna leh lungnih lohnate chu midang hnêna thlenin a tu ve ve mah inrel tur a ni lo. Hetiang thil âtthlâk tak leh ho tê tê leh pawi lova langah hian a tawpah inngaihsak lohna leh inensanna a siam thei a ni. Chutiang awm lo turin chhûngkaw tinten kan veng him tur a ni.

Chhûngkaw inpawl hona hi ‘hmun serh’ vanram entîrtu, mahni theuh inenfiahna dârthlalang angah ngaih tur a ni. Thenrual tha leh lainâte chu nei theuh mah ila chhûngkaw nun chhûngrilah tak tak chuan an inrawlh tur a ni lo. Mahni chhûngkua theuhah thu neihna leh neitu nihna kan nei theuh va, chu chu hahdam tak leh zalen takin kan hmang tur a ni.

Kan Lei, Mit leh Bengte Hi Vên That Tur

             Chhûngkaw dintute reng reng chuan Pathian chu an lêi te, an mit leh an bengte bâkah an taksa pêng tin chu ven thatsak turin dil rawh se. Sualna nena kan intawh hian inhnehtir kher tur a ni lo. Krista chuan nungchang hi thil tha nen rimtuiah A siam thei si a. Chhûngkaw awm honaa Krista timualphotu leh dik lo taka Krista nihna lantîrtu an va tam êm! Hmangaihna dik, dawhtheihna, ngaihdamna leh ngilneihna lantîr ngai reng reng lo pawh tam tak an ni! Mi tam tak chuan duhzawng leh duhloh zawng an nei a, an awmdân herh tak mai chu duh tâwka talpui theiah an inngâi bawk. Heng mite hian Krista nungchang leh a duhzawngte chu puan chhuah an tum lo. Krista nun chu ngilneihna leh hmangaihnain a khat a. Keini hi A nungchang thianghlimnaah chuan kan \hang lian ve dawn em?

Tanrualna, Hmangaihna leh Remna

Chhûngkaw nu leh pa tawh phawt chuan hmangaiha a thu awih an lo tiam tawh Pathian hnênah A khawngaiha zâra’n an nupa chuan intih thiam lohna nei lovin an fate awmdân tur anga an duhthusam ang chiaha tawngkam leh an cheziaa awm an tum ang tih tiam rawh se.    Chhûngkuaa lungrual lohna leh thu hran neihna a awm lohna turin nu leh pate chuan an vêng tlat tur a ni. He thil hi Setana aiawh, Setana nungchang hlauhawm nemkaina chu a ni. Nu leh paten inpumkhatna chhûngkuaah an vawn tlat a, Krista nun chu chhûngkaw awptu leh kaihruaitua hmanga, intihrannate an dan beh tlat chuan, chhûngkuaah inhmangaihna leh inpumkhatna an vawn tlat a, chhûngkuaah inhmangaihna leh inpumkhatnain ro a rel ang a. Tin, nu leh pa leh naupangte chuan Thlarau Thianghlim thilthlawnpek chu an dawng bawk ang.

Nupa chuan an inkârah intihthiam lohna awm miah lo pawh nise an phurrit phurh chu a tâwk tawh viau tho tih hre reng rawh se. Intihhranna chhe tê pawh chhûngkuaa awmtir phaltu chuan an chhûngkua cheng ve turin Setana a ko lût tihna a ni. An fate pawhin thu ho tê têa inhnial duhna rilru an lo nei mai thîn. Setana leh a pawlte lah chuan nu leh pate leh naupangte chu Pathian laka rinawm lo turin an lo bei ve reng thin si a.  Nupa nunah chuan harsatnate pawh lo thleng thei a ni naa nupa chuan Pathian hmangaihna thlarau chu vawng nung tlat rawh se. Pa ber chuan a fate nu chu khawngaihna te, ngaihdamna te leh lainatna te chang tlâkah ruat rawh se.

Chhûngkaw Inpumkhatna Thuruk

              Chhûngkua leh kohhrana buaina leh inthenna lo awm chhan ber chu Krista atanga an kal pen thin vang a ni. Krista hnaihna hian mimala inhnaihna a hring a. Chhûngkaw inpumkhatna thuruk chu tawngkam thiamna te, mi kilkawi thiamna te leh harsatna hneh tura nasa taka beih vanga neih ngawt theih a ni lo va; Krista nena lên dunna leh inpumkhatna atang chauha neih theih a ni.  I rilruin rin bial lian pui ziak la . Rin bial tlâng atang chuan a lai tak pan zawngin rin ngîl tam tak rin lût la, rin ngil chuan rin bial lai chu an hnaih poh leh rinngilte chu a inhnaih ve tawlh tawlh tih i hmu ang. Chutiang chu Kristian nun pawh hi a ni. Krista kan hnaih poh leh chhûngkua chu kan inhnaihin kan inpumkhat deuh deuh thîn.

Inpuih Tawn Theuh Tur A Ni

Chhûngkaw huang chhung hi inpawl hona thianghlim niin chu pâwl memberte chuan an member-puite tanpui turin tihtur an nei theuh bawk. Chhûngkaw hnathawh pawh hi uluk taka enkawl khâwl bung hrang hrangte fel taka an che ang hian fel takin a che tur a ni.  Chhûngkaw member tinte chuan an  chhûngkaw remna te, khawsak felna te leh hunbi bik an hman theihna te chu an koah a innghat theuh tih hre thiam rawh se. Midang kalhin engmah an ti tur a ni lo. Lungrual tak leh thukhat vuain infuih tawn zawk rawh se. Nunnemna te, zawldawhna te, dawhtheihna te nen, tawngkam thlum leh zaidam taka chhûngkaw buainate hnu chhawn chungin  nu ber phurrit leh hna chu theihtawp chhuahin i chhâwk zang ang u.  Chhûngkuaa tel zawng zawngte chuan midangte nena inpumkhatna tura a tih tur hna chu hrethiamin thawk sela, kum ruk chin chunglam zawng chuan mahni hna leh mawhphurhna chu hlen theuh rawh se.

Intiamna Thutling

Kan in chhûngah leh khawi hmunah pawh khawngaihna-ah hian ka thiltih zawng zawngah rilru lama thiltihtheihna ka neih theih nan than len zel ka tum a ni. Kan in chhûngah hian ka rilru, ka tawngkam leh khawsak dan ka vêng tha tur a ni a. A tha lam zawnga nungchang tha leh nghet tak mai ka neih theih nân mahni inzirna hun tha ka inpe bawk ang. Nîtin zing leh tlâiah Pathian thu ka chhiar ziah ang a, chu chu a takin ka nunpui tur a ni. Thlarau ngûnhnâm, Pathian thu chauh hi him taka ka hman theih ngûnhnâm awm chhun chu a ni bawk.

 

By – Danmawia Tochhawng

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x