A LA TLAI LO (True Story)

Ziaktu – Toni Da Râlte

(1st person angin ziak mai ang aw..)

Ruahsur chuan ka bianga mittui luang chu a rawn fin a. Ka hmai chu mittui leh ruahtui nen a inchiahpiah nuaih a. Khaw nge ka kal dawn tih pawh hre loin ka hmalam pan chuan ka tlan hlawk hlawk a. Min zuitu awm lo mah se, ka hmanhmawh em em ringawt mai a ni. Ni e, ka taksa lang thei chin te chu a him a, hliam a awm lo. Ka chhungril so bulh bulh erawh chung ruahsur leh thli thaw te chuan an tidai thei teuh lo. Puahdarh vek chak khawpa min siam thei thil chu nichin lawk khan ka tawng tlat a lawm.

“Thiannu, nula pangngai tak i niin ka hria a. Chuvang chuan nang ang nula zahawm chuan ka pasal chu min ţawmpui lo la ka va duh ve maw le” elsen rawng kai lek lek anga ngaih theih ni si, hmeichhe pakhatin min ţawngkhumna darkar pawh a la liam tam lo. Kha ka thu hriat khan min ţhâwng takzet! A hriatsual palh a nih ringin ka bialpa, ka hmangaih em em hming chu ka han sawi a. A chiang telh telh thung si! Ka va han zak ngawih ngawih tak em! Ka zahna leh thinrimna aia nasaa ka chhungril kher nget ngettu erawh ka hmangaih chu phatsantu leh bumhmang a lo ni chu a ni.
.

Thla 8 chhung khan engtin nge ka hriat chhuah loh theih zawk? Rinhlelhawmin a awm ngai tlat lo a tin ni. A phone pawh zan hnih lai ka kawlsak tawh asin. Tumah a be ngai lo va, ka tan a inhlan pumhlum thak niin ka hre thin. A phone a naupang thlalak te chu ka û fate a ti a nih kha. E taka, tuna a nupui anga inchhal pawh kha kan mô a ti asin. A û nupui kha engtin nge a nupui a lo nih theih tak tih lam ka ngaihtuah lo. Ka hmeichhiatpui tam tak te tawn ang thil rapthlak chu ka tawng ve tih ka chiang em em ringawt a ni. Chu chuan nasa theihtawpin zahna min thlen a. Tumah ka hmachhawn ngam tawh dawn em ni?

Nula pangngai ve tak, a hminga sorkara hna nei ve ka ni a. Kohhran leh khawtlangah pawh ka phak ang tawkin ka inhmang ve thin. Naupang chhia kan ni tawh lo bawk a, rilru pawh a puitling ve thawkhat. Ka bialpa hi ka thawhpui a ni. Kan thawhpuite pawhin an hre vek. Mi pasal a ni ang tih tumah hian an ring bik lo a nih hmel. Mi hlim thei leh mi ţanpui peih em em, kawm nuam tak a ni a. Ka ngaina a, ka ngaina ta mah mah a. Ani lahin min ngainatna chu thup a tum bik der lo! Tichuan bul kan ţan a nih kha.

Vawiinah erawh tu emaw pasal ka lo ţawmpui ve reng tih ka hrechhuak a. A nupui kha ka haw hauh lo. A dinhmunah ding ve ta i la, amah ai mah khan ka rapthlak zawk awm asin. Mahse, kha hmeichhia pawh kha kei ang thoa vanduai a ni. Pasal lerh leh bum hmang a nei miau a! A fate avangin a tlanbosan thei bik dawn si lo a, kei ai mahin a rilru a hahin a rum vawng vawng thin ngei ang le. A fate hmuh hlau takin a mittui a hru hul ang a, a pasal, a innghahna ber chuan tu nge a kawp leh ang tih ngaihtuah reng rengin hun a hmang thin awm si a! Thlamuang miah lo chunga a fate pa nena khum khata an han mudun thin tur ka ngaihtuah chuan ka khawngaih ta hial a!

Kei chuan ka hmangaih ka chân a ni mai a. Min hmangaih duhtu ka la tawng ve leh mai ang. Ani erawh hmangaihtu tawng mah se, karah fa an nei tawh a. Uire lah a duh awm si lo. Nun laklawh takah a ding a ni. Kei hian ka puih a ngai a ni. Mahse, ka na ve em em bawk si.

Leave ka la a. A hmel hmuh ka duh lo. A nupuiin min hmuh tak avang chu nge a reh hmak a! Min lo hmangaih lohzia ka chiang telh telh. Zankhat erawh a rui a! Min rawn bia a. Ngaihdam min dilin a nupui thena inneih puiah min sawm a. Ka nui chhuak lek lek.

NUPUI PAWMLAI NEI CHUNGA NGAIHZAWNG NEI, A FATE NU HNAWTCHHUAKA A BIALNU NEITU PASAL CHU A RINAWM KUMHLUN DAWN LO TIH HI KA HRECHIANG ÊM ASIN.

“Khawngaih takin i nupui tan khan rinawm tawh rawh” tih chu ka thuchah hnuhnung a ni.

Ka na lo a ni bik lo. Zantin ka la ţap a, ka ngai em em bawk. A chang chuan a nupui lak atanga rukbo daih chu ka chak thin ve tho. Mahse, a nupui ang thoa nupui vanduai ni tura rukru nih ai chuan, tumah an nat ve a ngaih lohna tur mipa dang hmangaihna ka nghak a ni zawk e. Pasal lerh chuan Pathian atang lo chuan lerh a sim thei ngai lo. Sual ve hle mah i la, a nupui tan chhelna ka dilsak ve thin.

Ka hmeichhiatpui, mi pawmlai lo ngaizawnga lo hmangaih ve hial te in lo awm a nih chuan, kir leh nan a la tlai lo a nia. Kei pawh ka thih bik loh hi. Khawngaih takin kan hmeichhiatpui te tina zawng chuan hmangaih nei lo ang u. An fate pawh ngaihtuah telin, kan hmangaihna kha nasa hle mah se, kha pawmlai nei chunga min hmangaih thiamtu khan hmangaih a ngah asin. I tan a rinawm bik ring reng reng suh.

(He hmeichhia ang hi ni vek thei ila, nupui biangah hian mittui a luang fô lovang maw le.)

Share this post:

You May Also Like

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x