BAWIHA, KAN LO TAR HUN CHUAN

Ziaktu : Pastor PL Thlenga Chhakchhuak

Bawiha, i nu leh pa te hi kan lo tar hun chuan kan vanglai ang kha kan nih dawn tawh loh avangin hriatthiamna thuk tak leh dawhtheihna nen min enkawl thin ang che.

1. Berhchep leh sawngnawi taka kan ei kan in hunin chawbarh hial kan lo ngaih hunah pawh min ten mai lo la. I naupan laia chaw kan barh thin che leh berhchep taka i chaw eitur kan sawngbawl sak thin che kha khawngaihin han hre reng thin ang che aw, Bawihte.

2. Thu pangngai leh sawi hnu kan sawi nawn chhen hun a lo thlenin dilchhut em mai tiin min hau mai suh aw. I naupan laia zan mut dawna thawnthu hrilh hnu ning mai lova kan hrilh nawn fo thin che kha han hre reng ang che.

3. Mahnia kan inbual theih loh hun, puitu kan mamawh hunin mawngzang takin min pui thin ang che. I naupan laia tual balah duh tawka i tal hnua duat taka tuilum nen kan bual thin che kha hre reng ang che.

4. Tunlai khawvel thara bungraw thar (thil thar) tam tak ka hriatthiam ve loh pawhin min nuihsanin min vin mai lo la, i naupan lai a “Engvang nge, hei hi nge?” engatinge tia i zawhnate zawng zawng ning lova, dawhthei taka kan chhan thin che kha hre reng ang che.

5. Rilru duh ang taksain a zawm theih loh hun, tha chak lo tak chunga khawlai kan leng vel min hmuh hunah leh kaih ngaia kan awm hunah i ban thahrui chak tak mai khan min kai thin ang che. Kal chhet chhet i zir laia kal dan kan zirtir thin che kha han hre reng ang che.

6. A ni tela ka lo tar hunin min lungngaihpui mai lovin, min hrethiamin min hnem fo zawk ang che. Hringnun kawng fel tak i zawh theih nan kawng dik ka kawhhmuh thin che ang bawk khan, kan hun hnuhnung kan zawh mek lai hian kan bulah min tanpuitu ni ang che.

7. Mahnia zunram leh ek pawh thiar thei lova buaipui ka ngaih hunah hnawksak min ti mai lola, min ten mai suh ang che aw. I nuapan laia i zun leh ek kan thiarsak thin che kha hre reng ang che.

8. Ka zun leh ek avanga kan mutbu leh awngphahte a lo rimchhiata suk a ngaih hunah min ten mai lo la, i naupan laia i zun leh ek thiarna puan leh awngphah ning miah lova kan suksak thin che kha hre reng ang che.

9. Lehkhate i lo zirsang a, saptawngte i lo thiam hunah sap tawng mal hnihkhat kan tihrik ve chhun te a lo diklo a nih pawhn min hmusitin min zahpui mai suh ang che. I naupan laia A Aw B leh ABC kan zitir nasat thinzia che kha theihnghilh suh ang che .

10. I nu emaw i pa zawk emaw boral hmasa zawk kan awm ngei ang a, lungleng khawhar taka kan awm hun a lo thlenin mi lenbosan reng lo la, kan phaktawk lekin min kawm hlim tum hram ang che. I naupanlaia i nu feh hlan leh i pa zin hlana i lunglen em em laia tihtlei tuma kan awm nasat thinzia che kha han hre reng ang che.

11. Thil awm leh awm lo pawh hre lova naupang ang maia thil kan ngen kan ngen hunte a lo thlen hunah min hau mai lo la, min hmusit mai lo la, nang pawh i naupan laia thil i ngen nasatzia kha hre reng la, i ngen apiang tihsak che tuma kan beih nasatzia kha han hre reng ang che aw, Bawiha.

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x